JENESIS 6
6
Ka jingbymman ka pyrthei
1Te ka la jia ruh, mynba ki briew ki la sdang ban ïaroi halor ka khmat ka khyndew, bad ba la kha ïa ki khun kynthei ïa ki, 2ba ki khun shynrang U Blei ki la ïohi ïa ki khun kynthei ki jong ki briew ba ki bhabriew; bad ki la shim ki tnga ïa lade na kat kiba ki la ïa-ibha. 3Te U Trai u la ong, “U Mynsiem jong nga un ym ïaleh bad u briew junom, namar ba u hi u long ka doh: la kumta ruh, ki sngi jong u kin long shispah arphew snem.” 4#Jkñ. 13:33.Ki riewradbah ki la don ha ka pyrthei ha kita ki sngi; bad hadien kata ruh, mynba kita ki khun shynrang U Blei ki la leit sha kita ki khun kynthei jong u bynriew, bad ba ki la ïoh khun na ki, kine keiñ, ki la jia long ki briew bashlur eh kiba la ju long mynhyndai hynthai, kiba la donnam shibun.
5 #
Mat. 24:37; Luk. 17:26; 1 Pet. 3:20. Te U Trai u la ïohi ba ka jingleh bymman jong u briew ka la khraw eh ha ka pyrthei, bad ba ka jingthmu baroh ki jingpyrkhat ka dohnud jong u ki la long bymman ha la ka sngi. 6Bad U Trai u la kylla-ka-bamut ba u la lah thaw ïa u briew ha ka pyrthei, bad la pynsngewsih eh ïa u ha la ka dohnud. 7Te U Trai u la ong, “Ngan pyndam noh ïa u briew ïa uba nga la thaw na khmat ka khyndew; naduh u briew haduh u mrad, bad haduh u kynja bapar, bad ïa ki sim bneng; naba nga kylla-ka-bamut ba nga la thaw ïa ki.” 8Hynrei, u Noah u la shem ka jingieit isynei ha khmat U Trai.
U Noah u thaw ka ïinglieng
9 #
2 Pet. 2:5. Kine ki long ki jinghiar pateng jong u Noah: u Noah u la long u briew u bahok, uba beit ha ki pateng bynriew jong u, u Noah u la ïaid ryngkat bad U Blei. 10Bad u Noah u la pynkha ïa lai ngut ki khun shynrang, ïa u Shem, ïa u Ham, bad ïa u Japhet.
11Hynrei, ka khyndew ka la pyut sniew ha khmat U Blei, bad la pyndap ruh ïa ka pyrthei da ka jingleh-jubor. 12Te U Blei u la khmih ïa ka pyrthei, bad, ha khmih ruh, ka la pyut sniew; naba ka doh baroh ka la lah pynpyut plak ïa la ka lynti ha ka pyrthei. 13Bad U Blei u la ong ha u Noah, “Ka bakut ka doh baroh ka la wan ha khmat jong nga; naba da ki keiñ la pyndap ïa ka pyrthei da ka jingleh-jubor; bad ha khmih ruh, ngan pynjot noh ïa ki lem bad ka khyndew. 14To thaw ïa lade ïa ka ïinglieng da u dieng Kopher; ïa ki pulit#6:14 Pulit: Kane ka kyntien ka mut ka kamra. men thaw ha kata ka ïinglieng, bad men tah ruh ïa ka da ka bsiang shapoh bad shabar. 15Bad ha kane ka rukom men thaw ïa ka: laispah pruh ka lynter jong kata ka ïinglieng, sanphew pruh ka pyngkiang jong ka, bad laiphew pruh ka jingjrong jong ka. 16To men thaw ïa ka jingpynshai ha kata ka ïinglieng; bad haduh shi pruh men kyntiew ïa ka shalor; bad ïa ka jingkhang jong ka ruh men buh sharud jong ka; bad lai pateng men thaw ïa ka. 17Namar, ha khmih ma nga, ma nga hi keiñ, ngan sa wallam ïa ka jingshlei ki um halor ka pyrthei, ïa ka ban pynduh noh ïa ka doh baroh, ïa kat kiba don ka jingpyrsad ka jingim ha ki, napoh ka suiñbneng; te kin sa ïap kiei kiei baroh katba don ha ka pyrthei. 18Hynrei, bad me ngan pynskhem ïa la ka jutang; te shapoh kata ka ïinglieng men ïoh wan bsut: ma me bad ki khun shynrang jong me, bad ka tnga jong me, bad ki tnga ki khun shynrang jong me lem bad me. 19Bad na kiei kiei ki kynja ba-im baroh, na ka doh baroh keiñ, men pynwan sha kata ka ïinglieng shi jur shi jur na ki, ïa ka ban ri pynim ïa ki lem bad me; bad shynrang bad kynthei ruh kin ïalong. 20Na ki kynja sim baher ha la ka jaid ka jaid, bad na ki kynja jingri ha la ka jaid ka jaid, na ki kynja bapar halor ka khyndew ruh ha la ka jaid ka jaid, shi jur shi jur na ki keiñ kin ïawan bsut sha me, ba yn ri pynim ïa ki. 21To buh te ha lade na ka kynja jingbam baroh kaba bit ban bam, bad to kynshew lang ha lade; ba kan long ka jingbam ïa me bad ïa ki.” 22#Heb. 11:7.Te u Noah u la leh kumta; katba kum baroh ba U Blei u la hukum ïa u, kumta keiñ u la leh.
The Bible Society of India