लुका 1
1
लुकाचे येसुइ बारेरी थीयोफीलस्त ब्रीबल
1पर्मेस्वर्चे सुङ्ब र्हङ्ले ङ्य्हङ्माकी गुङ्री बुत्पे लक्माइ बारेरी य्हक्को म्हीमाचे ब्रीबल मुब। 2हुजु लक्मा तीप्प य्हङ्सेनो र्हङ्की मीःचे म्रङ्बमातेङ्, प्रचार स्य्हेङ्बलमाचे ङ्य्हङ्मात स्येत्पल मुब। 3होत्तज्यीम् माननीय#१:३ माननीय ङ्हच्छ्यङ् म्हीतेङ् बरु म्हीत स्य्हेस स्य्हेङ्बे छीः। थीयोफीलस, ङचेएनो तीप्प य्हङ्सेनो हुजु जम्मा लक्मा ज्यनले म्हइज्यीम् गोबल तज्यीम् एत तङ्राले ब्रीब ज्यब तल बी म्हेन्ज्यी। 4तलेपङ्सम् एचे लोप्ज्यीन्बे तम्मा देमेन्नो टीम् बी एचे स्येःस्ये मुब।
बप्तीस्मा पीन्बे युहन्ना न्हस्येकी भवीस्यवानी
5हेरोद यहुदीया प्रदेस्की ग्यल्बो मुबे बेलोरी हुजुरी जकरीया पङ्बे लम्बु मुबल। थे अबीया लम्बुइ बगल न्हङ्री गीः मुबल। थेइ म्रीङ् एलीसीबाएनो हारुनकी खलक्की जमे मुबल। 6थेङ्य्हीनो पर्मेस्वर्की ङोन्ग्यम् धर्मी मुबल। ओसेम् परमप्रभुचे कुल्जेत्पे जम्मा अर्तीतेङ् नीयम्मा ज्यनले ङ्येन्ज्यीम् ब्रब मुबल। 7तर एलीसीबा ग्यम्चे कोल अतबल तज्यीम् थेङ्य्हील कोलमा अरेबल मुबल। ओसेम् थेङ्य्ही य्हक्कोनो खेक्प खुयु तबल मुबल।
8तीरेत् जकरीया र्हङ्की बगल्की पालो अनुसार पर्मेस्वर्त तेन्बे दीम्री लम्बुइ लक् स्य्हेङ्टीब मुबल। 9लम्बुइ पेठीम् अनुसार चीठ्ठा युमम् परमप्रभु पर्मेस्वर्त तेन्बे दीम्न्हङ् वङ्ज्यीम् सङ्स्यु म्रबरी जकरीयाकी मीन् पार्तीज्यी। 10सङ्स्यु म्रबे बेलोरी य्हक्को म्हीमा दोरी प्रार्थना स्य्हेङ्टीब मुबल। 11जकरीयाचे सङ्स्यु म्रबे बेलोरी बेदीइ केत्पट्टी परमप्रभुकी स्वर्गदुत् गीः रप्युज्यी। 12जकरीयाचे स्वर्गदुत् म्रङ्ब बीसेम् थे य्हक्को लोङ्ज्यीम् थोम्ज्यी। 13तर स्वर्गदुत्चे थेत पङ्ज्यी, “जकरीया थलोङो! एइ प्रार्थना पर्मेस्वर्चे सेन्जेत्पल मुब। एइ म्रीङ् एलीसीबाचे एइ लागीरी ज गीः न्हस्ये मुब। ओसेम् एचे थेइ मीन् युहन्ना थेनो। 14थे न्हबे बेलोरी ए य्हक्को तङ्ज्यीम् छु:स्ये मुब। ओसेम् य्हक्को म्हीमाएनो तङ्स्ये मुब। 