ÏOANNIS 4
4
U Jisu bad ka nong Samaria
1 #
Ïoan. 3:22. Namar kata, ynda U Trai u la tip ba ki Pharisi ki la ïohsngew ba U Jisu u pynlong bad ba u pynbaptis kham bun ki synran ban ïa u Ïoannis, 2(la U Jisu hi shisha um shym la pynbaptis, hynrei, ki synran jong u), 3u la iehnoh ïa ka Judia, bad u la leit pat sha Galilaïa. 4#Luk. 9:52; 17:11.Te ka la dei ïa u ban leit lyngba ïa ka Samaria. 5#Jen. 33:19; 48:22; Jos. 24:32.U la poi, namar kata, sha ka shnong ha Samaria ba khot “Sikhar”, hajan kata ka khyndew ïa kaba u Jakob u la ai ha u Joseph u khun jong u. 6Te hangta ka la don ka pukri u Jakob. U Jisu, namar kata, ba u la thait na kata ka jingleit, u la shong kumta halor kata ka pukri: te ka la long hamar kaba hynriew baje#4:6 hynriew baje: Kane ka dei ka kynta ka bahynriew. Ha ka jingkheiñ por ha kine ki sngi, kan dei ka por khat-ar baje shiteng sngi..
7Kawei ka briew na Samaria ka la wan ban tong um: U Jisu u ong ha ka, “To ai ha nga ban dih.” 8(Naba ki synran jong u ki la lah leit noh sha kata ka shnong, ba kin ïoh thied jingbam.) 9#Esr. 4:1-6; Neh. 4:1,2; Mat. 10:5; Ïoan. 8:48.Ynda kumta, kata ka briew kaba long ka nong Samaria ka ong ha u, “Kumno ma me u Jiw, me pan ban dih na nga, kaba long ka nong Samaria?” naba ki Jiw kim ju ïalok bad ki nong Samaria. 10#Ïoan. 7:37; Jpw. 21:6; 22:17.U Jisu u la ïathuh bad u la ong ha ka, “Lada pha la ithuh ïa ka jingaiei ka jong U Blei, bad uei u long uta uba ong ha pha, ‘To ai ha nga ban dih’, pha hi phan da la pan na u keiñ, u te un da la ai ha pha ïa ka um kaba im.” 11Kata ka briew te ka ong ha u, “Ko Kynrad, mem don jingtong ei ei, kane ka pukri ruh ka long kaba jylliew; namar kata, nangno me ïoh kata ka um kaba im? 12Hato me kham khraw ma me ban ïa u kpa jong ngi u Jakob, uba la ai ha ngi ïa kane ka pukri, bad u la dih hi ruh na ka, bad ki khun jong u, bad ki jingri jong u?” 13U Jisu u la ïathuh bad u la ong ha ka, “U briew baroh uba dih na kane ka um, un sliang pat; 14#Ïoan. 6:35; 7:38.hynrei, uno uno ruh u ban dih na kata ka um, ïa kaba nga ngan ai ha u, un ym sliang lano lano ruh; hynrei, kata ka um, ïa kaba ngan ai ha u, kan long ha u ka pukri ka um kaba kyrsoi sha ka jingim bymjukut.” 15#Ïoan. 6:34.Kata ka briew ka ong ha u, “Ko Kynrad, to ai ha nga ïa kane ka um, ba ngan ym sliang, lymne wan shane ban tong.”
