Aposteljeschicht 21
21
Von Milet no Tierus. Paulus woat jewoarnt
1Aus wie ons von an loosjeräten hauden un opp däm Schepp wieren, fua wie jlikj äwa no Kos un dän näakjsten Dach no Rodos un von doa no Patara. #21,1 Eenje oole Schreften sajen Patara un Miera. 2Un wiels wie doa een Schepp fungen, daut no Feenizien fua, stieej wie nenn un fuaren han. 3Aus wie Ziepern jeseenen hauden, fua wie daut aun dee siedne Kaunt vebie un fuaren no Sierien un kjeemen no Tierus, wiels doa sull daut Schepp de Woa aufloden. 4Un aus wie doa Jinja fungen, bleew wie doa säwen Doag. Dee säden Paulus derch dän Jeist, daut hee nich no Jerusalem gonen sull. #Apost 20,23 5Aus onse Tiet doa äwa wia, veleet wie un jinjen onsen Wajch, un dee kjeemen ons aula met Frues un Kjinja toop hinjaraun, bat wie ut de Staut wieren. Un doa kjneed wie ons aun de Kaunt vom Mäa dol un bäden. #Apost 20,36 6Aus wie von eenaunda Aufscheet jenomen hauden, stieej wie opp daut Schepp, un see jinjen trigj no Hus.
Von Tierus no Cäsarea. Woarnunk derch dän Profeet Agabus
7Wie reisden von Tierus wieda un kjeemen no Ptolemäus, bejreesten de Breeda un bleewen eenen Dach bie an.
8Dän näakjsten Dach veleet wie, dee wie met Paulus wieren, un kjeemen no Cäsarea un jinjen doa bie dän Evangelist Filippus em Hus nenn, dee eena von de Säwen wia. #Apost 6,5; 8,40 9Dee haud vea onbefriede Dajchta, dee de Gow hauden to profezeien. 10Un aus wie doa ieescht miere Doag wieren, kjeem Agabus, een Profeet von Judäa, doahan. #Apost 11,28 11Dee neem Paulus sienen Gort vom Kjarpa un bunk sikj doamet de Henj un de Feet un säd: De Heilja Jeist sajcht: Dän Maun, däm disen Gort jehieet, woaren de Juden en Jerusalem jrod soo binjen un de Nichjuden en de Henj jäwen. #Apost 20,23 12Aus wie daut hieeden, prachaden wie, uk de aundre dee doa wieren, daut hee nich sull no Jerusalem gonen. #Mat 16,22 13Dan säd Paulus: Wuarom hiel jie hia un bräakjen mie daut Hoat? Ekj sie reed, mie nich mau en Jerusalem binjen to loten, oba uk fa däm Harn Jesus sienen Nomen to stoawen. #Apost 20,24 14Aus Paulus sikj nich äwaräden leet, leet wie am tofräd un säden: Doo soo aus de Har daut well! #Luk 22,42
Oppnom en Jerusalem.
15Un om een poa Doag pakt wie toop un reisden no Jerusalem. 16Doa kjeemen eenje Jinja von Cäsarea met, dee brochten ons no Mnason sien Hus, wua wie bliewen sullen. Dee Maun wia von Ziepern un wia doa eena von de ieeschte Jinja.
17Un aus wie no Jerusalem kjeemen, neemen de Breeda ons met Freiden opp.
18Dän näakjsten Dach jinkj Paulus met ons aulatoop no Jakobus, wua aul de Eltestasch uk hankjeemen. #Apost 15,13 19Un aus Paulus an bejreest haud, vetald hee an omstendich waut de Har derch sien Aumt mank de Nichjuden jedonen haud. 20Aus see daut hieeden, lowden see dän Harn. See säden oba to am: Kjikj emol, Brooda, wooväl dusende Juden toom Gloowen jekomen sent, dee oba iewrich fa daut Jesaz enstonen. #Apost 15,1 21Dee es daut jesajcht worden daut du de Juden, dee mank de Nichjuden wonen, lieescht von Moses auftofaulen un an sajchst, daut see äare Kjinja nich sellen beschnieden, un sikj uk nich mea no äare Väaschreften rechten. #Apost 16,3 22Waut dan nu? Daut Volkj mott sikj onbedinjt vesaumlen, wiels dee woaren daut secha hieren, daut du häajekomen best. 23Dan doo nu waut wie die sajen. #Apost 18,18 24Wie haben hia vea Mana, dee een Vespräakjen opp sikj jenomen haben. Nemm dee un go met an toop derch äare Reinjungs Zeremonieen un betol de Onkosten, daut see sikj kjennen de Hoa aufschnieden loten. Dan woaren aule Menschen seenen daut et nich de Woarheit es, waut see von die vetalen, oba daut du selfst soo läfst aus daut Jesaz velangt. 25Oba de Nichjuden, dee toom Gloowen jekomen sent, hab wie jeschräwen daut see sikj aun nuscht soowaut hoolen brucken, oba daut see nich Aufjettaopfa, nich Bloot un nich Fleesch von een aufjewarjdet Beest #21,25 Eenje oole Schreften sajen nich un nich Fleesch von een aufjewarjdet Beest äten, un sikj nich met Huararie aufjäwen. #Apost 15,20.29 26Dän näakjsten Dach neem Paulus de Mana un reinjd sikj met an toop. Dan jinkj hee em Tempel nenn un säd an, wanea äare Reinjungs Doag wudden äwa sennen, un daut dan fa jieda eenem wudd een Opfa jebrocht woaren. #4Mo 6,13-21; 1Kor 9,20
Paulus woat em Tempel faustjenomen
27Un aus dee säwen Doag meist äwa wieren, sagen de Juden von Asien am em Tempel. See hizten daut Volkj en, un kjrieejen am to hoolen, un schrieejen: 28Jie israelitische Mana, halpt! Dit es dee Maun dee aule Menschen aulawäajen lieet jäajen daut Jesaz un dise heilje Städ to sennen. Un noch mea, hee haft Griechen em Tempel nenn jebrocht un doamet dise heilje Städ veorreinicht. #Hes 44,7; Apost 6,13 29See hauden am verhäa met Trofimus dän Efeesa toop en de Staut jeseenen, un dochten sikj daut soo, daut Paulus dän wudd em Tempel nenn jenomen haben. #Apost 20,4; 2Tim 4,20 30De gaunze Staut wia em Wirwoa, un randen toop, kjrieejen Paulus to hoolen un schlapten am utem Tempel rut, un muaken fuaz de Däaren too.
31Aus see am vesochten doottomoaken, kjrieech de Soldoten Offizia to hieren, daut gaunz Jerusalem em Opprua wia. 32Hee neem fekjs Soldoten un Offizieren un rand doa mank. Aus see de Offizieren un de Soldoten sagen, hieeden see opp, Paulus to schlonen. 33Aus de Offizia hankjeem, neem hee Paulus un leet am binjen met twee Kjäden un fruach am, wäa hee wia un waut hee jedonen haud. #Apost 20,23 34Un von em Volkj schrieech eena soo, un eena soo. Un aus see en aul dän Opprua nich kunnen utfinjen waut doa werkjlich wia, befool hee Paulus en de Baraken nenn to brinjen. 35Aus Paulus bat opp de Stoopen kjeem, wia daut Volkj soo tieraunisch, daut de Soldoten am droagen musten. 36Doa kjeem väl Volkj hinjaraun un schrieejen: Brinjt am äwatsied! #Luk 23,18; Apost 22,22
Paulus doaf sikj verem Volkj veteidjen
37Aus see Paulus en de Baraken nenn leiden wullen, fruach hee dän Offizia, auf hee to am räden kunn. Dee oba fruach am: Kaust du Griechisch räden? 38Best du nich dee Ägipta, dee een stootje trigj een Opprua aunstald un 4.000 Merda holpst en de Wiltnis nenn to komen? 39Paulus säd: Ekj sie een Jud von Tarsus en Zilizien, een Birja von nich mau eene eefache Staut. Doarom bedd ekj die, lot mie to de Menschen räden. 40Un aus hee de Frieheit haud, stieech hee opp de Stoopen un jeef daut Volkj met de Haunt eene Aundiedunk, daut see sullen stell sennen. Un aus daut ieescht gaunz stell wia, funk hee aun opp hebräisch to an to räden un säd:
હાલમાં પસંદ કરેલ:
Aposteljeschicht 21: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.