ADUNHEL 11
11
Pitor po Jerusalem Kachikruk Long Kachithan dam
1La-aphel adun hel aro Judiya long kido korte hel arju hlongo, ke Bang-ajat hel ta Arnam alam chidengo. 2Pitor po Jerusalem kidam amun, sunnot kachiplang arleng hel anang pen lam chingjesi thano, 3“Nang sunnot kachiplangple arleng ahem lutdamsi, anali pen cho-jun duno.” 4Laparake Pitor po analiyok isi para isi labang lam anali angot meso pulo. 5“Ne Joppa rongpe long pingkitsi kido apor, nephu kartiklak amun isi apharlo thekngo, lake phili atok long otsi athak para kapasun aplang kithe badi isi senge nedung yok wang kisun thek hlongo. 6Ne lalong nengpi si kilang-et yok ke akeng hong phili kido aro ingnam kido okthe, ajat-jat apei aro angsong kangjar awohel, mehel yok thek hlongo. 7Aro ‘Ei Pitor, ingthur not, lamehel marine chonot;” pusi neyok kipu asi ne arju hlongo. 8Manta neke pudun phakngo, ‘O Hemphu, labadi ke nangne lang; piyok pu tene inirsi ta kisim lale suwa apot helke ne angho bibe yong.’ 9Manta phong-ni athak para asi pu phakngo, ‘Arnam pot pangthir pilo, lamehel nang suwa puke puyek.’ 10Labangpo phong-thom pusi, lamehel athak yok pon phakngo. 11Aro langot, la aporsi Sisiriya para nedungyok wang kitol bang kithom arleng, hali kido ahem long wang hlengo. 12La-apor, nenglong pachiron hlonghle si, anali pen kapadun yok Jiuli-Kangthir neyok thano. Aro bang thorok korte helta nepen wangduno; aro hali labang arleng ahem lutdamsi, anang haliyok pulo, 13‘Ihut tharlonpo nehem long arjap dingsi chiklangsi pulo, Joppa long arleng tolne, ingho kachitha-ang amen ke Pitor po, labang Simon poyok pataram dam; 14Lalong nang aro nang hem ahuwit ta ingho pensi chipajok une, labang alam anang nali thane.’ 15Aro ne kithanyok kicheng amun, angot adak hali phuthak Jiuli-Kangthir kiwang badisi, anali yokta Jiuli-Kangthir wango. 16La-amun Johon po ke langpen baptist otelo, manta nali ke Jiuli-Kangthir long baptist chiplang hlonge, labang alam Hemphu nikipu, bang alampo nineng purkilo.’ 17Lasi ili Hemphu Jisu Khristo yok kikrol amun, Arnam potsi bor-eh hali pilo labangpo anang naliyokta pisi, Arnam yok kiteng dun ne ihutke ke inghopo te?” 18Labadi kithan arjusi, lahel dositsi Arnam yok pingkitsi pulo, “Ladi tene, Arnam Bang-ajat yokta hrengsi kido ajiu aphan neng kachipharlep bor-eh pilo.”
Antiyok Long Kachikruk Kaparjap
19La-angotsi inghosi Stiphen po alam anat kachiplang kido anat chisangsi kachingrum, anali Phonesiya, Saipras aro Antiyok yok arting damsi, Jihudi arleng aparke prek hel angoke Arnam alam thanthe yongot. 20Manta anali sitem Sairas aro Sairene alongri angkhan Antiyok yok wangsi Grik hel angota Hemphu Jisu kime-alamthe paharo. 21Aro Hemphu ajakong anali pen kirap apot, ako-ong arleng krolsi Hemphu long neng chipharlep mo. 22Anali alam kapahar si Jerusalem kachikruk longta arjusi, anali Barnabas poyok Antiyok yok tol lo. 23Anang lalong wang hlengsi, Arnam kajinso theksi anang arongo; aro anali angthin kar-ihpo dosi Hemphu long krolketsi kidoyok neng rungo; piyok pu tene anang kangthir arleng, aro Jiuli-Kangthir aro kikrol pleng si kido; 24lalong arleng ako-ong adholsi Hemphu long chilok ngo. 25Laparake Sol po yok bisarsi Tarsas yok damo; aro anangyok phochaksi Antiyok long yok wano. 26Lalong anali nengkan isiyok kachikruk long chingrumsi ako-ong arlengyok lamthe paklango. Aro adun helyoksi ango ke Antiyok rongpe longsi “Khristan” pusi taramo. 27Labang aporsi turki hel Jerusalem para Antiyok yok wango. 28Aro anali sitem Agabas amen ihut thursi, Jiuli pen parjulo, lake pirthepe dungsi akithe akal wange, Klaudiyas po kido adak ta ladi kachiplang. 29Lalong adun hel abang ten apharan ki-un ateng, Judiya long kido korte helyok kirap aphan banta kihlodun alamthe chipachip mo. 30La-aphel ladi asal tikisi, Barnabas po pen Sol po arideng phu-phang hel along yok hloduno.
वर्तमान में चयनित:
ADUNHEL 11: AMRI-BSI
हाइलाइट
शेयर
कॉपी
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.