Jã Sɛbɛ 11
11
A LAJAAR KŨU
1Daba dãa na be be na dɩ Lajaar ɩ̃ ɩ wʋlɩ̃. Ʋ be na a Betani-tẽw na mɩ ɩ a Maarɩɩ nɩ a ʋ yɛbɛ Martɩ tẽw. 2A Maarɩɩ ɩ na a ʋlɔ na dãa cir a kã-nyu-vɩlaa ƴɔ̃w a Nɩ-kpɛ̃ɛ *Jeeju gbɛɛ pʋɔ, ɩ̃ lɩɛb a ʋ jukɔbɔ fɔfɔ nɩ, ɩ̃ a Lajaar ʋlɔ na ɩ a wʋlɩ̃ ɩ na a ʋ yɛ-daba. 3A Lajaar yɛ-pɔɔbɔ ayi bala tʋ̃ na nɩrɛ ʋ cen na yel a Jeeju:
“Nɩ-kpɛ̃ɛ, a fʋ baraa ɩ na wʋlɩ̃.” 4A lɛ a Jeeju na wõ a ʋna ƴɛrɩ̃, ʋ yelʼã:
“A wʋlɩ̃ ʋlɔ ma kúrɔ ʋ wa, ɩ̃-cɛ a ɛ̃ɛ na ta ʋ a lɛ, na tʋɔ miilʼɩ̃ a Naaŋmɩn yo-yifʋ, ɩ̃ mɩ maal a maa Naaŋmɩn Bie yuor ʋ yi.”
5A Jeeju nʋ na a Martɩ nɩ a Maarɩɩ nɩ a ba yɛ-daba Lajaar. 6A lɛ ʋ na wõ a Lajaar wʋlɩ̃, ʋ lɛ cãa na maal bibie ayi a jie ʋlɔ ʋ na be, 7ɩ̃ pãa yel a ʋ *par-tuurbe:
“Nyɩ́ ɩ a sɩ lɩɛb cen a Jude.” 8A ʋ par-tuurbe yel ʋ:
“Jãjaana, aa ɩ a dayenɩ̃ yɛ̃yɛ̃ na a Jufisɩ dãa bʋɔrɔ ba lɔbʼɩ̃ fʋ a kʋsɩɛ kú wa? Ɩ̃ a fʋ lɛ bʋɔrɔ fʋ lɩɛb cen a be?” 9A Jeeju yel ba:
“A bibir tɛrɛ na a ʋ mɔtɔ̃w caarɩ̃fʋ daar. A nɩrɛ ɩ̃ cere a mɔtɔ̃w, ꞌwaa ŋmeere gbɛr wa a-na-ɩ a wɩɛr caarɩ̃ ʋ na. 10Ɩ̃-cɛ a ala ɩ̃ ɩ a tɩsɔw a nɩrɛ cere ʋ na ŋme na a gbɛr, a-na-ɩ a cãa ma be a ʋ jie wa.”
11A mɩnɛ ʋ na ƴɛr a lɛ baar, ʋ yel ba na:
“A sɩ baraa Lajaar gurʼã ɩ̃-cɛ ɩ̃ na cenʼã na sɩ̃w ʋ.” 12A ʋ par-tuurbe yel ʋ:
“Nɩ-kpɛ̃ɛ, a ʋlɔ ɩ̃ gur, ʋ na kpɛmɛ na.” 13A Jeeju bʋɔrɔ na ʋ yel ba áa Lajaar kpi na ɩ̃-cɛ a par-tuurbe tɩɛrʼã beeka gʋ̃ɔ son ʋ yele ba. 14Ala-ɩ̃-sɔ a Jeeju yel ba cãa pʋɔ:
“A Lajaar kpi na, 15ɩ̃ a nyɩ ɩnɛ a nʋmɔ ma na ɩ̃ na ma be be wa, a mɩnɛ a nyɩ na tʋɔ tɛrɛ nɩ ma a ƴɔ̃w-nyãa. Ɩ̃-cɛ nyɩ́ ɩ a sɩ cen a ʋ sɛ̃.” 16A lɛ, a ʋ *par-tuure ʋlɔ ba na buɔlɔ a Tomasɩ (na mɩ dɩ a Yɩb) yelʼã a ʋ tɔ deme:
“Nyɩ́ ɩ a sɩ mɩ cen na lãa kpi nɩ a sɩ Nɩ-kpɛ̃ɛ!”
