NOONNA THLOU 7
7
Stephen Atrong
1Mahchunna aklok thiimpu in ason, “Mah i chimme?” 2Mahchunna Stephen in ason, “Unao khatkho pa eio keirungaive. Paarthra Ringpu in inih ipa Abraham in Haran na a amnoh maa a, Mesopotamia a amlaia ammuh, 3che akuunga ason, ‘Nang niramnata che nang unao pasata mah a keiin nangkuunga kammuhsam ramkhanna sehro.’ 4Mahchunna Kaldi ramta mathlah a Haran na paalsa. Che apa athihnua, Ringpu in loua ipek nan amna ram inna thlenna asihpei; 5chulata amah amunchunna amah in aphahtu phukho malannoh, amah in akehmunphao malannohsa, chuta asa apoknoh lainata amah atak che vaknua akthlengsam amah atuteting anmah anta aveinatu rammi kamlantuta Ringpu in trongchet amlanpei. 6Ringpu in nga tloh a amahkuunga trongsa, mah chuvah vaknua akthlengsam atu atein miiramma mii aktlei veia amtuei, anmahta naichi maveia kum reija manli mananga ansihtuei. 7Chuta Ringpu in ason, ‘Anmah in rou antlohmii eikhata keiin pichaar kitlohtuei, mahchuche aknua anmah in anthruhche mah amun inna keita kamithruuntung;’ 8cheva amahkuunga avuntan trongirhna amlanpei. Nga tloh a Abraham in Isaak vaa apa veisa, mahche nirit tihpia amahta avun atanpei; Isaak in Jakop apa veisa, che Jakop in somleinihvaa anpa veisa.
9“Cheva pipaei in Joseph ta kallak seia, amahta Ijip a anjurhpei; chuta Ringpu in amahta anruuipi, 10alah anang jikchanata akalche Ijip kurung Pharaoh amaa a malungsi leh lousing amlan, che kurung in amahta Ijip leh amahram apumte chunga rampuui amveipei. 11Ipekva Ijip mahche Kanan apumtea saakchaal thlengsa, cheva khalmo klah knang suuksa, chunna inih ipa ipuei in saakphu tuuk cheknohsei. 12Chuta Ijip a saangniim amta Jakop in inih ipa ipu eita matsah a a amthlah ei. 13Mahche innih tihpia ansehlai, Joseph in auhte ankuunga atakta amromei, che Joseph ataploikuungta Pharaoh kuunga amrompei. 14Cheva Joseph in apa Jakop ta che amah unao anaam, li sopsrihlei rangata a ongnatu amthlah ei; 15che Jakop in Ijip a jungsa. Cheva amah atak, che inih ipa ipueikho thisei, 16mahchuche anmahta Sikkem a thlenna Abraham in Sikim nata Hamor a asa kupa ankuungnata harngou ste malanna akleiche rusuunna anphuumpei.
17“Chuta Ringpu in Abraham kuunga amlanche trongchet khanna annai inva, Ijip a mii porh a miitam ahanralpei. 18Joseph ta akromnoh aktlei kurung in Ijip a apaal inva anmahta chut amithronpei. 19Amah in inih jaatta khalmo thranoh anhuinapei che amnangei, mah chuvah naoson eita anring nanotu apaalla anlonei. 20Mahlaia Moses poksa, che Ringpu maikuunga khalmoa ameel kthra, mahche thlathum apa inna amma liinsa; 21che amahta apaalla ansih in, Pharaoh asaningol in amahta alohche asa kupa maveia ajokpei. 22Mahche Moses in Ijip na lousing naamte amtampei, khatkho tronga che thlou a akchek amneh veisa.
23“Amah in kum sopli aphah in, amah uhnao Israel eita annatu arilla suuksa. 24Ankaarna khat in thranohmalla atlohkhata amuh in, amnangmii khata akalnatu aloungaakpei cheva athunglou veia Ijip mii khata athatpei. 25Amah in amdonva anmahta akut a akalnatu anmah turel Ringpu in amthlah peita anrombra, chuta anmah in romnohsei 26Mahche akhuvar a anmah in incham injanatuta asonei, ‘Nannih i unaoseengchou, jarella nannih khat in khatta chimnoh a innah insuulchoume?’ 27Chuta amah unaokuunga chimnoh aktlohmii inna amahta apanga ilsunna asonpei, ‘Kanchunga nipaalnatu mahche pichaartloh niveinatu tunang in thlou nakthunme? 28Majaan Ijip miikhatta nithatnanga keikho keithattangta nitlohme?’ 29Amah athunglousam thlou khanna Moses in tlaansa, cheva Median ramma pajatla a amsa, cheva kupasa innihvah apa veisa.
