Luuk 1
1
1Fi Teofilos waai ate mi Luuk a te fu zula nna yegayega la, ale a ŋmarisi gbaŋka de a te fu. Nuruba yegayega a pii nyiŋ kama ayen ba ŋmarisi wie ŋaai meena ale nye tama suŋsuŋ la. 2Wie ŋaai meena ate ba ŋmarisi la a nyini ka seerɔ baai ale nya ŋa ta nyini ku piilimka po ale a sak nuruba ŋa wie la jigi. 3Mi ale ŋmasi zamsi wieŋa de a ta nyini ŋa piilimka po la nyiŋ, ale soa ate mi poli ayen ku nala kama ate m ŋmarisi ŋa meena ate ŋa va chaab a te fu, Teofilos waai ale ka kpagi la. 4Mi a ŋmarisi gbaŋka de a te fu kama ate fi baga a miŋ ayen wie ŋaai meena ate ba sak fu la a sum ka wensie.
5Judia naawa Ayerod daa ŋa po, kaabteerɔ ale jam boro. Wa yuei jam le Zakaria. Wa jam nyini labika po ate Abaija soa la.#1:5 1 Ŋiak Wie 24:10 Zakaria powa yuei jam ale Elizabet. Elizabet a jam ka Aaron ŋaaŋbiik. 6Zakaria ale wa powa jam ka wayɔrisima nyam ale a va Wen wieŋa nalimnyiini. Ba jam ka wakaasuŋ Naawen jigi ya. 7Alege ba jam ka biiga, dii nyiŋla wa powa Elizabet jam ka kirik. Bayema meena a jam kpaŋ kama.
8Ase wa le jam tom a te Wen ase kaabteerɔ la diipo ate ba labika a bo tuima la. 9Ase ku le ka kaabteerɔma ŋiak wari la, ba jam nak ka gbaŋ a lueri wa Naawen Yenni po ayen wa ju ŋan baai nyum ale masa la. 10Wa ale diem a jam bo di po la, nuru boanni meena a jam bo ka peelim a puusi diipo ate ba a ju ŋan baai nyum ale masa la. 11Zakaria ale jam boro pai ŋantaŋa a nyo bolimu po ayen ba dɛ la, Naawen maarɔ a yaa deri jam wa jigi a za kuŋkuŋku jigini juga geŋ. 12Zakaria ale nya wa la wa yaa deri a chali yɔgsum. 13Alege maarɔwa a yaa weeni wa ayen, <<Zakaria, kan chali yɔgsum, dii nyiŋla Wen a wom fi puusaŋa kama. Wa be le basi ate fi powa a biak nidoabili. Ate fi dan jam biak, te biika yuenni ayen Jɔɔn. 14Ate fi ale fi powa ale nuruba yegayega sue le peenti. 15Naawen ale basi ate wa chim nuru kpioŋ Naawen niŋ abe wa kan a nyu daamoa yaase da pagriga. Wen Chiika ale sueri wa a nyini wa biam po. 16Wa le basi ate Izirali demma yegayega a basi ba biemu suitaŋa abe ba ŋman va Naawen ba Wenni, 17Jɔɔn ale dɛ Naawen niŋ ale Elaja chiika ale wa pagrimu. Wa le jam yik koba ale ba bisa ate ba niak chaab. Wa ale ta baai ale kan a va Wen suiku la a jam wayɔrisima nyama yam suiku po. Wa ale gomsi Naawen nuruma a magsi a te wa.>>
18Zakaria yaa bek maarɔwa ayen, <<Mi ale nye ka sɛ a seba kude? Mi ale m powa a kpaŋ kama.>> 19Maarɔwa yaa tulisi wa ayen, <<Mi ka Gabriel waai ale a zaani Wen niŋ la. Wala abe le tom mu ayen m weeni fu wapaalaŋa de. 20Mi ale weeni fu diila ale jam chim ka wensie, diipo ale magsi la alege fi ka siaka ale mi ale weeni diila. Dila nyiŋla fi le chim ka gaauŋ a ta ga paari wieŋa de meena nyeka dai.>>
21Nuruma a jam a limisi Zakaria kama, ku jam cha ba kama wa le a beni Wen yenni po diila. 22Wa le jam nyini peelim la, wa an jam baga a biisi ale ba, ba jam a poli ayen wa nya ka wari Wen yenni po, wa jam pai ka nisa a magsi a sak ba. Wa jam te ba ka daana ale za diki. 23Zakaria tuimaŋa daaŋa ale nueri la, wa yaa kuli wa yenni.
24Daa maga ale taam la, wa powa Elizabet yaa yik puuk a suk wa yenni po chiisa sinu ale weeni ayen, 25<<Yɔgyɔgla de Naawen a bola maari mu kama. Wa yeeri mu m chivieŋa po a basi kama nuruba nimbie po.>>
26Chiisa siyuebiwa po, Wen yaa tom wa maarɔwa Gabriel ate wa cheŋ Nazaret ate ka bo Galili la po. 27Kaliak ale jam bo dula ate ba a wi ayen Mɛɛri. Wa jam siak kama ayen wa yali Josefi. Josefi a jam ka Deevid ŋaaŋbiik. 28Maarɔwa yaa jam weeni Mɛɛri ayen, <<Suiyɔgni a bo le fu. Wen a bo ale fu kama ale niak fu mɛ nna yegayega.>>
29Ku yaa daani Mɛɛri nna yega wa le wom diila nyiŋ, wa yaa poli wa popola po ayen ka boan jaab puusa ale nna. 30Maarɔwa yaa ŋman weeni wa ayen, <<Mɛɛri, kan basi ate fi kpaziim a nak, dii nyiŋla Wen niak fu kama. 31Wa weeni kama ayen fi le yik puuk a biak nidoabili. Fi dan biak biika, te wa yuei ayen Yeezu. 32Wa le jam chim ka nuru kpioŋ. Ate ba le wi wa ayen Wen Kpienni Nidoabili. Ti Naawen dii ale ka Wen la ale pai wa kowa Deevid naamu a te wa. 33Wa abe le wa nya Jekob yenni zuk taam wuu, ate wa naamu a kan maa kpeglim.>> 34Mɛɛri yaa weeni maarɔwa ayen, <<Mi a diem zɛ nidoa. Ku be le nye ka sɛ ate m yik puuga?>> 35Maarɔwa yaa tulisi wa ayen, <<Wen Chiika ale jam fi zuk, ate Wen Kpienni pagrimu ale lik fu. Dila nyiŋ la, nuruba le wi biweleŋka ayen Wen Nidoabili. 36Be teeri fi suoku Elizabet wari. Nuruba a weeni kama ayen wa ka kirik alege wa ale wa kpaŋsaŋa meena wa ta ka puuk chiisa siyuebi ale nna. 37Wari karo ate Wen an baga a nye.>> 38Mɛɛri yaa weeni ayen, <<Naawen dek ale soa mu. Wa yaa be basi ate ku nye ase fi ale weeni diila.>> Maarɔwa yaa deri basi wa ale cheŋ.
39Da ŋala po, Mɛɛri yaa nye nwuli a cheŋ tɛŋ kaai ate guuta a bo ka po la Judia tɛŋka po. 40Wa yaa ga jo Zakaria yenni po puusi Elizabet. 41Elizabet ale wom Mɛɛri lueluku la, wa biika yaa deri labri wa ponni po. Ate Wen Chiika a sueri Elizabet, 42ate wa yaa weeni Mɛɛri ale lueluk kpioŋ ayen, <<Wen niak fu kama a gaam nipooba meena. Biik kaai ate fi le biak la, Wen niak wa kama. 43Ka boa ate wa kpienni de a jam mi jigi ate mi Naawen ma a cheena m jigi ya? 44Mi ale poom wom fi lueluku la, m biika a deri a labri kama ale suipeentik. 45Niarɔ ale waai ale ta siaka ayen Naawen ale weeni diila ale sum nye kama la.>>
46Mɛɛri yaa weeni ayen, <<Mi chiika a pak Naawen kama, 47ate m chiika mɛ a naŋ ale Wen m Varibasidɔwa, 48a teeri wa lie waai ale kan daa nuru la wari la. A ta nyini jinla danni a cheŋ gaŋ meena le kasim a wi mi ayen ka niauŋ nyɔnɔ, 49dii nyiŋla Wen Kpienni tom ka tuim kpiema a te mu. Wa yuenni abe welema kama.
50<<Wa kasim ta jiirim kama ale baai meena ale a chali wa la gaŋsa meena po a cheŋ.
51<<Wa jam pai ka wa pagrimu yegayega a yik kanjanta nyam ale ba ale a poli dii ba suiniima po la.
