Luuk 11

1Dai yeŋ po ate Yeezu a yaa jam cheŋ jigi dinyi a boro a puusi Wen. Wa ale ga puusi nueri la, wa ŋaaŋviirɔma po wanyi a yaa weeni ayen, <<M Nyɔnɔ Yeezu Kirisita, sak ti ate ti seba Wen puusa ase Jɔɔn ale jam sak wa ŋaaŋviirɔma diila.>> 2Wa yaa weeni ba ayen, <<Ase ni daa puusi, ni puusi ayen, <M Ko, fi yuenni nya zula. Fi naamu abe jam. 3Te ti dai yeŋ dai yeŋ ŋandiinta, 4Abe fi vɔŋ ti wabaata a te ti, ase tama dek ale vɔŋ a te waai ale nye kaasi ti la, abe fi kan basi ate ti jo nyenyaka po.>>

5Yeezu yaa weeni ba ayen, <<Ase nama waai a nin ta doa ate fi yaa yiri goota suŋsuŋ po a cheŋ wa jigi a weeni wa ayen, <M doa, m cheena ayen fi piem mu ka borobotta tita, 6dii nyiŋla, m doa ale nyiem jam m yenni yɔgyɔgla, alege m ka jaab ayen m te wa ate m cheena fi jigi ayen fi maari mu.> 7Ate wa yaa duak wa dɔkku po a tulisi fu ayen, <Kan daani mu. Dɔkku kpari kama yɔgyɔgla de. Mi ale m bisaŋa abe dua a goa kama. Mi an baga a yiri a te fi jaaboa.> 8Ni basi ate m weeni a sak ni ayen, wa dan poom kan baga a yiti a te fu boroboroku, fi ale ka wa doa la nyiŋ. Wa ale yiti a te fu jaab meena ate fi a yaali la diila, fi ale ka a chali chivie alege kasim a bek la.

9<<Ni be basi ate m weeni a sak ni ayen waai a dan a yaali jaab, wa bek Wen ale wa le te wa, wa gisi mɛ ale wa le nya, wa dan za dɔkku nɔi a nak ku le lak te wa. 10Dii nyiŋ la nuru waai abe le a bek jaab wari la a nya kama, waai mɛ abe le a gisi jaab la a nya kama, waai mɛ abe le a nak dɔkku nɔnni la, ku a lagri kama a te wa. 11Biik a dan bek wa ko ayen wa te wa jum wa le pai waab a te wa? 12Yaase wa dan juisi jein wa le pai nueoŋ a te wa? 13Alege nama baai ale chim wabanyeerisa ale seba tiirim maŋsa ni bisa teka m be m ŋman weeni ka boa, ti kowa ale bo wenŋmazuk la ale pai Wen Chiika a te baai ale a juisi wa la.>>

14Yeezu yaa ŋman boro a yiak chichirik biok, kuui ale ka gauŋ la. Chichirik bioku ale ga nyini la, nuruwa yaa ŋman baga a biisi ate ku deri cha nuru baai ale bo dula la. 15Alege nuruma gela a yaa jam weeni ayen, <<Ka chichirik baataŋa kpagni, Beelzebu ale te wa pagrimu ate wa baga a yiak chichirik baata nuruba po a basi.>> 16Ba gela a jam a yaali ayen ba nye wa a nya, yaa weeni wa ayen wa be nye wakinkagli ate ba nya ate ku sak ayen wa pagrimu a nyini ka wenŋmazuk. 17Alege Yeezu ale jam seba ba popolaŋa la, a yaa weeni ba ayen, <<Naam buui meena ale poori a ta chaab ale budek la a kan zaani, yie dii mɛ ale poori tɔgatɔga la a waaŋ ka chaab. 18Sitaana mɛ abe ka dila dekdega. Wa dan poori wadek a ta chaab ale wadek, wa naamu ale nye ka sɛ a baga zaani? Nama weeni kama ayen ka chichirik baataŋa naawa, Beelzebu pagrim nyiŋ ale soa ate m baga a yiak chichirik baata nuruba zuima po a basi. 19Be dan ka Beelzebu pagrim ate mi baga a nye dila, nama dek nuruma abe nya ba pagrimu mɛ ka bɛ a baga a nye wa ŋala chaama? Bala abe le ba bo ni buusa ale ni le tulisi diila. 20Ku be dan ka Wen nisa nyiŋ ate mi baga a yiak chichirik baata nuruba zuima po a basi, ku be a sak kama ayen Wen naamu jam ni jigi kama. 21Nidoa pagrɔ a dan gomsi wadek a magsi a limisi wa yeri, wa jaab kan bɛ. 22Alege nidoa pagrɔ wa choa waai ale ta pagrim gaam wa la, a dan jam tu chaab ale wa a nak wa yiak, wa le tuesi ŋan baai meena ate nuruwa a pai gomsi wadek la kama alege a pai wa ŋantaŋa a chari wa doaba. 23Waai ale kan bo ale mi la a ta ka chaab ale mi, ate waai ale kaa tigsi ale mi la a kati a waaŋ.