16U Jisu u ong ha ka, “To khie leit khot ïa u tnga jong pha, bad to wan shane.” 17Kata ka briew ka la ïathuh bad ka la ong, “Ngam don tnga.” U Jisu u ong ha ka, “Pha la ong kaba dei, ‘Ngam don tnga’: 18#2 Syiem. 17:24; Hos. 2:7.naba san ngut ki tnga pha la ïoh, bad uta uba pha don mynta ruh, um long u tnga jong pha: ïa kane pha la kren kaba shisha.” 19Kata ka briew ka ong ha u, “Ko Kynrad, nga sngewthuh ba me long u nongïathuhlypa: 20#Deu. 11:29; Jos. 8:33; Luk. 9:53.ki kpa jong ngi ki la ïamane Blei halor une hi u lum; phi te phi ong, ba ha Jerusalem ka long kata ka jaka ha kaba dei ban mane Blei.” 21#Ïoan. 5:25; 16:2,32; Mal. 1:11.U Jisu u ïathuh ha ka, “Ko ka briew, to ngeit ïa nga, ba ka por ka jia, haba phin ym ïamane ïa U Kpa halor une u lum, lymne ha Jerusalem. 22#2 Syiem. 17:28-41; Isa. 2:3; Rom. 9:4.Phi ïamane Blei kat kum ïa kaba phim tip; ngi ïamane Blei kat kum ïa kaba ngi tip; naba ka jingpynim ka long na ki Jiw. 23Hynrei, ka por ka jia, bad ka long mynta keiñ, haba ki nongïamane Blei kiba shisha kin ïamane ïa U Kpa ha ka mynsiem bad ha kaba shisha; naba U Kpa ruh u wad ïa kiba kum kita ban ïamane ïa u. 24#Php. 3:3.U Blei u long U Mynsiem, te ka dei ïa kiba mane ïa u, ban mane ha ka mynsiem bad ha kaba shisha.” 25Kata ka briew ka ong ha u, “Nga tip ba u Messiah u wan, (ïa uba ki khot ‘U Khrist’), ynda la wan uta, un batai shai ha ngi ïa kiei kiei baroh.” 26#Ïoan. 8:24.U Jisu u ïathuh ha ka, “Nga long uta, uba kren bad pha.”
27Hamar kane, ki synran jong u ki la wan ruh; te ki la ïasngewkyndit ba u la ïakren bad ka kynthei; pynban, ym don ba kylli, “Kaei me wad?” lane, “Balei me ïakren bad ka?” 28Ynda kumta, kata ka briew ka la iehnoh ïa la u khiew um, bad ka la leit noh sha kata ka shnong, bad ka ong ha ki rangbah, 29#Ïoan. 7:26; Mat. 12:23.“To ale, to khmih ïa u briew uba la ïathuh ha nga ïa kiei kiei baroh kat kiba nga la leh: une u long ne em uta U Khrist?” 30Namar kata, ki la ïamih noh na kata ka shnong, bad ki la ïawan ha u.
31Hamar pdeng kata te, ki synran ki la ïakyrpad ïa u, ki da ong, “Ko Rabbi, to bam.” 32#Mat. 4:4.Hynrei, u la ong ha ki, “Nga, nga don ka jingbam ban bam, ïa kaba phi phim tip.” 33Namar kata, ki synran ki la ïa-ong paralok hi, “Don mano mano ba la wallam ei ei ha u ban bam?” 34#Ïoan. 5:30; 6:38; 17:4.U Jisu u ong ha ki, “Ka jingbam jong nga, ka long ba ngan ïoh leh ïa ka mon ka jong uta uba la phah ïa nga, bad ba ngan ïoh pyndep ïa ka kam jong u. 35#Luk. 10:2; Mat. 9:37.Phi phim ong, ‘ba sa saw bnai, kan long ka aïom ot?’ Ha khmih, nga ong ha phi: to khmied ïa la ki khmat, to jngoh ïa ki lyngkha; naba ki la byrlieh lypa ïa ka aïom ot! 36Uta uba ot te u ïoh diang ïa ka bainong, bad u lum soh ïa ka jingim bymjukut, ba uta uba bet ruh un ïoh ïakmen lem bad uta uba ot. 37#Job. 31:8; Mik. 6:15.Naba ha kane, kata ka ktien ka long kaba shisha, ‘U long uwei uta uba bet, uwei pat ruh uta uba ot.’ 38Nga, nga la phah noh ïa phi ban ot ïa kata kaba phi phim shym la trei minot; kiwei pat ki la ïatrei minot, phi, pynban, phi la ïoh bsut sha ka jingtrei minot jong ki.”