52<<Wa yik nalim kpiema a yeeri ba naam po alege basi ate nuru baai ale kan ta zaana jigi la a ŋman taam dɛ ba niŋ.
53<<Wa maari a te baai ate kom ta ba la ŋandiinta yegayega ale ge a basi ate baai ale jigsi la a chim ŋanjaksa.
54<<Wa maari wa tomteerɔwa Izirali, a ta va wa le teeri wa niniŋŋa wari la, 55ase wa le jam biisi ale ti koma ale Abrayam ale wa ŋaaŋbisaŋa taam wuu la.>>
56Mɛɛri a jam bo ka dula a paari chiisa sita alege yaa ŋman kuli wa yenni.
57Elizabet biamu danni ale jam paari la, wa yaa biak nidoabili. 58Wa dɔkdemma ale wa vaanchaama baai ale jam moata wa la, ale ga wom ayen Naawen sak jiirim yegayega ale wa la, ate ba meena yaa jam ta suipeentik ale wa.
59Daa naanika ba yaa jam ba gebi biika yoanni. Ba yaa te biika yuei ayen Zakaria, ase wa kowa la.#1:59 Piilimka 17:9-14; Kaabka 12:1-3 60Alege biika mawa a yaa zɛri ale weeni ba ayen, <<Wa yuenni ale Jɔɔn.>> 61Ba yaa weeni wa ayen, <<Nama buuni po waai a karo a ta yuei dila.>> 62Ba yaa pai ba nisimaŋa a magsi a biisi wie ale biika kowa a bek wa ayen, <<Fi a yaali ayen fi te biika yuenni ayen ka boa?>> 63Zakaria yaa weeni ba ayen ba ga ta jaab a jam ate wa ŋmarisi. Wa yaa ŋmarisi jaamu zuk ayen, <<Wa yuei ale Jɔɔn.>> Nya kude yaa deri cha ba. 64Zakaria ale ŋmarisi a nueri la, wa yaa deri ŋman baga a biisi ate wa yaa te Wen pimpauk. 65Ate yɔgsum yaa yik baai ale moata wa la meena wapaani de wie a yaa tagli Juda tɛŋka ate guutaŋa a bo ka po la. 66Baai meena ale jam wom la, ku yaa cha ba ate ba yaa pai ku nyo ba suiniima po a poli ku wie ale a bek chaab ayen, <<Biika de ale chim ka nuru boan choa ase wa nin chimu?>> Naawen pagrimu a jam bo ale wa kama.
67Wen Chiika yaa jam sueri wa kowa Zakaria ate wa biisi Wen wieŋa ayen, 68<<Ti Naawen dii ale ka tama Izirali Wenni la, a jam tama jigi kama a da tuesi ti a basi. Ni be basi ate ti a pak wa nya kude nyiŋ. 69Wa te ti ka pagrɔ waai ale ka tomteerɔwa Deevid yenni la. Wa le chim ka ti varibasidɔ. 70Dila powa ate Wen a weeni wa biisiteerɔma baai ate wa lueri a te wadek la, ayen ba ŋmarisi wa gbaŋka po ayen, 71wa puulim kama ayen wa le vari ti, ti dachaasa nisima po a basi ale baai ale kisi ti la nisima po a basi. 72Wa le sak jiirim ale ti kokpieŋsaŋa abe wa teeri nɔiyeŋ weleŋka. 73Pumpuulim ŋaai ate wa pɛ ale ti kowa Abrayam la, 74ayen wa vari ti tama dachaasaŋa nisa po a basi la, wa le vari ti a basi wa kan chali yɔgsummoa, 75ate tama ale chim nuru weleŋsa ale wayɔrisima nyam wa jigi ti boka meena po a ta a cheŋ.
76<<M biiga, nuruba le weeni ayen fi ka Wen Kpienni biisiteerɔ, fi le liŋ dɛ ti Naawenni niŋ a gomsi suiku, 77a te wa nuruma varibasika yam a ta va ba biemu vɔŋ teka, 78ti Wenni jiirimu nyiŋ ase dai dila danni a nin nyini wenŋmazuk a jam 79ayen di ta baai ale bo legi ale kum po la a nyini, a ta ti va suiyɔgni suik.>>
80Ate biika yaa jam chim a pagra chiika po, wa jam bo ka sagni po ate ku paari dai dii danni ate wa pai wadek a sak Izirali la.
वर्तमान में चयनित:
Luuk 1: BWU
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
