Lûke 19
19
Jezü la Zachë
1La tchêngbâ nə̈ ndə̂ Jezü lî lə̂ gö ndə̂ Jerikö, tche sə̂ lakə̂ ro lə̂ gö nə̈. 2Ngâ köchë ndə̂ rə̈ yê wü pä Zachë, ndə̂ tche wâtə̂ makündji ndə̂ a-earə̂ kə̂ pala makətche-lapöo, tche wä la arə tə̂ gbölösə̂nə̈. 3Zachë pû köbo ndə̂kə̂ wun rə̂ pä Jezü də̈ tchabâ? Kə̈ gbôâbo köbo ndə̂kə̂ wun tchë-a, bëte tche wätə̂ ndöndö akrə, ânyë azü zä tchêngbâ Jezü tə̂ gbölösə̂nə̈. 4Käko tche kpê andə̂ yê nə̈ dokʉ̈tchê, ânyë kə̈ â lə̂ ngâ yö ndə̂ rə̈ nə̈ wû pä sikomöre ndə̂kə̂ wun Jezü ndə̂ tche wâ ndə̂kə̂ ro lə̂ köbo nə̈ lâme. 5Ndə̂ Jezü wûtu sə̈ tchô nə̈ lâme, kə̈ kênga la yê kə̈ tô rə̂ sə̈ Zachë päkëdə̂: «Zachë, amö jre wândâ wändä, bëte angêta äwäpä me lo bhândə̂ zə̈.» 6Zachë jrê wândâ wändä, kə̈ zâ Jezü bhândə̂ yê la mômô. 7Ndə̂ azü wûn rə̂ käko, andjë sə̂ lakə̂ jende Jezü lakə̂ to rə̂ päkëdə̂: «Köchë âtə ë ndə̂kə̂ lo bhândə̂ ngâ earə̂ ngbongbo rə!» 8Praâbalë Zachë krʉ̂ lafô tchâtchu Gbölö Gbïɛ̈ kə̈ tô rə̂ sə̈ tchë päkëdə̂: «Amö djë mê Gbölö Gbïɛ̈, më âkʉ ngâ tchâkalâ arə ndə̂ mê gbɛ̂ sə̈ a-earə̂ yûkü. Âdə më âbolo ngâ akrə ânyë kə̈ kʉ̂ makətche ndə̂ yê, më âgi rə̂ ëngbânə̈ sə̈ tchë sûsunə̈ voanə̈.» 9Jezü tô rə̂ sə̈ tchë päkëdə̂: «Angêta, kə̂ tcha tchô ndə̂ Ndjapä lî lə̂ nda âtə nə̂, bëte momö ndjë gbɛ̂ mo wätə̂ ngâ akrə pâ mawo ndə̂ Abrahâmo. 10Bëte Modô ndə̂ Akrə nə̈ ndə̂kə̂ pu lakə̂ tcha azü ndə̂ andjë yû.»
