Hogusra 4
4
1Egi Adam hijawira Ewa hikaraperes‐shana egi waujganagshana, egi Kain jhuna, egi wena: Jehowa eja howaji wang‐hisha harnigaja.
2Egi shige khinubra Abel jhuna. Egi Abel jhasga hirakaraisha herena, eshi Kain max‐hikishereisha herena.
3Egi hagoreisha hahi wauinena, Kain mainja washa haxebhiga shesge Jehowa nab‐higiruxaj‐shana.
4Egi Abel hishge jhasga hornihe harnieja jorni jhuinesha hoshiura hagarnihina. Egi Jehowa Abel egi nab‐hiruxaj harnira najogija hiroruxuj‐shana.
5Eshi Kain egi nab‐hiruxaj harnira inke najogija horuxujnina. Egi Kain mashja wogitegshana egi wakhujinakshana.
6Egi Jehowa Kain wagena: Jagu‐u wonigitegshe? Egi jagu‐u shawakhushe?
7Inke de‐shesgarnina, phi ragi, ningish’ag hiranana, egi inke phi ranigi washa woishanara jhirobeja ningigiakshana egi washa woishanara roniguankshana, eshi warnaje.
8Egi Kain khinubra Abel hokarakit’ena. Egi wauinena jaja maxeja hahiregi, Kain khinubra Abel hakirana egi d’ehina.
9Egi Jehowa Kain wagena: Hajinja rakhinubra Abel niheshe? Egi wena: Inke hiaperesnina, jasge ne‐hakhinubra hirakara hajeshe?
10Egi Jehowa wena: Jagu sh’ushe? Rakhinubra wa‐i harnira manegi howahi hingi‐uwana.
11Egi higuana managre washoshishig howenikjanena, e ishab‐anaga egi rakhinubra wa‐i harnira rajgana nab hashininegi howahige esge.
12Jaja max horashugi howarehi‐kjanare epa homashja harnira inke harnigi xebnikjanena. Ruxaire‐ranianaga egi hojaina horaje ma hihagregi ranikjanena.
13Egi Kain Jehowa wagena: Hawe harnira xetegaja inke hiwanuxshagi un‐duxurugnina.
14Horuxujre, hamb de‐e managre hishjarnieja hishawahas‐shana, egi hishja hashinira nuangi‐xawankjanena, egi ruxaire harnianaga egi hojaina horajekjanena, higu hisha hiegi d’ewinkjanena.
15Egi Jehowa wagena: De‐e hawau higu peshe Kain d’ehigi, shagowiha hawinsh wagikarakje hirekjanena. Egi Jehowa Kain wijanti una, nigete hisha hiegi d’ehirege hirege.
16Egi Kain Jehowa hishja jowehieja hihinabshana, egi Nod mainja jhina, Eden wiaxebhueja.
17Egi Kain hijawira hikaraperes‐shana, egi waujganagshana egi Xanox jhuna, egi Kain jhinag hisha una, egi jhinagra rash rajgi hinigra rash harnira hanigigina Xanox higena.
18Egi Xanox Irad hagarninena, egi Irad Mahuiael hagarninena, egi Mahuiael Methusael hagarninena, egi Methusael Lamex hagarninena.
19Egi Lamex nupiwi khanakshana, hisha rashra Ada higairena egi hijanena Silla higairena.
20Egi Ada Jabal harnina, e waiperi hijhi hojhira shesgera hianj‐hirena egi je harninegi shesgera.
21Egi khinubra rashra Jubal higairena, e nainawa rujiwijiwira egi hishushug harnira shesgera harnaj hianj‐hirena.
22Egi Silla hishge Tubalkain harnina, e mas‐si egi maswirokhu uisha herena. Egi Tubalkain hinugjabra rashra Naema higairena.
23Egi Lamex hijawiwahira wawagena Ada egi Silla. Ho harnira naxguwine, Lamex hijawi‐niwina hoit’e harnira harnaxguwine, wangra hisha hingishanagi d’e hakjanena, huintekhi hojinjira hisha d’ehakjanena.
24Egi Kain shagowi hawinsh wagikarakje hirekjanegi jasgegi Lamex kerepana‐shagowi‐anaga egi shagowi hashana hawinsh wagikarakje hiranana.
25Egi Adam hijawira hikaraperes‐shana, egi hojinjinig hisha jhuna egi rashra Seth higena, wena: Maura su hijanesha hunk’ungaja Abel hornakshi, e Kain d’ehira.
26Egi Seth hishge hojinjinig hisha hagarninena, rashra Enos higena, epa wankshigra Jehowa rash harnira wihokhu hajia‐rairena.
Published by the American Bible Society in 1907.