GÉNESIS 12
12
Abramta Dios wajyan
1Uj kuti Señorqa Abramman nerqa: Saqey jallp'aykita, ayllusniykita, tataykej wasintawan. Jinaspataj ripuy, noqa rikuchisqayki chay jallp'aman. 2Mirayniykimanta ruwasaj uj jatun aylluta; bendicisqayki, sutiyki may yuyarisqa kanqa, qannejta wajkuna bendicisqas kanqanku. 3Qampaj allinta ruwajkunapaj allinta ruwapusaj, qampaj mana allinta ruwajkunatarí maldicisaj. Qannejta bendicisqas kanqanku tukuy ayllus kay jallp'a patapi kajkuna.
4Abramtaj Harán jallp'amanta llojsiporqa Señorpa kamachisqanman jina; Lotpis paywan rerqa. Abramqa qanchis chunka phishqayoj watasniyoj karqa, Canaán jallp'aman ripushaspa. 5-6Pay riporqa warmin Saraita, sobrinon Lottawan pusariykukuspa. Jinallataj Harampi kashaspa mashkha runastachus jap'erqa chaytawan, tukuy imasnintawan apariykukuspa; Canaán jallp'amantaj chayarqanku. Chaymanta Abramqa rillarqapuni Siquem jallp'aman chayanankama, More vallepi maypichus encina sach'a karqa chayman. Chay jallp'aspitaj cananeos tiyakusharqanku. 7Chaypi Señorqa Abramman rikhurerqa, nerqataj: Kay jallp'ata mirayniykiman qosaj. Abramtaj chaypi uj altarta Diospaj ruwaporqa, chaypi Señorqa payman rikhurisqanrayku. 8Chaymanta riporqa uj orqoman, chaytaj kashan Betel llajtaj inti llojsimuyninnejpi, chaypi jarakorqa. Betelqa kasharqa jaramanta inti yaykuypi. Haitaj karqa inti llojsimuynejpi. Chay cheqapi Abramqa uj altartañataj ruwarqa, Señorpa sutimpi Diosmanta mañakunampaj. 9Chaymanta Abramqa rillarqapuni pisimanta pisi Neguev jallp'aman.
Abramqa Egiptopi
10Chay tiempopi uj jatun yarqhay karqa jaqay jallp'api. Chayrayku Abramqa Egiptoman riporqa pisi tiempota tiyarikoj. Imaraykuchus chay jallp'api, maypichus tiyakorqa chaypi, manapuni imapis mikhuykunampaj karqachu. 11Egiptoman chayashaspataj Abramqa warmin Saraiman nerqa: Qhawariy, noqa yachani qanqa sumaj k'achita warmi kasqaykita. 12Egipcios qanta rikuytawan nenqanku: Kay warmeqa chay qharej warmin, nispa noqata wañuchiwanqanku, qantari mana. 13Chayrayku niy ari, qanqa noqaj panay kasqaykita, qanrayku ama wañuchinawankupaj, allintaj rinawampaj, nispa.
14Abram Egiptoman chayajtinkama egipciosqa Saraita mayta qhawaj kanku k'achita kasqanta. 15Faraonta yanapajkunasnimpis rikorqanku k'achita kasqanta, jinallataj faraompis; pay karqa Egiptopi rey. Chaymantataj Saraitaqa faraompa palacionman pusarqanku.
16Sarairayku faraonqa Abramta munakorqa. Qortataj payman ovejasta, wakasta, qhari kamachista, warmi kamachista, burrosta, camellostawan. 17Sarairaykutaj Señorqa faraonta mayta ñak'aricherqa ashkha jasut'iykunawan, jinallataj tukuy familiantapis. 18Chayrayku faraonqa Abramta wajyacherqa, nerqataj: Imaraykutaj qan kay jinata ch'aukiyawankiri? Imaraykutaj mana qan niwankichu kay warmeqa qampa warmiyki kasqantarí? 19Qan niwanki kay warmeqa panayki kasqanta, noqatataj saqewanki payta warmiypaj jap'ikojta. Kunanqa kayqa warmiyki, jap'ikapuy, ripuytaj kaymanta.
20Chaymanta faraonqa runasninta wajyaspa nerqa Abramta Egipto llajtankumanta qharqonankuta, warmintawan, pininchus, imasninchus karqa chaytawan.
वर्तमान में चयनित:
GÉNESIS 12: QCHSB
हाइलाइट
शेयर
कॉपी
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.