Maak 16
16
1Ba Vuusum Danni ale taam la, Mɛɛri Magdalene ale Jeemsi mawa Mɛɛri ale Salomi yaa ga da kpa masik ayen ba sa Yeezu nyiŋka. 2Bakoanni piilimka danni saluik yokyok ate wenni pusi maga la, ba yaa cheŋ juijui ate ba gu Yeezu la. 3Ba ale jam a cheŋ la, ba yaa bek chaab ayen, <<Ka wana dek ale wa bilim tintanni piuŋku vɔrumu nɔi a basi a te ti?>>
4Ba ale ga paari la, ba yaa nya tintanni ale di bilim dua nakpiak alege piuŋku vɔrumu nɔnni a basi. Tintanni a jam zuak kama ale dobra. 5Nipooma yaa ga jo Yeezu guka jigini yaa nya nidoa wanyi ale wa kala ba juga geŋ a jo kasaauk peeluk ate yɔgsum yaa jam yik ba.
6Nidoawa yaa weeni ba ayen, <<Ni kan chali yɔgsummoa. M seba ayen ni a gisi ka Yeezu Nazaret denɔwa waai ate ba kpi wa jabarimu nyiŋla. Wa yiti kum po kama. Ni nya ba ale pai wa dueni juijui la ale nna. 7Ni cheŋ ga weeni Piita ale Yeezu ŋaaŋviirɔma meena ayen, <Wa le dɛ ba niŋ a cheŋ Galili tɛŋka po kama ase wa daam ale weeni ba diila. Ba dan cheŋ dula, ba le nya wa.> >>
8Nipooma yaa basi dula jigini alege chali a cheŋ. Ba kpaziim yaa jam a nak ate ba nyiŋsaŋa a gɔgi. Ba an jam a weeni sak waai ya, dii nyiŋla ba jaa chali ka yɔgsum.
9Yeezu ale yiti kum po bakoanni piilimka danni saluik yokyok la, wa liŋ pai wadek a sak ka Mɛɛri Magdalene waai ate wa jam yiak chichirik baata tiyopɔiwa wa jigi a basi la. 10Mɛɛri yaa jam cheŋ Yeezu ŋaaŋviirɔma jigi. Ba meena sue a jam kaasi ka nna yegayega ate ba a kum. 11Mɛɛri yaa weeni ba ayen Yeezu a yiti kum po kama a ŋman ta nyuvuri ate midek a nya wa. Alege ba an jam siak ayen ku ka wensie.
12Ku ŋaaŋnyiŋ ate Yeezu yaa jam tagri a pai wadek a sak wa ŋaaŋviirɔma po bayewa, baai ale jam basi Jerusalem tɛŋka a cheŋ jigi yoŋ la. 13Ba yaa pilim ŋmani cheŋ wa ŋaaŋviirɔ mbala jigi a weeni ba ayen ba nya Yeezu kama, alege ba an jam siak ayen ku ka wensie.
14Ku ale ŋman pilim ga nye maga la, Yeezu ŋaaŋviirɔma pi ale wanyiwa yaa jam kala a dɛ ba ŋandiinta ate Yeezu yaa jam pai wadek a sak ba. Wa yaa toariŋ ba ayen ba ka nuru baai ale kan ta siaka la. Ba tueŋa a kpari ka nna yegayega ate ba an baga siak ale baai ale jam weeni a sak ba ayen ba nya wa kama ale wa yiti kum po la.
15Wa yaa weeni ba ayen, <<Ni nyini a cheŋ tɛŋka meena po a mooli Wen wamaŋsaŋa a sak waai meena. 16Baai meena ale ba ta siaka ale mi, a tuesi soka la, Wen le vari ba ba wabaataŋa po a basi, alege baai meena ale kan ba ta siaka ale mi la, Wen le jam bo mini ba kama. 17Baai meena ale ta siaka ale mi la, le baga a nye wie ate ku sak ayen Wen ale sum tom ba. Ba le pai mi yuenni nyiŋ a yiak chichirik baata nuruba po a basi. Ba le baga a biisi bi paalisa mɛ. 18Ba dan yik wiiga yaase ba dan nyu choŋ, jaab kan nye ba. Ba le baga mɛ a pai ba nisima a vi yɔgnyieŋsa zuk ate ba a nya nyiŋyɔgsa.>>
19Nyɔnɔwa Yeezu Kirisita ale biisi a ga nueri la, wa yaa yiti jueli wenŋmazuk a ga kala Wen juga geŋ. 20Wa ŋaaŋviirɔma yaa nyini a cheŋ tɛŋka meena po a mooli Wen wamaŋsaŋa a sak nuruba. Naawen a jam bo ale ba kama diipo meena ale a maari ba ate ba a tom tuimkperisa nna yegayega ayen ku sak ayen ba wieŋa ka wensie.
वर्तमान में चयनित:
Maak 16: BWU
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation