Intaliko 15
15
Leza alayana nu Abramu
1Pansizi pa vintu-nye vyoo, kwizile izwi lya Mfumu e Leza mu chilota kwe Abramu aliti, Utatina, ne nkwela yako; ichilambu chako chiliwa a chikulu nkaninye. 2Ukuwa Abramu ati, Ye we Mfumu Leza, nga ulimpa chani, vino insi nu mwana wino angiza ampyane, fwandi Eliezara uwa ku Damasika awino alimpyana? 3Achaleka Abramu watili, Utampa ikwata, achaleka umuzya wa mu ng’anda aliwa mpyani yane. 4Izwi lya Mfumu e Leza lyayile kwe weliwe aliti, Umuntu wenyewee ataliwa mpyani yako; umwanako-nye awino alikupyana. 5Amufumizya panzi amunena ati, Lola mupela uwazye intanda, ndi uli na maka yakuziwazizya. Achaleka amunena ati, Avino na wizikulu wako-nye waliwa. 6Achaleka asuwila Imfumu e Leza; nawe Leza ati, walungamika.
7Amunena ati, Ne Leza wino wakufumizye mu Uri munsi ya Kaladiya mu kukupa insi yoo ukuti uyikale mwenemo. 8Ukuwa ati, We Mfumu Leza, nga ingamanya wuli ukuti ndiwa ni nsi? 9Amunena ati, Undetele umwana wa ng’ombe uwa myaka yitatu, nimbuzi yamyaka yitatu nusukusuku wamyaka yitatu, intozi ni nkunda. 10Achaleka amutwalila vyonsi-nye vyoo, swinya aviputulania pawili awavipawunkania ku viwuye. Ukuwa ataputuzile ivinyunyi mu vipya viwili. 11Na mawimba ayika ukuti yalye inyama, ukuwa Abramu ayawinga.
12Pano ilanzi lyati aliwawila, Abramu aponechela; lolani ukutinia kwa mfinzi nkulu akumuponela. 13Imfumu e Leza amunena ati, Manya kuno ikwata lyako liliya munsi yinji, yino isi ansi yawo, waliya wakawe awazya kweneko, waliya wakatekwe ku mpindi ya myaka imyanda yini (400); 14ukuwa ndipanzya umwiko wuno wiza wawombela, pansizi walifuma ni nsawo mvule. 15Ukuwa wenji ulipita umutende kwe waso, ulifwa mu nkulo nzima iya wukote. 16Ukuwa awankwatwa ya chitini awano waliwela: amuno ukuwifya kwa wa-Amori kutani kusile.
17Alila ilanzi linjila nu kufita kwafita, lolani, akwiza inyungu ya mulilo ikususya ichusi nu lukozyo lukwaka, nu kupita pakasi pa viputulwa vyovyo vino wankinie. 18Mu wanda-nye wowo Imfumu e Leza walayilizizye Abramu ati, Ndipa insi yoo ku wizikulu wako, ukufumilila ku luzi lwa mu Ijeputi ukufika ku luzi lukulu, Yufureti, 19ansi ya wina-Keni, wina-Kenezi, wina-Kadimoni, 20wina-Hiti, wina-Perezi, wa-Refaimu, 21wina-Amori, wina. Kenani, wina-Girigasi, na wina-Jebusi.
נבחרו כעת:
Intaliko 15: WWN82
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Chinamwanga Bible © United Bible Societies, 1981.