लुका 2
2
येसु न्हबल
(मत्ती १:१८-२५)
1हुजु बेलोरी ग्यल्बो अगस्टस्चे राज्य स्य्हेङ्बे रोमी य्हुल्माकी म्हीमा ज्याबरी जम्मलनो मीन् ब्रीउ पङ्बे हुकुम् पीन्ज्यी। 2चोले मीन् ब्रीथोब पङ्बे हुकुम् पहीलोचोटी मुबल। हुजु बेलोरी कुरेनीयस् सीरीया प्रदेस्की हाकीम् मुबल। 3ग्यल्बोचे हुकुम् पीन्ब र्हङ्लेनो जम्मनो म्हीमा मीन् ब्रीबरी र्हङ्-र्हङ्की म्हेमे मम्की नम्सरी य्हर्ज्यी।
4हुजु बेलोरी योसेफ गालील प्रदेस्की नासरत पङ्बे सहरसे यहुदीया प्रदेस्की बेथलेहेम् पङ्बे दाऊद ग्यल्बोकी सहर्री ङ्यीज्यी। तलेपङ्सम् थेएनो दाऊदकी खलक् मुबल। 5र्हङ्तेङ् भ्या स्य्हेङ्बरी र्हीत्पे मरीयमत बक्च्य बोर्ज्यीम् योसेफ मीन् ब्रीबरी य्हर्ज्यी। हुजु बेलोरी मरीयमकी फोरी कोल मुबल। 6थेमा बेथलेहेमरी मुबे बेलोरीनो मरीयमल कोल न्हबे बेलो तज्यी। 7मरीयमचे ज ग्रेन् न्हज्यी। ओसेम् कोलत येन्चे येइज्यीम् सेम्ज्येन्मात चब पीन्बे स्यीङ्की कोःरी नेइज्यी। तलेपङ्सम् थेमात होटेलरी र्यबे ग्ला अयङ्।
स्वर्गदुत्मातेङ् ग्यु गोर्तेन्मा
8बेथलेहेम सहर्की रेइरीनो गोर्तेन्मा म्हुनरी र्हङ्की ग्युमा पङ्गर्री रुङ्टीब मुबल। 9परमप्रभुचे पीत्युजेत्पे स्वर्गदुत् गोर्तेन्माकी ङोन्ग्यम् रप्युज्यी। ओसेम् परमप्रभुइ स्हेर्चे गोर्तेन्मा मुबे ग्लारी य्हल् तज्यी। चोले तब म्रङ्ज्यीम् गोर्तेन्मा य्हक्कोनो लोङ्ज्यी। 10गोर्तेन्मा लोङ्ब म्रङ्ज्यीम् स्वर्गदुत्चे पङ्ज्यी, “थलोङो! तलेपङ्सम् ङचे एङ्यीमात य्हक्कोनो तङ्बे ज्यबे सम्तर् बेइबल मुब। चु ज्यबे सम्तर् जम्मा म्हीमाकी लागीरी य्हीन्ब। 11तीङ्यी दाऊदकी सहर्री मुक्तीदाता ख्रीस्ट् न्हबल मुब। थेनो ख्रीस्ट् प्रभु य्हीन्ब। 12चोतेबे चीनो एङ्यीमाचे म्रङ्स्ये मुब- हुजुरी कोलत येन्चे येइज्यीम् स्यीङ्की कोःरी नेइटीबल तस्ये मुब।” 13हुजु बेलोरीनो ल्हो-ल्हो य्हक्को स्वर्गदुत्मा हुचुरी म्रङ्ज्यी। ओसेम् पर्मेस्वर्त तोप्पे ह्वइ थेमाचे चोले कोज्यी,
14“गोदोब्न्हङ्की जोरी स्वर्गरी स्य्हुबे पर्मेस्वर्त
जयजयकार,
ओसेम् जम्बुलीङ्री पर्मेस्वर्चे म्होइ्बे म्हीमात सान्ती तरीखइ।”