15तलेपङ्सम् युहन्ना परमप्रभुइ ङोन्ग्यम् ङ्हच्छ्यङ् तस्ये मुब। थेचे खेमेएनो अङ्गुर्की नीङ्गु थुङ्स्ये अरे। ओसेम् थे अमइ फोरी खब य्हङ्स्येनो पबीत्र आत्माचे प्लीङ्स्ये मुब#१:१५ पबीत्र आत्माचे प्लीङ्स्ये मुब पबीत्र आत्माचे प्लीङ्ब पङ्बलमी पबीत्र आत्माचे अगुवाइ स्य्हेङ्ज्यीम् पर्मेस्वर्की इच्छा अनुसार् चल्दीब य्हीन्ब।। 16थेचे य्हक्को इस्राएलीमात दोःज्यीम् थेमाकी परमप्रभु पर्मेस्वर्पट्टी बस्ये मुब। 17थे एलीयाल र्हङ्बे आत्मातेङ् सक्तीरी प्रभु बीम ङोन्ग्यम्नो खज्यीम्, थेचे प्रभुइ ग्यम् तयार् स्य्हेङ्स्ये मुब। थेचे अपमाकी सेम् कोलमा पट्टी दोःन लस्ये मुब। ओसेम् पर्मेस्वर्चे कुल्जेत्पे अर्ती अङ्येन्बलमात ङ्येन्बमाकी बुद्दीपट्टी दोःबज्यीम्, प्रभुइ लागीरी म्हीमात तयार् स्य्हेङ्स्ये मुब।”
18जकरीयाचे स्वर्गदुत्त पङ्ज्यी, “चु देमेन्नो तस्ये बी ङचे खले स्येःस्ये? ङ खेक्प तज्यी। ओसेम् ङइ म्रीङ्एनो खुयु तबल मुब।”
19स्वरगदुत्चे पङ्ज्यी, “ङ पर्मेस्वर्की रेइरी रप्पे गाब्रीएल य्हीन्ब। थेङ्चे एत चु ज्यबे सम्तर् स्येत्परी ङत पीत्युजेत्पल य्हीन्ब। 20ङचे पङ्बे चु तम्त एचे बीस्वास् अस्य्हेङ्बल तज्यीम् चु तम् पुरा अतगदेसम्म ए लेम्ब तस्ये मुब। तर चु तम् ठीक् बेलोरी पुरा तस्ये मुब।”
21जकरीया पर्मेस्वर्त तेन्बे दीम्न्हङ् तले गेःबल बी य्हक्को म्हीमा थोम्ज्यीम् दोरी ब्रेन्टीब मुबल। 22जकरीया दोरी डोङ्युमम् थेचे थेमातेङ् तम् पङ्अखम्। होत्तज्यीम् याचे ल्हादब् लज्यी। ओसेम् थेचे पर्मेस्वर्त तेन्बे दीम्न्हङ् दर्सन यङ्नेम् बी थेमाचे गोज्यी। ओसेम् थे लेम्ब तस्यीनो टीज्यी।
23पर्मेस्वर्त तेन्बे दीम्न्हङ् जकरीयाकी सेवा स्य्हेङ्बे पालो बुत्प बीसेम् थे दीम्री दोःय्हर्ज्यी। 24हुजु लीप्चे थेइ म्रीङ् एलीसीबाइ फोरी कोल खज्यी। एलीसीब ल ङ्हसम्म दीम् पीत्ज्यीम् खनएनो अय्हर्। 25ओसेम् थेचे पङ्ज्यी, “ङत म्हीमाचे अज्यबे तङ्मेन् अपङ्खइ बी पर्मेस्वर्चे दय स्य्हेङ्जेत्ज्यीम् चु लक् ङइ लागीरी स्य्हेङ्जेत्पल य्हीन्ब।”
येसु न्हस्येकी भवीस्यवानी
26एलीसीबइ फोरी कोल खज्यीम् ल डु योमम् पर्मेस्वर्चे गाब्रीएल स्वर्गदुत्त गालील प्रदेस्की नासरत पङ्बे ज्यीद सहर्री 27मरीयम पङ्बे कङ्य अमकोलज पीत्जेत्ज्यी। थेत दाऊदकी खलक्की योसेफ पङ्बे म्हीतेङ् भ्या स्य्हेङ्बरी र्हीत्पल मुबल।
