Jã Sɛbɛ 12
12
A MAARƖƖ NA CIR A KÃ-NYU-VƖLAA ƳƆ̃W A JEEJU
GBƐƐ PƲƆ
(Mat 26.6-13, Mar 14.3-9)
1Bibie ayʋɔb ɩ̃ cɛ ɩ̃ a *Pakɩ fɛtɩ na ta, a *Jeeju cen a Betani, na ɩ a jie a Lajaar ʋlɔ ʋ na dãa ir a kũu pʋɔ na be. 2Ba maalʼã a dɩb kʋ ʋ a be, a Martɩ ɩ a dɩb-poro, ɩ̃ a Lajaar mɩ dãa na be a nɩbɛ bala pʋɔ na lãa jɛ a dɩb par nɩ a Jeeju. 3A Maarɩɩ de na a kã-nyu-vɩlaa ba na bʋɔlɔ a *naar na ma kpɛmɛ a dafʋ ɩɛ wa, wa nɩ cir ƴɔ̃w a Jeeju gbɛɛ pʋɔ ɩ̃ fɔfɔ nɩ ʋ a jukɔbɔ, a kãa nyuu de a yir ʋ jaa. 4A Jeeju *par-tuure ƴen sʋbɔ na dɩ a Judasɩ Isikaryɔtɩ, na ɩ a ʋlɔ nɔɔ diere ʋ a juu yelʼã:
5“Bõ ɩ̃ ɩ a baa dãa de a kãa na da warbie ture lɩjaata na ba kʋ a nãw deme wa?” 6ꞌWaa yel a lɛ a-na-ɩ a nãw deme ben bá ʋ na wa, ɩ̃-cɛ a-na-ɩ nyanyuur ʋ ɩ, ɩ̃ a mɩnɛ a na ɩ a ʋlɔ ɩ̃ ma tɛrɛ a libie wʋɔ, ʋ ma jure na a ala ba na ƴɔnɔ a be. 7Ɩ̃-cɛ a Jeeju yelʼã:
“Bar a pɔw jaa jom! Bar ʋ ʋ tɛɛlɛ a kã-nyu-vɩlaa na a ɩ̃ ũufʋ bibir ɩnɛ. 8Nyɩ na tɛrɛ na a nãw deme a nyɩ sɔ̃w a daar a jaa, ɩ̃-cɛ a maa, nyaa tɛrɛ ma a nyɩ sɔ̃w a daar a jaa wa.”
A LAJAAR BA NA GORO A KUFƲ
9A Jufisɩ yaw jie wõ na áa *Jeeju be na a Betani, ɩ̃ na ba cen. Ɩ̃ aa ɩ a Jeeju ɩnɛ tɛw ba cen wa, ɩ̃-cɛ ba bʋɔrɔ na ba mɩ nyɛ a Lajaar ʋ na ir a kũu pʋɔ. 10Ala-ɩ̃-sɔ a *baar-lo-nɩ-bɛrɛ mɩ goro na taa a ba na mɩ kú na a Lajaar, 11a-na-ɩ a ʋlɔ ɩnɛ a Jufisɩ yaw jie bara a baar-lo-nɩ-bɛrɛ sɔr ɩ̃ ƴɔnɔ a Jeeju nyãa.
A JEEJU NA KPƐ A JERUJALƐM-TẼW
(Mat 21.1-11, Mar 11.1-11, Lu 19.28-40)
12A dɩvɩɛ bio, a nɩ-yaw bala na wɩ a fɛtɩ jie wõ na áa *Jeeju tara na be a Jerujalɛm. 13A lɛ, ba ɓɛlʼã a pã-bie tɩɩr vɛɛ na ba yi tuoro nɩ ʋ ɩ̃ wuure nɩ kpɛ̃w yele:
“*Oojana! A Nɩ-kpɛ̃ɛ Naaŋmɩn ú be nɩ a ʋlɔ na waara nɩ a ʋ yuor! A Naaŋmɩn ú be nɩ a *Ɩsɩrayɛl jamana!”
14A Jeeju nyɛ na a bʋ̃ɔ, do jɛ a ʋ juu, a mɩnɛ a na yel a Naaŋmɩn Sɛbɛ pʋɔ:
15“*Sɩ̃ɔ-tẽw nɩbɛ, nyɩ taa jɔrɔ dãbɩ̃ɛ wa!
Nyɩ́ nyɛ a nyɩ jamana na do a bʋ̃-bile waara nɩ.”
16A ʋna daarʼã pʋɔ, a ʋ *par-tuurbe ma dãa bɔ̃w a par sɛr wa, ɩ̃-cɛ a lɛ a Naaŋmɩn na miilʼɩ̃ a Jeeju yo-yifʋ baar, ala ba pãa tɩɛr yuo a ala a Naaŋmɩn Sɛbɛ na dãa yel a ʋ ɩnɛ, ɩ̃ a ɩ na a ala a nɩbɛ na maal a ʋ jie.
17A bala ba jaa na dãa be nɩ a Jeeju ɩ̃ nyɛ a Lajaar ʋ na bʋɔl ʋ yi a yaa pʋɔ lɛ ɩ a nɩ-mimir, ba mɩɩnɛ na kʋrɔ a nɩbɛ. 18Ala-ɩ̃-sɔ nɩ-yaw tuoro na a Jeeju a-na-ɩ ba wõ na a ʋna nɔ-kofʋ tʋn ʋ na dãa maal. 19Ɩ̃ a *Farɩsɩ nɩbɛ yele na taa:
“Nyɩ nyɛ na, saa tʋɔrɔ maala bom wa; a tẽw nɩbɛ ba jaa tuure ʋ na!”
A GƖRƐKƖ NƖBƐ NA BƲƆRƆ A JEEJU
20A Gɩrɛkɩ nɩbɛ ŋmɛɛ be na a bala pʋɔ na wa a puorfʋ ɩnɛ a fɛtɩ jie be a Jerujalɛm. 21Ba ta na a Fɩlɩpɩ na yi a Bɛsada-tẽw na be a Galile wɩɛr ɩ̃ yel ʋ:
“Sɩ bʋɔrɔ na sɩ nyɛ a *Jeeju.” 22A Fɩlɩpɩ cenʼã na yel a Ãdire, a ba lãa cen na yel a Jeeju. 23A Jeeju yel ba:
“A daar ta na a Naaŋmɩn na miile nɩ a *Nɩbɛ Bie yo-yifʋ. 24Yel-mɩ̃ɛ ɩ̃ yele nyɩ, a ala ɩ̃ ɩ a ci-bir ma lo a tene kpi wa, ʋ ma jɛ na be ɩ a ci-bir bõ-ƴen, ɩ̃-cɛ a ʋlɔ ɩ̃ kpi, ʋ ma wɔ̃ na a wɔmɔ yayaw. 25A ʋlɔ na nʋ a ʋ baafʋ, ʋ na bɔr ʋ na; ɩ̃-cɛ a ʋlɔ na ꞌlaar a ʋ baafʋ a tẽw na pʋɔ, ʋ na tɛrɛ ʋ na kpɛ nɩ a baa-kɔ̃-tɛw pʋɔ. 26A ala ɩ̃ ɩ a nɩrɛ tʋnɔ na a ɩ̃ tʋn, ú tuure ma, ɩ̃ a jie ʋlɔ ɩ̃ na be, be a ɩ̃ tʋ̃tʋnɔ ʋlɔ na mɩ be. A ala ɩ̃ ɩ a nɩrɛ tʋnɔ na a ɩ̃ tʋn, a ɩ̃ Sãa na ƴɔnɔ ʋ na.
A JEEJU MANA NA A Ʋ KŨU ƳƐRƖ̃
27“A ƴɛ̃ƴɛrɩ̃ na, a ɩ̃ tɩɛrɩ̃sɩ dama ma na, ɩ̃ bõ ɩ̃ na yel? Ɩ̃́ yel a ɩ̃ Sãa ʋ faa ma a daarʼã ɩnɛ mɩɩ? Ɩ̃-cɛ má a ala ɩnɛ ɩ̃ ɛ̃ɛ wa, a na ta ma. 28Sãa, ɩ a fʋ yuor ʋ yi!”
A lɛ, a kɔkɩr ƴɛrʼã be a saꞌlon yel:
“Ɩ̃ dãa na maal ʋ ʋ yi, ɩ̃ ɩ̃ na lɛ maal ʋ na ʋ yi go.” 29A nɩbɛ bala na ɩraa a be ɩ̃ wonaa yelʼã a saa tanʼã, ɩ̃ a nɩŋmɛɛ yel a Naaŋmɩn sɩ-tʋnaa kãw ɩ̃ ƴɛrɛ nɩ ʋ. 30A *Jeeju yel ba:
“Aa ɩ a maa ɩnɛ a ʋna kɔkɩr ƴɛrɛ wa, ɩ̃-cɛ a nyɩ ɩnɛ ʋ. 31A ƴɛ̃ƴɛrɩ̃ na, a daar ta na ba na guoro a tẽw na ƴɛrɩ̃. A ƴɛ̃ƴɛrɩ̃ na, ba na irʼã *a tẽw na jamana bar. 32Ɩ̃ a maa, a lɛ ba nɔɔ jɛwrɛ ma a ka a tẽw juu duoro nɩ, ɩ̃ na taw na a nɩbɛ ba jaa a ba wa a ɩ̃ sɛ̃.” 33Ʋ ƴɛrʼã a lɛ miilʼɩ̃ a bõ kũu ʋ na kpiire. 34A nɩbɛ bala yel ʋ:
“Sɩ wõ na a sɩ ƴɛr-kpɛn pʋɔ áa *Kirisi na tɛrɛ na a baafʋ daadaa kpoolaa, ɩ̃ mɩnɛ fʋ ɩ ɩ̃ yel áa sɛw na a ba na jɛw a *Nɩbɛ Bie a tẽw juu do nɩ? Ala ɩ̃ ɩ a Nɩbɛ Bie ʋlɔ?” 35A Jeeju yel ba:
“Daar fɩ̃ɩ tɛw a cãa na lɛ cãa be a nyɩ sɔ̃w. Nyɩ́ cere a lɛ nyɩ na cãa tɛrɛ a cãa, a mɩnɛ a libe kɔ̃ wa dũunɩ nyɩ wa. A-na-ɩ a ʋlɔ na cere a libe pʋɔ maa bɔ̃w a jie ʋ na cere wa. 36A mɩnɛ nyɩ na cãa tɛrɛ a cãa, nyɩ́ sɔw de ʋ, a mɩnɛ a nyɩ na lɩɛb ɩ a cãa deme.”
A JUFISƖ NA MA SƆW DE A JEEJU WA
A mɩnɛ a *Jeeju na ƴɛr a lɛ baar, ʋ cenʼĩ na sɔɔlɩ̃ a ba ɩnɛ. 37Ɩ̃ a mɩnɛ ʋ na dãa saarɩ̃ maal a nɔ-kofʋ tʋ̃-yaw a ba nii-sɔw ɩ̃ baa sɔw de ʋ wa, 38a mɩnɛ a Naaŋmɩn ƴɛr-hiere Ejayi ƴɛrɩ̃ ʋ na dãa yel na tʋɔ maal baar. Ʋ yelʼã:
“Nɩ-kpɛ̃ɛ, ala ɩ̃ sɔw a sɩ manfʋ?
Ala a Nɩ-kpɛ̃ɛ miilʼɩ̃ a ʋ fãw?”
