Aposteljeschicht 20
20
Eene Reis derch Mazedonien un Griechenlaunt un trigj no Troas
1Un aus de Opprua äwa wia, roopt Paulus de Jinja no sikj, spruak an Moot too, neem Aufscheet von an un jeef sikj opp de Reis no Mazedonien. #2Kor 2,13 2Un aus hee derch dise Lenda jereist wia un an doa met väl Wieed Moot toojesproaken haud, kjeem hee no Griechenlaunt un bleef doa dree Moonat. 3Aus de Juden am aunfungen notostonen, jrod aus hee reed wia no Sierien to reisen, wort hee sikj eenich trigj no Mazedonien to gonen. 4Un met am no Asien reisden Sopater von Beria, Pierus sien Sän; Aristarch un Sekundus von Tessalonich; Gajus un Timotäus von Derbe; un Tiechikus un Trofimus von Asien. #Apost 16,1; 17,10; 19,29; 21,29; Efs 6,21 5Dise Mana jinjen veropp un luaden no ons en Troas.
6Wie oba säajelden fuaz no daut Passafast un kjeemen om fief Doag bie an en Troas aun, wua wie säwen Doag bleewen.
Eutiechus en Troas vom Doot oppjewakjt
7Aus de Jinja dän ieeschten Dach en de Wäakj toopkjeemen, daut Broot to bräakjen, un wiels Paulus dän näakjsten Dach räakjend wieda to reisen, räd hee bat medden en de Nacht. #Mat 28,1; Apost 2,42.46 8Doa wieren väl Laumpen en de Bowastow, wua see toopjekomen wieren. 9Un Eutiechus, een junga Maun, saut em Fensta, un aus Paulus soo lang räd, wia hee faust enjeschlopen. Aus hee soo faust schleep, foll hee vom dredden Stock rauf un wort doot oppjehowen. 10Paulus jinkj rauf un läd sikj opp dän Maun nopp, foot am om un säd, see sullen kjeen jaumarieren aunstalen, wiels siene Seel wia noch en am. #1Kjen 17,21 11Dan jinkj hee wada trigj nopp, bruak daut Broot un eet. Hee räd noch väl met an, bat daut zemorjes dach wort, un dan reisd hee wieda. 12De Menschen neemen dän jungen Maun no Hus, un daut wia fa an een groota Troost.
Von Troas no Milet
13Wie jinjen veropp nom Schepp un fuaren no Asos om Paulus doa nopp to nämen, soo aus hee daut bestalt haud, wiels hee wia doa to Foot hanjegonen. 14Aus wie am en Asos troffen, neem wie am met un kjeemen bat Mitilene. 15Dan säajeld wie von doa wajch un kjeemen dän näakjsten Dach bat Chios. Un dän Dach doaropp fua wie no Samos un kjeemen dan #20,15 Eenje oole Schreften sajen Samos, un aus wie en Trogielium jewast wieren, kjeem wie dän näakjsten Dach no Milet.
Aufscheetsräd aun de Eltestasch en Efesus
16Paulus haud sikj väajenomen, bie Efesus vebie to foaren, daut hee nich noch en Asien Tiet toobrinjen must, wiels hee spood sikj doaropp, wan daut mäajlich wia, to Pinjsten en Jerusalem to sennen. #Apost 18,21
17Oba von Milet schekjt hee no Efesus un leet de Eltestasch von de Jemeent fodren. 18Aus see aunkjeemen, säd hee to an: Jie weeten, woo ekj vom ieeschten Dach aun, bie junt en Asien emma jeläft hab, #Apost 18,19; 19,10 19un woo ekj dän Harn en aule Deemoot unja väl Tronen jedeent hab, wan ekj von de Juden, dee mie nostunden, uk sea opp de Proow jestalt wort. 20Un jie weeten uk, daut ekj biem prädjen nuscht trigjehoolen hab, daut junt toom nutzen komen kunn. Ekj hab junt en de Vesaumlungen jelieet, un sie uk von een Hus no daut aundret jegonen. 21Ekj hab beid, Juden un Griechen, daut woarnent väajehoolen, daut see sikj to Gott kjieren un aun onsen Harn Jesus Christus jleewen sullen. 22Un nu go ekj vom Jeist jedräwen no Jerusalem, un weet nich, waut doa met mie passieren woat. #Apost 19,21 23Ekj weet bloos, daut de Heilja Jeist en aule Städa mie woarnt, daut ekj doamet räakjnen kaun, daut ekj woa lieden motten un faustjenomen woaren. #Apost 9,16; 21,4.11 24Oba ekj hool mien ieejnet Läwen nich väl wieet, ekj mucht bloos mienen Wajch met Freiden to Enj ranen, un dän Deenst verechten, dän de Har Jesus mie oppjelajcht haft, un daut es, fa daut Evangelium von Gott siene Jnod entostonen. #Apost 21,13; 2Tim 4,7 25Un ekj weet nu bestemt, daut aul jie, mank dee ekj daut Gottesrikj jeprädicht hab, woaren mie nich wada seenen. 26Doawäajen saj ekj junt daut vondoag gaunz kloa, daut ekj aun kjeenen Mensch sien Bloot schuldich sie, #(26 und 27)Hes 3,17-19; Apost 18,6 27wiels ekj hab mie nich jeschut, junt aules to sajen waut Gott em Senn haud. 28Soo woakt äwa junt selfst un uk äwa de Häad, äwa dee de Heilja Jeist junt aus Oppsechta jestalt haft, een Hoad äwa Gott #20,28 Eenje oole Schreften sajen äwa däm Harn siene Jemeent to sennen, dee hee sikj met sien ieejnen Sän sien Bloot #20,28 Griechisch met daut Bloot von Sienen, daut meent, sienen Sän, ooda met sien ieejnet Bloot. jekoft haft. #1Tim 4,16; 1Pet 5,2-4 29Ekj weet, daut wan ekj ieescht woa wajch sennen, woaren rietende Wilw mank junt komen, dee de Häad nich veschoonen woaren. #Mat 7,15 30Doa woaren soogoa von june ieejne Menschen eenje oppstonen, dee de Woarheit vedreien woaren, om Aunhenja fa sikj to kjrieen. #1Joh 2,18-19 31Doawäajen siet waka un denkjt doaraun, daut ekj dree Joa, Dach un Nacht, junt aula met Tronen vemont hab. 32Un nu äwajäw ekj junt aun Gott un sien Jnodenwuat, daut de Krauft haft junt opptobuen un een Oafgoot to jäwen, met aul dee toop, dee jeheilicht sent. 33Ekj hab kjeenem sien Selwa, Golt, ooda Kjleeda velangt. 34Jie weeten selfst, daut dise, miene Henj, mie daut enjebrocht haben, waut ekj fa mie selfst brukt, un uk fa dee, dee met mie wieren. .#Apost 18,3; 1Kor 4,12; 1Tess 2,9 35Un en aules, waut ekj deed, bewees ekj junt, daut wie derch schwoa oabeiden de schwake methalpen musten, un doaraun denkjen, daut de Har Jesus säd: Jäwen es seelja aus nämen.
36Un aus hee dit jesajcht haud, kjneed hee sikj met an aulatoop dol un bäd. #Apost 21,5 37Un see hielden aulatoop, un footen am om un kusten am. 38Waut an aum truarichsten muak, wia, daut Paulus jesajcht haud, daut see am nich mea seenen wudden. Un see jinjen met am met nom Schepp.
હાલમાં પસંદ કરેલ:
Aposteljeschicht 20: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.