28स्वर्गदुत् रप्युज्यीम् मरीयम्त पङ्ज्यी, “लस्सो! पर्मेस्वर् एतेङ् मुब। एत ङ्हच्छ्यङ् मोलम् न्हङ्बल मुब।” 29मरीयम स्वर्गदुत्की चु तम् थेःज्यीम् थोम्ज्यी। ओसेम् चु खतेबे तम् य्हीन्ज्यी बी सेम्री म्हेन्ज्यी। 30स्वर्गदुत्चे थेत पङ्ज्यी, “मरीयम थलोङो! तलेपङ्सम् एचे पर्मेस्वर् ग्यम्चे मोलम् यङ्बल मुब। 31देरे एइ फोरी कोल खस्ये मुब। ओसेम् ज गीः न्हस्ये मुब। एचे थेङ्की छेन् येसु थेनो। 32थेङ् ङ्हच्छ्यङ् तजेत्स्ये मुब। ओसेम् थेङ्त गोदोब्न्हङ्की जोइ पर्मेस्वर्की ज पङ्स्ये मुब। परम्प्रभु पर्मेस्वर्चे थेङ्त थेङ्की म्हेमे दाऊद र्हङ्बे ग्यल्बो स्य्हेङ्जेत्स्ये मुब। 33थेङ्चे याकुबकी खलक्री जुक्-जुक्नो राज्य स्य्हेङ्जेत्स्ये मुब। थेङ्की य्हुल् खेमेएनो बेस्ये अरे।” 34मरीयमचे स्वर्गदुत्त पङ्ज्यी, “चु खले तब खम्ब? देरेसम्म ङ कङ्यनो मुब।” 35स्वर्गदुत्चे जोहाप् पीन्ज्यी, “पबीत्र आत्मा एइ ल्हीरी व्योन्युज्यीम् गोदोब्न्हङ्की जोइ पर्मेस्वर्की सक्ती ग्यम्चे एचे कोल न्हस्ये मुब। होत्तज्यीम् एचे न्हस्येकी कोल पबीत्र तजेत्स्ये मुब। ओसेम् थेङ्त पर्मेस्वर्की ज पङ्स्ये मुब। 36एइ म्हेम्हेत् एलीसीबा खुयु तलेनो थेइ फोरी कोल खबल मुब। म्हीमाचे थेत कोल अन्हबे अमकोल पङ्ब तर देरे थेइ फोरी ल डुःकी कोल मुब। 37तलेपङ्सम् पर्मेस्वर्चे स्य्हेङ् अखम्बल तेएनो अरे।” 38ओसेम् मरीयमचे पङ्ज्यी, “ङ परमप्रभुइ योक्पो य्हीन्ब। एचे पङ्ब र्हङ्लेनो ङत तखइ।” ओसेम् स्वरगदुत्चे थेत ख्लेथेन्ज्यीम् य्हर्ज्यी।
मरीयम एलीसीबात दोबरी ङ्यीबल
39तोव दीन् लीप्चे मरीयम ग्योन्-ग्योन्ले यहुदीया प्रदेस्की गङ्क्योर् मुबे ज्यीत सहर्री ङ्यीज्यी। 40ओसेम् थे जकरीयाकी दीम्री वङ्ज्यीम् एलीसीबात लस्सो स्य्हेङ्ज्यी। 41एलीसीबाचे मरीयमकी लस्सो थ्येःब बीसेम् थेइ फोरी मुबे कोल म्योज्यी। ओसेम् एलीसीबा पबीत्र आत्माचे प्लीङ्ज्यी।
42थेचे केत् ङ्हच्छ्यङ् तेत्ज्यीम् पङ्ज्यी, “अमकोलमा न्हङ्री गोदोब्न्हङ् ए पर्मेस्वर् ग्यम्चे य्हक्को मोलम् यङ्बे अमकोल य्हीन्ब। ओसेम् एचे न्हस्येकी जचेएनो मोलम् यङ्बल मुब। 43चु ङचे खतेबे स्य्हेस यङ्ज्यी, ङइ प्रभुकी अम ङत दोबरी खज्यी? 44एचे लस्सो पङ्बल ङचे थ्येःब सात्चेनो ङइ फोरी मुबे कोल तङ्ज्यीम् स्यज्यी।
