ADUNHEL 12
12
Jems poyok Marisi Pitor poyok Akrol Para Kapajok
1Labang apor Herod recho po angkhan kachikruk abangyok duktap pilo. 2Anang Johon po amuso Jems poyok nokjir pen mari lo. 3Anang Jihudi helyok anang arong theksi anang Pitor poyok ta panep mo. 4La-amun Onga Ahim kamai chojun aporsi kido. Aro Pitor poyok panepsi, Kijoktang-kamai aphel rat ango bisi kabisar yok chironsi, akrol long pathalo; aro bang phili pangsem si khel phili sonturi anangyok kapahonyok lahel arideng champilo. 5Ladi si Pitor poyok akrol along thalsi bilo; manta anangphan kachikruk arleng hel nengpisi Arnam ango pingkit si kido.
Pitor po Akrol Para Kijok
6La aphel Herod po anangyok mokol olesi kiwang ango arni anuwe, Pitor po bang hini sonturi hel asitem hirkuli jeng-ni bam klaksi amek jangsi kido, aro kihon arleng hel ke akrol amahang long honrulsi kido. 7La amun langot, Hemphu Atharlon ihut chiklangsi, hem apulu polong patha-ang detno. La-amun tharlon po Pitor poyok hujuksi pangthursi pulo, “Ingthur sirak;” la amun jongsi Pitor po ari para hirkuli hel chiphloksi jango. 8Laparake tharlon po anangyok pulo, “Nang amicheng chikokne keng-op chi-ikngot.” Pitor po chi-ik tang aphel, tharlon po pulo, “Nang chol akidingpo chi-ikne nephel phel wangne do.” 9Ladisi Pitor po akrol para olesi anang phel-phel duno; manta tharlonpo khanangsi tikilo, labangpo abhu hlongkelsi, pharlo si chithek hlongdo pusi chirono. 10Labadi si anali konam isi sonturi aro hi-ni sonturi yok chirkansi, anali rongpeyok kidam-kiwang ingchin owapo, adung kihleng aphel, labang owapo abithangsi chingpu phleno. Laparake anali mokol olesi isi duwar ajon damo aro photsi tharlonpo anangyok tikango. 11La-amun Pitor po atot chihlongsi pulo, “Hemphu anang tharlon yok wangtolsi, Herod po arideng pen Jihudi hel ahuwit kar-ih hel para neyok pajokngo, labang ne minon khanangsi than undo. 12La-aphel anang chiron chi-ap si Mark amen pen kachitha-ang Johon po, anang ai Mary pe ahemyok damo; lalong arleng ako-ong chingrum si pingkitsi kido. 13Pitor po mokol owalong kapardeng aphel, Roda amen aturu pe wang-one lo. 14La-amunsi Pitor po asi chinisi, anang arong ongsi owapo ingpu pipe si, hem arloyok katsi, Pitor po owa long wang arjapsi do pusi than damo; 15la-amun anali pulo, “Nang ingcham chiplangdo,” manta anang khanang pusi pulo, “Khanangsi, wang pendo, lalo.” La-amun anali pulo, “La tene labangke anang tharlonpo si.” 16Manta Pitor poke owalong pardeng jongsi kido; aphel anali inghappo ingpusi, anangyok theksi asombhik hlongo. 17La-amun anali kapado klipyok, anang ari atewa pen paklangsi, Hemphu pot badi anangyok akrol along para mokolyok wano, labang atomo analiyok panirsi thano; aro pulo, “Nali Jems popen kortehel ayok labang a-odi parju.” Aro anang olesi prek athemyok damo. 18Adap katha-ang aphel, Pitor po pot chiplango, pusi sonturi hijan chibhong hlokngo. 19La-amun Herod po anangyok langwor ta pahlong un-ehsi, kihon abangyok bisar-honthesi, sonturi helyok si kamari yok thano; labang aphel Herod po Judiya tikangsi Sisiriya rongpe yok damsi, lalong si dolo.
Herod po Kithi Alam
20Labang adak Tayar pen Sidon arleng hel yok Herod po anang akangho kihlong; manta anali inan chirwal pungsi anang ngot damsi, Blastas amen pen kido rechopo arlo kido phu-phangpo analiphan padoksi, kachipangsam ayok chingduk damo; piyok pu tene rechopo alongri parasi anali alongriyok cho-jun abihini hel hloman. 21La aphel inirsi kachipachip arni, Herod recho po ape arik chi-iksi recho anghol long iningsi, arlenghel yok lam thano. 22La-apor arleng hel hangdun solsi pulo, “Lake arleng alam thanthe yong, arnamsi lam than do.” 23Manta labang aman anang Arnam yok pipe yongot, Hemphu atharlon Herod poyok photsi ghuniya ingholo, aro anangyok ingthan cholo, aphel anang thilo. 24Manta Arnam alamthe chisangsi chan-chansi damo. 25La-aphel Barnabas po pen Sol po potsi katiki aphang kihlong, labangpo anali pachokngo, lalong Mark amen kachitha-ang Johon poyok, anali pen ensi Jerusalem para chirulo.
वर्तमान में चयनित:
ADUNHEL 12: AMRI-BSI
हाइलाइट
शेयर
कॉपी
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.