YAHYA 8
8
1Mingka Isa a'lampai mange ri Bonto Zaitun. 2Ngesalakalejuapai Ia rie'mu isse' ri Sapo Allataala, na sikuanna tau rie' ngase'i mange ri Ia. Ia attolongi na laajara ngase'i. 3Jari guru Tora' na tau Farisi injo ngerangi mange ri Ia se're bahine kauppaang assangkili. 4Lataro bahine injo a'bora tangnga ampai appau mange ri Isa, ”Guru, bahine inni kauppaangi assangkili. 5#Im. 20:10; Ul. 22:22-24Musa lalang ri hukkung Tora' lapassuroangi mae ri ditte ribundu'i batu bahine appakonjo injo sa'genna mate. Anteekamua panguppaTa ripassala inni?” 6Iyai lapau passala injo lasso'ri mange ri Ia, solanna nguppai se're lalang laappassala mange ri Ia. Mingka a'doko-dokoi Isa ampai lapaukiri karameng limanNa ri tana. 7Sungka'na tarru'-tarrusumo akkuta'nangi mange ri Ia, ammentengi Isa ampai appau mange ri iyai, ”Inai jua ri kau intu gele rie' dorakana, iamo kaminang riolo ambundu' batu mange ri tau bahine inni.” 8Maeng injo a'doko-dokoi pole ampai ngukiri ri tana. 9Mingka sungka'i lalangngeri ngase' pau injo, a'lampa tassitau-taumu guru Tora' na tau Farisi injo, pakaramula ri tukaminang toa injo. Sa'genna Isamamo kale-kalenNa surang tau bahine injo attaang ri tampa'na. 10Jari ammentengi Isa na appaui mange ri ia, ”Oe tau bahine, anteeimu mae? Gelejua rie' manna se're tau assare hukkungang ri kau?” 11Pappihalinna, ”Gele rie', Karaeng.” Jari appaui Isa mange ri ia, ”Manna Nakke gele todo'ko Kusare hukkungang. A'lampamoko, na pakaramula allo inni, andamoko anggeokang kadorakaang muliang.”]
Isa intu sinara'na lino inni
8:12-20
12 #
Mat. 5:14; Yah. 9:5 Appaui pole Isa mange ri iyai, ”Nakkemo sinara lino; inai jua minahang ri Nakke, ia gele laa'lingka lalang kalammang, mingka languppa'i sinara katallasang.” 13#Yah. 5:31Jari lakuaimo tau Farisi injo mange ri Ia, ”Ditte assa'bi ripassala kalenTa, passa'biTa gelei naba.” 14Lakua Isa mange ri iyai, ”Manna injo Nakke assa'bi ripassala kalengKu to'jua, mingka nabai injo passa'biKu, saba' Kuisse'i, battu ri antee mae assala'Ku na laantee mae lampaKu. Mingka kaui gele muisse', ri antee mae assala'Ku na laantee mae lampaKu. 15Kau appassala assituru' ukkuranna rupatau, Nakke gelea appassala manna rise're rupatau, 16na ampa Nakke appassala, injo nabai ta'rangKu appassala, saba' Nakke gele kale-kalengKu, mingka suranga Amma Tuassuro injo ri Nakke. 17Lalang ri kitta' Tora'mui rie' ta'ukiri ma'nassana passa'bi ri rua tau assa'bi injo toje'i; 18Nakkemo assa'bi ripassala kalengKu, na Amma pole, Tuassuro injo ri Nakke.” 19Jari appaui ngase'mu mange ri Ia, ”Ri antee mae AmmamMu?” Lakuamo Isa, ”Baji' Nakke, iyareka AmmangKu gele muisseki. So'di injo muissekia, injo muisseki todo'i AmmangKu.”
20Pau-pau injo labisarai Isa riampi'na panaroang doe', rihattu ngajara'na ri Sapo Allataala. Gele rie' manna sitau lajakkalai Isa, saba' gelepai larapi' hattunNa.
