Intaliko 14
14
Abramu atula Loti
1Imfumu Amurafelo uwa mu Shinari, Arioki imfumu ya Elasara, Kedoralaomere imfumu ya Elamu nu Tidala imfumu ya mu Goyimu, 2imfumu-nye zyozyo zyakatusizye isumo nu Bera imfumu ya mu Sodomu, Birsha imfumu ya mu Gomora, Shinabu imfumu ya mu Adama, Shemeberi imfumu ya Zeboimu, nga ni mfumu ya Bela (akuli kuti Zoaria). 3Wonsi waa awalwisyania mu mupata wakwe Sidimu (e sumbi wa muchele), 4Pa myaka ikumi na yiwili wawombelanga Kedoralaomere na mu mwaka wa chiti-kumi ni myaka yitatu awamupiluchila. 5Mu mwaka wa chiti-kumi na yini Kedoralaomere ni zya-mfumu zino zyaiinji nawe azichimvya Refaimu mu Ashitaroti-Karanayima, na wa Zuzimu mu Hamu, awa Emimu mu Shave-Kiriatayima, 6na wa Hovi mu mwamba wawo uwa Seyiri ukufika ku Eliparani mwe mu mpaka wa mavunje; 7awanyoka awiza ku Enemishipati (akuli kuti Kadeshi) nu kuchimvya insi yonsi iya wina-Ameleki, ni nsi ya wina-Amori, wano wikalanga mu Hazazoni-Tamara.
8Achaleka imfumu ya mu Sedomu, iya Gomora, iya Adama, iya Zeboimu ili mfumu ya mu Bela (akuli kuti Zoara) awakatuka awaya awayisanzya ku musika mu mupata wakwe Sidimu, 9awalwisya Kedoralaomere imfumu ya mu Elamu, Tidala imfumu ya mu Goyimu, Amurafelo imfumu ya mu Shinari mu Ariyoki imfumu ya mu Elasara, imfumu zini zyalwanga ni mfumu zisano. 10Ukuwa mu mupata wakwe Sidimu mwalinji ivizinji vyakwe tala monsi-nye; pano imfumu zya mu Sodomu nu Gomora zyasamazile wamwi awaponela mwenemo, wano wasyazile, awasamalila ku mwamba. 11Achaleka awalwani awasenda iviya vya mu Sodamu nu Gomora ni chakulya chawo chonsi, awapita. 12Awasenda nu Lati umwana wa munyina wakwe Abramu wino wikalanga mu Sodomu, ni viya vyakwe, awapita.
13Achaleka wenga wino wapulumusile aya anena Abramu umu Heberi, wino wikalanga mu musitu wakwe Mamre umwina-Amore, umuoyina wakwe Eshikolo nu Aneri. Waa walwanga isumo apaliponga nu Abramu. 14Walanga Abramu wivwa kuno uwakazi kakwe walemilwe uwuzya, asenda awalumendo wakwe wano wakwatilwa mu ng’anda yakwe, imyanda yitatu ni kumi na kananimonsi (318), awakonka ukufika ku Dani. 15Pa mpindi ya wusiku ayankania ivita vyakwe awawinga awalwani nu kuwakonka awasampa ukufika ku Hoba, kambazwa kakwe Damasika. 16Awela ni viya vyonsi vino vyasenzilwe apaliponga nu Loti ni viya vyakwe, na wanachi wakwe, na wantu wakwe wonsi.
Melekizedeki apepa Abramu
17Awala wawela kuno wachimvizye Kedoralaomere ni zya mfumu zinji zino walinji nazyo, imfumu ya Sodomu iya mukumusunkania ku mupata wakwe Shave (akuli kuti, umupata wa mfumu). 18Nga Melekizedeki imfumu ya Salemu itwala ichakulya nipala; walinji we sikapemba wakwe Leza Tengenene. 19Amupepa ati, Umupepwe kwe Leza Tengenene e katumbula wi yulu ni nsi awewe Abramu; 20Swinya e Leza: Tengenene, wino wawinga awalwani mwi kasa lyako achindikwe! Achaleka Abramu wamupile ichachitikumi kwe wila chintu. 21Achaleka imfumu ya Sodomu yanenile Abramu iti, Ntayila wantu, ukuwa usende iviya vyonsi. 22Ukuwa Abramu watolelezile imfumu ya ku Sodomu ati, Nalafile kali ku Mfumu e Leza e Tengenene, ekatumbula wi yulu ni nsi 23ukuti ntanga nsende umunyeta, nanti achakunyepela indyatu-nye nanti a chintu chako chimwi, amuno ungavwanga uti, Nachindamika Abramu. 24Ntanga nsende nkandi chino awalumendo walya ni chankanwa ku wantu wane wapisile nani; leka Aneri, Eshikolo, nu Mamre wasende ivyankanwa.
נבחרו כעת:
Intaliko 14: WWN82
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Chinamwanga Bible © United Bible Societies, 1981.