Aposteljeschicht 16
16
Paulus jewent Timotäus. De Beschluss von Jerusalem bekaunt jejäft
1Hee kjeem no Derbe un dan no Liestra. Doa wond een Jinja, dee heet Timotäus; siene Mutta wia eene jleewende judsche Fru oba sien Voda wia een Griech. #Apost 17,14; 19,22; 20,4; Flp 2,19-22; 1Tess 3,2.6; 2Tim 1,5 2De Breeda en Liestra un Ikonion hauden goodet von am to räden. 3Paulus wull am opp siene Reis metnämen. Hee beschneet am om de Juden äat haulwen; wiels en dee Jäajent wisten see aula, daut sien Voda een Griech wia. #Gal 2,3 4Un aus see derch de Städa reisden, säden see an doa, waut de Apostel un Eltestasch en Jerusalem beschloten hauden. #Apost 15,23-29 5Doaderch worden de Jemeenten em Gloowen jestoakjt, un äare Zol neem aule Dach too.
Paulus en Troas: No Europa jeroopt
6See reisden dan derch Friegien un Galatien, wiels de Heilja Jeist daut nich tooleet daut Wuat en Asien to prädjen. #Apost 18,23 7Aus see bat Miesien kjeemen, vesochten see derch Bitienien to reisen; oba Jesus sien Jeist leet daut nich too. 8Un soo reisden see bie Miesien vebie un kjeemen no Troas.
9Dan dee Nacht haud Paulus eene Vision daut een Maun von Mazedonien beddent ver am stunt un säd: Komm äwa no Mazedonien un halp ons!
10Aus hee dise Vision nu jeseenen haud, vesocht wie fuaz no Mazedonien to komen, wiels wie neemen aun daut de Har ons doahan jeroopt haud, daut Evangelium to prädjen.
Paulus en Filippi: Die Bekjierunk von Liedia
11Dan fua wie von Troas loos, un fuaren jlikj äwa no Samotrake, un kjeemen näakjsten Dach no Neapolis, 12un von doa no Filippi, eene reemische Kolonie, #16,12 De oole Schreften sent hia nich kloa to vestonen. en dee Jäajent eent von de väaschte Städa en Mazedonien. Un doa bleew wie miere Doag. 13Aum Sabat jinkj wie batem Stautspuat aum Wota, wua doa jeweenlich jebät wort. Doa sad wie ons dol un räden met de Frues, dee sikj doa vesaumelt hauden.
14Eene Fru, dee doa horchen deed, wia Liedia, een gottesferchtjet Frumensch von Tiatira, dee met bleiwroodet Zeich haundeld; däa muak de Har daut Hoat op, daut see doaropp achten deed, waut Paulus säd. 15Aus see un äare Famielje wieren jedeept worden, loot see ons en em Hus to komen un säd: Wan jie mie doafäa hoolen, daut ekj toom Gloowen aum Harn jekomen sie, dan komt un blieft en mien Hus. Un see beräd ons.
Paulus drift een Woasaja Jeist rut
16Eenen Dach aus wie no dän Plauz jinjen to bäden, troff wie een Sklowenfrumensch, dee een Woasajajeist haud, un äare Haren derch äa Woasajen väl enbrocht. 17Dit Frumensch kjeem Paulus un ons hinjaraun un schrieech: Dise Mana sent dän aulahechsten Gott siene Deena, dee ons sajen woo wie kjennen seelich woaren. #Mrk 1,24.34 18Dit deed see eenen Dach nom aundren, bat Paulus doaräwa soo vedrislich wort, daut hee sikj omdreid un to dän Jeist säd: Ekj jebeed die en Jesus Christus sienen Nomen ut ar rut to komen! Un fuaz veleet de Jeist ar. #Mrk 16,17
Paulus un Silas em Jefenkjnis
19Oba aus äare Haren sagen, daut äare Hopninj opp Jewenst wajch wia, neemen see Paulus un Silas, un schlapten dee opp däm Moakjtplauz ver Jerecht. 20Dee brochten dee ver äare Rechta un säden: Dit sent judsche Mana un brinjen onse Staut em Opprua. #Apost 17,6 21Un waut see lieren, kjenn wie nich aunnämen uk nich metmoaken, wiels wie Reema sent. 22Daut Volkj räajd sikj opp jäajen an to gonen, un de Rechta befoolen an de Kjleeda vom Kjarpa to rieten un an to veheiwen. #2Kor 11,25; Flp 1,30; 1Tess 2,2
23Un aus see an goot veklopt hauden, schmeeten see an en daut Jefenkjnis, un befoolen dän Jefenkjniswajchta an doa secha to hoolen. 24Un dee, wiels daut von am velangt wort, stopt an em bennaschten Jefenkjnis un schloot an de Feet en een Klotz nenn.
De Jefangnen woaren loos un de Jefenkjniswajchta dreit nom Harn
25Oba medden en de Nacht bäden Paulus un Silas, un sungen Leeda Gott to lowen, un de aundre faustjenomne hieeden daut. 26Un plazlich kjeem doa een grootet Ieedbäben, daut daut Jefenkjnis bat opp däm Gruntfoot scheddad. Fuaz oppestäd jinjen aule Däaren op, un an follen aula de Kjäden auf. 27De Jefenkjniswajchta wuak opp. Un aus hee sach daut aule Jefenkjnisdäaren op wieren, jreep hee nom Schwieet un wull sikj doot moaken; wiels hee docht de faustjenomne wudden aula utjeräten sennen. 28Paulus oba roopt met lude Stemm: Doo die kjeenen Schoden; wie sent aula hia! 29Dan leet hee sikj een Licht brinjen un rand nenn un foll zetrent ver Paulus un Silas han. 30Hee brocht an rut un säd: Leewe Haren, waut mott ekj doonen, daut ekj seelich woa? #Apost 2,37 31See säden to am: Jleew aun dän Harn Jesus Christus, dan woascht du un diene Famielje seelich! 32Dan prädijden see dän Harn sien Wuat to am, un to aul de sienje en sien Hus. 33Un krakjt dan de Nacht wosch hee an de Blootstriepen auf. Un fuaz doa leet hee sikj un siene Famielje deepen. 34Un hee neem an bie sikj em Hus nenn un sad an Äten väa. Un hee freid sikj daut hee met siene gaunze Famielje wia toom Gloowen aun Gott jekomen.
De Entschuldjunk vom Rechta; Aufscheet von Filippi
35Un aus daut ieescht dach wia schekjten de Stautsrechta äare Deena no däm Wajchta, daut hee de Mana sull gonen loten. 36Dan säd de Jefenkjniswajchta to Paulus: De Stautsrechta haben Wuat jeschekjt, daut du un Silas friejeloten sent. Got en Fräd! 37Paulus oba säd to an: See haben ons oschuldje Reema effentlich veheift un enjestopt, un räakjnen ons nu em Jeheemen loostowoaren? Nä! Nu lot an selfst komen un ons hia rut leiden. #Apost 22,25 38Un de Deena säden de Stautsrechta daut. Un aus dee hieeden, daut Paulus un Silas Reema wieren, wort an angst. 39Dan kjeemen see un beräden an un brochten an rut un prachaden an äare Staut to veloten. 40Dan jinjen see utem Jefenkjnis rut un jinjen bie Liedia em Hus nenn. Un aus see de Breeda jeseenen un Moot toojesproaken hauden, veleeten see.
હાલમાં પસંદ કરેલ:
Aposteljeschicht 16: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.