A JEEJU Ɩ NA A KŨU-PƲƆ-IRFƲ NƖ A BAAFƲ SƲBƆ
17A lɛ a *Jeeju na ta a be, ʋ nyɛ na bɔ̃w ka a maalʼã bibie anaan ba na ũu a Lajaar. 18Ɩ̃ a Betani nɩ a Jerujalɛm ma jãa ta wa, aa mɩ tara kilo ata wa, 19a Jufisɩ yaw wɩ a Martɩ nɩ a Maarɩɩ sɛ̃ na ƴɛwrɛ ba a ba yɛ-daba na kpi ɩnɛ.
20A lɛ a Martɩ na wõ áa Jeeju waara na, ʋ yi na tuoro ʋ, ɩ̃-cɛ a Maarɩɩ cãa jɛ a be a yir. 21A Martɩ yelʼã a Jeeju:
“Nɩ-kpɛ̃ɛ, a fʋ̃ʋ dãa be ka, a ɩ̃ yɛ-daba kɔ̃ɔ dãa kpi wa. 22Ɩ̃-cɛ a ƴɛ̃ƴɛrɩ̃ na, ɩ̃ bɔ̃w ka a bom lɛ fʋ na sʋɔrɔ a Naaŋmɩn jie ʋ na kʋ fʋ na.” 23A Jeeju yel ʋ:
“A fʋ yɛ-daba na irʼã a kũu pʋɔ.” 24A Martɩ yel a Jeeju:
“Ɩ̃ bɔ̃w na bɔ̃w ka ʋ na irʼã a kũusɩ irfʋ daar a bibi-baaraa dayen.” 25A Jeeju yel ʋ:
“Maa ɩ̃ ɩ a kũu-pʋɔ-irfʋ nɩ a baafʋ sʋbɔ. A ʋlɔ na yɔ̃w ma a nyãa, a ʋlɔ ɩ̃ saarɩ̃ kpi, ʋ na cãa na tɛrɛ a baafʋ. 26Ɩ̃ a ʋlɔ na tɛrɛ a baafʋ ɩ̃ ƴɔ̃w ma a nyãa, kũu ma be na ta ʋ wa. Fʋ sɔw na a ala mɩɩ?” 27A Martɩ yel ʋ:
“Nɩ-kpɛ̃ɛ, ɩ̃ sɔw na. Ɩ̃ sɔw na a fʋ̃ʋ ɩ̃ ɩ a *Kirisi na ɩ a Naaŋmɩn Bie. Fʋ̃ʋ ɩ̃ ɩ a ʋlɔ na sɛw na wa a ka a tẽw pʋɔ.”
A JEEJU NA KÕ
28A lɛ a Martɩ na ƴɛr a lɛ baar, ʋ lɛ kulʼã a yir na bʋɔl a ʋ yɛ-bile Maarɩɩ, na ʋ bʋr yel ʋ:
“A Jãjaana wa na ɩ̃ bʋɔlɔ fʋ.” 29A lɛ a Maarɩɩ na wõ a ʋna ƴɛrɩ̃, ʋ irʼã fɔfɔw cen a *Jeeju sɛ̃, 30a-na-ɩ a Jeeju ma kpɛ a tẽw pʋɔ sɛr wa; a jie ʋlɔ a Martɩ na tuorʼɩ̃ ʋ ʋ cãa ɩraa. 31A Jufisɩ bala na dãa lãa be nɩ a Maarɩɩ be a yir ƴɛwrɛ ʋ, nyɛ ʋ na ʋ ir a fɔfɔw yire. Ala-ɩ̃-sɔ ba tuure ʋ na, a-na-ɩ ba tɩɛrʼã beeka a yaa par ʋ cere a kõfʋ jie.
32A lɛ a Maarɩɩ na ta a jie ʋlɔ a Jeeju na be, naa ʋ nyɛ ʋ, ʋ lo na a ʋ gbɛɛ pulẽe ɩ̃ yel ʋ:
“Nɩ-kpɛ̃ɛ, a fʋ̃ʋ dãa be ka, a ɩ̃ yɛ-daba kɔ̃ɔ dãa kpi wa.” 33A lɛ a Jeeju na nyɛ ʋ ʋ kono, ɩ̃ mɩ nyɛ a Jufisɩ bala na bɩɛl ʋ a ba mɩ kono, ni-sɔbaa kpɛ ʋ na, a tɩɛrɩ̃sɩ dama ʋ, 34ʋ soor ba:
“Nyɩnɛ nyɩ ũu ʋ?” a ba yel ʋ:
“Nɩ-kpɛ̃ɛ, wa nyɛ a jie,” 35a Jeeju kõ. 36Ala-ɩ̃-sɔ a Jufisɩ yele taa: “Nyɩ́ nyɛ a mɩnɛ ʋ na dãa nʋ ʋ!” 37Ɩ̃-cɛ a nɩŋmɛɛ a ba sɔ̃w yele na:
“Aa ɩ ʋlɔ ɩ̃ dãa yuo a jɔ̃w mimie wa? Ʋ kɔ̃ɔ dãa tʋɔ maal a Lajaar ʋ kɔ̃ kpi wa mɩɩ?”
A LAJAAR A JEEJU NA MAAL Ʋ IR A KŨU PƲƆ
38A ni-sɔbaa lɛ nyɩrɩ̃ na kpɛ a *Jeeju, ʋ cen a yaa par. A yaa ɩ na tãw bɔw, ɩ̃ a ba pɔw kubir kpɛ̃ɛ a bɔw nʋɔr. 39A Jeeju yel:
“Nyɩ́ bilĩ a kubir bar,” a Martɩ na ɩ a ʋlɔ na kpi yɛ-pɔw yel a Jeeju:
“Nɩ-kpɛ̃ɛ, ʋ nyuure na a-na-ɩ bibie anaan nɩ a dɩnaa ʋ na maal a yaa pʋɔ.” 40A Jeeju yel ʋ:
“Maa dãa yel fʋ a fʋ̃ʋ tɛrɛ nɩ ma a ƴɔ̃w-nyãa fʋ na nyɛ na a Naaŋmɩn yo-yifʋ wa mɩɩ?” 41A lɛ, ba bilĩ na a kubir, a Jeeju dʋɔ ꞌwuor a saꞌlon ɩ̃ yel:
“Ɩ̃ Sãa, fʋ̃ʋ sɔ puorfʋ a mɩnɛ fʋ na cɛl a ɩ̃ sʋɔrfʋ. 42Ɩ̃ bɔ̃w ka fʋ ma cɛlʼã a ɩ̃ sʋɔrfʋ a daar a jaa, ɩ̃-cɛ a bala na tiw kolĩ ma ɩnɛ ɩ̃ yele, a mɩnɛ a ba na tʋɔ sɔw bɔ̃w ka fʋ̃ʋ ɩ̃ tʋ̃ ma.” 43A mɩnɛ a Jeeju na ƴɛr a lɛ baar, ʋ bʋɔlʼã nɩ kpɛ̃w:
“Lajaar, wa yi!” 44A kũu yi, a gbɛɛ nɩ a nur vilĩ pɔw nɩ a cẽcẽ-luursɩ ɩ̃ a ba mɩ dãa lũ a nii-sɔw pɔw nɩ a cẽcen. A Jeeju yel ba:
“Nyɩ́ ꞌlor ʋ bar ʋ cen.”