45“परमप्रभुचे एत सुङ्बे तम् पुरा तब बी एचे बीस्वास् स्य्हेङ्बल तज्यीम् एचे मोलम् यङ्बल मुब।”
मरीयमचे पर्मेस्वर्त तोप्पे व्हइ
46ओसेम् मरीयमचे पङ्ज्यी,
“ङ परमप्रभुत ङइ सेम्सेनो तोप्प,
47ङइ मुक्तीदाता पर्मेस्वर्तेङ् ङइ सेम् तङ्ब,
48तलेपङ्सम् थेङ्की सेवा स्य्हेङ्बे ङ र्हङ्ब जात वास्ता स्य्हेङ्जेत्ज्यी,
देरे य्हङ्स्ये जम्मा छकोन्चे ङत पर्मेस्वर्की मोलम् यङ्बल पङ्स्ये मुब।
49तलेपङ्सम् सक्तीसाली पर्मेस्वर्चे ङइ लागीरी ङ्हच्छ्यङ् लक्मा स्य्हेङ्जेत्ज्यी,
थेङ्की छेन् पबीत्र य्हीन्ब।
50ओसेम् पर्मेस्वर्त तेन्बलमात थेङ्चे छकोन् सम्मनो दय ङोन्जेत्प।
51थेङ्चे थेङ्की सक्तीसाली फ्याचे लक् स्य्हेङ्जेत्पल मुब। ओसेम् र्हङ्चे र्हङ्त ङ्हच्छ्यङ् म्हेन्बलमात खनबीबीनो ठम्लाजेत्पल मुब।
52थेङ्चे र्हङ्चे र्हङ्त ङ्हच्छ्यङ् म्हेन्बे ग्यल्बोमाचे ठीइ जोचे दुङ्री फप्लाजेत्पल मुब,
ओसेम् र्हङ्चे र्हङ्त ज्यीद म्हेन्बलमात जोरी कोत्जेत्पल मुब।
53थेङ्चे ख्रेन्बलमात रोङ्ब-रोङ्बे चबे स्य्हेमा न्हङ्ज्यीम् म्रेन्नलजेत्पल मुब,
ओसेम् बरुमात या थेन्-थेन् पीत्जेत्पल मुब।
54थेङ्चे र्हङ्की दय व्हल् लजेत्ज्यीम् थेङ्की सेवा स्य्हेङ्बे इस्राएलीमात र्हो स्य्हेङ्जेत्पल मुब।
55थेङ्चे र्हङ्की बाचा व्हल् लजेत्ज्यीम् अब्रहामतेङ् थेइ सन्तान्त दय स्य्हेङ्जेत्बल मुब।”
56मरीयम एलीसीबातेङ् ल सोम् बक्च्य टीज्यीम् थेइ दीम्री दोःय्हर्ज्यी।
बप्तीस्मा पीन्बे युहन्ना न्हबल
57एलीसीबाल कोल न्हबे बेलो तब बीसेम् थेचे ज गीः न्हज्यी। 58परमप्रभुचे थेत ङ्हच्छ्यङ् दय स्य्हेङ्जेत्पल थ्येःज्यीम् थेइ म्हेम्हेमातेङ् खीम्सेमा जम्मनो थेतेङ् तङ्ज्यी। 59दीन् ब्रेत्री कोलत खतना स्य्हेङ्बरी थेङ्यीमा खज्यी। ओसेम् कोलइ मीन् अपल र्हङ्बनो जकरीय थेन्ब छ्यज्यी, 60तर एलीसीबाचे पङ्ज्यी, “अय्हीन्! थेइ मीन् युहन्ना थेन्थोब।” 61थेङ्यीमाचे थेत पङ्ज्यी, “चोतेबे मीन् मुबे एइ म्हेम्हेमा खलएनो अरे।” 62होत्तज्यीम् कोलइ मीन् ता थेन्ब बी थेङ्यीमाचे कोलइ अपत ल्हादब् लज्यीम् ङ्योत्ज्यी। 63जकरीयाचे ब्रीब तबे स्यीङ्की था र्हीत्ज्यीम् ब्रीज्यी, “थेइ मीन् युहन्ना य्हीन्ब।” ओसेम् थेङ्यीमा थोम्ज्यी। 