NOONNA THLOU 6
6
Thlou Amjoom Mii Sirih
1Ipek akni aknileh aroi tam ahanral in, Kriik trong aktrong Judi ei in Hibru trong aktrong Judi anchunga andah a insosei alamva aknirel saakna iinna ansem anmilanlai anmah trulmeinuta thou sanohsei. 2Chunna somleinih in Akpu amlot mii eita onga ansonpei, “Inih in Ringpu trong akraan thlouta mathlah a tebor thloua routloh i chimnohsa. 3Alamchunna unaoeio, mah thlou irella mii thunna thlou imtlohnatu malot ah anming inthang, Akseeng Li a sip, lousingin sipmii sirih nankaarnata charve, 4Chuta inihva angenna mahche akthra trongta routloh a iril maluutreio.” 5Mahchuta anson in annaamte anril pelsei, cheva Akseeng Li in mahche lousingin sip Stephen che Philip, Prokhoras, Nikanor, Timon, Parminas mahche Antiokna Judi in ol Nikolas ta ancharpei. 6Anmahta raangroi anmaa a ansihpei, che anmah in ngenna anchunga ankut ansihpei.
7Mahche Ringpu atrong porh ahanralpei; Jerusalem a ak am aroiei anmasing khalmo tam athloipei, mahche thiimpuei inkho amlot mii aknuta anjuihpei.
Stephen ta Ansuur
8Mahche Stephen in malungsi leh tuui in sip a, miikaara salungkhouna thlou mahche daang khalmo atlohpei 9Mahchunna thlaang thlaang mii, Sinakok na mii arouin (mahchu ngata an ong); mahche Sirini na, Alexjendri na, Silisia na, che Asia na mii arouin Stephen soh trong inkharh anmithronpei. 10Chuta anmah in lousing leh Li a trongta indah eia ngir cheknohsei. 11Mahchunna anmah in inruk a miita masoh anmitronpei, “Amah in Moses leh Ringpu ta andah a manuih a trong antheihpei.” 12Mahche anmah in anparuul che ringjih lulok eita rok a anmisaopei, che anmah in ankuunga thlenga amahta ansuurpei cheva jama anmaa a anthlenpei, 13cheva akchimnoh sakhi amlan miikhatta thlenna anmisonpei, “Amahmii in akseeng ita mahche trongthuunta indah a trong inngainoluung; 14alamva Najareth na Jisu in amah amunni ammaangtu, mahche Moses in inimlan amaanata iloutloh nonota amah in a thlengtu ta amah in asonkha kannih in kantheihpei.” 15Mahchunna jama ah anbok annaamte in amahta thratea an an in ameelkha ringroi khatvaa ameelnanga anmuhpei.
נבחרו כעת:
NOONNA THLOU 6: TARAOBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.