ADUNHEL 9
9
Sol po Angthin Kachipharlep
(Aka. 22:6-16; 26:12-18)
1La-apor yokta Sol po Hemphu adun hel yok papheresi aro kamari alam thansi, bor-bangthe adung damo, 2aro labang kidam aduwar arloso-apenso kaphochak alengke, analiyok bam thipsi Jerusalem yok kiwan ayok Damaskas long kido Arnam ahem ahuwit yok kiwi aporman alo hango. 3Laparake anang kidamjong apor Damaskas kihleng rang amun, photsi athak para katha-ang wang chikomwolsi anangyok klano. 4Anang lungle athak jang klungo aro, “O Sol, O Sol, neyok piyokte aduk nepido?” anangyok labadi kipu alamthe arju hlongo. 5Anang arju dun phakngo, “O Hemphu, nang ke inghote?” Wang than duno, “Inghoyok nang honjat pipon do, hanelo labang- Jisu. 6Manta thurnot, rongpe yok lut damot, lalong nang pot tiki hlonge, bangpo nang thane.” 7Anang pen kidam arleng hel ke kaiyok ta thekthesi, arki sodet one-hlongsi alamthe wesi arjap phrongsi dodetno. 8Lapara ke Sol po lungle para thuro, aro anang amek kichar yongta, anang amek-thekthe detno; lasi anali anangyok ari-otsi Damaskas yok pono. 9La-aphel anang ni-thom yok amek thekthe pensi dolo, aro cho-che junjesi dolo. 10Labang apor Damaskas long Ananiyas amen ihut adun kido. Hemphu anang yok pharlo long pulo, “Ei Ananiyas po.” Anang pulo, “O Hemphu, langot, ne holekdo.” 11Hemphu anangyok pulo, “Nang thurne Kengset kipuman aduwarpo yok damne, Judas po ahem long, Tarsas arongpe para kiwang Sol amen arlengpo yok chilang dammot, piyok pu tene, langot, anang pingkitsi do, 12Aro anang amek kichar ayok, apharlo long Ananiyas amen ihut arleng wanglutsi, anang banglong ari kibi thek hlongo. 13Manta Ananiyas po pu phakngo, “Hemphu, labang arleng Jerusalem long nang kangthir arleng helyok anang konbak akangho ingholo, labang ne ako-ong arleng para arjulo; 14aro holek ta nangmen ki-en ahuwit yok kinep aphan, anang bangthe hel para apharan ensi wangdo.” 15Manta Hemphu anangyok pu phakngo, “Nang damot; piyok pu tene Bang-ajat aro rechohel, aro Israyel asohel ango ne men ki-en ponyok, aro anangsi ne arwal tango. 16Piyok pu tene nemen anat konbak aduk chichak hlonge, bangpo ne anangyok paklange.” 17Lasi Ananiyas po damsi hemyok lut damo. Anang Sol po abang along ari batsi pulo, “Ei korte Sol, nangmek thekngot, aro Jiuli-Kangthir pen plengot, nang kiwang aduwar along Hemphu, lake Jisu nangyok kachiklang, anangsi neyok wangtolo.” 18Aro la-amunsi, anang amek para kachithar badi penebak olesi kijang ahari lo, aro anang mek chithek phakngo, aro anang thursi baptist chiplango, 19aro lapara ke kicho abihini cholo, anang ajakong hlong phakngo.
Sol po Damaskas Long Arnam Alam Kithan
La-aphel anang Damaskas long kido adunhel pen bekso adin dosi, “Jisu si Arnam Aso lo,” 20Labang alam anang Jihudi kachirdom ahem long pahar penpano. 21Lalong ahuwit anang lam ka-one abangke asombhik hlongsi pulo, “Inghosi Jerusalem long Jisu yok kachirdom abang yok kamari, aro anangsi analiyok bamsi bor-bangthe ango kiponyok chironsi holek ayok kiwang, labang po anang kalek ma?” 22Manta Sol po aro ajakong hlongsi, Jisu si Khristo la, pusi aporman paklangsi, Damaskas long kido Jihudi arleng hel kipu ye alam pangwe detno.
Sol po Jihudi Para Kikat
23Jokha adin kidam aphel, Jihudi hel anangyok kamari ye alam chirhepmo, 24manta Sol po anali kachirhep alam than uno. Anali anuwe anerlo anangyok kamariyok owa long tono; 25manta adun hel anuwesi anangyok enpono, aro pachi along thalsi arpong aga pasuno.
Jerusalem Long Sol po Kidam
26La-aphel Sol po Jerusalem yok wango, anang adun hel pen kachilokdun rono, manta analike anangyok pherelo, piyok pu tene anangta adun chiplango, puke krol un-eh yongot. 27Manta Barnabas po anangyok adun hel angoyok ponsi, anang potbadi duwar long Hemphu yok kithek, aro Hemphu anangyok kithan hel, aro anang Damaskas long Jisu amen pen ingtang dutsi kapahar, labang ahuwit alam anali ango than dakngo. 28Lasi Sol po anali pen dosi, Jerusalem long Hemphu amen pangtang dutsi paharo. 29Anang Grik alam kithanthek Jihudi helpen lam chirwalo aro lam chingje lo; manta lahel anangyok kamaripen ayoksi awak chilango. 30Aro kikrol korte hel bangpo than unsi, anangyok Sisiriya yok ponsi, lalong para Tarsas rongpe yok tolo. 31La-amunsi ahuwit Judiya, Galili aro Samariya alongri dung kachingrum abang nengsam hlongsi, aro dhorom aneng kihari wango. Hemphuyok kaphere dosi adin padamo, aro Jiuli-Kangthir neng kirung pensi kikrol arleng alekha ong-ongsi damo.
Ayenas Poyok Kiso Kapame
32Pitor po kikrol anali ahuwit pen hangkhone arting damsi, anang Lida long kido kangthir arleng adung hlengo. 33Lalong anang nengkan hinarkep so-hapsi kido Ayenas amen ihutyok atot kangwe kiso chiplangsi kido thekngo. 34Pitor po anangyok pulo, “Ei Ayenas po, Jisu Khristo nang pamenang; thurnot, aro nang tar chi-olnot!” Aro lajongsi anang thur penpano. 35Aro Lida pen Saron long kido abang, ahuwit anangyok theksi Hemphu yok aneng chipharlep mo.
Pitor po Lida Pen Joppa Kidam
36Minonke anali lampen Dorkas (Grik alam acho ke “Ok-hi pe.”) puman, khanang ke Tabitha amen ihut adunpe Joppa arong long kido. Anang kime asal katiki aro banta kirap si arloso ihut kido. 37La-apor anang kisosi kido, aro thilo. La-amun arleng hel anang kithi arangpo lang palusi athak apulu ahempo long pa-ihsi bilo. 38Labang Lida arongpe Joppa adung apot, aro Pitor pota lalong do pusi than-unsi, adun hel lalongyok bang-hini arleng tolsi pathan damo, aro pulo, “Arni padingdene holek wangot.” 39Lasi Pitor po ingthursi anali pen damo, aro arleng hel anangyok athak apulu ahemyok pono; aro ahuwit hime arloso hel anang dung kido aro arjap solsi surusi kido aro Dorkaspe anali pen kido apor ka-ote chol akiding hel paklango. 40Pitor po anali ahuwit yok mokol pa-olesi, anang tarhuksi pingkit no. Laparake anang kithi arangpo lango aro pulo, “O Tabitha, thur not.” Laparake anang amek charo; aro Pitor poyok theksi, ingthursi iningo. 41La-amun Pitor po anangyok ari-otsi pangthuro. Laparake anang kangthir arleng pen hime arloso hel yok taramsi, anali ngo anangyok akihreng paklango. 42Labang alampo Joppa arong dung chithang detno, aro ako-ong arleng Hemphu yok krolo. 43Labang aphel Pitor po Joppa long, Simon amen ihut musiyar popen jokha adin dolo.
वर्तमान में चयनित:
ADUNHEL 9: AMRI-BSI
हाइलाइट
शेयर
कॉपी
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.