GÉNESIS 13
13
Abramwan Lotwan t'aqanakorqanku
1Abramqa Egiptomanta llojsipuspa, warminwan, chanta tukuy imasninwan wicharerqa Neguev jallp'aman. Lot sobrinompis paywan khuska riporqa. 2Abramqa may qhapaj karqa, tiyaporqa ashkha uywasnin, qolqen, qorin ima. 3Neguevmanta ripullarqapuni jarakuspa Betel llajtaman chayanankama; chaymantapis rillarqapuni maypichus ñaupajta ruwakorqa toldota Betelwan, Haiwan tinkuypi chayman. 4Chayqa karqa maypichus ñaupajta altarta ruwarqa chay. Chaypi Diosmanta mañakorqa, Señorpa sutinta oqharispa.
5Lotpis, mayqenchus Abramwan risharqa chayqa, may qhapajllataj karqa. Tiyaporqa ashkha ovejas, wakas, toldoswan ima. 6Maypichus kasharqanku chay cheqaqa pisi karqa chay chhika uywasninkupaj. Chayrayku mana tiyakuyta aterqankuchu khuskallapuni. 7Abrampa uywasninta michejkunasninwan, Lotpa uywasninta michejkunasninwan mayta maqanakorqanku churanakuspa. Chaypacha chay jallp'api tiyakullarqankutaj cananeos, ferezeos ima.
8Uj p'unchay Abramqa Lotman nerqa: Qanwan noqawanqa aylluntin kanchej, mana atisunmanchu phiñanakuyta noqanchejpura, nitaj michejkunasninchejpis phiñanakuyta atinkuchu. 9Qhawariy, jallp'aqa tiyallan, ajllakuy, noqamanta t'aqakuy. Sichus qan lloq'eman rinki chayqa, noqa ripusaj pañanejman. Qantajchus pañanejman rinki chayqa, noqaqa ripusaj lloq'enejman.
10Lotqa tukuynejta qhawarerqa, astawanqa Jordán mayu valleta Zoar juch'uy llajtakama. Chaykunaqa yakusniyoj karqa, sumajtaj Señorpa huertan jina, Egipto jallp'aman rijch'akoj. Chaytaj karqa manaraj Señor chinkachishajtin Sodoma llajtata, Gomorra llajtatawan. 11Lotqa chaymanta ajllakorqa Jordán valleta. Riporqataj inti llojsimuynejman, maypichus kasharqanku chaymanta. Ajinata Abramwan Lotwan t'aqanakorqanku. 12-13Abramqa Canaán jallp'api qhepakorqa. Lottaj riporqa tiyakoj valle llajtas chaupiman, Sodoma llajta qayllaman, maypichus runaqa millay sajra karqa chayman. Chay Sodomapi kajkunaqa millay sajra juchasta, Señorpa contranta ruwaj kanku.
14Lot ripusqanmanta qhepaman Señorqa nerqa Abramman: Maypichus kashanki chaymanta sumajta qhawariy patanejta uranejta, inti llojsimuyta inti yaykuytawan. 15Noqa qosqayki tukuynin rikusqayki jallp'asta, qampaj wiñaypaj kanqa, jinallataj mirayniykipajpis. 16Mirayniykita jallp'a t'iyuta jina mirachisaj. Imaraykuchus jallp'a t'iyoqa mana yupay atina, ajinallataj mirayniykeqa mana yupay atina kanqa. 17Kunanqa sayariy, thaskiriytaj kinrayninman, sayt'unman; imaraykuchus noqa qanman qosqayki kay jallp'ata.
18Jinamanta Abramqa toldonta oqharispa riporqa Mamre runaj encinas sach'arara jallp'anman, Hebrón llajta qayllaman. Chaypi uj altarta Señorpaj ruwarqa.
वर्तमान में चयनित:
GÉNESIS 13: QCHSB
हाइलाइट
शेयर
कॉपी
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.