1. Korinta 7
7
Ehe, Eheloosichkjeit un Ehescheidunk
1Miene Auntwuat doaropp, waut jie mie schreewen, es dit: fa een Maun es daut goot, wan hee sikj met kjeene Fru aufjeft. 2Oba wäajen de Jefoa von Huararie, sull jieda Maun siene ieejne Fru, un jieda Fru äaren ieejnen Maun haben. 3De Maun saul de Fru daut jäwen, waut see een rajcht haft to kjrieen, un jrod soo goot uk de Fru däm Maun. 4De Fru äa Kjarpa jehieet nich bloos ar, oba uk äa Maun. Un jrod soo goot jehieet däm Maun sien Kjarpa nich bloos am, oba uk siene Fru. 5Trakjt junt nich eena vom aundren trigj, buta jie woaren junt beid doarenn eenich, opp eene bestemde Tiet, daut jie junt Tiet nämen toom bäden. Dan komt oba wada toop, daut Soton junt nich vesieekjen kaun, wiels jie junt nich beharschen kjennen. 6Oba dit saj ekj mau om junt entjäajen to komen, daut es nich een Jeboot. 7Leewa wudd mie sennen, daut aulemaun soo wia aus ekj sie. Oba een jiedra haft siene Gow von Gott, eena soo un de aundra aundasch. #Mat 19,12 8To dee, dee nich befriet sent, un to de Wätfrues saj ekj, daut daut fa an goot es, sikj nich to befrieen, soo aus ekj mie nich befriet hab. 9Oba wan see sikj nich beharschen kjennen, dan lot see sikj befrieen; wäajen befrieen es bäta, aus sikj met äare Lost nich Rot to weeten. #1Tim 5,14
10Fa de befriede oba es daut een Jeboot vom Harn, nich von mie, daut de Fru sikj nich von äa Maun scheeden loten saul. #Mat 5,32 11Wan see oba aul uteneen es, saul see onbefriet bliewen, ooda sikj wada met äa Maun veseenen, un de Maun saul sikj nich von siene Fru scheeden. 12To de äwaje saj ekj, nich de Har, wan een Brooda eene Fru haft, dee nich jleeft, un see oba wellich es, met am toop to läwen, saul hee ar nich wajch schekjen. 13Un wan eene Fru eenen Maun haft, dee nich jleeft, un hee oba wellich es, met ar toop to läwen, saul see äaren Maun nich wajch schekjen. 14Een Maun, dee nich jleeft, es derch siene jleewende Fru jeheilicht, un eene Fru, dee nich jleeft, es derch äaren jleewenden Maun jeheilicht. Sest wudden june Kjinja orrein sennen; nu oba sent dee heilich. #Reema 11,16 15Oba wan wäa nich jleeft un sienen Poatna velat, dan lot am gonen. Een jleewenda Maun ooda Fru es en soonem Faul nich jebungen. Gott haft ons #7,15 Eenje oole Schreften sajen junt. aunjestalt, en Fräd to läwen. #Reema 14,19
16Fru, woo kaust du weeten, auf du dienen Maun raden woascht? Ooda Maun, woo kaust du weeten, auf du diene Fru raden woascht? #1Pet 3,1
17Wuarom daut jeit es, daut jiedra en däm bliewen saul, waut Gott am jejäft haft, un en däm Staunt, en woonen Gott eenem jewält haft. Dit es de Aunwiesunk, dee ekj aule Jemeenten jäw. 18Wan wäa aul beschnäden wia aus hee von Gott jewält wort, dan saul hee doabie bliewen. Un wäa nich beschnäden wia aus hee jewält wort, saul sikj nich beschnieden loten. 19De Beschniedunk halpt nuscht, un onbeschnäden sennen halpt uk nuscht. Waut doa talt, es Gott siene Jebooten hoolen. #Gal 5,6; 6,15 20Een jiedra saul soo bliewen, aus hee wia, aus Gott am roopen deed. 21Wan du een Sklow wieescht aus Gott die roopen deed, dan moak die doaräwa kjeene Sorjen. Oba wan du de Jeläajenheit hast, frie to woaren, dan doo daut. 22Daut es soo, wäa vom Harn jewält wort aus hee Sklow wia, es em Harn een fria Mensch. Un wäa vom Harn jewält wort aus hee frie wia, es nu däm Harn sien Sklow. #Efs 6,6; Flp 1,16 23Jie sent fa eenen dieren Pries jekoft; lot junt nich aun Menschen vesklowen. #1Kor 6,20 24Breeda, een jiedra saul soo met Gott bliewen, aus hee wia aus Gott am roopen deed.
Frie bliewen fa dän Harn
25Fa dee waut nich befriet sent hab ekj kjeen Jeboot vom Harn. Oba ekj jäw junt miene Meenunk, aus eena dee vom Harn Metleet jekjräajen haft, un opp dän to veloten es. 26Wan ekj aun de Noot denkj, en dee wie läwen, dan meen ekj, daut es goot fa eenen nich befrieden Mensch, soo to bliewen aus hee es. #1Kor 10,11 27Best du aun eene Fru jebungen, dan vesieekj ar nich loos to woaren. Wan du nich eene Fru hast, dan sieekj uk kjeene. 28Oba wan du frieen deist, sindichst du doamet nich. Un wan eene Mejal frieen deit, sindicht see doamet nich. Oba ekj mucht junt dän Trubbel spoaren, dee en de latste Tiet äwa befriede Menschen komen woat.
29Oba dit saj ekj junt, Breeda: Wie haben aul mau weinich Tiet. Dee waut Frues haben, sullen von nu aun soo läwen, aus wan see dee nich hauden. #Luk 14,26; Reema 13,11 30Dee waut hielen, sullen soo läwen, aus wan see nich hielden; un dee sikj freien, aus wan see sikj nich freiden; un dee waut kjeepen, aus wan see daut nich ieejenden; 31un dee de Sachen von dise Welt brucken, aus wan see dee nich brukten. Wiels soo aus dise Welt nu es, daut woat vegonen. #1Joh 2,15-17 32Oba ekj mucht jieren, daut jie onen Sorjen wieren. Wäa nich befriet es, beschafticht sikj met daut, waut däm Harn aunjehieet, un woo hee am jefaulen kaun. 33Oba wäa befriet es, däm es daut om daut to doonen, waut to dise Welt jehieet, woo hee siene Fru jefaulen kaun, un soo sent siene Interessen jedeelt. #Luk 14,20 34De Fru, dee kjeenen Maun mea haft, un de onbefriede Mejal sorjen sikj om Gott siene Sachen, daut see aun Kjarpa un Jeist heilich sent. Oba de befriede Fru sorcht om daut, waut to dise Welt jehieet, un woo see äa Maun jefaulen kaun. 35Un dit saj ekj junt to junem ieejnen nutzen. Ekj saj daut nich om junt von irjentwaut trigj to hoolen, oba daut jie junt em rajchten Senn un onjehindat däm Harn hanjäwen kjennen.
Rot fa velowde Menschen un Wätfrues
36Wan irjentwäa denkjt, daut hee siene am aunvelowde Brut doamet nich rajcht behaundelt, un see aul oolt jenuach es, un daut soo sennen saul, lot am soo doonen, aus hee well, lot sikj befrieen; hee sindicht doamet nich. 37Oba wäa sikj em Hoat entschloten haft, un hee es von noanich unja Druck, un haft sienen Wellen un siene Jefeelen unja Kontroll, un es sikj eenich jeworden en sienem Hoat, sikj nich met ar to befrieen, haundelt rechtich. 38Dan es daut nu soo: Wäa sikj befrieen deit, deit rajcht; un wäa sikj nich befrieen deit, deit noch bäta.
39Eene Fru es aun äaren Maun jebungen soo lang aus dee läft. Oba wan äa Maun doot es, es see frie, sikj to befrieen, met wäm see well; bloos de Maun saul uk däm Harn aunjehieren! #Reema 7,2 40Miene Aunsecht es, see wudd bäta auf sennen, wan see onbefriet bleef. Ekj denkj, ekj hab uk Gott sienen Jeist.
હાલમાં પસંદ કરેલ:
1. Korinta 7: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.