24<<Yeezu a yaa ŋman weeni Farisiima ayen, <<Chichirik biok a dan nyini nuru po a nyini, ku a cheŋ ka sagni po a ga nyiem a gisi vuusum jigi. Ku dan kan baga a nya jigi ya. Ku a weeni ka ku dek ayen, <Basi ate m ŋman a ga jo nuru waai po ate m poom boro la.> 25Ku dan ŋmani a ga jo dula jigini, ku yaa ale nya ayen ku jigini a gomsi magsi kama. 26Ku yaa ŋman nyini dula jigini a ga gisi a nya ku chichirik baata ti chaab tiyopɔi a ta ga jo nuruwa po. Nuru wala ale poom ka diila a gaam wa daamwa kama.

27Yeezu ale biisi dila a nueri la, nipok wanyi ale jam maa bo nuru boanni po a yaa lak wa lueluku biisi ate ku jueli ayen, <<Nipok waai ale biak fu ate fi ŋoosi wa la a ta suipeentik kama.>> 28Alege Yeezu yaa tulisi nipowa ayen, <<Aaya, baai ale a wom Wen Wanni ale a nye di la ta suipeentik kama.>>

29Ase nuruma ale jam piisi a gum du la, wa yaa piilim a weeni ayen, <<Gaŋka de ka biem gaŋ, ka a gisi ka daana, alege ba kan nya daana ka Jona daanaŋa nyiini. 30Ase Jona ale jam chim daana a te Niineve tɛŋka la#11:30 Jona 1:2, dila dekdega ate Mi Saalɔbiika ale chim daana a te gaŋka de mɛ. 31Yeseoku Nipok Naawa ale yiti kama buusa boka vaaŋa po ale gaŋka de nuruma a bo mini ba, wa jam nyini ka tɛŋka kpeglimka a jam wa wom Solomon yammu wie, ni abe nya wari dii ale zuak a gaam Solomon la a bo dela.#11:31 1 Nalima 10:1-13 32Buusa boka danni mɛ a dan paari, Niineve demma mɛ le yiri zaani kama a toariŋ ni dii nyiŋla, ba ale wom Jona sinsaŋŋa la, ba basi ba tuimbaataŋa tomka kama. Ni be basi ate m ŋman weeni a sak ni ayen wa dii ale bo dela la, a gaam Jona kama.

33<<Nuru karo a toati bolim zeuŋ a pai ku a suk yaase wa pai jaab a lik ku. Wa pai ku a zaani ka jaab zuk ate ku a nya, ate baai ale a jo dɔkku po la a nya bolimu. 34Fi nummu abe a nye ase ka zeuŋ la a te fi nyiŋka. Fi nummu abe dan nala, fi nyiŋka meena a sueri ale ka bolim. Alege nummu a dan kaasi fi nyiŋka meena a sueri ale ka legi. 35Dila nyiŋ be kpesi fidek kan basi ate bolimu ale bo fi po la a chim legiya. 36Fi nyiŋka meena abe dan sueri ale weleŋsa ate ka juijui ka biem po, ka meena be le bo ka weleŋsa po ase fi nyiem ale toati bolim ate fi a nya diila.>>

