LUKA 7
7
1Ammaa ideda madedo halya hake hose hakaida madunyi ha wandu, naalyo kakuidya na kulya Kapernaumu. 2Napfo kuwekeri-pfo mchili o siṟi ya wasikari ihana, aweluṟe msoṟo o koke kepfa, nao nyiawemkundi mnu. 3Mchili ulya kekicho sumu tsa Yesu, kamdumia wameeku wa ko Wayuda wamterewe nache, nachiṟe isinga lyake. 4Nawo washika alyando Yesu ai wakamterewa mnu wakambia, “Nyawaṟi Mndumii, kembutie kudo. 5Kipfa nyi akundi wandu wa mbaṟi yadu katana aluwikia na mba-i yeterewia.” 6Kyasia Yesu kahenda nawo. Ashikye haleshe na mba ya mchili ulya, mchili ulya kamdumia mbuya tsake wahende imbia, “Mndumii, ulakuwinyishe, kyamba inyi njiiho sa ochicha na koko noide shi ya kai lyakopfo. 7Nkyo kyaduma ngawona ke njilawaṟi icha na kopfo; indi kekuhambie idedo tupu, na msoṟo chu oko nechikuchia. 8Kyamba na inyi nyi mndu njimbike shi ya wuchili, na inyi mbewode wasikari wanjinyiye, na inyi ngawia ichu, ‘Henda,’ nao nyiechihenda; na ungi, ‘Njoo,’ nao nyiechicha, na kisinga kyako, ‘Henda wuta wuliwe,’ nao nyiecheewuta.” 9Yesu aicho ado kamṟihio, kaindukia mamwingi fulya fuwemwitung'atie kawawia “Ngamuwia nyo, ma ko wa Israeli njilemewone iidikia ling'anyi lidipfo!” 10Kyasia walya waledumo wawuya na kanyi wakakooya msoṟo ulya amechia.
Yesu aṟutsa mana o mka mkusu
11Kukashika ili lya ngama kahenda kundu ko mṟinyi fumlahe nyi Nainyi, na walya wa kiloshionyi kyake wakahenda nao na mamwingi fo wandu fufoi. 12Lilyandi aweshikye kufui na kichumi kya mṟi fulya, adi a ulya mndu mpfu ario kehenda dao kya patehu, nao nyiawei mana kimumu ko mae, nao nyiawepfiie mii; na wandu wa kulya mṟinyi wafoi nyi wawerianyi nao. 13Mndumii kekimbona, kamwichio wukiwa kambia, “Ma kulalie mai.” 14Katikiria hafui, kapaaya kitaṟa kilya; na walya warie wakatirima. Nao kahamba “Iyo manake, ngakuwia kure!” 15Mpfu ulya kakure, kadamia, kawooka ideda, nao kamnengya mae. 16Wakawado nyi wuowu wose wakaidapfuma Ruwa wehamba “E lae; kodu komekure mwikimbi o Ruwa ang'anyi, na Ruwa amesahia-ng'u wandu wake.” 17Mbonyi-tso tsake tsikadung'ana kulya Uyuda kose na kulya-ndo kukinganyi napfo kose.
Ndumi ya wuka ko Yohane mpatisi
(Mat 11:2-19)
18Kyasia walya wa kiloshionyi kya Yohane wakahenda imwongoya shose. 19Kyasia Yohane kalaha wa kiloshionyi kyake wawi, kawaduma ko mndumii wahende imbesa “Iyo nyi iyo ulya a mhambe ke nyi echicha, ang'u luwedie ungi?” 20Wasoṟo walya wekishika kulya koke wakahamba “Yohane mopatisa nyi aluduma kopfo wai kakuwia-le wai, Iyo nyi iyo ulya a mhambe nyiechicha ang'u luwedie ungi?” 21Na saa iya tichi Yesu kachiṟa wandu waluo ndaaṟe wafoi na maṟishi hawo, kawawuta na mumuyo mbicho na wapfu-meso wafoi kawewasaṟia kawaambuṟa. 22 Kahaluo kawawia “Kuhendyenyi muongoye Yohane ishi moicho na iwona mkawewona Wapfu meso aiwa wai iwona, wai iriteka na iwa wai ichumia, wawodo nyi saka wai iheṟemka, wapfu madu nyi wai iicho, wapfiie nyi wai iṟutso, na wakiwa wakaongoyo mbonyi tsiwode sia. 23Wungusu ulya alamsukie nyi inyi.” 24Walya waledumo nyi Yohane wamehenda, Mndumii kawooka ideda na mamwingi fulya fo wandu kya Yohane “A nyikiki mlehenda yambuya kulya nuka; ngesa nyi kiwale kiweisingitso-singitso nyi otanu? 25A nyi kiki mlehenda yambuya-pfo; nyi mndu aṟee nguwo tsa kimamile ngesa? Walya waṟṟe nguwo tsa shimamile wakuleheshie, nyi mbenyii tsa wamangi wai! 26A nyi kiki-se mlehenda yambuya; ngesa nyi mdedi o Ruwa Ee wo ngamuwia, nyi aidie na wadedi. 27 Icho nyio sa awemṟehie ke Ambuya, ngaduma msu oko oshungunyi lopfo, nao nasungusie njia yapfo oshangunyi lopfo. 28Nyi ngamuwia Ipfo ko iwo wawafee nyi waka, kuipfo mdedi o Ruwa ang'ang'anyi na Yohane-pfo. Kyaindi, ichu ai mtutu o wose ipfo wumanginyi wo Ruwa, nyi ang'anyi kota-o.” 29 Na mamwingi fulya fo wandu fokiicho fudo, na wasanyi wa okamba, wakapatisio wupatiso wo Yohane. 30Kyaindi Wafarisayo walya, na walaanyi wa wuwawaso wakatahacha kyaama kya Ruwa wawenyi, kilya Ruwa awekundi, walapatiso nyio. 31“A wandu wa oshari-lu nyi njiechiwafananyisha na kiki? Nyi wafananyi na kiki-wo? 32Nyi wafananyi na shiwana shidamie tumo shechilahana shehamba ‘A ili lomemkapa mtoṟiṟo, nanyo mulashine nyiki; lomemfihiṟia, nanyio ma mlafuhe nyiki?’ 33Kipfa nyi kulecha Yohane Mpatisi alaweelya mkate ma inyo mvinyo, nanyo mkahamba nyi amosose nyi mumuyo mbicho! 34Manomndu kacha, echilya na inyo, nanyo mkahamba aichu makilya na makinango mvinyio, nyi mbuya ya wesana okamba na wenyamaṟa! 35Na mṟango ulya nyi ekededyo nyi wana wake wose!”
Yesu ai kanyi ko Simeon Mfarisayo
36Kyasia umu-ho o Wafarisayo kacha imterewa ke nahende ikuliia shelya kulya koke; nao kacha kadamia-pfo. 37 Adi aichu mka o kulya mṟinyi ai monyamaṟia Ruwa, aleicho ke nyi adamie kiliionyi kya choonga ipfo mba ko Mfarisayo ulya, kacha naho arie kichupa kya alabastro kiwode mafuda hepfaama. 38Kacha ihoṟoka alya numa ya madende hake kechilia, kawooka ichoweṟa madende halya hake na mchenyeṟe iya; kawuya ihaanguo na njui tsa ipfo mdonyi koke. Amiidima ado kakomba-komba madende halya hake, kahashia mafuda halya hepfaama. 39Kyasia Mfarisayo ulya amlahie shelyenyii kekiwona ado kahia mrimenyi foke amonyi kehamba “Kokoya ichu nyi ai mdedi o Ruwa, nyi awechimanya ke mka-chu nyiu, na mbaṟi yake nyi ida, ke nyi mka mnyamaṟi!” 40Yesu kahaluo kambia “Simon oko, njiwode kindo kyako njiikuwia.” Nao kahamba “Mlosha, kuhambie, mwaaria.” 41“Kuwekeri-pfo wandu wawi wai wasile wa mndu moakuya, ulya umu awode sile yake ya shilingi mahana hatanu, na ulya ungi ya shilingi makumi hatanu. 42Nawo walawone kemtaa, nao kawadeea sile tsilya wo wawawi. Kyasiang'u nyi uhya echimkunda ngoseṟa.” 43Simon kamhaluo kahamba “Ngakusaṟa na ulya aledeeyo sile ifoi-ko.” Nao kambia “Nodumbuo sungusihu teṟe.” 44Kyasia kekiindukia mka ulya kawia Simon “Uwonyi mka-chu? Inyi ngamekuchea na kunu mba kopfo, na iyo onnenga ma mṟinga fosanjia madende hapfo. Nao kyake nyi achoweṟa madende hako na mechenyeṟe, kawuya kahaanguo na njui tsa ipfo mdonyi koke. 45Ma omenjikomba-kombapfo na kiwookia ngacha, ameda ikomba-komba madende hakopfo. 46Ma omenjishia mapfuda kunu mdonyii fokopfo; nao nyiashia madende hako mafuda hepfaama. 47Kipfa kya ikyo nyi ngakuwia-ng'u O nyi ambute njonyamaṟo tsifoi, kyamba nyi amkunda mkundie fung'anyi; kyaindi ichu awuto kyake kitutu nyi awekunda mkundie mtutu.” 48Kawia mka ulya “Njonyamaṟo tsapfo tsamewuto.” 49Kyasia walya wadamie nao kilonyi kya shelya, wakawooka ideda ipfo mrimenyi yawo wehamba, “Nyio-u ichu katana awuta wandu njonyamaṟo?” 50Nao kawia mka ulya “Nyi wuidiki wopfo wokukiṟa; kuhendieng'u na kipuo.”
Waka waleoshana na Yesu
Kimochi Bible © Bible Society of Tanzania, 2016.