LUKA 8
8
1Kukashika ili numa-numa, nao kawa motengeta mamṟinyi na shimṟinyi sha wandu kechilosha na yonguo mbonyi tsiwode sia tsa wumangi wo Ruwa arianyi na walya ikumi na wawi. 2 Na waka wengi sa walekiṟo mṟufu mbicho na ndaaṟe nyi wawerianyi nao; nyi Maria, amlahe Magidala, nyio ulya alechiṟo mṟufu mbicho mfungade. 3Na Yohane, mka o Kusa, nyi awei msoṟo mokalia shindo sha Herode, na Susana, na wengi-se wafoi wawekemtarama na shindo shawo sha nga.
Mfanano fo mkumbi o mbeu
(Mat 13:1-9; Mar 4:1-9)
4Lilyandi wandu wafoi walekumbuhanana wawuka mṟinyi yawo, kadeda nawo kui mfanano. 5“Mkumbi mokumba mbeu alehenda ikumba mbeu tsake, na lilyandi awekeri ikumba, maata tsikaoloka mbai ya njia tsikachumo-chumo, na shilehe shikacha itsitola shikamaa-ho. 6Tsingi tsikaoloka ihohu lya iṟaṟa, tsamedo tsikawuya yuma, kifa kulawei-ho mchoweṟa. 7Tsingi tsikaoloka mshenyi, msha iya ikadosana natso ikatsichoronguo. 8Na tsingi tsikaoloka terinyi njicha tsikado tsikang'ana, makumbienyi hatso, imu ikakumbia ihana.” Kekiidima ihamba ado kadeda na ṟu ling'anyi kahamba “Ichu ai na madu heicho naicho!”
Kitewe kyelosha kui mfanano
(Mat 13:10-17; Mar 4:10-12)
9Kyasia walya wa kiloshionyi kyake wakacha imbesa mbonyi tsa ifanano lilya nyiiwe tsa iki. 10 Nao kahamba “Sa wai wainenge imanya mbonyi tsa kiṟika tsa wumangi wo Ruwa nyinyo; indi iwawengi nyi kui mafanano, kundu ma ili wewona walawone, na ili wechiicho walamanye.”
Yesu atambahaluo mfanano fo mkumbi o mbeu
(Mat 13:18-23; Mar 4:13-20)
11“Na ifanano lilya nyi ili; mbeu tsilya nyi idedo lya Ruwa. 12Na tsilya tsa mbai ya njia nyiwo iwo weadanyia; numa Satana kacha iwuta kidedo kilya ipfo ngoonyi tsawo, kundu walawone wechiidikia wakiṟo. 13Na tsilya tsa ihohu nyi iwo wekeicho idedo lilya wakaliwada na sia, indi kindo walawode nyi mri, nyi wandu wekeidikia oweṟe kitutu, na kiheri kya mahesho wakakuletsana-ho. 14Na tsilya tsiolokie mshenyi nyi iwo wekeadanyia idedo, wakahenda ishingio nyi makusaṟo ha wukiwa na masaa na malango ha moo-fu, walakikumbie ndunda. 15Indi tsilya tsa terinyi njicha, nyi iwo wekeicho idedo lilya, wakaliwada na ngoo njilalutsu wakakumbia ndunda na itirisia.”
Taa injiwike shiya kisoṟo
(Mar 4:21-25)
16 “Ma kuipfo mndu echiatsa taa naipfinyikie nungunyi ang'u naiwike shi ya kitaṟapfo; indi nyi echiiwika kidi-hu kyemasa taa, kundu orio wandu waida napfo wawone sayo. 17 Kipfa kuipfo kindo kii kipfinyike keeda kilapfunuka numapfo, ma kindo kii kiṟike keeda kilamanyika na iwoneka na patapfo. 18 Kyasia ambuyenyi mnu chando mokeicho; kipfa ichu awode nyi echinengo, na ichu alawode, ma isho ekekusaṟa nyi shake necheshisoko.”
Mae na wana wa mae wa Yesu
(Mat 12:46-50; Mar 3:31-35)
19Alyando awei kukawecha naho mae na wana wa mae, indi walaidime ishika afui nao, nyi kipfa waleshingio nyi mamwingi fo wandu. 20Kawio ke mayo na wana wa mayo nyi wahoṟoki oo njia, nyi wakundi ikuwona. 21Nao kahaluo kawawia “Wama oko na wana wa wama nyi iwo wekeadanyia idedo lya Ruwa wakawewa moliwuta.”
Yesu awawasa masinanu hatsie
(Mat 8:23-27; Mar 4:35-41)
22Kyasia naalyo mfiri fumu kadooya ngalawenyi arianyi na walya wa kiloshionyi kyake; kawawia “Ndenyi luambadie kulya kya ora lungi lo nduwa.” Wakahenda. 23Wechihenda wado na ngalawa iya, nao kalaa mado. Naalyo kukacha otanu sa lwafinya kulya ipalyipalyi-hu, wakawona ngalawa iya iichuo mringa, wakawado nyi fowa. 24Wakahenda imwamtsa wakahamba “Mndumii Mwaaria, Mndumii Mwaria, nyi ideka-ng'u lui!” Nao kakure madonyi kadedia otanu lulya na masinanu halya ha mṟinga; nasho shikatsia sau-sau, kukahutsa olele. 25Nao kawawia “A iidikia lyanu nyiiku li?” Wakaowuo, wakaṟihio, wakawiana wo wenyi na wenyi “A ulalu nyiu-wo ichu, ili awawasa otanu na mṟinga nasho shikawemwicho?”
