MAWUTO HA WASU 9
9
Ihaluka lya Saulo
(Maw 22:6-16; 26:12-18)
1Kyasia na Saulo kakaa keikoro mikoro fokudosa oloyo na iwaha walya wa kiloshyonyi kya Mndumii Kahenda kulya ko mkohanyi ang'anyi. 2Kambesa paruo tsehenda kulya Damasiko tsa kulya sinagogenyi, kundu, kakokya-pfo wandu wa njia ii wai womi ang'u waka, nawapfunge na iwaende na Yerusalemu. 3Kyasia echihenda ashikye kufui na Damasiko idi ngela pereseng'u ikamdung'anyitsya sa riti iwuka ipfo ruwehu. 4Nao kaho wanda kaicho ṟu lembia, “Saulo wu, Saulo wu! Nyi kili owa monjiterengya?” 5Nao kahamba, “Iyo nyi iyo wu mndumii?” Nao kahamba “Inyi nyio Yesu ichu okemterengya iyo. 6Kya indi kure nohende ipfo mṟinyi nochikaa uwio kindo kikuwaṟi iwuta.” 7Na wasoṟo walya wawerianyi nao wakahoṟoka-ho waangalali, ṟu wakaliicho walawone mndu. 8Saulo kakure alya wanda, kekitambaṟuo meso hake nalaidime iwona. Wakambada owoko wakamteteṟa wakamshitsa kulya Damasiko. 9Kakaa-pfo mkonu iṟaṟu a mpfu meso, ma alalya kindo ma inyo. 10Kyasia kulya Damasiko kukeri-pfo mndu o kiloshyony rina lyake nyi Ananyia. Mndumii kacha imbia oo kiwonyonyi, “Ananyia!” Nao kahamba, “Nyi iya njii hoi Mndumii.” 11Mndumii kambia, “Kekure nohende kulya njienyi i njideye rina nyi njihoṟotsu noshihe mndu awio rina lyake nyi Saulo o kulya Tarso ipfo mba ko Yuda. Cha kipfa nyi aipfo aiterewa. 12Nao nyi amewona mndu kiwonesyonyi ewio rina lyake nyi Ananyia keida na ipfo mba koke kecha imhekya owoko kundu nawuye-se iwona.” 13Ananyia kahaluo, “Ale Mndumii, njileicho kya msoṟo chu njewio nyi wandu wafoi chando aletana wandu waele wapfo wa kulya Yerusalemu shindo shiwicho shifoi. 14Na ili ai kunu na awewode pfinya awutye kulya ko wakohanyi wang'anyi yecha ipfunga iwo welaha rina lyapfo wose.” 15Kya indi Mndumii kambia, “Wada njia uhende-pfo, kyamba o ichu nyi anjikerye kisha kyako ndekisambuṟa nahende iduo rina lyako sumuhana na wandu wa masangeny na wamangi na wana wa isiraeli. 16Kyamba njechikaa njimloṟe shilya shimwendye nahende iwawiṟo kimaduma kya rina lyako chando kimbaṟi ishiwona shose.” 17Kyasia Ananyia kakure kahenda iida na kulya mba iya kamhekya mawoko kahamba, “Saulo, mowowama oko, nyi Mndumii anjiduma o Yesu chu alekuwonekya kulya njienyi kochicha kundu uwuye-se iwona noichuṟo Mumuyo Mwele.” 18Nalyo liyenyi kikamwowokia ipfo mesonyi hake cha nyi kuweho mawala kawuya iwona. Nao kakure kahenda ipatiso. 19Kakulia kando kairika, kakaa kulya ko walya wa kiloshyonyi wa kulya Damasiko mfiri yeikena.
