Maak 12
12
1Yeezu yaa magsi wamagsima a sak ba ayen, <<Nuru ale jam kpa wa kaduk, a vuk tiisa ka po ayen si a yɔni. Wa yaa che daata a ti gilim ka meena ale tu goluk a magsi daam ŋmiaka ale sɛ yie woŋ. (Azaya 5:1-2) Wa ale nye dila a ga nueri la, wa yaa yaali nuruba ayen ba a limisi ka abe ba a tom ka po alege nyiem a cheŋ tɛŋ nna niŋniŋa. 2Wa kadukka tiisaŋa yɔnaŋa pisika ale jam paari la, wa yaa tom tomteerɔ ayen wa ga tuesi yɔna ŋaai ate wa soa la wa nuruma jigi a ta jam te wa. 3Nuruma yaa yik wa a nak yiak wa ate wa cheŋ ale nisim koruta. 4Kadukka nyɔnɔwa yaa ŋman tom tomteerɔ wa choa ba jigi ate ba ŋman yik wa mɛ a nak wa zukku, a pai wa a nyo chivie po. 5Wa yaa ŋman pilim tom wa choa ba jigi ate ba ko wala. Ba jam a nye ka nuruba yega dila a nak ba gela ale ko ba gela mɛ.
6<<Waai nyiini ale jam tali ayen wa tom la ale wadek nidoabinni, waai ate wa a yaali la. Wa yaa weeni wadek ayen, <M dan tom m dek nidoabinni, ba le te wa zula.> Wa yaa tom wa ate wa cheŋ ba jigi.
7<<Alege nuruma ale nya wa nidoabinni la, ba yaa weeni chaab ayen, <Nidoabinni kowa a dan kpi, wala le wa soa wa ŋantaŋa meena. Dila nyiŋ ni basi ate ti ko wa ate wa kowa chum dan kan boro abe tama soa wa ŋantaŋa.> 8Ba yaa yik wa a ko a vuuri wa a ta nyini kadukka po a nyini peelim. 9Nama seba kadukka nyɔnɔwa le wa nye ba diila? Wa le jam ko ba kama abe wa ŋman pai wa kadukka a te nuru yonta. 10Nama an diem a karim kude Wen gbaŋka po? <Tain dii ate seerɔma a zɛri ayen di an nala la, tain dila dek ale tulim a chim tain maŋ. 11Naawen ale nye dila. Di ka wakperikaliik ti nina po.> >> (Yiila 118:22-23)
12Ba yaa deri miŋ ayen ka ba jigi ate wa pai wamagsini de a magsi dii nyiŋla, ba zɛri wa kama. Ba yaa jam a yaali ayen ba yik wa, alege ba jam a chali nuru boanni yɔgsum, ate ba yaa jam basi wa ale ge cheŋ.#12:1-12 Nya fotowa, Piilimka 9:20.
13Ba yaa tom Farisiima gela ale naawa Ayerod nuruma gela ayen ba ga choa Yeezu nɔi a wom. 14Ba yaa jam weeni wa ayen, <<Sagrɔ, ti seba ayen fi ka wensie nyɔnɔ. Fi niŋ ka dii meena ate nuruba a poli la po. Nuruba kpaŋta kan basi ate fi a tagri fi popola. Fi a sak Wen wieŋa kama ale wensie. Ku magsi ayen ti tuni ti lampoowa a te naab kpioŋku Siiza, yaa ku an magsi ya? Ti a tuni yaa ti kan a tuni?>> 15Yeezu a poom seba ba kiri kama ate wa yaa bek ba ayen, <<Ka boa ate ni a yaali ayen ni choa m nɔi a wom? Ni ga ta ligbiri a jam te mu.>> 16Ba yaa ta ligbiri dinyi a jam te wa. Wa yaa bek ba ayen, <<Ka wana zuk ale wa yuei ale dua ligni nyiŋŋa?>> Ba yaa weeni wa ayen, <<Ka Siiza zuk ale wa yuei ale dua du.>>
17Wa yaa weeni ba ayen, <<Ni pai ŋan baai ate Siiza a soa la a te wa, abe ni pai ŋan baai mɛ ate Wen a soa la a te Wen.>> Ba ale wom dila la, ku yaa cha ba.