30“Ipek kum sopli achenua, ringroi khat in Sinai muul rapril inbang khat a meibom khat veia amuhpei. 31Moses in mahchuta amuh in salungkhousa; chunna amah in innaia annatu aluut in, Akpu ahouta thlengsa. 32‘Kei i nipa nipuvaa Ringpu, Abraham, Isaak che Jakop vaa Ringpu sang.’ Cheva Moses in inchuunsa, an cheknohsa. 33Cheva Akpu in amahta ason, ‘Nang nikehnata kehkhraangkha liimro, alamva nangin ningirhna munkha akseeng tukleisa. 34Ijip ah am kei kimiita thranoh a anminangi tak a kimuhpei, mahche anmah in thonoh a anlahoukha kitheihpei. Chunna anmahta kikalnatu keiin thlengsang. Ipek varo, keiin nangta Ijip a namthlahtang.’
35“ ‘Tunang in nangta kanchunga nipaalnatu mahche pichaar tlohnatu nakthunme?’ ta anmah in andah Moses ta inbangkaar a mamuh a ringroi akut a akpuui mahche akkal Akpu veia Ringpu in amthlakhasa. 36Amah in Ijip na in aang tuiiboomma, kum sopli raprilla salungkhouna thlou mahche daang jikcha tloh a Ijip nata chinga asehpiei. 37‘Ringpu in nannih unaopasa nata keinanga ringraan khat kamthruhtu.’ Nga tloh a Israel ankuunga aksonkha amah Moses ireh. 38Sinai muulla amahkuunga atrongpi ringroisoh raprilla amsa che ipa ipueisoh louam mahche inihkuunga Akringtrong aphahche inimlan miikha amahsa. 39Amah in ason ipa ipuin majuih indah ei, chuta amahta ajea an ilche, amah anril avah Ijip ting inlengei, 40Aaron akuunga ason, ‘Kannih kanmaa a aksehtu kanniturella leili rappu seemreiro; alamva Ijip nata chinga kanisehpi Moses ta khatloh a vei satame romnohsung.’ 41Cheva mahlai chunna anmah in siilte khatta anthatche leili rappu kuunga thiilpoot veia ankat mahche anmah ankut a anseem poot khanna anroomthoksa. 42Chuta Ringpu in anmah ankuungnata inheisa, mahche ringraan nirik a anjih khananga, ‘Israel innsuungeio raprilla kum sopli nannih in siilta mathruunna pootchei keikuunga nankatnohme? 43Nannih in namilotva rappu thiilta mahche nannih arsivaa rappu Rephan vaa leilita nanlohnome; amah leili rappu chuva nannih in namithruunnatu nanseempei. Chunna keiin nannihta Babilon araalla kphurh usachou.’
44“Inih ipa ipuei in sakhitu mathruunna thiil raprilla anmahsoh am, Ringpu in Moses ta matheih a asonnanga; amah in amuhche ahoongsoh intrimma aseemtu. 45Inih ipa ipuei in anpathou anputhou nata mathruunna thiilchu phah a Joshua soh inruuijoua inih ipa ipuei anmaa a louam jatih eita manomma ramkhanna athlenpei. Mahchu Davit in a amlai phah a am, 46Davit in Ringpu amaikuunga rilvolna aphah mahche Jakop in amah Ringpu amnatu amunkhat aktuuknatu anihpei. 47Chuta amah turella inn inkhat Solomon in atlohpei. 48Chulata Ankaangrem kut a inseem inna amahva amnoh, ringraan in asonnanga, 49‘Ringramva kei kphompii, mahche thalei in kikeh chuunna. Kei turella nannih in jaknang inn nantloh ume, Akpu in ason, chunoleh keiin kanngeihnasam ramname? 50Mah naamte i kikut in seemnoh angme?’
51“Nannih rukingtrang eio, nannih in lai amrella Akseeng Li ta nanlouthing. Nanpa nanpuin anloutloh nanga nannihkho nantloh. 52Ringraan suunga nanpa nanpuin anchutnoh amreiseime? Akchimlamseh mii khat athlengnatu matsah a ansonta nannih in nanthatpei, ipek nannih in amahta nanjurhpei che nanthatpei, 53ringroi in trongsuurta nannih nankuunga nanimlanta nanphahpei, mahchu nannih in majuihnohchou.”
Stephen ta Lung Anden
54Ipek ohchuta antheih in khalmo amilung inhaangsa, che anha kret kretta anmiketpei. 55Chuta amah in Akseeng Li a sip a ringramta intouva a an in, Ringpu vaa Paarthra ah Jisu in Ringpu akchanga ngirra amuhpei; 56che amah in asonei, “Anve, ringramta inhoong mahche miivaa Asa kupa in Ringpu akchanga ngirra am kimuhpei.” 57Chuta amah in rool inkaanga onga anmikuur ansiinpei mah chuvah amahkuunga inlomsei. 58Cheva amahta khuuboom apaalla anminomche lung andenpei; mahchuta sakhi akvei in anmah anpuunreita akming Saul an ong nao kupakhat akehkungah ansihpei. 59Nga tloh a anmah in Stephen ta lung andenlai, amah in ngenna “Akpu Jisu, kei kikli i keiluorosa.” 60Mahcheva amah in akhuk makamma ahou suuk a ongsa, “Akpu, mah aneh i anmah anchunga mathlaaknoh eiro.” Cheva maita asonche amahva insa.
נבחרו כעת:
NOONNA THLOU 7: TARAOBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.