जोहन 20
20
ईसु रआ जुवेत बिरीतोः
(मती 28:1–8; मरकुस 16:1–8; लूका 24:1–12)
1एतवार हिलोः मगदलना हातु रिई रे तहीः वनीः मरियम भिनसारा लुबाः-लुबाः गी मरघाटी ठिनुः हेच्चेनाय। उनी नेल्लेताय चि मरघाटी रे ते दिड़ी ओचोः एकाना। 2सिमोन पतरस अरो उनी एटाः चेला ठिनुः, जे के ईसु दुलार एयकेनाय निर अगु केते मेताःकिनाय, उनकु ता परभु के मरघाटी रे एते ओचोः कदेयाकु अरो अबुन के पता हों बनुःआं चि उनी के कारे दोहो एकाःदेयाकु। 3पतरस अरो उनी एटाः चेला मरघाटी सोझ चइल एताकिन, 4उनकिन बनार होर मिसा तिगी निनिर एटेच एताकिन। एटाः चेला पतरस के निर बगी केते मरघाटी ठिनुः पहिल तेबाःएनाय, 5उनी लपुत केते नेल्लेताय चि कफन किचरीः भोइर हेनाःआं, मुदा उनी भीतरी काय सेन केनाय, 6सिमोन जे पतरस गमुःकेनाय, उनी रआ तयोम-तयोम सेन अगुएताय अरो भुलकाः मरघाटी रआ भीतरी तोराया अरो कफन किचरीः भोइर नेल्लेताय, 7अरो उना गमछा जे ईसु के दोहो घरीक उनी रआ बोहोः रे पोतराव लाःआकु, कफन किचरीः लोः का तहिकेना, बलकी उनी ठिनुः एते अलगे मीः ठांव रे लटुम केते दोहो केना। 8तोब उनी एटाः चेला हों, जे मरघाटी ठिनुः पहिल हेच केनाय, भीतरी तोराया। उनी नेल्लेताय अरो बिसवास एताय 9चिलिमेनचि उनकु निमीः तक पबितर धरम पोथी रआ उना ओल अनाः काकु सोमझावकेना, चि उनी रआ गोच वनकु रे एते जुवेत बिरीत निचित हेनाःआं। 10इना तयोम चेलाकु अपन-अपन ओड़ाः रुवाड़ एनाकु।
मगदलना हातु रे तहीः वनीः मरियम एते ईसु दिसतार एनाय
(मती 28:9,10; मरकुस 16:9–11)
11मगदलना हातु रे तहीः वनीः, मरियम मरघाटी ठिनुः टांड़ी रे इयाम चित तहिएनाय। उनी ता इयम-इयम कुयडूः केते मरघाटी रआ भीतरी नजेर एताय। 12अरो जे ठिनुः ईसु रआ गोच-होड़मो दोहो लाःआकु, ओन्डो पुंडी किचरीः वन बार होर सोवारागदूत के दुरुप नेलेःकिनाय मिहोर बोहोः ठिनुः अरो मिहोर के बका ठिनुः। 13बनार सोवारागदूत उनी के मेताःदेयाकिन, “ए कुरी होपोन आम चिलिमेन इयाम कनाम?” उनी ता जबाब एमाःकिनाय, “आले रिई परभु के ओकोय ता रिम इदी एदेयाकु अरो इञ काइञ सारीइकाना चि ईसु के कारे दोहो एकाःदेयाकु।” 14उनी नुवां गाम केते तयोम नेल रुवाड़ एताय दो उनी ईसु के ओन्डो तिंगु नेलेःदेयाय, मुदा उनी काय चिनहाव दड़िवादेयाय। 15ईसु ता उनी के मेताःदेयाय, “ए कुरी होपोन, आम चिलिमेन इयाम कनाम? ओकोय के दंड़ाय कनाम?” मरियम ता उनी के सहेब सोमझाव केते मेताःदेयाय “हुजूर, जदि आम ईसु के रिम इदी एकाः देयरेदोम, इञ के उदुःवाञमी चि आम ईसु के कारे दोहो एकाःदेयाम ताकि इञ ईसु के इदियिञ।” 16इना रे ईसु ता उनी के मेताःदेयाय, “मरियम!” मरियम ता नेल रुवाड़ केते इबरानी भाखा एते ईसु के मेताःदेयाय, “रबुनी” मोतलोब “गुरु” 17ईसु ता मरियम के मेताःदेयाय, “इञ के ओलोम जोटेतिञा, निमीः तक इञ आपुञ ठिनुः चेतान काइञ सेन एकाना। इञ रेन बोयहाकु ठिनुः सेन केते उनकु के नुवां गाम वकुम चि इञ अपन आपुञ अरो अपे रिई आपुपे, अपन परमेसर अरो अपे रिई परमेसर ठिनुः चेतान सिनुःकानिञ।” 18मगदलना हातु रे तहीः वनीः, मरियम ता सेन केते चेलाकु के मेताःकुवय चि इञ परभु के नेल एकाःदिञ अरो ईसु, इञ के नुवां गानाम गामवादेञाय।
