Jã Sɛbɛ 15
15
A JEEJU Ɩ̃ Ɩ A DIVƐ̃ TƖ-SON
1“Maa ɩ̃ ɩ a dɩvɛ̃ tɩ-son ɩ̃ a ɩ̃ Sãa ɩ̃ ɩ a tɩ-ꞌwuoro. 2Ʋ ma ŋma na a wulbie ala bar na be a ɩ̃ pʋɔ ɩ̃ ma wɔnɔ wa, ɩ̃ a ala na wɔnɔ, ʋ ma cɔɔrɩ̃ na ɓɛl bar, a lɛ bɔ̃w nyɩrɩ̃ wɔ̃. 3A ƴɛrɩ̃sɩ ala ɩ̃ na dãa man kʋ nyɩ gɔrʼã cɔɔrɩ̃ nyɩ a nyɩ ɩ cɛcɛ. 4Nyɩ́ mar ɩraa a ɩ̃ pʋɔ a mɩnɛ ɩ̃ na mɩ mar ɩraa a nyɩ pʋɔ. A wulbir ma tʋɔrɔ wɔnɔ wɔmɔ a ʋ mɩ̃ɛ ɩ̃ a ala ma ɩ a tɩɛ pʋɔ ʋ mar ɩraa wa. A lɛ ʋ mɩ a nyɩ jie, nyaa tʋɔrɔ wɔnɔ wɔmɔ ɩ̃ a ala ma ɩ a ɩ̃ pʋɔ nyɩ mar ɩraa wa.
5“Maa ɩ̃ ɩ a dɩvɛ̃ tɩɛ, ɩ̃ nyɩmɩ ɩ̃ ɩ a wulbie. A ʋlɔ na mar ɩraa a ɩ̃ pʋɔ, ɩ̃ mɩ mar ɩraa a ʋ pʋɔ, ʋ ma wɔ̃ na wɔmɔ yaw, a-na-ɩ a maa ma be nɩ nyɩ wa, nyaa tʋɔrɔ bom maala wa. 6A ʋlɔ na ma mar ɩraa a ɩ̃ pʋɔ wa, ʋ wɔ̃ na taa nɩ a wulbir ba na ma lɔb bar ʋ ko; ɩ̃ a wulbi-lɛ nʋmɔ, ba ma woorʼã ƴɔ̃w a vũumɩ a dɩ. 7A ala ɩ̃ ɩ nyɩ be na a ɩ̃ pʋɔ, a ɩ̃ ƴɛrɩ̃sɩ mɩ be a nyɩ pʋɔ, nyɩ́ sʋɔr a bom lɛ nyɩ na bʋɔrɔ ɩ̃ nyɩ na pɔw na. 8A ala ɩ̃ ɩ nyɩ wɔnɔ na a wɔmɔ yayaw, lɛ a ɩ̃ Sãa yuor na yire, ɩ̃ lɛ nyɩ na mɩ ɩ a ɩ̃ *par-tuurbe. 9A mɩnɛ a ɩ̃ Sãa na nʋ ma, a lɛ ɩ̃ mɩ nʋ nyɩ. Nyɩ́ ɩraa a ɩ̃ nʋfʋ pʋɔ. 10A ala ɩ̃ ɩ nyɩ jɔrɔ na a ɩ̃ ƴɛrɩ̃sɩ, nyɩ na ɩraa na a ɩ̃ nʋfʋ pʋɔ, a mɩnɛ ɩ̃ na jɔ a ɩ̃ Sãa ƴɛrɩ̃sɩ ɩ̃ ɩraa a ʋ nʋfʋ pʋɔ.
11“Ɩ̃ yel nyɩ na a lɛ a mɩnɛ a ɩ̃ nʋ̃ɔ na tʋɔ be a nyɩ pʋ̃ɔ, ɩ̃ a nʋ̃ɔ na ƴala nyɩ. 12A ɩ̃ ƴɛrɩ̃ ɩ̃ na kʋrɔ nyɩ ɩ na, nyɩ́ nʋnɔ taa a mɩnɛ ɩ̃ na mɩ nʋ nyɩ. 13A nʋfʋ ʋlɔ na gãw a nʋfʋ a jaa ɩ na a mɩnɛ a nɩrɛ na sɔw kpi a ʋ badɛɛ ɩnɛ. 14A nyɩmɩ jɔrɔ a ɩ̃ ƴɛrɩ̃sɩ, nyɩ ɩ na a ɩ̃ badɛɛ. 15Maa lɛ bʋɔlɔ nyɩ tʋ̃tʋnbɔ wa, a-na-ɩ a tʋ̃tʋnɔ maa bɔ̃w a ala a ʋ nɩ-kpɛ̃ɛ na maala wa. Ɩ̃ ɛ̃ɛ na bʋɔl nyɩ ɩ̃ badɛɛ, a-na-ɩ ɩ̃ man nyɩ na a yele ala a jaa ɩ̃ na dãa wõ a ɩ̃ Sãa sɛ̃, 16Aa ɩ nyɩmɩ ɩ̃ vɛl ma ir wa; maa ɩ̃ vɛl nyɩ ir ɩ̃ ƴɔ̃w nyɩ a nyɩ cen na wɔ̃ a wɔmɔ, ɩ̃ a wɔmɔ ʋlɔ kɔ̃ sãw wa. Ɩ̃ a bom jaa lɛ nyɩ na de a ɩ̃ yuor sʋɔrʼɩ̃ a Sãa sɛ̃, ʋ na kʋ nyɩ na. 17A ala ɩ̃ na kpãkpana nyɩ ɩ na, nyɩ́ nʋnɔ taa.
A TẼW PƲƆ NƖBƐ NA ꞌLAAR A JEEJU NƖ A BALA Ʋ NA SƆ
18“A ala ɩ̃ ɩ a tẽw pʋɔ nɩbɛ ꞌlaar nyɩ na, nyɩ́ bɔ̃w ka maa ba dãa de nĩe ꞌlaar. 19A nyɩmɩ dãa ɩ a tẽw pʋɔ nɩbɛ, a tẽw pʋɔ nɩbɛ naa nʋnɔ nyɩ na, a-na-ɩ bala ɩ̃ sɔ nyu Ɩ̃-cɛ a-na-ɩ ɩ̃ ow nyɩ na kpee ir a tẽw pʋɔ a nyaa cãa ɩ a tẽw pʋɔ nɩbɛ wa, ala-ɩ̃-sɔ a ba ꞌlaar nyɩ. 20Nyɩ́ tɩɛr bɔ̃w nɩ a ʋna ƴɛrɩ̃ ɩ̃ na dãa yel nyɩ, áa tʋ̃tʋnɔ ma ɩ kpɛ̃ɛ a ʋ nɩ-kpɛ̃ɛ jie wa. A bala ɩ̃ dãa hʋɔl ma, ba nɔɔ mɩ hʋɔl nyɩ na. A bala ɩ̃ dãa jɔ a ɩ̃ ƴɛrɩ̃, ba nɔɔ mɩ jɔ na a nyɩ ƴɛrɩ̃. 21Ɩ̃-cɛ ba na maal nyɩ na a ana yele a jaa a ɩ̃ ɩnɛ a-na-ɩ baa bɔ̃w a ʋlɔ na tʋ̃ ma wa. 22A ala ɩ̃ ɩ maa dãa wa ƴɛrʼɩ̃ ba wa, ba kɔ̃ɔ dãa tɛrɛ maal-fãa wa, ɩ̃-cɛ a ƴɛ̃ƴɛrɩ̃ na, ŋmɩɩlɩ̃fʋ jie ma cãa be be a ba maal-fãa ɩnɛ wa. 23A ʋlɔ na ꞌlaar ma, ʋ mɩ ꞌlaarʼã a ɩ̃ Sãa. 24A ala ɩ̃ ɩ maa dãa tʋ̃ tʋ̃-bie a ba sɔ̃w a nɩrɛ kãw na ma dãa tʋ̃ wa, ba kɔ̃ɔ dãa tɛrɛ maal-fãa wa, ɩ̃-cɛ a ƴɛ̃ƴɛrɩ̃ na, ba nyɛ na a ala ɩ̃ na maal, ɩ̃ cãa ꞌlaar a maa nɩ a ɩ̃ Sãa. 25Ɩ̃-cɛ a ta na a lɛ a mɩnɛ a ƴɛr-bir ʋlɔ na be a ba ƴɛr-kpɛn sɛbɛ pʋɔ na maala baara. A yelʼã: ‘Ba ꞌlaar ma na pɔrɔ.’
26“A Sõsũono ʋlɔ na ɩ a Yel-mɩ̃ɛ Sɩɛ na yi a Sãa jie na wa na. Ɩ̃ na tʋ̃ nɩ ʋ na ʋ yi a Sãa jie ɩ̃ wa a nyɩ sɛ̃ na mana a ɩ̃ yel-mɩ̃ɛ. 27Ɩ̃ a nyɩmɩ, nyɩ na mɩ mana na a ɩ̃ yel-mɩ̃ɛ, a-na-ɩ nyɩ be nɩ ma na a nyɔwfʋ jie.
वर्तमान में चयनित:
Jã Sɛbɛ 15: BNT93
हाइलाइट
शेयर
कॉपी
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