Yesu achiṟa mndu awodo nyii mṟufu mbicho
(Mat 8:28-34; Mar 5:1-20)
26Wakaambadya, wakashika ohambehu lo oruka lo Wageraseno, nalo nyi mambatsana na Galilaya. 27Kawuka ngalawenyi kadooya kulya orukenyi, kakumbuhana mndu o kulya mṟinyi ai mosose nyi mṟufu mbicho, alawekeṟa-se ma nguwo handu ha mfiri ifoi ma ikaa kundu ko mba, shile na shifunyi tupu. 28Kekiafuṟa Yesu kafihiṟa kamwolokia kadeda na ṟu ling'anyi “Nyikiki njiwode na iyo Yesu Mana o Ruwa ichu ai huye ya shose? Ngakuterewa ma ulantuure.” 29Kipfa nyi awemewawasa mṟufu ulya mbicho nalekane na mndu ulya; cha kipfa nyiawemwosose, kakuruo-kuruo shiheri sa shifoi kawa moringo ampfunge na mshe na matima, nao nyiawekedumbuo-dumbuo shilya shiwempfungie, kawa motengesho-tengesho nyi mṟufu ulya kundu ko nuka kulaai wandu. 30Yesu kambesa “Rina lyapfo nyiu?” Nao kahamba, “Nyi Legionyi (isiṟi).” Kyamba awemwosose nyi waṟufu wawicho wafoi. 31Wakamterewa nalawawawasie wasoke ngolokionyi. 32Napfo nyi kuwekeri-pfo poo lya nguwe tsifoi tsiweiliso alya fumvunyi; wakamterewa nawainenge momu wahende itsiososa-tso. 33Kawainenga momu. Naalyo mṟufu iya ikawuka mndu ulya ikahenda yosoosa nguwe tsilya. Poo lilya likapiṟimika kulya msaṟi-hu, likaoloka kulya nduwenyi, likapfumbo nyi mṟinga. 34Walisi walya wawona wado, wakadicha, wakashitsa mbonyii-tso kulya mṟinyii na ko wademi. 35Wandu wakakure wahende yambuya kilya kyawutika, wakashika alyando Yesu ai, wakakooyaho mndu ulya alewuto waṟufu walya wawicho adamie; aṟee nguwo, apfudie, ai alya madendenyi ha Yesu; wakaowuo. 36Na walya wawewonyii wakawaongoya chando ulya awewodo nyi waṟufu wawicho achiṟo. 37Na wandu walya wose walee mṟasenyi ya Wageraseno wakamterewa nawuke kulya kowo, kipfa lyandi walehoyo nyi wuowu wung'anyi; nao kadoya ngalawenyi, kawuya. 38Msoṟo ulya alewuto waṟufu walya wawicho kamterewa ke nakukaye nao. Nao kamsama kambia. 39“Kuwuuye na kanyi; nohende yonguo shindo-shi shing'anyi shidi Ruwa akuwutia.” Nao kakuhendia; kawa moonguo kulya mṟinyi kose shilya Yesu alembutia.
Mana o waka o Yairo na mndu mka umu wachiṟo
(Mat 9:18-26; Mar 5:21-43)
40Lilyandi Yesu alewuya, mamwingi fulya fo wandu fukamwambia, kipfa nyi fuwei imbedia fose. 41Adi a ulya mndu, rina lyake nyi Yairo; kacha naho, nao nyi awei mwitoṟi o mba yeterewia. Kakuhutsa oo madendenyi ha Yesu, kamterewa nahende kulya kanyi koke. 42Kipfa nyi awewode mana kimumu o waka aweshitsie maka ikumi na iwi, nao nyi aweshikie hafui na inenuka. Nao kechihenda mamwingi fulya fuka-peṟehetsana nao. 43Na mka umu aweluo ndaare ya samu handu ha maka ikumi na iwi, awemarisie shindo shake piu ko wahanga nalaidimike ichiṟo nyi mndu. 44Kacha kya ipfo numa, kapaaya mambo tsa nguwo tsake, naalyo lienyi ndaaṟe iya ya samu ikamsia piu. 45Yesu kahamba “Njiu anyipaaya lanye?” Wechikana-kana wose Petro na wodoe wakahamba “Mwaaria, nyi mamwingi-fu fuipeṟe-hetsana na iyo na ikutsindika.” 46Yesu kahamba “Kuwode mndu amenjipaaya, kindo ngamanya nyi pfinya yanjiwuka.” 47Mka ulya awona kechiidima imwowyapfo, kacha naho kechidedema, kamwolokia ndenyi, kamwongoya alya kiidi kya wandu wose kimarete kampaaya, na chando awechia oweṟe lulya. 48Nao kambia “Wuyo nyi moo manoko, kiidikio kyapfo kyamekukiṟa; kuhendie kipuo.” 49Alamhutsia ado, adi a ulya sa awuka kulya ko mwitoṟi ulya o mba yeterewia kawia Yairo, Mana ulya opfo amenenuka, ma kulawinyishe-se mlosha. 50Yesu aicho ado kamhaluo “Ma ulaowuo, idikia tupu, na echichia-se.” 51Kekishika kulya kanyi nalalekie mndu echiida nao kulya mba, shile nyi Petro na Yohane na Yakobo, na ndee o mana na mae. 52Nawo nyi wawekeri ifihiṟa wechimkapya shilio wose. Nao kahamba “Mulafihiṟe, kipfa amepfapfo, nyi alee mado!” 53Nawo wakamseka mnu, kipfa nyi waweichi nyi apfiie. 54Nao kambada owoko, kamlaha kahamba, “Iyo mana, kure!” 55Mumuyo foke fukambuya, kakure. Kawawasa nainengo shelya. 56Wafee wake wakaṟihio. Nao katutuma walawie mndu ikyo kyawutika.
Yesu aduma walya kumi na wawi
(Mat 10:5-15; Mar 6:7-13)
Kimochi Bible © Bible Society of Tanzania, 2016.