YAHYA 7
7
A'lampai Isa mange ri Yerusalem langanre-nganre ri sapo ta'ata' taha kaju
7:1-13
1Rimaenna injo Isa a'lingka-lingkai a'lili' ri Galilea, saba' Ia gelei a'ra' a'lili' ri Yudea, saba' ri injo lohe ponggaha Yahudi tulusu a'ra'i lahuno Isa. 2#Im. 23:34; Ul. 16:13Rihattu injo seppa'mu allo panganre-nganreanna tau Yahudi inni ri sapo ta'ata' taha kaju. 3Jari appauimu uranna siana' Isa mange ri Ia, ”A'lampako battu ri tampa' inni na mangeko ri Yudea, solanna ana'-ana' gurumMu lajanjang todo'i sikonjo panggeokang laMugeokang injo. 4Saba' gele rie' manna sitau a'bua' panggeokang ri tampa' tassa'bu-sa'bu, ampa a'ra'i ripakala'biri ri a'rakanna tau lohe. Ampa pade' Kau a'ra' a'bua' nuappakonjo, pappijanjangangi kalemMu mae ri tau lohe.” 5Saba' manna urang siana'Na gelei tappa' mange ri Ia. 6Jari appihali Isa mange ri iyai, ”Gelepai larapi' hattungKu, mingka ri kaui tulusu larie' hattu. 7Lino inni gele akkulle liking mange ri kaui, mingka ia likingi mae ri Nakke, saba' Nakke assa'bi passala ri ia ma'nassana sikonjo jamaanna nudaa. 8A'lampamoko mange ripassua'-suarang injo. Nakke gelea laa'lampa mange konjo, saba' gelepai larapi' hattungKu.” 9Appakonjomu pauNa mange ri iyai, na Ia ammari todo'i ri Galilea.
10Mingka rihattu a'lampainnamo urang siana'Na mange ripassua'-suarang injo, manna Ia a'lampa todo'i mange konjo, gele lapappiissekang kalenNa. 11Sikonjo ponggaha Yahudi labojai Isa ripassua'-suarang injo na lakua, ”Ri anteei mae Isa?” 12Ritangnga-tangngana tau lohe injo kalanggerangi bisi'-bisi' ripassala'na Isa. Rie' tau appau, ”Ia tau baji'.” Mingka rie' todo' tau appau, ”Gele, Ia appakalingui lohe tau.” 13Gele rie' manna se're tau barani appau lambusu ripassala'na Isa saba' mallakinna mange ri ponggaha tau Yahudi injo.
Passa'bina Isa ripassala kalenNa
7:14-24
14Rihattu attangnganamo passua'-suarang injo, Isa antama'i ri Sapo Allataala ampai ngajara ri injo. 15Manna ponggaha Yahudi Injo lannasa ngase' na appaui, ”Anteekamua tau inni anralang konjo pangisse'na nagelejuai appilajara!” 16Appihali Isa mange ri iyai, ”AjarangKu gele nubattu ripangisse' kale-kaleKu jua, mingka nubattu ri Tuassuro injo ri Nakke. 17Inai jua a'ra' lageokangi a'ra'Na, lalaisse'i apa ajarangKu inni nubattu ri Allataala, iyareka Nakke appau nubattu ri kalengKu to'jua. 18Inai jua appau-pau nubattu ri kalenna to'jua, ia a'bojai kala'birang tuju kalenna, mingka inai jua a'boja kala'birang mange ri Ia ri tuassuro injo ri ia, ia nabai na tide' nugele naba ri ia. 19Gelejua Musa maengi assare hukkung Tora' mange ri kau? Mingka gele rie' manna se're tau ri kau lageokangi hukkung Tora' injo. Ngura Nakke muparri-parri a'ra' lamuhunoi?” 20Appihali tau lohe injo, ”Ladongkokiko setang! Inaimo apparri-parri lalahunoKo?” 21Appihali Isa mange ri iyai, ”Se're jua panggeokang Kugeokang na kaliru ngase'ko. 22#Kej. 17:10; Im. 12:3Jari, Musa lapattantui solanna assunnakiko – sitoje'na sunna' injo ripakaramulana gele nubattu ri Musa, mingka assala'na nubattu ripuwa-puwata – na manna kaui pole risunna'ko ri allo Passambajangang! 23#Yah. 5:9Ampa rie' se're tau risunna' ri allo Passambajangang, solanna andai riadeli assituru' hukkung nulapabattu injo Musa, ngura kukukiko mae ri Nakke, kanara Nakke appakagassing tau garring ri allo Passambajangang. 24Akolalo appassala assituru' rinukajanjangang injo jua, mingka adelilalo lalang rikaadelang.”