15स्वर्गदुत्मा स्वर्गरी दोःज्यीम् य्हर्ब बीसेम् गोर्तेन्माचे थेमा न्हङ् चोले पङ्ज्यी, “लौ ब्रे, बेथलेहेम्री, ङ्य्हङ्मात परमप्रभुचे सुङ्ब र्हङ्ले तबे तम् च्याबरी” 16होत्तज्यीम् थेमा ग्योन्-ग्योन्नो बेथलेहेमरी य्हर्ज्यी। हुजुरी थेमाचे मरीयमतेङ् योसेफ ओसेम् स्यीङ्की कोःरी नेइटीबे कोलत म्रङज्यी। 17गोर्तेन्माचे कोलत म्रङ्ब बीसेम् थेङ्की बारेरी स्वर्गदुत्चे पङ्बे तम्मा म्हीमात स्येत्पीन्ज्यी। 18गोर्तेन्माचे स्येत्पे अर्थ थ्येःबे म्हीमा जम्मनो थोम्ज्यी। 19ओसेम् मरीयमचे चु जम्म तम्मा र्हङ्की सेम्रीनो म्हेन्ज्यीम् थेन्ज्यी। 20स्वर्गदुत्माचे पङ्ब र्हङ्ले थ्येःबतेङ् म्रङ्ज्यीम् गोर्तेन्माचे पर्मेस्वर्त महीमा तोप्ज्यीम् दोःय्हर्ज्यी।
कोलल मीन् येसु थेन्ज्यी
21दीन् ब्रेत्री कोलत मोसाचे ब्रीबे पर्मेस्वर्की नीयम् र्हङ्लेनो थेङ्यीमाचे खतना स्य्हेङ्ज्यी। ओसेम् थेङ्ल छेन् येसु थेन्ज्यी। येसु अमइ फोरी खब बीमम् ङोन्ग्यम्नो स्वर्गदुत्चे हुजु मीन् थेनो पङ्बल मुबल।
पर्मेस्वर्त तेन्बे दीम्री येसुत सोप्तीबल
22मोसाचे ब्रीबे पर्मेस्वर्की नीयम् र्हङ्लेनो चोखइ्दीब#२:२२ चोखइ्दीब यहुदी अमकोलचे कोल न्हब बीसेम् यहुदीमाकी पेठीम् अनुसार् चोखो तबे लागीरी सत ङ्ह ब्रेन्थोब मुबल। हुजु लीप्चेकीनो पर्मेस्वर्की दीम्री ङ्यीज्यीम् ठा पीन्म्यङ्ब मुबल। बुप्प बीसेम् येसुइ अपतेङ् अमचे येसुत परमप्रभुजा सोप्तीबरी यरुसलेमरी बोर्ज्यी। 23तलेपङ्सम् परमप्रभुकी नीयम्री चोले ब्रीबल मुब, “ङोन्ग्यम् न्हबे जम्मनो ज ग्रेन्मा पर्मेस्वर्की लागीरी फेःज्यीम् थेन्थोब।”#२:२३ प्रस्थान १३:२,१२ 24ओसेम् परमप्रभुकी नीयम्चे पङ्ब र्हङ्ले ढुकुर पङ्लेनो ङ्य्ही, परेवा पङ्लेनो ङ्य्ही ठा पीन्बरी थेमा पर्मेस्वर्त तेन्बे दीम्री खज्यी।#लेबी १२:८
25हुजु बेलोरी सीमीयोन पङ्बे म्ही गीः यरुसलेमरी टीब मुबल। थे धर्मीतेङ् पर्मेस्वर्त तेन्बे म्ही मुबल। थे इस्राएलीमात थर्नलबे म्ही ब्रेन्ज्यीम् टीटीब मुबल। ओसेम् पबीत्र आत्मा थेतेङ् स्य्हुब मुबल। 26“परमप्रभुचे पीत्युजेत्स्येकी मुक्ती न्हङ्बे ख्रीस्ट्त अम्रङ्गते ए स्यीस्ये अरे” पङ्ज्यीम् पबीत्र आत्माचे सीमीयोनत ङोन्ग्यम्नो था पीन्बल मुबल। 