ADUNHEL 10
10
Pitor po Pen Kornoliyas po
1Sisiriya arongpe long ‘Italia sonturi’ asem long Kornoliyas amen ihut, phoro isi sonturi aghaipo kido. 2Anang ihut Arnam kimeng arleng kido, aro ahem dungsi Arnam kaphere abang kido; anang arlengyok angthin wakdaksi banta kipi, aro Arnam yok pingkit lensi kido. 3Inirsi anithu baji kithom bak apun anang apharlo long, Arnam tharlon anang dung wango, aro anangyok pulo, “O Kornoliyas.” 4La-amun anang tharlon yok lang-etsi kaphere anat pulo, “Pot te nethan not Hemphu?” La-amun tharlonpo anangyok pulo, “Nang kapingkit pen banta hel neng kachiri aphan, Arnam ango ethakpe yok hlengo. 5Minon Joppa yok arleng tolne, langpe akung kidoman Simon ingho amenke Pitor amen; 6Anang langpe akung kido Simon po pusi ihut musiyarpo ahem, don chiplangsi do, anangyok taramne pawanot. 7Kornoliyas poyok lam kithan Arnam tharlonpo damo, aro anang hem turu bang hi-ni yok, aro anang kachi-al abang adak kadhorom sonturi ihutyok taramo, 8aro labang ahuwit alam thandaksi analiyok Joppa yok tolo. 9Anali dam damsi aphel arni Joppa adung hlengo, aro Pitor po anerlo baji kere hini apun kapingkit yok hem athak damo. 10Lalong anang an kangchirsi, penebak kicho anengo, manta anang phan kicho kijun kahonjokpi amunsi, anang arti klakngo. 11Ladi aporsi athak aduwar chingpusi, atok phili along otsi kapasun pe aplang badi isi senge kipasun thekngo. 12Labang asitem akeng hong phili ajatjat apei hel, aro lungle kiklim apei hel, aro athak kangjar awo hel kido. 13Laparake, “Ei Pitor, ingthur not aro lamehel marine chonot,” kipu lamthe asi arjulo. 14Manta Pitor po pulo, “O Hemphu, ladi ke nangne lang; piyok pu tene ne labang akisim aro kasuwa abihini isita cho-hlonghle yong.” 15Latang si phong-ni ayok anangyok labang alam arju hlongo, “Arnam pot ayok pangthiro, bangpo nang akisim puyek.” 16Labadi phong-thom than tango apot, labang aplang la-amun si athakyok pon phakngo. 17Minonke Pitor po pharlo kithek, labang acho alamke potsine, labadi chiron irsi kido amunsi, langot, Kornoliyas po angkitol arleng hel arju-hisi Simon po ahem owa amahang long arjap phrongsi dolo. 18Anali taramsi arjulo, holek kachitha-ang amen ke Pitor po, labang Simonpo ta puman, anang holek doman ma? 19Manta Pitor po apharlo alam chiron jong amunsi, Jiuli-Kangthir para anangyok pulo, “Langot, bang kithom arleng nangyok bisarsi wangdo. 20Minon nang thurne sunot, aro angthin chi-en eh-ne, anali pen damot; piyok pu tene hanesi analiyok wang tolo.” 21Lasi Pitor po sundamsi arleng helyok pulo, “Langot, nali kabisar arlengpo, ne lo. 22Nali pot anat wango?” Lalong anali pulo, “Kornoliyas amen dhorom kangthir aro Arnamyok kaphere arleng, aro Jihudi asondung angot kachitha-ang det, pharo-isi sonturi aghaipo nangyok anang hemyok taram ponsi, nang para lamthe ka-oneyok, kangthir tharlon parasi Arnam kithan alam hlongo.” 23Lasi Pitor po analiyok hem arlo taram ponsi don chingden pamelo. La-aphel arni anang thursi, anali pen damo, aro Joppa long kido angkhan kortehel kikrol abang anang duno. 24La-aphel arni anali Sisiriya yok wang hlengo. Kornoliyas po adon-arat pen alokjor helyok taram pungsi, anali yok inghong dingsi kido. 25Pitor po kilut dam amun Kornoliyas po anangyok paphochak si, anang keng otsi chirdomo. 26Manta Pitor po anangyok pangthursi pulo, “Thur not, ne ta ihut arlengsi.” 