39Te shibun na ki nong Samaria na kata ka shnong ki la ngeit ha u, namar ka jingong jong kata ka briew, kaba la ong skhem, “U la ïathuh ha nga ïa kiei kiei baroh kat kiba nga la leh.” 40Namar kata, mynba kita ki nong Samaria ki la ïawan ha u, ki la ïakyrpad ïa u ban ïaisah bad ki; te u la sah hangta ar sngi. 41Te kham bun shuh shuh ki la ngeit namar ka ktien jong u hi; 42#1 Ïoan. 4:14; 2 Tim. 1:10.ha kata ka briew te ki la ïa-ong, “Mynta ngi ngeit, ym namar kata ka jingong jong pha shuh; naba ngi la ïohsngew ma ngi hi ïa u, bad ngi ïatip ba une u long shisha U Khrist, U Nongpynim jong ka pyrthei.”
U Jisu u pynkhiah ïa u khun u Rangbah Syiem
43Te hadien kita ki ar sngi, u la mih noh nangta sha Galilaïa. 44#Mrk. 6:4; Mat. 13:57.#Mat. 13:57; Mrk. 6:4; Luk. 4:24.Namar U Jisu u la phla hi, ba u nongïathuhlypa um ïoh ïa ka burom ha ka ri jong u hi. 45#Ïoan. 2:23.Te ynda u la poi sha Galilaïa, kita ki nong Galilaïa ki la pdiang sngewbha ïa u, haba ki la ïohi ïa kiei kiei baroh ïa kiba u la leh ha Jerusalem ha kata Ka Jingkhawai Niam: namar ki ruh, ki la leit sha kata Ka Jingkhawai Niam.
46 #
Ïoan. 2:1-11; Mat. 8:5-10; Luk. 7:2-10. Kumta, U Jisu u la leit pat sha Kana Galilaïa, ha kaba u la lah pynlong Waiñ ïa ka um. La don te uwei u rangbah syiem, uba u khun jong u, u la pang ha Kapernam. 47Une, haba u la ïohsngew ba U Jisu u la wan na Judia sha Galilaïa, u la leit ha U, bad u la kyrpad ïa U, ban wan hiar bad ban pynkhiah ïa u khun jong u, naba u long u ban sa ïap. 48#Dan. 4:2; Mrk. 13:22; Ki Kam. 2:19; 4:30; Rom. 15:19; Heb. 2:4.Ynda kumta, U Jisu u la ong ha u, “Lymda phin ïohi ïa ki dak bad ïa ki kam phylla, phin ym ngeit satia.” 49Uta u rangbah syiem u ong ha U, “Ko Kynrad, to ïawan hiar katba im pat ïap noh i khun jong nga.” 50U Jisu u la ïathuh ha u, “To khie leit noh; u khun jong me u la im.” Uta u briew u la ngeit ïa kata ka ktien kaba U Jisu u la ong ha u, bad u la leit noh. 51Hangta te haba u dang leit hiar, ki shakri jong u ki la ïawan tan ïa u, bad ki la ong, “U khun jong me u la im.” 52Ynda kumta, u la kylli na ki, ïa ka por ha kaba u la sngew kham koit. Te ki la ïathuh ha u, “Mynhynnin, ha kaba hynñiew baje#4:52 hynñiew baje: Kane ka dei ka kynta ka bahynñiew. Ha ka jingkheiñ por ha kine ki sngi, kan dei ka por shi baje nohphai sngi., ka khieshoh ka la iehnoh dak ïa u.” 53#Ki Kam. 11:14.Kumta, uta u kpa u la tip ba ka la long ha kata ka por hi, ha kaba U Jisu u la ong ha u, “U khun jong me u la im:” te u hi u la ngeit, bad ka ïing jong u baroh kawei. 54#Ïoan. 2:11.Ïa kane pat ka kambah ka ba-ar U Jisu u la leh, hadien ba u la wan na Judia sha Galilaïa.
The Bible Society of India