39Ɩ̃ baa tʋɔrɔ sɔwrɔ wa, a na ɩ a mɩnɛ a Ejayi na lɛ dãa yel:
40“A maa Naaŋmɩn ɩ̃ pɔw ba a mimie,
ɩ̃ maal a ba sube a kpɛmɛ,
a mɩnɛ a ba mimie kɔ̃ wa nyɛ wa,
a ba kɔ̃ mɩ bɔ̃w a par a ba tɩɛrɩ̃sɩ pʋɔ wa,
ɩ̃ a ba kɔ̃ mɩ lɩɛb wa a ɩ̃ jie
ɩ̃ kpɛmɛ ba wa.”
41A Ejayi yelʼã a lɛ a-na-ɩ ʋ nyɛ na a Jeeju yo-yifʋ ɩ̃ ƴɛrɛ a ʋ ɩnɛ.
42A na saarɩ̃ be a lɛ ɩ̃ a Jufisɩ ni-dierbe yaw jie sɔw na de a Jeeju, ɩ̃-cɛ a *Farɩsɩ nɩbɛ ɩnɛ, baa dãa ꞌlara ƴɛrɛ a nɩbɛ na bɔ̃wnaa wa. Ba jɔrɔ na dãbɩ̃ɛ ba nɔɔ wa diw ba bar a *puorfʋ yir pʋɔ, 43a-na-ɩ ba nʋ na a pɛwfʋ ʋlɔ na yi a nɩbɛ jie gãw a Naaŋmɩn na pɛwrɛ ba.
A JEEJU ƳƐRƖ̃SƖ NƆƆ ƳƆNƆ A NƖBƐ A ƳƐRƖ̃
44A *Jeeju ƴɛrʼã nɩ kpɛ̃w yel:
“A ʋlɔ na sɔw de ma, aa ɩ a maa tɛw ʋ sɔw de wa, ɩ̃-cɛ ʋ mɩ sɔw na de a ʋlɔ na tʋ ma. 45Ɩ̃ a ʋlɔ na nyɛ ma, ʋ mɩ nyɛ na a ʋlɔ na tʋ ma. 46A maa, ɩ̃ wa na a ka a tẽw pʋɔ ɩ a cãa, a mɩnɛ a nɩrɛ lɛ na sɔw de ma kɔ̃ cãa be a libe pʋɔ wa. 47A ala ɩ̃ ɩ nɩrɛ wõ na a ɩ̃ ƴɛrɩ̃sɩ ɩ̃ ma sɔw maal wa, aa ɩ maa ɩ̃ wa ƴɔnɔ ʋ a ƴɛrɩ̃ wa, a-na-ɩ maa wa ka a tẽw pʋɔ a nɩbɛ ƴɛrɩ̃ ƴɔ̃wfʋ ɩnɛ wa, ɩ̃-cɛ ɩ̃ wa na a ba faafʋ ɩnɛ. 48A ʋlɔ na jaar ma bar, ɩ̃ ma de a ɩ̃ ƴɛrɩ̃sɩ wa, ʋ na tɛrɛ na a ʋ ƴɛr-ƴɔnɔ. A ƴɛrɩ̃ ʋlɔ ɩ̃ na mana, ʋlɔ ɩ̃ nɔɔ ƴɔ̃w ʋ a ƴɛrɩ̃ a bibi-baaraa dayen. 49A-na-ɩ maa ƴɛrɛ a ɩ̃ mɩ̃ɛ ƴɛrɩ̃sɩ wa, ɩ̃-cɛ a ɩ̃ Sãa na tʋ ma, ʋlɔ ɩ̃ kʋ ma a ala na sɛw ɩ̃ ƴɛrɛ ɩ̃ mɩ mana. 50Ɩ̃ ɩ̃ bɔ̃w na bɔ̃w ka a ʋ ƴɛrɩ̃ tɩɩrɛ na a baa-kɔ̃-tɛw. Ala-ɩ̃-sɔ, a ala ɩ̃ na ƴɛrɛ, ɩ̃ ƴɛrɛ na a mɩnɛ a ɩ̃ Sãa na man ma.”
वर्तमान में चयनित:
Jã Sɛbɛ 12: BNT93
हाइलाइट
शेयर
कॉपी
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