Isa gele tubattu ri lino inni
8:21-29
21Maeng injo appaui pole Isa mange ri iyai, ”Nakke laa'lampa na kau la'bojai ri Nakke mingka lamateiko lalang rikadorakaammu. Ri tampa' Kumangei injo, geleiko ma'ring rie' ri injo.” 22Injomo saba'na, appauimu ponggaha Yahudi injo, ”Barang Ia a'ra'i lahuno kalenNa jari appau appakonjo: Mange ri tampa' Kumangei injo, geleiko ma'ring mange konjo?” 23Jari appaui Isa mange ri iyai, ”Kaui assala'mu battu raha, Nakke battu rate; kau battuiko ri lino inni, Nakke gele battu ri lino inni. 24Injomo saba'na Kupaui mange ri kaui sumpae' ma'nassana lamateiko lalang rikadorakaammu; saba' ampa geleiko tappa' ma'nassana Nakkemo Inni, injo lamateiko lalang rikadorakaammu.” 25Jari lakuaimo mange ri Ia, ”Inaiko?” Appihali Isa mange ri iyai, ”Maemmu Kupau mange ri kau minang ripakaramulana? 26Lohe nuparallu Kupau na Kuadeli ri passala'mu; mingka Ia Tuassuro injo ri Nakke, iamo toje', na apa Kulangngere battu ri Ia, iamo injo Kupau mae ri lino inni.” 27Ponggaha tau Yahudi injo gele lapahangi ma'nassana Ia lalagarai mange ri iyai passala'na Amma. 28Jari appaui Isa, ”Ampa kau appakala'biri Ana' Rupatau, injo ampamu muisse' ma'nassana Nakkemo inni na ma'nassana Nakke gelea a'bua' kale-kale battu ri kalengKu to'jua, mingka Nakke a'bisara risikonjo passala, anteekamua nulapangajarang injo Amma mae ri Nakke. 29Ia, Tumaeng assuro injo ri Nakke, minahangi ri Nakke. Ia gelea lalappasang akkale-kale, saba' Nakke tulusu Kugeokangi apa nubaji' ri a'rakanNa.”
Kanabaang assare kalappasang
8:30-36
30Sungka'i maemmo lapau ngase' injo Isa, lohemo tau tappa' mange ri Ia. 31Jari pauNa mange ri tau Yahudi tappa' injo ri Ia, ”Ampa kau tuli rie' lalang ripauKu, toje'i kauimo ana' gurungKu 32na kaumo langisse' kanabaang, na kanabaang injomo lapakalappasiko.” 33#Mat. 3:9; Luk. 3:8Appihali ngase'mu, ”Kambe inni tuinakang Abraham na gelekang minang a'jari ata manna ri inai jua. Anteekamua Ditte naakkulle ripau: Lalappasiko?” 34Appaui Isa mange ri iyai, ”Sitoje'na Nakke appau mange ri kaui, inai tau a'bua' kadorakaang, iamo ata ri kadorakaang. 35Ata intu gele ammari lalang ri sapo, mingka ana' tulusu ammari lalang ri sapo. 36Jari, ampa Ana' injo lapakalappasiko, toje'i intu lappasa'mu.”
Tuina Abraham tugele injo battu ri Allataala
8:37-47
37”Kuisse'i ma'nassana kau intu tuina Abraham, mingka kaui tulusu Nakke munaha-naha lamuhunoi kanara ripauKu gele nguppa tampa' lalang ri atimu. 38Apa Kujanjang ri Amma, iamo injo Kupau, na appakonjo todo'i mugeokangi passala apa mulangngere battu ri ammammu.” 39Appihali ngase'mu mange ri Ia, ”Ammamba iamo intu Abraham.” Appaui Isa mange ri iyai, ”Ampa pade' kau ana'-ana' ri Abraham, tantu mujamainna jama-jamaang lajama injo Abraham. 40Mingka konni-konnina kaui a'naha-naha Nakke lamuhunoi; se're tau appau kanabaang mange ri kau, iamo intu kanabaang Kulangngere injo battu ri Allataala; jama-jamaang appakonjo injo gelei lajama Abraham. 41Numujama injo jama-jamaanna to'jua ammammu.” Appihali ngase'mu, ”Kambe gelekang rianakang kanara risangkili. Se're jua ammamba, iamo intu Allataala.” 42Appaui Isa mange ri iyai, ”Ampa pade' Allataala ammammu, tantu ngamaseammu mae ri Nakke, saba' Nakke battu ri Allataala, na konni-konnina Nakke rie' ri inni. La'bipa pole Nakke rie' mae konni gele ria'ra' kale-kaleKu to'jua, mingka a'ra'namo Tuassuro injo ri Nakke. 43Apakale saba'na ri kau nagele mupahang pauKu? Saba' kau gele akkulle mupina'na' pauKu. 44Kau assala'mui battu ri ammammu, iamo intu Ibilisi, na a'ra'i mugeokang sikonjo nulakaa'raki injo ammammu. Ia intu pahuno-huno tau minang ripakaramulana na gele attallasa lalang rikanabaang. Ampa ia appau injo sanging bura, ia appaui battu ria'ra' kale-kalena jua, saba' ia intu pa'buraang na ammai risikuanna tau pa'buraang. 45Mingka kanara Nakke appau kanabaang mange ri kaui, jari geleiko tappa' mae ri Nakke. 46Inaimo ri kau ngase' intu akkulle lasa'bii ma'nassana Nakke a'bua' kadorakaang? Ampa Nakke appau kanabaang, ngura geleiko tappa' ri Nakke? 47Inai jua assala'na battu ri Allataala, ia lapilangngeri pauna Allataala; injomo saba'na kau gele mupilangngeri, saba' assala'mu gele nubattu ri Allataala.”
Isa rie'mu ri tide'napa Abraham
8:48-59
48Ponggaha Yahudi injo appihali ri Isa, ”Gelejua nabai ampa kambe appau ma'nassana Kau tau Samaria na ladongkokiko setang?” 49Appihali Isa, ”Tide' setang a'dongko' ri Nakke, mingka Nakke appakala'biri ri AmmangKu na kaui gele appakala'biri ri Nakke. 50Mingka Nakke gelejua a'boja kala'birang ri kalengKu: Rie' Se're Tau labojai na Ia tommo langadeli. 51Nakke appau mange ri kaui: Inai jua laturuki pauKu, ia gele languppa kamateang situlusu'na.” 52Lakuaimo ponggaha Yahudi injo mange ri Ia, ”Konni-konnina taisse'mu ma'nassana ladongkoki toje'Ko setang. Saba' Abraham sallomu maeng matena na appakonjo todo'i sikonjo nabbi, mingka Kau appau: Inai jua laturuki pauKu, ia gele languppa kamateang situlusu'na. 53Apa Kau la'bi bakkakang battu ri ammanta Abraham, tumaeng injomo mate! Manna nabbi-nabbi injo mate ngase'mu; surangang inaimo Mupassinrapang kalemMu?” 54Appihali Isa, ”Ampa Nakke appakala'biri ri kalengKu to'jua, injo kala'birangKu manna siso'di' tide' jua matu-matunna. AmmangKumo appakala'biri ri Nakke, ripassala'na inai mukuangang: Iamo Allataala ri kambe, 55sitoje'na Ia gele muisseki, mingka Ia Kuisse'i. Jari ampa Nakke appau: Ia gele Kuisse', Nakkemo pa'buraang, assimpole kaui, mingka Ia Kuisse'i na Kuturuki pauNa. 56Ammammu Abraham sunggui ma'nassana ia lajanjangi allongKu na ia maeng lajanjammu na ia rannui.” 57Jari lakuaimo ponggaha Yahudi injo mange ri Ia, ”Ummuru'Mu gelepai ganna' limampulo taung na Kau maengi mujanjang Abraham?” 58Appaui Isa mange ri iyai, ”Sitoje'na Nakke appau mange ri kaui, rigelenapa rie' Abraham, Nakke la'bi riolomo rie'.” 59Jari ngalleimu batu labunduki Isa; mingka Isa a'lampai labokoi Sapo Allataala.
נבחרו כעת:
YAHYA 8: LAI_SLY
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
@LAI 2012 Indonesian Bible Society (Lembaga Alkitab Indonesia)