Ndoka pâ makətche ndə̂ lôlo
(Mat 25.14-30)
11Jezü kä tô ngâ ndoka sə̈ azü ndə̂ andjë sə̂ lakə̂ dje pö lâme. Tche tö rə̂ bëte rə̂ ndə̂ tche ndô la gö ndə̂ Jerûzalêmo nə̂, ânyë azü nə̈ wüntî pä Gbölö gö-gbïɛ̈ ndə̂ Ndjapä âwutu angangaâtə. 12Bëte rə̂ kä Jezü tô rə̂ päkëdə̂: «Ngâ köchë ndə̂ azü lə̂ bûngrɨ̂ ndə̂ yê wâtə̂ agbölö azü rô ngrɨ̈ lə̂ ngâ gö ngbî ndə̂kə̂ pa a za tchë tə̂ gbïɛ̈ ânyë tche kangbâ yê kə̂ watə̂ gbïɛ̈ lə̂ gö ndə̂ yê. 13Dokʉ̈tchê ndə̂kə̂ pa tche ro, tche ê angâ a-earə̂ kua ndə̂ yê lə̂ könô gbɛ̂, kə̈ kʉ̂ makətche ndə̂ lôlo sə̈ andjê balë balë gbɛ̂, kə̈ tô rə̂ sə̈ andjê päkëdə̂: ‹Nyë kʉ̈ makətche âtə, kə̂ ka rə la rə̂ zoo âwutu tə̂ lo kə̂ ka ndə̂ mê.› 14Praâbalë azü gö ndə̂ yê kôsə̂ yê, kə̈ wân angâ azü ngbâ yê ndə̂kə̂ to rə̂ päkëdə̂: ‹Ârâ nyîâbo ndə̂nə̈ pä köchë âtə wätə̂ gbïɛ̈ pâ ârâ-a.› 15A zâ tchë tə̂ gbïɛ̈, tche kângbâ yê lə̂ gö ndə̂ yê. Käko tche ê a-earə̂ kua ndə̂ tche kʉ̂ makətche sə̈ andjê lâme, ndə̂kə̂ yu andjê tə̂ rə ndə̂ andjë gbô rə̂ pânə̈. 16Dokʉ̈ nə̈ nə̂, kə̈ tô rə̂ päkëdə̂: ‹Gbïɛ̈, makətche ndə̂ mo zâ rə̂ sə̈ më alême, më gbö ngânə̈ pânə̈ lə̂ könô gbɛ̂.› 17Gbïɛ̈ nə̈ tô rə̂ sə̈ tchë päkëdə̂: ‹Sə̂nə̈ kä, mo wätə̂ djîrə̂ earə̂ kua. Batə̂ rə̂ ndə̂ mo mbô tchôtchô kua la kpîɛ̂kpîɛ̂ rə ndə̂ më zâ rə̂ sə̈ mö, më zä mö ndə̂kə̂ watə̂ goverenëre pâ agö lə̂ könô gbɛ̂.› 18Bïchuû earə̂ kua nə̈ nə̂, kə̈ tô rə̂ päkëdə̂: ‹Gbölö Gbïɛ̈, më gbö makətche mïndûu pâ anə̈ ndə̂ mo zâ rə̂ sə̈ mê.› 19Gbïɛ̈ nə̈ tô rə̂ sə̈ tchë päkëdə̂: ‹Momö, më zä mö tə̂ goverenëre pâ agö mïndûu.› 20Vötaâ earə̂ kua nə̈ nə̂, kə̈ tô rə̂ päkëdə̂: ‹Gbïɛ̈, makətche ndə̂ zə̈ kä âtə. Më gʉ̈ä rə̂ la ndöma lə̂ba kə̈ zâ rə̂ wü. 21Më mbö wa zə̈ bëte mo də̈ akrə ndə̂ mo kî tə̂ gbölösə̂nə̈: Mo zä rə sə̂ tchô ndə̂ mo bâtabô rə bâta tâ-ê, ânyë kə̈ sôâ ndjî rəgʉ sə̂nə̈ ndə̂ mo lûâbô rə lû tâ-ê.› 22Gbïɛ̈ nə̈ tô rə̂ ndə̂nə̈ sə̈ tchë päkëdə̂: ‹Ngbongbo earə̂ kua! Më âwa ngbanga lə̂ küma zə̈ gundə̂sə̂ pö ma zə̈. Mo wûnsə̂ nə̈ nə̂ pä më də̈ akrə ndə̂ më kî tə̂ gbölösə̂nə̈; më zä rə sə̂ tchô ndə̂ më bâtabô rə bâta tâ-ê, ânyë kə̈ sôâ ndjî rəgʉ sə̂nə̈ ndə̂ më lûâbô rə lû tâ-ê. 23Bëte giamâ kä ndə̂ mo zâbô makətche ndə̂ mê zâ bhâlə̂ gro-makətche ndə̂kə̂ pa azü kʉ rə̂, ânyë kə̂ ka ndə̂ mê, mê gbo ngâ rə pânə̈?