Saulo aonguo mbonyi Damasiko
20Nalyo liyenyi kaonguo kya Yesu kulya masinagogenyi ke o nyi Mana o Ruwa. 21Walya waleicho ishi wakaṟihio mnu wose wakahamba, “Ichu chio ulya awei moterengya iwo welaha rina li kulya Yerusalemu? Na kimaduma cha ikyo kimwendie na kunu nyi kundu nawafunge na iwaduo ko wakohanyi wang'anyi.” 22Indi Saulo kaitika iṟingishya kapfulutsa Wayuda walya wawei kulya Damasiko nyashi kechiwanza ke ichu nyi Kristo. 23 Ko-meidaho mfiri sa ifoi Wayuda walya wakasanza kyama ke wambahe. 24Kya indi Paulo kamanya mtambo fowo wakawa wemlaya alya shichuminy mfiri na kio wambahe. 25Walya wa kiloshyonyi wakamwira kio wakamrundutsa alya omombohu lo mṟi wakamsotsya wanda na itimba.
Saulo awuya na Yerusalemu
26Nao kekishika kulya Yerusalemu kahesha ikulunga na walya wa kiloshyonyi, nawo wawekaa wemwowuo wose walaidikye ke nao nyi awei o kiloshyonyi. 27Nyio Barnaba kamwambya kamdaya wasu kawaongoya chando alewona Mndumii kulya njieny ke nyio alededa nao na chando awei yongwo rina lya Yesu kulya Damasiko alawode wuowu. 28Nao kakaa nawo handu hamu kulya Yerusalemu kechiida na iwuka. Kawa mokuhamba na pata ke nyi aihendelya rina lya Mndumii. 29Kahenda ideda na siṟi ya Wagriki na iwingana nawo. Nawo wakadeda kyama ke wambahe. 30Kyasia wanawawama wekimanya mbonyi tsi wakamduo kulya Kaisaria wakamdika Tarso. 31Nahong'u siṟi tsikakukaya na ofoṟo kulya Yudaya kose na Galilaya na Samaria wakakulunga mbika imu wechichumia weowuo Mndumii wakawonyo mwengeṟya kui wuamtsu wo Mumuyo Mwele.
Ainea achiṟo
32Kukashika nao Petro kechitengetatengeta njora tsose kahenda isoka na ko waele wawei kulya Lida. 33Handu halya kawona-pfo mndu ewio rina lyake nyi Ainea. Awelee kitaṟehu maka nyanya cha kipfa awei mumu shiwungo sho. 34Petro kambia, “Ainea, Yesu Kristo akuchiṟa. Kure noale kitaṟa kyapfo iyo kumonyi.” Oweṟe nalo kakure. 35Na wandu wai kulya Lida wose na kulya Saronyi wakambona wakahalukya Mndumii.
Tabita achiṟo
36Nahong'u na kulya Yope kuwepfo mka o kiloshyony ewio rina lyake nyi Tabita (nyi kimu na sariha.) Mka chu awei sa msanze mowuta mawuto mecha na isungusia shindo shetarama wakiwa. 37Kukashika mafiri halya kaluo kapfa. Nawo wekiidima imsanja wakamleṟya kulya kai. 38Nahong'u ili Lida koi kufui na Yope wa kiloshyonyi walya wameicho ke Petro nyipfondo ai. Nawo wakamdumya wandu wawi wemterewa ke nalatiṟe icha na kowo. 39Petro kakure kaduana nawo. Kekishika-pfo wakamdosa na kulya kai. Waka wakusu wose wakacha ihoṟoka alyando ai wechifuha na imloṟa kanzu na nguo tsilya Tabita awetsiwikye mandi ei nawo. 40Kyasia Petro kawafuna-ho wose kapfiria ndi katerewa aindukye mnying'a fulya kahamba, “Tabita kure!” Nao katambaṟuo meso hake kekiwona Petro kakuira kadamya. 41Nao kambada owoko kamhoṟotsa. Kekiidima ilaha waele walya na waka walya wakusu kambika oo oshangunyi lowo ai na moo. 42Kindo ki kikamanyika kulya Yope kulya mṟinyi fose wandu wafoi wakaidikya Mndumii. 43Kiidima Petro kakaa kulya Yope mfiri ifoi ai kanyi ko mndu ewio rina lyake nyi Simon ai msusi o njonyi.
Petro na Kornelio
נבחרו כעת:
MAWUTO HA WASU 9: KIM2
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Kimochi Bible © Bible Society of Tanzania, 2016.