64होले ब्रीब सात्चेनो जकरीयाचे तम् पङ्ब खम्ज्यीम् पर्मेस्वर्त तोप्प थाल्दीज्यी। 65चोतेब तब म्रङ्ज्यीम् खीम्चेमा जम्मनो लोङ्ज्यी। ओसेम् चु सम्तर् यहुदीया प्रदेस्की गङ्क्योर्की खनबीबीनो नम्समारी थ्येःज्यी। 66चु थ्येःबमा जम्मचेनो म्हेन्ज्यीम् पङ्ज्यी, “चु कोल लीप्चे ता तल?” तलेपङ्सम् परमप्रभुइ सक्ती थेतेङ् मुबल।
जकरीयाचे पर्मेस्वर्त तोप्पे व्हइ
67युहन्नाइ अप जकरीया पबीत्र आत्माचे प्लीङ्ज्यीम् अगम्बानी पङ्ब थाल्दीज्यी,
68“इस्राएलकी परमप्रभु पर्मेस्वर्त तोप्के,
तलेपङ्सम् थेङ् र्हङ्की म्हीमात थर्नलबरी ब्योन्युज्यी।
69थेङ्चे ङ्य्हङ्माकी लागीरी र्हङ्की सेवा स्य्हेङ्बे दाऊदकी खलक् न्हङ्से,
सक्तीसाली मुक्तीदाता गीः न्हङ्जेत्पल मुब।
70-71थेङ्चे ङ्य्हङ्मात ङ्य्हङ्माकी सत्तुर्मातेङ्
ङ्य्हङ्मात अखोबलमा जम्म ग्यम्से थर्न लजेत्स्ये मुब,
बी दङ्बोनो थेङ्चे थेङ्की पबीत्र अगम्बक्तमाकी सुङ् ग्यम्से बाचा स्य्हेङ्जेत्पल मुबल।
72थेङ्चे ङ्य्हङ्माकी म्हेमेमातेङ् स्य्हेङ्जेत्बे पबीत्र बाचा व्हल् लजेत्ज्यीम्
ङ्य्हङ्मात दय स्य्हेङ्जेत्पल मुब।
73थेङ्चे ङ्य्हङ्माकी म्हेमे अब्रहामतेङ् देमेन्नो पुरा स्य्हेङ्जेत्स्ये बी बाचा स्य्हेङ्जेत्पल मुबल।
74ङ्य्हङ्मात ङ्य्हङ्माकी सत्तुर्मा ग्यम्चे अलोङ्नले थेङ्की सेवा स्य्हेङ्खइ बी थेङ्चे थर्न लजेत्पल मुब,
75होत्तज्यीम् ङ्य्हङ्मा सोगदेसम्म थेङ्की ङोन्ग्यम् पबीत्रतेङ् धर्मी तथोब।
76ङइ ज, एत गोदोब्न्हङ्की जोइ पर्मेस्वर्की अगम्बक्त पङ्स्ये मुब।
तलेपङ्सम् प्रभुकी ग्यम् थोन्नलबरी ए ङोन्-ङोन् ङ्यीस्ये मुब।
77एचे थेङ्की म्हीमात ‘पापमा क्षमा तज्यीम् मुक्ती यङ्स्ये मुब’ बी स्येत्स्ये मुब। 78पर्मेस्वर्की ङ्हच्छ्यङ् क्रीपाचे लज्यीम्
स्वर्ग ग्यम्से स्य्होकी दीनी थोल्ज्यीम् ङ्य्हङ्माइ जोरी य्हल् तस्ये मुब।
79हुजु य्हल्चे म्हुन्दुङ्न्हङ् टीबलमातेङ् स्यील बी लोङ्बलमात य्हल् पीन्स्ये मुब।
ओसेम् ङ्य्हङ्मात सान्तीइ ग्यम्री बोर्स्ये मुब।”
80युहन्ना ल्हीरी छर्बोर्बतेङ् आत्मारी बङ्ज्येन् तबोर्ज्यी। ओसेम् थे इस्राएलीमाकी गुङ्री अम्रङ्गदे उजाड-ग्लारी टीज्यी।
वर्तमान में चयनित:
लुका 1: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