18Sajusiima baai ale jam weeni ayen nuruba kan yiti kum po la, yaa jam Yeezu jigi ale bega. 19Ba bek Yeezu ayen, <<Moosis a ŋmarisi wa gbaŋka po kama ayen, <Nuru waai a dan faari nipok ate wa ale wa an biak a nyaya alege ate wa kpi, ti a basi kama ate wa yuawa a faari nipowa a biak bisa a te wa ate wa yuenni a kan be.>#12:19 Teerika 25:5 20Nuruba bayopɔi ale jam boro a chim suata ate ba suok kpagni a faari nipok ate ba an biaya alege ate wa kpi. 21Waai ale pai saŋ la yaa faari wa suoku powa, alege nipowa ale wa mɛ an biak a nyaya alege ate wa mɛ a kpi. Ba suok kuui ale pai saŋ butawa la mɛ a nye dila dekdega. 22Ba meena bayopɔiwa a jam faari nipowa kama a taam tu, alege ba waai an biak ale wa alege kpi ya. Ku ŋaaŋnyiŋ ate nipowa mɛ a yaa kpi. 23Yɔgyɔgla de ate nuruba bayopɔiwa de meena a faari wa a nya la, dai dii dai ate nuruba meena a yiti kum po la, ka ba wana dek chekki ale wa soa nipowa de?>>
24Yeezu yaa weeni ba ayen, <<Nama an diem a miŋ Wen gbaŋka po wieŋa chagiya. Ka dila ale soa ate ni bɛ suiku. Ni zɛ Wen pagrimu mɛ ale ka diila. 25Dai dii dai ate nuruba meena ale yiti kum po la, ba meena le tagri kama a nye ase Wen maarɔma baai ale bo wenŋmazuk la. Nidoa a kan ŋman faari nipowa. Nipok mɛ abe kan ŋman yali chora. 26Yɔgyɔgla de, a magsi chaab ale nuruba le ba yiti kum po la, nama an karim Moosis gbaŋka kauk kuui ale a biisi a magsi chaab ale ti fiika ate bolimu jam a nye nna ase bu a dɛ bu la? Dula jigini ku ŋmarisi kama ayen Wen weeni Moosis kama ayen, <Wa ale Abrayam ale Aizik ale Jekob Wenni.> (Nyinika 3:6) 27Dila a sak kama ayen wa daa kpilima Wen yaa, wa ka ŋanvuta Wen, dila nyiŋ ni bɛ suiku kama.>>
28Sinsak sagrɔma wanyi a yaa wom ba ale a biisi diila. Wa ale wom ale Yeezu a tulisi ba magsi la, wa yaa jam bek Yeezu ayen, <<Ka Wen Sinsaŋŋa po ŋa ŋan dek ale chim sinsak kpiema a gaam ŋa meena?>>
29Yeezu yaa weeni wa ayen, <<Sinsaŋŋa de ale chim sinsak kpiema a gaam ŋa meena. <Ni wom dɛ Izirali demma: Naawen ka ti Wen. Naawen ka wanyi. 30Yaali Naawen fi Wenni ale fi suinum meena ale fi chiik meena ale fi popola meena ale fi pagrim meena.> (Teerika 6:4-5) 31Sinsaŋ ŋaai ale gaam ale pai saŋ la ale nna, <Yaali fi vaanchoa ase fi ale a yaali fidek diila.> (Kaabka 19:18) Sinsaŋŋa ŋman karo a chim sinsak kpiema a gaam sinsaŋŋa de ŋayewa.>>
32Sinsak sagrɔwa yaa weeni wa ayen, <<Sagrɔ, fi wieŋa ka wensie. Wen sum ka dinyi dekki. Wen di choa a ŋman karo a gum wa po.#12:32 Teerika 4:35 33Abe fi a yaali wa ale fi suinum meena ale fi miŋka meena ale fi pagrim meena ale yaali fi vaanchoa mɛ ase fidek la, dila ka wari kpienni a gaam fi ale a ko duŋsa ale pai ŋanta ba chaab a kaab a te wa la kama.>> #12:33 Teerika 6:5; Kaabka 19:18
34Nuruwa ale weeni dila la, Yeezu yaa seba ayen wa tulisi wa ka nalimnyiini ate wa yaa weeni wa ayen, <<Ku tali ka magadega ate fi jo Wen naamu po.>> A zaani dila waai an ŋman jam be wa bega.
35Ase Yeezu ale jam a sak Wen Yenni po la, wa yaa bek ayen, <<Ka boa ale soa ate Sinsak sagrɔma a weeni ayen Kirisitawa ale chim ka Deevid nidoabili yaa? 36Wen Chiika jam basi kama ate Deevid weeni ayen, Naawen a weeni mi Nyɔnɔwa ayen, <Kali m juga nisa geŋ a ta cheena diipo ate m le basi ate fi nya pagrim fi dachaasaŋa zuk.> (Yiila 110:1)
37<<Ase Deevid dek dan wi Kirisitawa ayen wa Nyɔnɔ, ku be zaani ka sɛ ate Kirisita a baga a chim Deevid nidoabili yaa?>> Nuru boari nna yegayega ale jam boro a wom Yeezu sinsaŋŋa ale suipeentik.
38Wa yaa weeni ba ayen, <<Ni kpesi nidek ate Sinsak sagrɔma a kan paasi ni. Ba a yaali kama ayen ba jo ba garuk woŋtaŋa a bo yabaŋa po a nyiem a cheŋ ate nuruba a puusi ba abe ba a te ba zula mɛ. 39Ba a yaali kama ayen ba nyiem a kali zukpaglik sii ate nuru kpientaŋa a kali la zuima ba tuka diinaŋa po. Ba nyiem a dan boro a nye tigi ba a yaali kama ayen ba a kali zukpaglik sii ate ba kpaŋŋa a kali la zuk. 40Ba be ka baai mɛ ale a yaali pukɔga paasi dɛka la, ale baai mɛ ale a puusi Wen venta puusa woŋta la. Bala chaab waalika le gaam taam ka nna yegayega.>>
41Yeezu a jam kala ka Wen Yenni po a moata juijui ate nuruba ta ba ligra a jam a nyoro a te Wen la, a yaa a nya. Ligra nyam yegayega ale jam maa bo Wen Yenni po. Ba mɛ yaa jam maa ta ligra nna yegayega a jam a nyoro. 42Pukɔgi niwobwa yaa jam boro a ta wa ligbie ŋaye a jam nyoro. Ŋa an jam soa diiya.
43Ate wa yaa wi wa ŋaaŋviirɔma ate ba jam wa jigi weeni ba ayen, <<Wensie, mi ale a weeni ayen pukɔgi jakka de a te gaam baai meena ale te diila kama. 44Dii nyiŋ la ba meena a te kama ale diem tali nna yegayega, alege nipowa de a pai dii meena ate wa ta la a te.>>
वर्तमान में चयनित:
Maak 12: BWU
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation