NOONNA THLOU 5
5
Ananias Khatkho Sapphira
1Chuta akming Ananias an ong mii khat in amah akmei Sapphira soh amah aram akirkhat ajurh, 2che amah akmeisoh romjoua anphahnata ste anmah chuumtuta ansihche, arouruta thlenna raangroiei ankehkunga asihpei. 3Chuta Pitar in ason. “Ananias, nangin Akseeng Li ta masimna a mahche ram amannata nangtu arou nikhainatu jarelna Seitan in nirilsuunga sipmeio? 4Mahchu nijurhnoh laiva nitanohme? Chuta mahchu nijurhcheva nihuuinaja ahuuina janohsa. Mah thloui nitlohnatu nang nirilla khatloh a akthar inthruhme? Nangin miita masimna nohche, chuta Ringpu ta namsimnapei.” 5Ananias in trongchu atheihsoh, tukleia inriilla thisa, che aktheih annaamte in khalmo intrisei. 6Mahchu akmuh intlangsa ei in inthoua amah aruungta tuumma apaal khur a anphuumpei.
7Pung inthumvak inngeihche aknua amah akmei in aksuuk thloukha jakhatkho romnohluunga hukluutsa. 8Mahchunna Pitar in akuunga ason, “Keisonro nangin ramkha vachahruin nijurhningme?” Cheva amah in ason, “Oi maichah a.” 9Chuta Pitar in amahta ason, “Akpu vaa Li ta madoinatu nannih in khatloh a injachoume? Rungairo nang namsalta akphuum eikha innkhaar kuunga ammei, che nangta apaalla nanphurhtu” 10Kak hanga Pitar akehkungah amahkho inriilla thisa. Intlangsa in anluutlaia amahta thia am antuukpei, cheva amahta apaalla anphurhche amsalkomma anphuumpei. 11Maita aktheih mii naamte anchunga khalmo intri hangsei.
Salungkhouna Thlou
12Ipekva raangroi ankut a daang leh salungkhouna thlou khalmoa miikaara antlohpei. Mahche annaamte in Solomon innmuk a inchunsei. 13Che anmah ankaar a tunangkhat inkho anmahsoh inchunpia kraang cheknohsei, chuta mii inva anmahta khalmo injahsei 14Mahche amlot kupaleh kumei miitam in ral ralla Akpu kuunga amichunei, 15mahchunna anmah in aknaei luungkho lamma thlenna mahche intolhna tuklaichunga matolh a ansih, alamva Pitar in lamma athlenglai amah aniim slakho anchunga atlaknatuta. 16Jerusalem vella ak am khuupii khuupiinata miitam in aknaeita anthlen, che anmah annat ansatna thraei.
Raangroi ta Anchut
17Chuta akthloi thiimpu leh amah in anruuipi Sadukiis loomei in kallak a sipsei, 18anmah in raangroi eita ansuurche miitam amna simma ansihpei. 19Chuta khulouh a Akpu vaa ringroi khat in sim akhaareita mahoonga anmahta apaalla anthruhpiche asonei, 20“Seh choulaia mathruunna thlaamsuunga ngirra mah Akringtrong naamte i mii kuungah raanna tongve.” 21Chunna mahchuta antheih in kini avaarsoh mathruunna thlaamsuunga luut a amitheihpei.
Ipek aklok thiimpu leh amah in anruuipi in thlenga Israel vaa jamaleh chum eita annaam ongjoua, raangroi eita simma thlennatu amithlahpei. 22Chuta phrangki in anthlenglaia, anmahta simsuunga tuuknohsei, cheva anmah in inlenga antongpei. 23“Simkha thra inkhaar che akngaak ei in thongkha thra anngaak a kantuuk ei, chuta thong akhaar kamihoong inva asuunga tukhatkho tuuknohsung.” 24Ipek mathruunna thlaamta akngaak raalmii akpuui mahche akthloi thiimpu in mahtrong chuta antheih in anmah rella khalmoa inhalsei, 25Mahchunna tukhat in ankuunga thlenga atih, “Nannih in simma nanthun mii eikha mathruunna thlaamsuunga ngirra miita matheih a amsei.” 26Mahchunna raalmii akpuui in phrangki eisoh sehjoua hou masuuknoh luunga anmahta anthlenpei, alamva mii in lung kanidentu ta intrisei.
27Chunna anmahta anthlenche jama ankaar a ansihpei che akthloi thiimpu in anmahta trong anruiei, 28#Met 27:25“Amah akminga mii namitheihnoh natu tranga kanchaakchou, chuta nannih in miita namitheih a Jerusalem a sipsa, che amah athii kantakchunga namithlak natu nantlohpei.” 29Chuta Pitar leh raangroi in amisang, “Kannih in miitrongta kamijuihtu ngutva Ringpu trong kamijuihtu tla.” 30Nannih in thinga mathoia nanthat Jisu ta kannih kan pa Ringpu in amringpei 31Israel in anril anthlengnatu mahche anmah anlehta ipnatu, Ringpu in amahta Akching mahche akkal Akpu veia akchang kut a amliinpei. 32Mairella kannih in sakhisung, mahche Ringpu in ason amjuih mii eita amlan Akseeng Li inkho sakhi.
33Mahchuta antheih in anmahva khalmo amilunghaangsa mahche amahta anthatjasa. 34Chuta jamana Pharisi akmingva Kamaliel, trongsuurvaa lulok mii naamtein injahnavei inkhat in ngirsa, mahche raangroi eita apaalla kak ansihnatu jathang amlanei 35Che amah in ankuunga asonei, “Israel miieio, anmah ankuunga nantlohthlou i cheksilve. 36Alamva mah akniei i amaa a akming Theodas in kei ningsangta amdon mii khat inthruh, mii reija manlivak in amah aknuta anjuih; chuta amahta anthatpei mahche aknua aje ajea inthek invorhsei, che jakhatkho veinohsa. 37Amah aknua miipok teennatu amah aknichunna Kalili na Juda in inthoua mahche mii arouta amah aknuta anjuihpei; atakkho kmaang kremsa, che amah aknu akjuih mii eikho inthek invorhsei. 38Mahchunna ipek aksuukthlou i keiin nankuunga kitihchou, maseh eivesa; alamva anmah in antlohthlou i mii tingnata suukleva mah i jakhatkho veinohtu; 39chuta mah i Ringpu tingnata veileva nannih in anmahta cheknoh uchou!”
40Chunna anmah in atrongkha anjapei, che anmah in raangroi eita onga ankhonpei mahche Jisu akminga antrongnoh natu anchaakche anmithlahpei. 41Cheva anmah in jamanata sehsei, anroomthoksei mah chuvah amah akming kharelna klah knang phah matikcha injahna vei tuei tih a Ringpu in asonpei. 42Mahche anmah in aknirel mathruunna thlaam a che inn inna matheih a Jisu Khrista ta akraan, inngainoh luungsei.
נבחרו כעת:
NOONNA THLOU 5: TARAOBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.