Passisala pahangang ripassala pa'assalanna Isa
7:25-36
25Maenna injo lohemo tau Yerusalem appau, ”Gelejua Ia inni tau a'raki injo lahunoi? 26Mingka janjangi, Ia laloasai a'bisara na iyai gele juai appau manna sipali' mange ri Ia. Barang ponggahata baji'mu laisse'na ma'nassana Iamo Almase? 27Mingka ripassala'na tau inni ditte baji' riisse'na battu ri antee mae pa'assalanNa, mingka pariekanna Almase gele rie' tau laisse'i battu ri antee mae pa'assalanNa.” 28Rihattu ngajara'na Isa ri Sapo Allataala, appau bakka'i, ”Tantu muissekingKu na muisse' todo'i battu ri antee mae pa'assalangKu; mingka Nakke rie' mae konni gele battu ria'ra' kalengKu, mingka Nakke risuro ri Allataala tunaba gele injo muisseki. 29Nakke Kuisse'i, saba' Nakke rie' mae konni battu ri Allataala na Allataalamo assuro ri Nakke.”
30A'naha-nahaimu lalajakkali Isa, mingka gele rie' manna se're tau lauppai lakaraha Isa, saba' gelepai larapi' hattunNa.
31Mingka ritangngana tau lohe injo rie' lohe tutappa' mange ri Allatalla na lakuai, ”Ampa rie'mu Almase, barang laloheangang lapaa'jari nugele samara na nulapaa'jari injo Allataala inni?” 32Tau Farisi allangngere injo ribisi'-bisi'na tau lohe rinua'jari injo ripassala'na Isa, na kanara injomo imang ponggaha injo surang tau Farisi injo assuroi risikonjo pajaga ri Sapo Allataala lajakkalai Isa. 33Jari lakua Isa, ”Siso'di' kalemamo hattungKu larie' assurang-surang kau na maeng injo Nakke laa'lampa mange ri Tuassuro injo ri Nakke. 34La'bojaiko ri Nakke, mingka gelea akkulle muuppai, saba' geleiko akkulle ambattu mange ri tampa' pammariangKu.” 35Injomo saba'na allagarimu ponggaha Yahudi injo, lakua, ”Laa'lampai antee mae, sa'genna ditte gele akkulle lariuppa? Barang nulakuangang injo Isa lamange ri tau rieki injo ammari ri tanana tau dere intu, ri tau Yunani injo, langajara tau Yunani? 36Barang nulakuangang injo ri pauNa: Laa'bojaiko ri Nakke, mingka gelea akkulle muuppai, na: Geleiko akkulle ambattu mange ri tampa' pammariangKu?”
Ere poong katallasang
7:37-44
37 #
Im. 23:36
Ri allo kateppusanna, iamo intu rimata passua'-suarang injo, ammentengi Isa na appau bakka'i, ”Inai jua tirere, baji'i battu mae ri Nakke na nginungi! 38#Yeh. 47:1; Za. 14:8Inai jua tappa' mae ri Nakke, assimpole nulapau injo ri Kitta' Tangkasa: Battu lalang ri atina lanyo'lo'i eremata attallasa.” 39Nulakuangang injo Isa iamo intu Nyaha Allataala nulalatarima injo sikuanna tau tappa' mange ri Ia; saba' Nyaha Allataala injo gelepai rie', saba' Isa gelepai ripakala'biri.
40Rie' sikura tau ri tau lohe appilangngeri injo pau-pau inni, appau, ”Ia inni toje'i nabbi nularie' injo.” 41Rie' tau maraeng appau, ”Ia inni Almase.” Mingka rie' todo' tau maraeng appau, ”Gele! Almase gele battu ri Galilea! 42#Mi. 5:1Gelejua Kitta' Tangkasa appau ma'nassana Almase battui rilo'lo'ranna Daud na battu ri desa Betlehem, tampa' pammarianna Daud riolo.” 43Jari ammumbamu passisala pahangang ri tau lohe injo ri kanarana Isa. 44Rie'mo sikura tau ri iyai injo a'ra'i lajakkala Isa, mingka manna se're tau gele rie' tubarani latetengi.
Isa risa'bii ri Nikodemus
7:45-52
45Maeng injo muliangimu sikonjo pajaga ri Sapo Allataala mange risikonjo imang ponggaha surang tau Farisi, na rikuta'nangi, ”Ngura gele muerangi Isa?” 46Pappihalinna pajaga injo, ”Gelepa minang rie' tau appau assimpole tau injo!” 47Jari appauimu tau Farisi injo mange ri iyai, ”Barang manna kau laajara sala todo'ko? 48Barang rie' se're risikonjo ponggaha injo tappa' mange ri Ia, iyareka rie' se're tau Farisi injo? 49Mingka tau lohe inni gele laisse' hukkung Tora', mate laalle ngase'i pua!” 50#Yah. 3:1-2Nikodemus, sala se'renna battu ri iyai, nuriolo maemmu battu mange ri Isa, appau mange ri iyai, 51”Apa hukkung Tora'ta assare hukkungang mange rise're inni tau, rigelenapa rilangngere pauna na rigelenapa riisse' apa geo' sala maeng lageokang?” 52Appihali ngasekimu, ”Barang kau tau Galilea todo'ko? Paressai Kitta' Tangkasa lamuisse'i ma'nassana gele rie' nabbi battu ri Galilea.”
Bahine assangkili
7:53–8:11
[ 53Maeng injo muliang ngase'mu mange ri saponnai,
נבחרו כעת:
YAHYA 7: LAI_SLY
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
@LAI 2012 Indonesian Bible Society (Lembaga Alkitab Indonesia)