Luuk 10

1Ku ŋaaŋnyiŋ ate ti Nyɔnɔ Yeezu Kirisita yaa ŋman lueri nuruba pisiyopɔi a yaa tom ba baye baye ayen ba dɛ niŋ a cheŋ tɛŋsaŋa meena po ale juijui meena ate wadek weeni ayen wa le cheŋ la. 2Wa yaa weeni ba ayen, <<Cheka tuima ale boro nna yegayega, alege tuimtomdɔma an piisi ya. Ni puusi a te Wen dii ale ka cheka nyɔnɔwa la ate wa basi ate tuimtomdɔba yegayega a jam.>> 3Ni yaa be a cheŋ. Ni nya, mi a tom ni kama ayen ni nyini cheŋ ase pabisa ate ba pai basi piina suŋsuŋ diila. 4Ni dan a cheŋ, ni waai kan pai ligra foowa yaase foruwa yaase nuensa. Ni kan wari zaani suik ayen ni puusi waai ya. 5Yeri dii meena wuu ate ni a jo di po, ni nyiem liŋ puusi yenni demma a weeni ayen, <Wen le ta niaka jam yenni de po.> 6Nuru waai abe dan bo yenni po a ta suiyɔgni nama suiyɔgni le bo ale wa. Alege nuru a dan boro kan yaali suiyɔgni nama suiyɔgni le pilim ŋman jam ka nidek jigi. 7Ni bo yeri dila po a dɛ abe ni a nyu jaabuuri meena ate ba nye a te ni la dii nyiŋla, ku a fɛ kama ayen ba tuni tuimtomdɔwa wa tutunaŋa. Ni kaa a togli yie. 8Ni dan cheŋ tɛŋ po ate ba nye ni tia, ni dɛ jaabuuri meena ate ba nye a te ni la. 9Ni tebi yɔgnyieŋsaŋa abe ni weeni ba ayen Wen naamu a moata ba kama. 10Alege ni dan ga jo tɛŋ po ate ba an nye ni tia, ni taam ka suik duataŋa zuk a weeni ayen, 11<Ni tɛŋka paasuk kuui dek ale maŋ tama naŋtaataŋa la, tama kpaanti ka kula a basi ni nyiŋ ate ku sak ayen ti kaam ni kama, ni seba kude ayen, <<Wen naamu a moata kama.>> > 12Mi a weeni kama ayen buusa boka danni dii ale jam Sodom demma jigi la ale zunchoŋ tɛŋ kala kama.

13<<Koraziin ale Beteseida demma ku le toa a te ni kama boan nyiŋŋa, ase Taaya ale Saidon tɛŋsaŋa a daam dan nya Wen ale nye wakperikaliik sii, ase nama Koraziin ale Beteseida demma ale nya diila, ba daam ti basi ba tuimbaataŋa tomka kama ale tagri. 14Alege mi a weeni ni Wen a dan jam ayen wa bo tɛŋzuk meena demma buusa wa le ta jiirim ale Taaya ale Saidon demma a gaam nama kama. 15Nama Kapernaum demma, nama a poli ayen ba le zak ni a ta jueli wenŋmazuwa? Nama ale siŋ ka kpiluŋ.>>

16Yeezu yaa weeni wa ŋaaŋviirɔma ayen, <<Waai a dan wom nama, wa wom mi mɛ kama, alege waai a dan zɛri nama, wa zɛri mi mɛ kama. Waai abe le a zɛri mi la, a zɛri ka waai dek ale tom mi la.>>

17Nuruba pisiyopɔiwa ate Yeezu a jam tom ayen ba nyiem cheŋ tɛŋsaŋa po la, a yaa ŋman pilim jam ale suipeentik a weeni Yeezu ayen, <<Ti Nyɔnɔ Yeezu Kirisita, chichirik baata mɛ dek a siak te ti kama fi yuenni nyiŋ.>>

18Wa yaa tulisi ba ayen, <<Mi nya Sitaana ale nyaksi nyini wenŋmazuk ase bolim la a jam lo. 19Ni nya de m te ni ka pagrim ate ni baga a tabi wiiga ale nuenta zuima ale dachiaka Sitaana ale wa pagrimu meena, alege nyaŋa de meena po wari a kan daani ni. 20Alege mi a weeni kama ayen ni kan basi ate ni sue peenti nyiini ale chichirik baataŋa ale siak a te ni la, ni basi ate ni sueŋa peenti ale ba ale ŋmarisi ni yueŋa wenŋmazuk po la.>>

21Dila powa dek Wen Chiika yaa sueri wa ate wa weeni ayen, <<Mi a nye fi jiam m Koa, wenŋmazuk ale tɛŋzuk Naawen yaa, fi ale pai wieŋa de a suk yam nyam ale baai ale ta sebchakka ale pai ŋa a sak buluata. M Koa, ŋade ka fi ŋmantiika yaalika nyiŋ. 22<< M Kowa a pai jaabuuri meena a te mu kama. Nuru waai a zɛ Wen Nidoabinni, ka wa Kowa nyiini ale seba wa. Nuru waai mɛ a zɛ Kowa ka wa Nidoabinni nyiini ale seba wa. M basi kama ate baai ate m lueri la seba wa mɛ.

