जोहन 21
21
तिबरियास समुदर रआ अतोम चेलाकु ठिनुः ईसु रआ दिसतारोः
1इना तयोम ईसु तिबरियास समुदर ठिनुः अपन चेलाकु लोः अरो दिसतार एनाय ईसु ता आच अपन के नियां रकम दिसतार एनाय। 2सिमोन पतरस, थोमा जुड़वा गमुःकेनाय, गलील चट्टी काना रिई नथनियेल, जबदी रेन बार होर होपोन हेरेल अरो ईसु रेन बार होर एटाः चेला ओन्डो जामा केनाकु। 3#लूका 5:5सिमोन पतरस ता उनकु के मेताःकुवय, “इञ हाकु सासप सिनुःकानिञ।” उनकु उनी के मेताःदेयाकु, “आले हों आम लोः सिनुः कनाले।” उनकु चइल एताकु अरो डोंगा रे देच एनाकु, मुदा उना निदा जहनकु केहों काकु साप दड़ी वाःकुवा।
4अंगा तागी ईसु समुदर अतोम रे तिंगु केनाय, मुदा चेलाकु ता ईसु के काकु चिनहाव दड़िवादेया। 5ईसु उनकु के मेताःकुवय, “होपोनकु अपे ठिनुः जहन हाकु हेनाकुवा?” उनकु ता जबाब एमाःदेयाकु, “बङा” 6#लूका 5:6इना रे ईसु ता उनकु के मेताःकुवय, “डोंगा रआ जोम ती सोझ झाली ओडावेपे अरो अपे हाकु दाः कुवापे।” उनकु झाली ओडावेताकु अरो इमिनुः हाकु दाः एनाकु चि उनकु झाली ओर उडुङ हों काकु दड़िवाकन केना। 7तोब उनी चेला ता, जेके ईसु दुलार एयकेनाय पतरस के मेताःदेयाय, “नेय दो परभु गी हेकेय।” जोब सिमोन पतरस ता अयुम एताय चि नोय परभु हेकेय, दो पतरस अपन किचरीः होरोः एनाय चिलिमेनचि उनी ठेठगें गी तहिकेनय समुदर रे चुड़ीर एनाय। 8एटाः चेला हाकु एते पेड़ेच झाली ओर वते डोंगा एते अतोम रे हेच्चेनाकु, चिलिमेनचि उनकु ओते एते लगेभगे बार साव हाथ संगिञ रे तहिकेनाकु।
9जोब उनकु अतोम हेच्चेनाकु दो उनकु ता ओन्डो धधकाः कोयला रआ सेंगेल धराः नेल एताकु। उना रे हाकु अरो पिठा इसिन कथिर दोहो लाःआकु। 10ईसु ता उनकु के मेताःकुवय, “अपे निमीः-निमीः हाकु साप एकाःकुवापे, उनकु रे एते थोड़गन अगुकुपे” 11सिमोन पतरस तोराया अरो झाली अतोम रे ओर अगुवेताय। उनकु हाकु रे एते मीः साव तिरीपन मरंग हाकु एते पेड़ेच वनाः झाली ता अतोम सोझ ओर अगुवेताकु अरो इमिनुः हाकु तहिकेनाकु रेहों झाली का ओड़ेचकेना। 12ईसु ता उनकु के मेताःकुवय, “हिजुःपे, जोम कोःपे।” चेलाकु रे जहय केहों ईसु एते नुवां कुली रआ भोरसा का होय केना चि आम ओकोय हेकेम। उनकु सारीइ केनाकु चि उनी परभु हेकेय। 13ईसु हेच्चेनाय आर पिठा लेयकेते उनकु के एमाकुवाय अरो इना लेका हाकु हों एमाःकुवाय। 14इना लेका ईसु गोच वनकु रे एते जुवेत बिरीत तयोम पेय धांव अपन चेलाकु लोः दिसतार एनाय।
ईसु अरो पतरस