27पबीत्र आत्माचे सीमीयोनत पर्मेस्वर्त तेन्बे दीम्री ङ्यीबे सेम् न्हङ्ज्यीम् थे हुजुरी ङ्यीज्यी। ओसेम् मोसाचे ब्रीबे पर्मेस्वर्की नीयम् पुरा स्य्हेङ्बरी मरीयमतेङ् योसेफचे येसुत पर्मेस्वर्त तेन्बे दीम्री बज्यीम् पर्मेस्वर्त सोप्तीज्यी। 28ओसेम् सीमीयोनचे येसुत तङ्री थोज्यीम् पर्मेस्वर्त ह्वोर्छ्ये पीन्ज्यीम् चोले पङ्ज्यी,
29“ओ परमप्रभु, एचे स्य्हेङ्बे बाचा पुरा तज्यी।
देरेम् एइ सेवा स्य्हेङ्बे म्हीत ढुक्कले स्यीबुङ्जेतो,
30तलेपङ्सम्, ङइ मीःचे एइ मुक्तीत म्रङ्म्यङ्ज्यी।
31एचे हुजु मुक्ती जम्म जात्की म्हीमाचे म्रङ्खइ पङ्ज्यीम् तयार् स्य्हेङ्जेत्पल य्हीन्ब।
32थेङ्नो यहुदी अय्हीन्बे म्हीमात ग्यम्
ङोन्बे य्हल् य्हीन्ब।
ओसेम् थेङ्नो एल इस्राएलीमाकी महीमा य्हीन्ब।”
33कोल येसुइ बारेरी सीमीयोनचे पङ्बे तम् थ्येःज्यीम् थेङ्की अमतेङ् अप थोम्ज्यी। 34सीमीयोनचे थेमात मोलम् पीन्ज्यीम् येसुइ अम मरीयमत चोले पङ्ज्यी, “ङ्यनो, इस्राएलरी थेत बीस्वास् स्य्हेङ्बे म्हीमात थेचे थर्नलब, बीस्वास् अस्य्हेङ्बमात नास् लब। ओसेम् गदे म्हीमाकी लागीरी थे बीरोधकी चीनो तबे लागीरी एइ कोलत पर्मेस्वर्चे दम्जेत्पल मुब। 35ओसेम् य्हक्को म्हीमाकी सेम्की तम्मा म्रङ्स्ये मुब। एइ तीङ्री छुरीचे ब्लोब र्हङ् तस्ये मुब।”
36ओसेम् हन्ना पङ्बे खुयु अगम्बक्त गीः पर्मेस्वर्त तेन्बे दीम्री मुबल। थे आसेर खलक्की फनुएलकी जमे मुबल। थेल भ्या तब बर्स ङ्यीस् लीप्चे र्हेम्बो स्यीबल मुबल। 37देरेम् हन्ना बर्स खल् ब्लीस्यी ब्लीतीङ् तबल मुबल। थे खेमेनो पर्मेस्वर्त तेन्बे दीम् अपीत्नले दीन्म्हुन्नो टीब मुबल। ओसेम् ङ्यीम्बु टीज्यीम् प्रार्थना स्य्हेङ्ज्यीम् पर्मेस्वर्त तेन्ब मुबल। 38थेचेएनो मरीयमतेङ् योसेफकी रेइरी खज्यीम् पर्मेस्वर्त ह्वोर्छ्ये पीन्ज्यीम् यरुसलेमकी म्हीमात थर्न लस्ये म्ही ब्रेन्टीबलमात येसुइ बारेरी स्येत्ज्यी।
39परमप्रभुकी नीयम्चे पङ्ब र्हङले स्य्हेङ्थोबे जम्मनो लक्मा स्य्हेङब बुच्ज्यीम् योसेफतेङ् मरीयम कोल येसुत बोर्ज्यीम् र्हङ्की सहर् गालीलकी नासरत्री दोःय्हर्ज्यी। 40कोल येसु जेप्प तबोर्ज्यीम् बङ्ज्येन् तज्यी। थेङ् बुद्दीचेएनो प्लीङ्बोर्ज्यी। ओसेम् पर्मेस्वर्की मोलम् थेङ्तेङ् मुबल।
येसु पर्मेस्वर्त तेन्बे दीम्री
41येसुइ अप-अम बर्सेएलनो नीस्तार पङ्बे पर्व म्हन्दीबरी यरुसलेमरी ङ्यीब मुबल। 42येसुचे ल्हेगोर् गीः#२:४२ ल्हेगोर् गीः यहुदीमाकी लागीरी कोलमाचे ल्हेगोर् योःब बीसेम् हुजु कोल देरेम् ब्योन् तज्यी पङ्बल टीम्। योमम् देबेएनो पर्व म्हन्दीबरी थेमाचे थेङ्त बोर्ज्यीम् यरुसलेमरी ङ्यीज्यी। 43पर्व म्हन्दीब बीसेम् थेमा दीम्री दोःज्यीम् य्हर्टीबे बेलोरी येसु यरुसलेमरीनो स्य्हुजेत्ज्यी। चु तम् येसुइ अपतेङ् अमत थानो अत। 44येसु ग्यम्री ब्रबे ल्हो-ल्हो म्हीमातेङ् मुस्यील म्हेन्ज्यीम् थेमा दीन् गीः ब्रस्यीनो टीज्यी। ओसेम् ङ्येस्ये तब बीसेम् थेमाइ म्हेमेमातेङ् र्होमात ङ्योत्ज्यीम् म्हइ्ज्यी। 45येसुत खनएनो अयङ्ब बीसेम् थेत म्हइबरी थेमा यरुसलेमरी दोःय्हर्ज्यी। 46म्हइम-म्हइमम् सोम्रेत् लीप्चे येसुत थेमाचे पर्मेस्वर्त तेन्बे दीम्री यङ्ज्यी। येसु धर्म-लोप्पोन्मातेङ् स्य्हुज्यीम् थेमाकी तम् ङ्येन्जेत्टीबतेङ् ङ्योत्जेत्टीब मुबल। 47ओसेम् येसुचे तम् गोज्यीम् जोहाप् पीन्ब म्रङ्ज्यीम् जम्मनो थोम्ज्यी। 48येसुत हुजुरी म्रङ्मम् थेङ्की अपतेङ् अम थोम्ज्यी। ओसेम् मरीयमचे ङ्योत्ज्यी, “लेन्छ्य, एचे चु ता स्य्हेङ्बल? च्याको, एत अयङ्ज्यीम् एइ अपतेङ् ङ य्हक्को लोङ्ज्यी। ओसेम् छेर्ज्यीम् म्हइटीब मुबल।” 49ओसेम् येसुचे थेमात सुङ्ज्यी, “एङ्यीमाचे ङत तले म्हइजेत्पल? ङ ङइ अपइ दीम्री तथोब बी एङ्यीमात था अरेबल?” 50येसुचे सुङ्बे तम् थेमाचे गोअख्म्। 51हुजु लीप्चे येसु अप अमतेङ् नासरत्री दोःजेत्ज्यी। ओसेम् थेमाइ अर्ती ङ्येन्ज्यीम् स्य्हुज्यी। येसुइ अम मरीयमचे चु जम्म तम्मा सेम् न्हङ्नो थेन्ज्यी। 52ओसेम् येसु पर्मेस्वर्तेङ् म्हीइ अनुग्रह यङ्ज्यीम् ल्हीतेङ् बुद्धीरीएनो छर्बोर्जेत्ज्यी।
वर्तमान में चयनित:
लुका 2: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