23Wa yaa virim wa ŋaaŋviirɔma nyiini jigi a weeni ba ayen, <<Nama baai ale a nya wieŋa de ate ni a nya nna la, ta niauŋ kama. 24Dii nyiŋla, Wen biisiteerɔba ale nalima yegayega a jam a yaali kama ayen ba nya nama ale nya diila, alege ba an jam nya ya. Ba jam a yaali ayen ba wom nama ale wom diila, alege ba an jam wom ya.>>

25Sinsak sagrɔ a yaa yiti zaani ayen wa nye wa a nya. Wa yaa jam bek Yeezu ayen, <<M sagrɔ, m le nye ka sɛ ate m nya nyuvuri dii ale kan ta kpeglimka la?>> 26Yeezu yaa tulisi wa ayen, <<Ba ŋmarisi Sinsaŋŋa po ayen ka boan la? Fi a kariŋ ka sɛ?>> 27Nuruwa yaa tulisi ayen ba ŋmarisi kama ayen, <<Yaali Naawen fi Wenni ale fi suinum meena ale fi chiik meena ale fi pagrim meena ale fi popola meena, (Teerika 6:5) abe fi yaali fi saalɔ choa ase fi ale a yaali fidek diila.>> (Kaabka 19:18) 28Yeezu yaa tulisi wa ayen, <<Fi tulisi mu a magsi kama, be nye nyaŋa de meena, ate fi le boro.>> 29Alege sagrɔwa a jam a yaali ayen wa sak ayen wa ka nuru dek la, wa yaa bek Yeezu ayen, <<Ka wana abe ale mi vaanchoa?>>

30Yeezu yaa tulisi wa ayen, <<Nuru ale jam nyini Jerusalem tɛŋka a siŋ Jeriko tɛŋka. Wa yaa ga jo zueba suŋsuŋ ate ba yeeri wa gattaŋa ale nak wa a moata koka a yaa basi wa ale ge cheŋ. 31Kaabteerɔ mɛ yaa yiti va suik kula a cheŋ. Wa ale jam nya ale nuruwa dua la, wa yaa logri va suiku nakpiak a taam. 32Livai denɔ mɛ jam nyini va suik kula dekdega a cheŋ. Wala mɛ ale jam paari nya nuruwa la, wa mɛ a logri va suiku nakpiak a taam. 33Alege Samaria denɔ mɛ a jam va suik kula dekdega a cheŋ a nya nuruwa ate jiirim a yik wa, 34a yaa cheŋ wa jigi a sugri wa mulaŋa, alege pai kpaam a daam a nyo ŋa po a yaa bobi ŋa, a pai wa a kali wadek boniŋ zuk a ta wa cheŋ yeri dinyi po a nya wa zuk. 35Dai dii ale pasaŋ la wa yaa yeeri ligri a te yenni nyaarɔwa ale weeni ayen, <A nya wa zuk, dii meena ate fi a kaasi la m le tuni fu ase m nin pilim jam.> 36Nuruma de batawa, ka ba wana ale nuru waai ate zuema nak la vaanchoa?>> 37Sinsak sagrɔwa yaa tulisi ayen, <<Ka nuru waai ale nya wa a ta jiirimu ale wa la.>> Yeezu yaa weeni wa ayen, <<Be cheŋ ga nye dila dekdega.>>

38Ku ŋaaŋnyiŋ ate Yeezu ale wa ŋaaŋviirɔma a jam a cheŋ la, ba yaa jam paari tɛŋ fiik kanyi po ate nipok a jam tuesi wa a ta jo wa yenni po. Nipowa yuei ale Maata. 39Wa suok mɛ ale jam boro ale wa, wa mɛ yuei ale Mɛɛri. Mɛɛri yaa jam kala ti Nyɔnɔ Yeezu Kirisita tɛŋ a wom wa sinsaŋŋa, 40alege Maata popola meena jam bo ka dikka jigini. Wa sui an jam peenti ale Mɛɛri ale jam basi wadek wa nyiini ate wa boro a dik la, ate wa yaa cheŋ Yeezu jigi a ga bek wa ayen, <<M Nyɔnɔ Yeezu Kirisita, ku peenti fi sui kama ate fi nya mi dek m nyiini ale boro a dik ŋandiintaŋa la? Weeni m suoku ate wa jam maa maari mu.>> 41Alege ti Nyɔnɔ Yeezu Kirisita yaa tulisi wa ayen, <<Maata, Maata, ka boan ale soa ate fi basi ate wie yegayega a danni fu? 42Fi zɛ ayen ka wa yeŋ nyiini ale magsi nyeka? Mɛɛri abe lueri ka wamaŋ kala. Nuru a kan baga a tuesi di wa jigi ya.>>

वर्तमान में चयनित:

Luuk 10: BWU

हाइलाइट

कॉपी