Aposteljeschicht 17
17
Jäajenstaunt en Tessalonich
1Aus see opp äare Reis derch Amfipolis un Apolonia wieren, kjeemen see no Tessalonich; doa wia eene Judenschool. #1Tess 2,2 2Un soo aus Paulus daut jewant wia, jinkj hee bie an nenn un räd met an aun dree Sabaten ut de Schreft. 3Hee läd an de Schreft ut un muak an daut kloa, daut Jesus lieden un vom Doot oppstonen must. Un hee säd an daut dis Jesus, dän hee an prädijd, de Christus wia. #Luk 24,26-27.45-46 4Un eenje von an jleewden un schlooten sikj Paulus un Silas aun, un soo uk een grootet Schoof gottesferchtje Griechen un väl von de väanämste Frues. #1Tess 1,1; 2Tess 1,1 5Oba de stieekopje Juden wieren aufjenstich un holden sikj romdriefschet Peebel toop, un brochten de Staut em Opprua, un saumelden sikj ver Jason sien Hus un vesochten an rut to kjrieen un ver däm Volkj to brinjen. 6Oba aus see dee nich fungen, schlapten see Jason un noch eenje aundre Breeda ver de Stautsväastona un schrieejen: Dise, dee äwa de gaunze Welt Trubbel jemoakt haben, sent uk häajekomen, #Apost 16,20 7un Jason haft dee bie sikj oppjenomen. Dise haundlen aula jäajen dän Kjeisa sien Jesaz un sajen, doa es een aundra Kjennich, dän see Jesus nanen! #Luk 23,2 8Aus daut Volkj un de Stautsväastona daut hieeden, jeef daut een grootet Derchenaunda. 9Un aus Jason ieescht fa an gootjesajcht haud, leeten see an wada gonen.
Eene korte Tiet en Beria
10De Breeda schekjten dan fuaz de Nacht Paulus un Silas no Beria. Aus see doahan kjeemen, jinjen see en de Judenschool nenn. 11De Menschen doa wieren aunstendja aus dee en Tessalonich; dee neemen daut Wuat gaunz wellich opp, un forschten aule Dach en de Schreft, om to seenen auf daut soo wia, aus see säden. #Joh 5,39 12Un doa kjeemen väl Juden toom Gloowen, un soo uk väl väanäme griechische Frues un Mana. 13Aus de Juden en Tessalonich hieeden, daut Paulus daut Gotteswuat uk en Beria prädijd, kjeemen see uk doahan, daut Volkj opptoräajen. 14De Breeda schekjten Paulus dan fuaz wajch, bat aum Mäa to gonen, oba Silas un Timotäus bleewen en Beria. #Apost 16,1 15De Mana, dee met Paulus toopjinjen, brochten am bat Ateen. Un no däm, daut see dän Befäl jekjräajen hauden, Silas un Timotäus to sajen, daut see soo schwind aus mäajlich uk hankomen sullen, jinjen see trigj.
Paulus en Ateen
16Aus Paulus en Ateen no an luad, räajd sien Jeist sikj en am opp, aus hee sach woo de Staut voll Aufjetta wia, 17un räd dan en äare Schoolen to de Juden un de gottesferchtje Griechen, un uk to aule, dee hee aule Dach opp däm Moakjtplauz troff. 18Dan muaken sikj uk eenje von de epikurische un stoiksche Filosofen äwahäa met am to strieden. Eenje säden uk: Waut well dis Blaubamauz ons sajen? Eenje säden: Daut sitt soo, aus wan hee ons niee Jetta väatostalen haft. Daut säden see, wiels hee an daut Evangelium von Jesus prädijd un säd, daut de Doodes oppstonen wudden. #1Kor 4,12 19Dan neemen see Paulus un brochten am opp däm Jerechtsplauz, un fruagen am: Kjenn wie weeten, waut dise niee Lia es, von dee du rätst? 20Wie hieren waut gaunz framdet von die; doawäajen well wie jieren weeten, waut daut meent. 21Aul de Ateena, un de Utlenda dee doa wieren, doonen nuscht leewa aus von niee Dinja räden, ooda waut nieet hieren.
Paulus prädicht opp däm Areopag, däm Jerechtsplauz
22Dan stunt Paulus medden opp däm Jerechtsplauz opp un säd: Jie Mana von Ateen, ekj see, daut jie no aule Sieden han sea relijees sent un de Jetta ferchten. 23Wiels aus ekj hia romjinkj un mie de Städen besach, wua jie aunbäden, sach ekj eenen Aultoa, opp dän jeschräwen stunt: To dän onbekaunden Gott. Nu moak ekj junt met dän Gott bekaunt, dän jie aunbäden un oba nich kjanen. 24De Gott, dee de Welt un aules waut doabennen es jemoakt haft, es Har äwa Himmel un Ieed, un wont nich en Tempels, dee met de Henj jebut sent. #1Kjen 8,27 25Un hee woat uk nich von Menschenhenj bedeent, aus wan am irjentwaut fält. Wiels hee selfst jeft aule Menschen Läwen un Odem un aulet aundre. #Psa 50,9-12 26Un hee haft daut soo jemoakt, daut aule Velkja opp de Ieed von eenen Mensch staumen, un äwa de gaunze Welt wonen sellen, un haft äare Tiet jesat un bestemt wua see wonen sellen. #5Mo 32,8 27Dit deed hee doaropp, daut see no Gott sieekjen sullen, un woomäajlich am feelen un finjen wudden. Hee es werkjlich von ons aula nich wiet auf. #Jes 55,6 28Daut wie läwen, ons bewäajen un äwahaupt doa sent, es aula en am; soo aus eenje von june Dichta jesajcht haben: Wie sent uk siene Kjinja! 29Wan wie von Gott staumen, sell wie uk nich denkjen daut de Gottheit met Golt, Selwa un Steenbilda to vejlikjen es, dee derch Menschenkonst un Jedanken jemoakt sent. #1Mo 1,27; Jes 40,18 30Gott haft de Tiet äwaseenen aus see am nich kjanden. Nu oba velangt hee aule Menschen aulawäajen omtokjieren. #Apost 14,16; Luk 24,47 31Wiels hee haft een Dach bestemt, aun dän hee de Welt met Jerajchtichkjeit rechten well, derch een Maun, dän hee doatoo jewält haft. Un daut haft hee doaderch sechajestalt, daut hee am vom Doot oppwuak. #Apost 10,42; Mat 25,31-33
De Hiera nämen de Räd veschieden opp
32Aus see doavon hieeden, daut de Doodes oppstonen wudden, hauden eenje äaren Spott doaräwa. Aundre oba säden: Wie wellen die noch meamol doavon räden hieren. 33Un soo jinkj Paulus von an wajch. 34Doa wieren oba doch eenje Mana, dee am aunhongen un toom Gloowen kjeemen. Eena von dee wia Dioniesius, eena utem Jerechtsrot, un eene Fru dee Damaris heet, un eenje aundre met an.
હાલમાં પસંદ કરેલ:
Aposteljeschicht 17: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.