› 24Pânə̈ tche tô rə̂ sə̈ andjanə̈ ndə̂ andjë sə̂ ndrotə̂ yê päkëdə̂: ‹Nyë zä makətche ndə̂ lôlo ndə̂ âwâ tchânə̂ yê lâme kə̂ za rə̂ sə̈ akrə ndə̂ tche wâ la rə̂ lə̂ könô gbɛ̂!› 25Andjë tô rə̂ sə̈ tchë päkëdə̂: ‹Gbïɛ̈, andə̂ ye nə̈ kä tâ lə̂ könô gbɛ̂!› 26Gbïɛ̈ nə̈ tô rə̂ ndə̂nə̈ päkëdə̂: ‹Më tö rə̂ sə̈ nyê: Akrə ndə̂ tche wâ la rə, a âzadje ngânə̈ ëpânə̈ sə̈ tchë. Akrə ndə̂ tche wâbô wâ la rə, a âjiadje ndjë kpîɛ̂kpîɛ̂ nə̈ ndə̂ tche wâ la rə̂. 27Andə̂ a-earə̂ kə̂ kosə̂ mê, ndə̂ andjë nyîâbô nyîndə̂ nə̈ pä më watə̂ gbïɛ̈ ndə̂ andjê lâme, nyë nə̈ la andjê atâ, kə̈ wôn andjê kpô tchâtchu mê!›»
Kə̂ li ndə̂ Jezü atə̂ Jerûzalêmo
(Mat 21.1-11; Mar 11.1-11; Jan 12.12-19)
28Pânə̈ ndə̂ Jezü tô pö lâme, tche zâ köbo dokʉ̈tchê tə̂ akpûlû azü nə̈ ndə̂kə̂ e atə̂ Jerûzalêmo. 29Ndə̂ Jezü wûtu ndola gö ndə̂ Betefajë la gö ndə̂ Betanï, ndə̂ âwâ ndrotə̂ aga ndə̂ a ê rə̂ tâ pä aga ndə̂ a-Olivï, tche wân adjisîpili ndə̂ yê bïchuû dokʉ̈tchê, kə̈ tô rə̂ sə̈ andjê päkëdə̂: 30«Nyë êë atə̂lə̂ yɛ̈yɛ̈ gö ndə̂ âwâ tchâtchu nyê lâme, gbô rə̂ ndə̂ nyê âsə̈ li atə̂lə̂ yɛ̈yɛ̈ gö nə̈, nyê gboadje ngâ ngbavö kûndiɛ ndə̂ a tchô tchë, ndə̂ ngâ akrə balë âbô â pâ yê dämba-ê. Nyë zü tchë, kə̂ ka la tchë. 31Âdə ngâ akrə âyu nyê päkëdə̂: ‹Bëte giamâ nyë zû tchë?› Nyë tö rə̂ sə̈ tchë päkëdə̂: ‹Gbölö Gbïɛ̈ kä ndə̂ ânyîndə̂ yê.›»
32Adjisîpili ndə̂ Jezü bïchuû lâme ê kə̈ gbô ndjë rə nə̈ batə̂ rə̂ ndə̂ Jezü tô rə̂ sə̈ andjê. 33Ndə̂ andjë âsə̈ zu ngbavö kûndiɛ tə̂ da yö nə̈, a-earə̂ yê yû andjê päkëdə̂: «Nyë zü ngbavö kûndiɛ nə̈ bëte giamâ?» 34Adjisîpili nə̈ tô rə̂ ndə̂nə̈ sə̈ andjê päkëdə̂: «Gbölö Gbïɛ̈ kä ndə̂ ânyîndə̂ yê.» 35Pânə̈ adjisîpili nə̈ kâ la ngbavö kûndiɛ nə̈ sə̈ Jezü. Andjë vrô alə̂ba ndə̂ andjê ëpâ kûndiɛ nə̈, kə̈ mbô rə̂ pä Jezü a pâ yê. 36Ndə̂ Jezü âsə̈ ro, azü sə̂ lakə̂ vro alə̂ba ndə̂ andjê pâ köbo tchâtchu yê. 37Ndə̂ Jezü âsə̈ wutu ndola gö ndə̂ Jerûzalêmo, lə̂ köbo ndə̂ âjrê tə̂ aga ndə̂ a-Olivï, kpûlû adjisîpili ndə̂ yê sɨ̂sɨ̈ la mômô. Andjë sə̂ lakə̂ ta wârə̂ ngbôô lakə̂ voga Ndjapä bëte akpɨ̈ngbɨ̈ rə ndə̂ Jezü mbô rə̂ ânyë andjë wûn rə̂. 38Andjë tö rə̂ päkëdə̂: «Äwäpä Ndjapä e tchôtchô pö pâ Gbïɛ̈ ndə̂ tche nə̂ la rə̈ Gbölö Gbïɛ̈! Zɨtɨ su wä bhâ lafô, ânyë azə̈ vöga Ndjapä ndə̂ tche sə̂ pâ arə gbɛ̂#19.38 Nyë dɨ̈ Aps 118.26.!»
39Angâ afarizïɛ̈n ndə̂ andjë sə̂ lə̂ kpûlû azü nə̈ tô rə̂ sə̈ Jezü päkëdə̂: «Earə̂ kə̂ nyisə̂ rə, amö hro la adjisîpili ndə̂ zə̈ pä andjë ngbo ma andjê ëtâ!» 40Jezü tô rə̂ ndə̂nə̈ sə̈ andjê päkëdə̂: «Më tö rə̂ sə̈ nyê, âdə andjê ângbo ma andjê ëtâ, atäme âon-adje ngbôô!»
Jezü kɨ̈ tə̂ Jerûzalêmo
41Ndə̂ Jezü wûtu ndola gö ndə̂ Jerûzalêmo, tche wûn gö nə̈ kə̈ jêtə̂ kə̂ kɨ̈ tâ. 42Tche tö rə̂ päkëdə̂: «Jerûzalêmo, âdə mo âwunsə̂ köbo ndə̂ âza zɨtɨ su sə̈ mö angêta! Praâbalë angaâtə, âwû tə̂ zə̈ nə̂, köbo ndə̂kə̂ pa mo wun rə̂ wâbo-a. 43Bëte angâ alö âwutuadje ndə̂ a-earə̂ kə̂ kosə̂ zə̈ paladje tə̂ agbadja ndrotə̂ zə̈ râgbâ-ê, ânyë kə̂ takpadje ndə̂ zə̈ kperə̂ la kʉ̈ʉ̈. 44Andjê nunuadje mö tratralë la azü gö ndə̂ zə̈ gbɛ̂. Ngâ täme ndə̂ zə̈ balë kä wa bata pâ ngâ yê tee-a. Bëte lo nə̈ ndə̂ Ndjapä nə ndə̂kə̂ ji mö, mo wûn-âbo sə̂nə̈-a!»
Jezü grö a-earə̂ waɛ̂che lə̂ gbölö nda Ndjapä
(Mat 21.12-17; Mar 11.15-19; Jan 2.13-22)
45Pânə̈ Jezü lï lə̂ gbölö nda Ndjapä, tche jêtə̂ kə̂ gro a-earə̂ waɛ̂che, lakə̂ to rə̂ sə̈ andjê päkëdə̂: 46«Mbëtï Ndjapä tö rə̂ päkëdə̂: ‹Nda ndə̂ mê wadje tə̂ nda kə̂ voga Ndjapä#19.46 Nyë dɨ̈ Eza 6.7; Jer 7.11.›, praâbalë nyënyê ndə̂ nye nə̈, nyë mbô rə̂ batə̂ sə̂ tchô ndə̂ a-earə̂ ngbä zatə̂ andjê wü tâ!»
47Logbɛ̂, Jezü nyïsə̂ rə lə̂ gbölö nda Ndjapä. Agbölö a-earə̂ kə̂ wa ngela sə̈ Ndjapä, la a-earə̂ kə̂ nyisə̂ ndïɛ̈, la agbölö azü ndə̂ ajuîfu, pû köbo ndə̂kə̂ mbo rə̂ pä a won Jezü. 48Praâbalë andjë wûn-âbo sə̂ rə ndə̂ andjê mbo rə̂ ânyë kə̂ za tchë-a, bëte azü gbɛ̂ dëka tü andjê ndə̂kə̂ dje tchë.
© Wycliffe Bible Translators, Inc.