कुलवानकु.कामि 28
28
मलटा दिविप रे पाउलुस
1बनचाव केते अतोम तेबाः तागी आले के पता होय्येना चि टापू रआ लुतूम मलटा हेके। 2ओन्डो रेन बोसिंदा ता आले के बुगिन एते बेवहार वेःलेयाकु। मुदा दाः गामाय केनाय अरो रबंङ रआ चलते उनकु सेंगेल धराव केते सुबिन के माइन वेःकुवाकु 3पाउलुस सहान रआ बोझा हविर केते सेंगेल रे दोहोय केनाय रिगी मियाः बिञ, आंच रआ चलते उना एते उडुङ केते उनी रआ ती रे बेधाव एनाय। 4टापू रेन बोसिंदा उनी रआ ती रे बिञ बेधाव एते नेल केते अकु-अकु रे गाम हेलावेनाकु, “निचित गी नोंय होर हतयारा हेकेय। नोंय समुदर रे एते दो बनचावेनाय, मुदा नेयाय बोंगा ता उनी के जुवेत काय तही इरिवादेयाय।” 5मुदा पाउलुस ता बिञ के सेंगेल रे हिचली कदेयाय अरो उनी के जहन हानि का होयकेना। 6उनकु सोमझावेनाकु चि, मो नोःवोय बङ रेदो अचाका उयुःओय। जोब देरी तक उनी के नेनेल केनाकु चि नोंय के जहन हानि का होयुःकेना, दो उनकु अपन मोन बदलाव केते गागाम हेलावेनाकु चि नोंय बोंगा हेकेय। 7उना ठांव रआ हेनात टापू रिई मुखिया पुबलियुस लुतूम मुखिया रआ खेत तहिकेना। उनी ता आले के माइन वेःलेयाय अरो अपन गाति लेका, पेय हिलोः तक आच ठिनुः आले के मेहमान वेःलेयाय। 8इमिताः गी पुबलियुस रिई आपु तेः रुवा अरो टांड़ीः एते काबु केनाय अरो परकोम रे पोड़ाव केनाय। पाउलुस ता उनी ठिनुः सेन केते पराथना ताय अरो उनी रे ती एते जोटेत केते उनी के बुगी देयाय। 9इना तयनोम टापू रेन एटाः हासु वनकु हों हेच्चेनाकु अरो बुगी एनाकु। 10इनाते होरकु ता आले रआ बेचोट रकम एते इजात वेःलेयाकु अरो जोब आले ओन्डो एते तोरालेया, दो जहन्नाः उनकु के दरकार तहिकेना उनकु ता उना सुबिन दाः जहाज रे दोहो कताकु।
मलटा दिविप एते रोम सोझ
11आले पेय मेहना तयोम सिकन्दरिया चट्टी रआ जुड़वा बोंगा लुतूम रआ दाः जहाज रे देच केते चइल्लेताले। उना दाः जहाज रबंङ भोइर टापू रे थिराव तहिकेना। 12आले सुरकूसा चट्टी तेबाः केते, ओन्डो पेय हिलोः तक तहिएनाले। 13आले ओन्डो एते घुराव वते रेगियुम चट्टी हेच्चेनाले। एटाः हिलोः दछिन होयो सेसेन हेलावेना, इनाते आले मीः रोज तयनोम पुतिओली चट्टी तेबाःएनाले। 14ओन्डो बिसवासी बोयहा-मिसी एते नपाम्मेनाले अरो उनकु रआ गोहराव एते सात हिलोः उनकु लोः तहिएनाले। इना तयनोम आले रोम चट्टी तेबाःएनाले। 15रोम चट्टी रेन बिसवासी बोयहा-मिसी आले रआ हिजुः खभेर ओनाव केते अपियुस बाजार लुतूम चट्टी अरो पेय-सराय लुतूम चट्टी ठांव तक आले के माइन कराव हेच्चेनाकु। उनकु के नेल केते पाउलुस ता परमेसर के धेनयाबाद एमाःदेयाय अरो उनी डिढ़ एनाय। 16जोब आले रोम चट्टी तेबाःएनाले दो पाउलुस नुवां हुकूम नाम्मेताय चि जे ठिनुः आम तही चहाव वोःओम, ओन्डो तहीःमी, मुदा मिहोर पलटन पाउलुस के पहरा एदेयाय।
रोम चट्टी रे पाउलुस
17पेय हिलोः तयनोम पाउलुस ता मुध जहुदी नेताकु के आच ठिनुः होहोवेःकुवाय, अरो उनकु जमा एनाकु दो उनकु के गामवाःकुवाय, “बिसवासी बोयहा-मिसी! इञ ना दो अबु रेन होर रआ बिरोध जहन गुनाह एकाःइञ अरो ना पुरखाकु रआ परथा रआ बिरोध रे जहन एकाःइञ, मुदा जरुसलेम रे इञ के कयदी बाय केते रोमन रेनकु रआ ती रे सोंपव कदेञाकु। 18रोमिकु ता इञ के कुलिएदेञाकु अरो इञ के बागी चहावेनाकु, चिलिमेनचि इञ रे जहन गुनाह काकु नामलाःआ, जेकर चलते इञ के गोजेञाकु। 19#कु.कामि 25:11 मुदा जोब जहुदी पाउलुस रआ बिरोध कराव हेलावेनाकु, दो इञ के रोम रिई महाराजा कयसर एते गोहराव पोड़ावेना। नुवां बङा चि इञ के अपन जाइतकु रे जहन दोस लगाव तहिकेना। 20इनाते इञ ता अपे एते नपाम केते अरो नधनी कथिर रआ गोहराव वेःपिञ, चिलिमेनचि इसराइल रआ आसरा रआ चलते इञ बेरी एते तोल एकानिञ।”
21उनकु ता पाउलुस एते गाम वदेयाकु, “आले के आम रआ बबेत रे जहुदिया पोरदेस एते जहन चिट्ठी का नाम एकाना अरो ओन्डो सेन केते हेचवान जहय बोयहा ता आम रआ बबेत रे, जहन खभेर अगुएताकु, ना आम रआ बबेत रे जहन बुराय गाम एकाःआकु। 22मुदा आले, आम एते, आम रआ बिचार ओनाव चहाः कनाले, चिलिमेनचि आले सारीइकानाले चि नियां होरा रआ खोनोस रे सुबिन ठिनुः गाम कनाकु।”
23इनाते उनकु पाउलुस लोः मीः हिलोः निचित एताकु। अरो उना हिलोः बेचोट एते होर जमानाकु, जे ठिनुः उनी तहिकेनाय। तोब पाउलुस ता सेताः एते अयुम लुबाः तक उनकु के परमेसर रआ राइज रआ बबेत रे सिखाव अरो चेताव चित तहिएनाय अरो मूसा रआ नियम अरो परमेसर सोझ एते नधनी वनकु रआ पोथी एते ईसु रआ बबेत रे उनकु के मनाव कथिर कुरसीद लाःआय। 24उनकु पाउलुस रआ गानाम हुडिञगन होर बिसवास एताकु पाउलुस रआ गानाम मनावेनाकु। अरो हुडिञगन होर काकु बिसवास लाःआ। 25जोब उनकु अकु-अकु रे काकु सहमत केना अरो बिदा केते अपन-अपन तोराकुवा, दो पाउलुस ता उनकु के नुवां मुडूः गानाम तक गाम वाःकुवाय, पबितर रावा ता परमेसर सोझ एते नधनी वनीः जसायाह रआ मोचा एते अपे रेन पुरखाकु एते ठीक गी गाम एकाःआय! 26#जसा 6:9,10नोकु होर ठिनुः सेन केते नुवां गाम्मी,
“‘अपे ओनाव चित तहिनापे,
मुदा कपे सोमझाव वोःओ।
अपे नेनेल चित तहिनापे, मुदा अपे के का सुझाःआ,
27चिलिमेनचि नोकु होर रआ बुधि गोच एकाना,
नोकु लुतूर एते ओनाव काकु चहाःकाना,
उनकु ता अपन मेत जापित एकाःआकु
जहां ठिनुः हों नुंका ओलो होयुःका चि
नोकु मेत तेदो नेल कियाकु,
अरो लुतूर एते अयुम कियाकु,
अरो मोन एते सोमझाव कोःओकु,
इञ सोझ रुवाड़ हिजुःआकु
अरो इञ उनकु के बुगी कुञ।’”
28“इनाते अपे सारी केपे चि परमेसर एते हेच वनाः उद्धार रआ खभेर गइर-जहुदिकु ठिनुः कुल एकाना। उनकु सरिगी बुगिन एते ओनावियाकु।” 29(जोब उनी ता नुवां गामवाःकुवाय, दो जहुदी अकु-अकु बेचोट झमेला कराव हेलावेनाकु अरो ओन्डो एते तोराकुवा।)#28:29 पहिल रआ पोथी रे नुवां गानाम का ओल एकाना। “जोब पाउलुस नुवां गानाम गाम चुकाव ताय दो अकु-अकु रे बिचार कराव वते जहुदिकु ता ओन्डो एते तोराकुवा।”
30पाउलुस पुरा बार बरीस तक अपन गोनोंङ रआ ओड़ाः रे तहिकेनाय। अरो जे उनी ठिनुः हिजुः केनाकु, उनकु सुबिन के सोवागत कुकनकेनाय। 31अरो उनी निधाड़क केते अरो पुरा आजाद एते परमेसर रआ राइज रआ परचार चित तहिएनाय अरो परभु ईसु मसी रआ बबेत रे सिखाव कुकनकेनाय।
נבחרו כעת:
कुलवानकु.कामि 28: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0