Maak 13
13
1Yeezu yaa ale jam nyini Wen Yenni po a nyini la, wa ŋaaŋviirɔma po wanyi yaa weeni ayen, <<Sagrɔ, nya tanaŋa ale zuak diiya, nya yenni ale nala diila?>>
2Yeezu yaa tulisi ayen, <<Ni nya yeri kpienni de? Dai cheena ate ba le nak di meena a lɔnsi. Tain yeŋ mɛ la a kan ŋman dua di choa zuwa.>>
3Ba yaa cheŋ ga jueli Olivi Guuku zuk a kala dula jigini a nya Wen Yenni. Piita ale Jɔɔn ale Jeemsi ale Andiru yaa bek Yeezu badek ba nyiini ayen, 4<<Ka dimpo ate wieŋa de meena ale nye? Ka boa ale ku nye ate ku sak ti ayen danni a moata?>>
5Yeezu yaa weeni ba ayen, <<Ni kpesi nidek ate waai a kan paasi ni. 6Nuruba yegayega le jam mi yuenni nyiŋ a weeni ayen, <<Ka mi ale Kirisitawa.>> Ba le paasi nuruba yegayega ayen ba va ba. 7Ni dan wom kpaliŋsa wie ate si gela moata alege si gela mɛ a bo niŋniŋa, ni kan a chali yɔgsummoa. Ku a fɛ kama ayen nyaŋa de meena a nye, alege ku kan sak kama ayen tɛŋka kpeglimka a moata kama. 8Tɛŋsa le yiti a ta chaab ate naata a yiti ta chaab. Tɛŋka mɛ le choa m na yegayega ate kɔm a jam tɛŋka meena po. Ase nipok ale dɛ niŋ a dom dii alege a biak la, ku a fɛ kama ayen wieŋa de meena mɛ dɛ niŋ nye alege ate tɛŋka a jam kpeglim.
9<<Ni kpesi nidek dii nyiŋla, nuruba ale jam yik ni ale pagrim a ta ni cheŋ ba tuka diinaŋa kpaŋŋa jigi ate ba bo ni buusa abe ba nak ni. Ni ale a va mi la nyiŋ, ba le ta ni mɛ a cheŋ ga zaani nalima niŋ ate ba mɛ bo ni buusa, ate ni nya suik a mooli Wen wamaŋsaŋa a sak ba. 10Ku a fɛ kama ayen nuru meena a liŋ wom Wen wamaŋsaŋa alege ate tɛŋka a kpeglim. 11Ba dan ta ni a cheŋ ga jo buusa boka dɔkku po, ni kan basi ate ni le ni biisi diila a daani ni. Ni biisi dii meena ate Wen le basi ate ni biisi la dii nyiŋla, ka Wen Chiika le ka sak ni ate ni biisi daa nama dega.
12<<Kula danni a dan paari, suata le yik chaab a te nuruba ate ba ko ba. Koba mɛ ale nye ba bisa dila, ate bisa mɛ a nye ba koba ale ba maba dila. 13Waai meena le kisi ni kama ni ale a va mi la nyiŋ. Alege waai a dan baga a chiib zaani a tu ninammu de meena a ga nueri, Wen le vari wa a basi.
14<<Dai yeŋ ni le nya jabuui ate Wen kisa la ale wa za juijui ale kan magsi ayen wa zaani la. Ni dan nya dila ku a fɛ kama ate nama baai meena ale bo Judia tɛŋka po la a chali ga suk guutaŋa suŋsuŋ.>> Nuru waai le wa karim nya kude la, a ŋmasi miŋ chak.#13:14 Daniel 9:27 15<<Waai a dan za wa gboŋ zuk kan ŋman daani wadek ayen wa siŋ a pai jaaboa. 16Waai mɛ ale bo wa kaduk po la, a kan ŋman kuli yeri ayen wa pai wa garuwa. 17Da ŋala po ku le jam tua ka nna yegayega a te nipok puusa ale baai ale ta buluata la. 18Ni a puusi a te Wen ate nya kude a kan jam nye ŋoota wein ya. 19A zaani diipo ate Wen a nye tɛŋka la a ta jam paari jinla, ninammu de le gaam ninam meena ate nurubiik a nam ale diem kala ayen wa nam la kama. 20Alege Naawen a yeeri ninammu daaŋa gela a basi kama, baai ate wa lueri ayen ba jam va wa la nyiŋ. Wa dan kan yeeri ninammu daaŋa gela a basiya, waai kan nyini ninammu po a nyini. 21Da ŋala po waai dan weeni ayen, <Ni nya, Kirisitawa ale nna,> yaase <Ni nya, Kirisitawa ale la,> ni kan wom wa. 22Nuruba gela ale jam yiti a paasi nuruba ayen ba ale Kirisitawa. Ba baai mɛ le jam a weeni ayen ba ka Wen biisiteerɔba. Ba le jam a tom wakperikaliisa nna yegayega a yaali ayen ba dan poom baga ba paasi baai ate Wen a lueri ayen ba va wa la. 23Ni be kpesi nidek, dii nyiŋla m ŋaam weeni wieŋa de meena kama ale ŋa an diem nyeya.
24<<Alege ninammu daaŋa a dan jam taam, Wenbinni ale sobri ate chiika a kan nya. (Azaya 13:10) 25Chiŋmarisaŋa le nyini wenŋmazuk a lo ate ŋan baai meena ale bo wenŋmazuk a ta pagrim la mɛ a choa.#13:25 Azaya 13:10; Joel 2:10
26<<Dila po nuruba ale nya Mi Saalɔbiika ale nyini chiŋmaaŋa po a cheena ale pagrim yega ale zula.#13:26 Daniel 7:13 27Mi ale tom maarɔma ate ba jam tɛŋka meena po a tigsi nuru baai ate Wen a lueri ayen ba va wa la.
28<<Ni basi ate kiŋkaŋ a sak ni wari kiri. Ni nyiem a dan nya ale ka boro a pusi vaata, ni seba ayen yoe a moata kama. 29Ni be dan nya wieŋa de ale ŋa piilim a nye, ni yaa be seba ayen m jamka moata kama. 30Wensie ate mi a weeni ni gaŋka de a kan sum taam ka wieŋa de meena a nin nye. 31Wenŋmazuk ale tɛŋzuk meena ale jam taam dai yeŋ po, alege mi wieŋa a kan taam diipo diipo.#13:31 Azaya 40:8
32<<Nuru waai a zɛ Mi Saalɔbiika ŋman jamka danni. Mi ale Wen maarɔma mɛ dek a zɛ, alege ka m Kowa nyiini ale seba. 33Ni kpesi nidek abe ni a limisi dii nyiŋla, ni zɛ m jamka daiya. 34Ku a nye se ka nuru ale gomsi ayen wa nyiem a cheŋ satɛŋ niŋniŋ la. Wa yaa te wa tomteerɔma meena tuima ale weeni waai ale a nya yenni zuk la ayen wa a limisi.
35<<Ba nyɔnɔwa a baga a jam junɔi geŋsa yaase goota suŋsuŋ yaase kpadaasa kumsa po yaase wenbinni ale a pusi diipo la kama. Ba waai zɛ wa le cheena diipo la. Suik kula po mɛ, nama waai a kan seba mi ŋman jamka danni. Dila nyiŋla, ni kpesi nidek abe 36ni kan basi ate ni nyɔnɔwa a jam diiri ni ale ni dua a goa. 37M kan weeni ka nama nyiini, mi a weeni ka waai meena. Ni kpesi nidek abe ni a limisi.>>
वर्तमान में चयनित:
Maak 13: BWU
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation