1. Korinta 6
6
Christ sennen un nom Jerecht gonen
1Wan von junt wäa met sienem Metchristen en Striet es, woo woacht hee sikj daut, dän ver eenen ojjerajchten Rechta to brinjen, enne Städ de heilje daut schlichten to loten? 2Ooda weet jie nich, daut de heilje de Welt rechten woaren? Un wan de Welt von junt saul jerecht woaren, sent jie dan nich fäich, soone Kjlienichkjeiten to rechten? #Mat 19,28 3Weet jie nich, daut wie Enjel rechten woaren? Wooväl mea dan de Sachen vom däachlichen Läwen? 4Wan jie junt äwa auldäachliche Sachen strieden, dan go jie no Rechta, dee enne Jemeent nuscht to sajen haben. 5Ekj saj dit, daut jie junt schämen sellen. Es daut soo, daut mank junt kjeena weis jenuach es, tweschen Brooda un Brooda to unjascheeden un to rechten? 6Oba een Brooda vekloacht dän aundren Brooda ver Jerecht, un daut ver onjleewende! 7Daut jie junt äwahaupt unjarenaunda strieden un ver Jerecht gonen, es aul schlemm jenuach. Wuarom lot jie junt nich leewa orrajcht doonen? Wuarom lot jie junt nich leewa utnutzen? #Mat 5,38-41; 1Tess 5,15; 1Pet 3,9 8Oba jie moaken daut jrod aundasch. Jie doonen orrajcht un schmäaren june ieejne Breeda aun!
9Ooda weet jie nich, daut de ojjerajchte daut Gottesrikj nich oawen woaren? Lot junt nuscht enbillen! Menschen, dee Onzucht driewen, dee Jetta aunbäden, dee de Ehe bräakjen, Mana dee met Junges ooda met aundre Mana jeschlajchtlich toopkomen, #(9-11) 1Tim 1,9-11; Gal 5,19-21 10un stälen, jiezich sent, drinkjen, spotten un Menschen äwafaulen woaren daut Gottesrikj nich oawen. 11Un soone sent eenje von junt jewast. Oba nu sent jie rein jewoschen, jie sent jeheilicht, jie sent jerajcht jeworden derch dän Nomen von onsem Harn Jesus Christus un derch dän Jeist von onsem Gott. #Reema 3,26; 1Kor 1,2; Tit 3,3-7
De Kjarpa een Tempel fa dän Heiljen Jeist
12Eenje sajen: Ekj hab to aules Frieheit! Jo, oba daut deent nich aula toom gooden. Ekj hab to aules Frieheit, oba nuscht saul mie binjen un beharschen. #1Kor 10,23 13Daut äten fa de Moag un de Moag fa daut äten, oba Gott woat daut beides to nuscht moaken. Ons Kjarpa es ons nich jejäft, om Huararie to driewen, oba om däm Harn to deenen, un de Har sorcht fa dän Kjarpa. #1Tess 4,3-5 14Gott haft onsen Harn Jesus Christus vom Doot oppjewakjt, un hee woat ons derch siene Krauft uk oppwakjen. #1Kor 15,20; 2Kor 4,14 15Weet jie nich, daut june Kjarpa Jläda aun Christus sent? Sull ekj dan Christus siene Jläda nämen un Huarenjläda doarut moaken? Oba niemols! 16Ooda weet jie nich, daut wäa sikj met eene Hua aufjeft, een Kjarpa met ar es? De Schreft sajcht, “Dee twee woaren een Fleesch sennen”. #1Mo 2,24 17Wäa sikj oba met däm Harn vebinjt, es een Jeist met am. #Joh 17,21-22 18Rant wajch von aule Huararie! Aule Sinden, dee een Mensch deit, sent buta sienen Kjarpa; wäa oba Huararie drift, sindicht aun sienen ieejnen Kjarpa. 19Ooda weet jie nich, daut jun Kjarpa een Tempel fa dän Heiljen Jeist es, dee en junt wont un dän jie von Gott haben? Jie ieejnen junt nich selfst. #1Kor 3,16 20Jie sent fa eenen dieren Pries jekoft. Doawäajen veharlicht Gott met junem Kjarpa.
હાલમાં પસંદ કરેલ:
1. Korinta 6: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.