15उनकु जोजोम अनाः जोम तयोम, ईसु ता सिमोन पतरस के मेताःदेयाय, “जोहन रिई होपोन हेरेल सिमोन, जेतना दुलार नोकु इञ एते दोहोय कनाकु, चिलि आम इञ एते ढेर दुलार दोहोय कनाम?” पतरस ता ईसु के मेताःदेयाय, ए परभु, आम सारीइ कनाम चि, “इञ आम के दुलार मिकानिञ।” ईसु ता पतरस के मेताःदेयाय, “इञ रेन मेमना अतिञकुम।” 16ईसु ता अरो मिसा उनी के मेताःदेयाय, “सिमोन जोहन रिई होपोन हेरेल! इञ के दुलार एञकनाम?” पतरस ता ईसु के जबाब एमाःदेयय, “ए परभु! आम सारीइ कनाम चि इञ आम के पेयार मिकानिञ।” ईसु ता पतरस के मेताःदेयाय, “इञ रेन भेड़ी के नेलअतेनकुम।” 17ईसु ता अरो मिसा पतरस के मेताःदेयाय, “सिमोन जोहन रिई होपोन हेरेल! चिलि आम इञ के पेयार एञकनाम” पतरस ता नियां गानाम रे दुःख एनाय चि ईसु ता पतरस के पेय इसा नुवां कुलिदेयाय, “चिलि आम इञ एते दुलार दोहोय कनाम?” पतरस ता ईसु के मेताःदेयाय, “हें परभु, आम सुबिन्नाः सारीइ कनाम, आम सारीइ कनाम चि इञ आम एते पेयार दोहोय कनिञ!” ईसु ता पतरस के मेताःदेयाय, “इञ रेन भेड़िकु के अतिञकुम।” 18इञ आम के सच गाम वामकानिञ, “जोब आम धिंगाला तहिकेनम, तोब आम अपन गमछा डांडा रे बेरयार एते तोल केते, जहां सिनुः सनाम केना, सेन जोन केनाम। मुदा जोब आम हड़ाम वोःओम, दो ती जिलिंग इयाम अरो जहय एटाः होर आम के डांडा रे गमछा तोल केते जे ठिनुः आम सिनुः कम चहाःआ, ओन्डो इदिमाकु।” 19ईसु ता नुवां दरसाव कथिर नुंका गाम्मेताय चि उनी चिलकन गोनोच एते परमेसर रआ महिमायय, इमिनुः गाम केते ईसु ता उनी के मेताःदेयाय, “इञ तयोम कोःमी!”
ईसु अरो उनी रिई पेयारा चेला
20 #
जोह 13:25
पतरस ता नेल रुवाड़ केते उनी चेला के तयोम-तयोम हिजुःते नेलेःदेयाय, जेके ईसु दुलार एयकेनाय अरो जे बियारी जोजोम घरीक ईसु रआ कुन्दुराम सोझ कुयडूः केते कुलिइ केनाय, “ए परभु! उनी सासप वनीः ओकोय हेकेय, जे आम के साप इरीमाय।” 21पतरस ता उनी के नेल केते, ईसु के कुलिएदेयाय, “परभु! नोय रआ चिलिकाः होयुःआ?” 22ईसु ता उनी के जबाब एमाःदेयाय, “जदि इञ चहाः कनिञ चि उनी इञ हिजुः तक तहीः रेदोय, आम एते चिलि मोतलोब? आम इञ तयोम कोःमी।” 23नियां लेका नुवां गानाम बोयहा-मिसी ठिनुः नोन्डो तक फयलावेना चि उनी चेला काय गोजुःआय। ईसु नुवां काय गाम लाःआय। बलकी इमिनुः गी गाम्मीतिञ चि, “जदि इञ चहाःइञ चि इञ रआ हिजुः तक तही जोन दो उना एते आम के चिलि।”
चबाएना
24नोय उनी चेला हेकेय, जे नियां सुबिन गानाम रआ गोवाही एम कनाय अरो जे ता नुवां सुबिन गानाम ओल एकाःआय, आले सारीइ कनाले चि उनकु रआ गोवाही सच हेनाःआं।
25ईसु ता अरोहों बेचोट एते कामि कराव एकाःआय, जदि मिमियाः नियां सुबिन गानाम ओल्लीयाकु रेदो इञ सोंचाः कनिञ चि जे पोथी ओल कनाकु, उना इमिनुः ढेर होयुःआ होनङ चि समुचा दुनिया रेहों का समाव ओःओ होनांङ।
נבחרו כעת:
जोहन 21: BIY
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 NLCI CC BY-NC-ND 4.0