JENESIS 7
7
Ka jingshlei um
1Te U Trai u la ong ha u Noah, “To khie leit ma me bad ka ïing jong me baroh shapoh kata ka ïinglieng; naba ïa me nga la ïohi u bahok ha khmat jong nga ha kane ka pateng bynriew. 2Na u kynja mrad bakhuid baroh, men shim bad me hynñiew hynñiew jur, ïa u shynrang bad la ka kynthei: bad na ki kynja mrad ki bymkhuid shi jur shi jur, ïa u shynrang bad la ka kynthei. 3Bad na ki kynja sim bneng ruh hynñiew hynñiew jur, shynrang bad kynthei; ïa ka ban ri pynim ïa u symbai halor ka khmat ka khyndew baroh. 4Naba sa hynñiew sngi ngan pynhap ïa u slap halor ka khyndew sawphew sngi bad sawphew miet; bad ngan pynduh noh na khmat ka khyndew ïa kiei kiei ki kynja ba-im baroh katba nga la thaw.” 5Te u Noah u la leh baroh kat kumba U Trai u la hukum ïa u.
6Te u Noah u la long hynriewspah snem ka rta mynba kata ka jingshlei ki um ka la jia long halor ka khyndew. 7#Mat. 24:38-39; Luk. 17:27.Bad u Noah u la leit bsut shapoh, bad ki khun shynrang jong u, bad ka tnga jong u, bad ki tnga ki khun shynrang jong u, lem bad u shapoh kata ka ïinglieng, namar kita ki um jong ka jingshlei. 8Na ki mrad ki bakhuid, bad na ki mrad ki bymkhuid, bad na ki kynja sim, bad na kiei kiei ki kynja bapar baroh halor ka khyndew, 9ki la ïaleit bsut shi jur shi jur ha u Noah shapoh kata ka ïinglieng, shynrang bad kynthei, kumba U Blei u la lah hukum ïa u Noah. 10Ka la jia ruh, ba hadien hynñiew sngi, kita ki um ka jingshlei ki la long halor ka khyndew.
11 #
2 Pet. 3:6. Hamar ka bahynriewspah snem ka rta jong u Noah, ha u bnai u ba-ar, ha ka bakhathynñiew sngi jong uta u bnai, ha kata ka sngi hi keiñ, la pynbthei noh ïa ki um mihpohliew baroh ka jingjylliew bah, bad ïa ki jingkhang ki bneng la plie noh wang. 12Bad u 'lap bah u la don halor ka khyndew sawphew sngi bad sawphew miet. 13Ha kata ka sngi hi keiñ, ki la leit bsut u Noah, bad u Shem, bad u Ham, bad u Japhet, ki khun shynrang u Noah, bad ka tnga jong u Noah, bad ki tnga jong ki khun shynrang jong u lai ngut lem bad ki, shapoh kata ka ïinglieng; 14ma ki, bad ki kynja mrad khlaw baroh ha la ka jaid ka jaid, bad ki kynja jingri baroh ha la ka jaid ka jaid, bad u kynja bapar baroh bapar halor ka khyndew ha la ka jaid ka jaid, bad ki kynja baher baroh ha la ka jaid ka jaid, u sim baroh na ka jaid baroh. 15Bad ki la leit bsut sha u Noah hapoh kata ka ïinglieng, shi jur shi jur na ka doh baroh, ha kaba la don ka jingpyrsad ka jingim. 16Bad kito kiba la ïaleit bsut, ki la ïaleit shynrang bad kynthei na ka doh baroh, kumba U Blei u la lah hukum ïa u: bad U Trai u la khang ïa u shapoh.
17Te kata ka jingshlei ka la don sawphew sngi halor ka khyndew; bad kita ki um ki la ïa nang bun, bad ki la kit ïa kata ka ïinglieng, te la kyntiew ruh ïa ka shalor ka khyndew. 18Bad kita ki um ki la ïa nang ïoh bor, bad ki la ïa nang bun shikatdei halor ka khyndew; te kata ka ïinglieng ka la per ha sla ki um. 19Bad kita ki um ki la ïa nang kham jur shikatdei eh halor ka khyndew; te la tap lup ïa ki lum jrong baroh kiba la long hapoh ka bneng baroh. 20Khatsan pruh ki la ïa nang kiew kita ki um sha jrong; te ïa ki lum la tap lup. 21Te ka doh baroh ba la khih ha ka khyndew ki la ïap noh, ki sim, bad ki jingri, bad ki mrad khlaw, bad kiei kiei ki kynja bapar baroh kat ki bapar halor ka khyndew, bad u briew baroh de: 22baroh keiñ kiba la don ka jingpyrsad ka mynsiem ka jingim ha ki thliew khmut jong ki, na kita baroh kiba la don ha ka ryngkew, ki la ïap noh. 23Kumta, la pynduh noh ïa kiei kiei baroh ki kynja kiba im halor ka khmat ka khyndew, naduh u briew haduh ki jingri, bad ïa kiei kiei ki kynja bapar, bad ïa ki sim ki bneng; kumta keiñ, la pynduh noh ïa ki na khmat ka khyndew: bad la sah im sa tang u Noah, bad kita kiba la don lem bad u ha kata ka ïinglieng. 24Bad kita ki um ki la ïa nang kham jur halor ka khyndew shispah bad sanphew sngi.
The Bible Society of India