37Yeezu ale jam diem a biisi la, Farisii wanyi a yaa weeni ayen ba kuli ate ba dɛ ŋandiinta. Yeezu yaa siak ate ba jo kali ayen ba dɛ, 38ate ku cha Farisiiwa nna yegayega ate wa nya ale Yeezu a dɛ alege an nari wa nisaŋa ase ba kisiku ale a sak diila. 39Nyɔnɔwa Yeezu Kirisita yaa weeni wa ayen, <<Nama Farisiima a nyiem sugri ka beerisaŋa ale taasaŋa ŋaaŋsa, alege ni puusaŋa po ka varuk popola ale gaasa nyiini ale sueri. 40Ni ka betta. Nama zɛ ayen Wen ale nye jaab ŋaaŋ la wa maa nye ka wa puuka po mɛ? 41Dila nyiŋla ni pai ŋan baai ale bo beerisaŋa ale taasaŋa po la a te ŋanjaksaŋa ate jaab meena a nala a te ni.

42<<Alege nama Farisiima ku ale bie a te ni, nama a tuni ŋan baai ate ni pai a nyo jenta po la piika a te Wen kama, alege ni ka nyemagsika ale nuruba gela ni be kan yaali Wen ya. Wie ŋaai ale magsi ayen ni a nye la ale la ase ni a nin poom a nye nŋala.>> 43Nama Farisiima, ku ale bie a te ni, dii nyiŋla, ni a yaali ka zukpaglik sii ate ba lueri a te nuru baai ale magsi zula teka la zuima kalik ni tuka diinaŋa po. Ni be a yaali kama mɛ ayen nuruba a puusi ni a te ni zula yaba peelitaŋa po ate waai meena a nya ni. 44Ku ale bie a te ni, diila ni a nye ase ka boosuk tii ate ba kan nya ti la, ate nuruba a va ti zuk a taam alege zɛ la.>>

45Sagrɔma wanyi a yaa tulisi wa ayen, <<M sagrɔ, fi ale biisi nna la, fi lɛ tama mɛ kama.>> 46Ate wa weeni ayen, <<Ku ale bie a te nama Sinsak sagrɔma mɛ, diila ni pai ka jipta a ji nuruba ate ku pagra a te ba alege nama dek a kan tiri ti ale ni nandubsa. 47Ku ale bie a te ni diila ni sɛ ka boosita a te Wen biisiteerɔma baai dek ate nama kokpieŋsaŋa a ko la. 48Dila nyiŋ nama nyeka a sak kama ayen ni siak kama ale ni kokpieŋsaŋa ale nye diila. Boan nyiŋŋa ka bala ale ko ba ate nama mɛ yaa a sɛ boositaŋa a teeri ba. 49Dila ale soa ate Wen yammu a weeni ayen, <M le tom biisiteerɔba ale tuimtomdɔba ate ba jam ba jigi. Ba be le ko biisiteerɔma ale tuimtomdɔma de ba gela abe ba basi ate ba gela a nya ninam. 50Biisiteerɔma ziimu ale nyini tɛŋka nyubini piilimka la nyiŋ, gaŋka de ale nya waalika 51a ta nyini Abel a ga paari Zakaria ate ba jam ko Wen yenni kuŋkuŋku ale weleŋsaŋa jigini suŋsuŋ la. Mi diem a weeni kama ayen gaŋka de ale nya waalika.> 52Ku ale bie a te nama Sinsak sagrɔma, ni ale pai yam saafiika, nama dek an jo ya, ale kasi baai ale a yaa ba jo la.

53Yeezu ale ga basi dula jigini ale cheŋ la, Sinsak sagrɔma ale Farisiima a jam a toariŋ wa kama nalimnyiini a bek wa beka nna yegayega 54a pii nyiŋ a nye ayen wa biisi kaasi ate ba nya suik a bo wa buusa.

वर्तमान में चयनित:

Luuk 11: BWU

हाइलाइट

कॉपी