A JEEJU A JUFISƖ NI-DIERBE NA GORO
(Mat 26.1-5, Mar 14.1-2, Lu 22.1-2)
45A Jufisɩ bala na dãa wɩ a Maarɩɩ sɛ̃ ɩ̃ nyɛ a ala a *Jeeju na maal, a yaw jie ƴɔ̃w ʋ na nyãa, 46ɩ̃-cɛ a nɩŋmɛɛ a ba pʋɔ cenʼã a *Farɩsɩ nɩbɛ jie na man ba a ala a Jeeju na maal. 47A lɛ, a Farɩsɩ nɩbɛ nɩ a *baar-lo-nɩ-bɛrɛ bʋɔlʼã a *ƴɛr-guor-nɩ-bɛrɛ duo ɩ̃ yel ba:
“A daba na maala na a nɔ-kofʋ tʋ̃-yaw; bõ sɩ na maal? 48A sɩmɩ bar ʋ ʋ maala a lɛ, a nɩbɛ ba jaa na sɔw na a ʋ ben, ɩ̃ a Orom nɩbɛ na wa na wɛl a sɩ ji-son nɩ a sɩ tẽw bar.”
49A ƴen sʋbɔ a ba pʋɔ na dɩ a Kayifi na ɩ a *baar-lo-nɩ-kpɛ̃ɛ a ʋna yuon naa pʋɔ yel ba na:
“Nyaa bɔ̃w bom wa! 50Nyaa tɩɛr bɔ̃w ka a ɩ na son a nyɩ jie a nɩ-bõ-ƴen na kpi a nɩbɛ ba jaa ɩnɛ, a tẽw kɔ̃ wɛl ʋ jaa wa mɩɩ?” 51A ala ʋ na yel ma yi a ʋ mɩ̃ɛ jie wa, ɩ̃-cɛ a-na-ɩ ʋ ɩ na a baar-lo-nɩ-kpɛ̃ɛ a ʋna yuon naa, ala-ɩ̃-sɔ a Naaŋmɩn pʋ-tɩɛrʋ̃ ƴɛrɩ̃ ʋ mana áa Jeeju na kpi na a Jufisɩ bal par ʋ jaa ɩnɛ. 52Ɩ̃ aa ɩ a ʋna bal par ɩnɛ tɛw ʋ wa, ɩ̃-cɛ ʋ na kpi na a mɩnɛ ʋ na mɩ kpaarɩ̃ a Naaŋmɩn bibiir bala na yaarɩ̃, a ba ɓã taa ɩ bõ-ƴen.
53Wa nyɔw nɩ a ʋna bibir, a Jufisɩ goro na taa a Jeeju kúfʋ. 54Ala-ɩ̃-sɔ a Jeeju maa lɛ cãa yɔ yi a Jufisɩ nii-sɔw wa, ɩ̃ ʋ cenʼã a tẽw ʋlɔ pʋɔ na dɩ a Efarɩm na be a wɛkar nʋɔr, lãa jɛ nɩ a ʋ *par-tuurbe a be.
55A Jufisɩ *Pakɩ fɛtɩ daar tara na, a nɩ-yaw yi a tẽ-bil pʋʋr ɩ̃ cere a Jerujalɛm a ba mɩ̃ɛ pɔlfʋ ɩnɛ. 56Ba bʋɔrɔ na a Jeeju, ɩ̃ sooro taa a Naaŋmɩn puor-yir kpɛ̃ɛ pʋɔ:
“Mɩnɛ nyɩ tɩɛr? Ʋ̃ kɔ̃ wa a fɛtɩ jie wa mɩɩ?” 57Ɩ̃-cɛ a baar-lo-nɩ-bɛrɛ nɩ a Farɩsɩ nɩbɛ dãa na yel áa ala ɩ̃ ɩ a nɩrɛ bɔ̃w na a jie a Jeeju na be, á ʋ sɛw na na yel a ba nyɔw ʋ.
वर्तमान में चयनित:
Jã Sɛbɛ 11: BNT93
हाइलाइट
शेयर
कॉपी
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