चेलाकु के दिसतार वोः
(मती 28:16–20; मरकुस 16:14–18; लूका 24:36–49)
19इना एतवार हिलोः गी अयुप पहरा, जे हापता रआ पहिल हिलोः तहिकेना, ईसु रेन चेला जहुदिकु रआ बोरोय एते दुवेर हंडेत लाःआकु। इमिताः गी ईसु ओन्डो उनकु रआ ताला हेच तिंगु वेनाय अरो उनकु के मेताःकुवय, “परमेसर अपे के सांति एमापेकाय।” 20अरो इना तयोम उनकु के आच रआ ती अरो पंजरा देखावाःकुवाय। परभु के नेल केते चेला आनाद एनाकु। 21ईसु ता उनकु के मेताःकुवय, “परमेसर अपे के सांति एमापेकाय। जे लेका आपुञ इञ के कुल एकाःदेञाय, इना लेका इञ अपे के कुल पेकानिञ।” 22नुवां गाम केते उनकु रे ओंङ वेःकुवाय अरो उनकु के मेताःकुवय, “पबितर रावा गरहन एपे। 23#मती 16:19; 18:18अपे, जेकर पाप माफ इयापे, उनकु, अपन पाप एते छोड़ाव वोःओपे, अरो जेकर सुबिन पाप कपे माफ्फीया, उनकु, अपन पाप एते तोल तहिनाकु।”
ईसु ता थोमा एते दिसतार एनाय
24ईसु रआ हिजुः घरीक बारहों चेलाकु रे ते मिहोर, थोमा जे जुड़वा गमुः कनाय, उनकु लोः काय तहिकेनाय। 25एटाः चेलाकु थोमा के मेताःदेयाकु, “आले परभु के नेल एकाःदेयाले।” थोमा जबाब एमाकुवाय, “इञ जोब तक ईसु रआ ती रे कांटी ठोकाव भुः चिन्हा काइञ नेल केया अरो उना ती भुः रे अपन अंगुर काइञ संजोया अरो उनी रआ भुः पंजरा रे अपन ती काइञ संजोया तोब तक इञ काइञ बिसवासिया।”
26आठ रोज तयोम ईसु रेन चेलाकु अरो मिसा ओड़ाः रआ भीतरी तहिकेनाकु। अरो थोमा हों उनकु लोः तहिकेनय, अरो सुबिन दुवेर रे ताला लगाव लाःआकु। ईसु हेच्चेनाय अरो उनकु रआ तला रे तिंगु केते मेताःकुवय, “परमेसर अपे के सांति एमापेकाय।” 27तोब ईसु ता थोमा के मेताःदेयाय, “अपन अंगुर नोन्डो संजोयमी। नेल नुवां इञ रआ ती हेके। अपन ती जिलिंग केते पंजरा भुः रे संजोयमी अरो अबिसवासी बङा मुदा बिसवासी बयुःमी।” 28थोमा ता जबाब एमाःदेयय, “इञ रिई परभु! इञ रिई परमेसर!” 29ईसु ता थोमा के मेताःदेयाय, “चिलि आम इना एते बिसवास कनाम चि आम इञ के नेल एकाःदेञाम? धेनया हेनाकुवा, जे बिन नेल गी बिसवास कनाकु।”
नुवां पोथी ओओल रआ उदेस
30ईसु ता अपन चेलाकु रआ सामने अरो बेचोट एते चिनहा-चकरीत कामि देखाव एकाःआय जेकर बिवरण नुवां पोथी रे काकु ओल एकाःआ। 31अरो जे गानाम नुवां किताब रे ओल एकाना। नुवां इनाते हेनाःआं चि अपे बिसवास एपे चि ईसु गी परमेसर रिई होपोन हेरेल मसी हेकेय। अरो बिसवास कराव केते उनी रआ लुतूम एते अपे जीवन नम्मापे।
נבחרו כעת:
जोहन 20: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0