27Aro lapara ke anang pen lam chithansi, anang hem lut damo, aro arleng ako-ong kachingrum thek hlongo; 28aro Pol po lahelyok theksi pulo, “Bang-ajat arlengpen kachilok, lale kilutdam, Jihudi arleng adak kanghopot alam do, labang nalita chithan undo; manta arleng kaiyokta akisim lale suwa kipupe yok Arnam neyok paklango. 29Lasi neyok kataram amun, ingne pupesi ne wango; lasi nali arju bang, nali neyok pot aronsi pataramo?” 30La-amun Kornoliyas po pudun phakngo, “Mini hutke ni-phililo, ne baji kithom apun pingkit amun, la-an aporyok kidojong; la-amun langot, kiphlan-et ape kachi-ik ihut arleng ango arjap si, labang nethano. 31Anang pulo, ‘Ei Kornoliyas, nang kapingkit arjulo aro nang kipi banta kipihel Arnam anang ingsam mo. 32Lasi Joppa yok arleng tolo, aro langpe akung Simon amen ihut musiyar po ahem don badi kido Simon, anang kachithang det amen ke Pitor; anangyok pataram ne wanot.’ 33Lasi ne la-amunsi nang dungyok arleng tolo; nangta ne wang pilo, me peno. Lasi Hemphu potsi kithan alamthe nangpilo, labang ahuwit ka-oneyok hali ahuwit ta minon Arnam angot inghong dingsi do.”
Bang-ajat Abang Kime-Alamthe Kachideng
34La-akosi Pitor po kithan yok chengsi pulo: “Arnam ibak det langle, 35manta ahuwit ajat asitem inghosi anangyok kapherepo dosi dhorom kangthir arjapman, anangyok anang chidengman, labang ne khanangsi abhu hlongdo. 36Inghosi ahuwit aphan Hemphu, labang Jisu Khristo arideng kapajok pon kime-alamthe kapahar amun, Arnam potsi alamthe Israyel aso hel adung wangtolo. 37Aro Johon baptist po alam kapahar aphel, Galili along chengsi Judiya yok ajaldung chisang detno, labang alamthe nali than unsi do. 38Labang ke ladi, Arnam Najareth Jisu yok Jiuli-Kangthir aro jortang pisi arwaltango, anang rong hel along artingsi kime asal tikisi, si-ik para aduk kihlong ahuwit yok pamelo; piyok pu tene Arnam anang pen kido. 39Aro anang Jihudi hel arong hel aro Jerusalem long anang jibak katiki, mehel ahuwit asal hel hakhi halido. 40Arleng hel anangyok thengpe along tarsi marilo; manta ni-thom arnike Arnam anangyok pangthursi, pachiklango; 41ahuwit arleng ango ke kalek, manta anang kithi asitem para kibur aphel anang pen kicho-kijun hlongdun Arnam karwal ahakhi halisi, hali ngo pachiklango. 42Aro kihreng pen kithi, la hiniyok bisarpo kachiplang ayok Arnam inghoyok pachakngo, labangke anango, labang alam rat angot kapahar ayok aro hakhi kipi ayok, anang haliyok thano. 43Anang bhaksi ahuwit turkihel labang hakhi piman, lake anangyok kikrol majit anang menpen pap rontang man.”
Bang-Ajat Abang Jiuli-Kangthir Kihlong
44Pitor po labang alam kipu amunsi, onesi kido abang aphuthak Jiuli-Kangthir wango. 45Lalong Pitor po pen kiwang sunnot abi-pun kikrol abang, aro Bang-ajat hel aphuthak ta Jiuli-Kangthir abor-eh kili theksi asombhik hlong detno, 46piyok pu tene anali, anali para ajat ten prek alamthe pen thansi Arnam yok kaparklam arju lo. 47La-amun Pitor po pulo, “Ili badi Jiuli-Kangthir kihlong labang arleng hel baptist kachiplangple ayok inghone bak lang ayok teng une ma?” 48Lasi anang analiyok Jisu Khristo amen pen baptist kachiplang yok thano. La-amun anali bekso adin kipado yok anangyok chingduk ngo.
वर्तमान में चयनित:
ADUNHEL 10: AMRI-BSI
हाइलाइट
शेयर
कॉपी
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.