लुका 5
5
येसुइ ङोन्ग्यम्की डबमा
(मत्ती ४:१८-२२; मर्कुस् १:१६-२०)
1तीरेत् येसु गनेसरेत पङ्बे ग्येइ यरी र्प्जेत्टीब मुबल। य्हक्को म्हीमा पर्मेस्वर्की फ्रोइ ङ्येम्बरी र्हुप् तज्यीम् तोर् इ मोर् इ तटीब मुबल। 2येसुचे ग्येइ यरी दोङ्ग ङ्य्ही म्रङ्जेत्ज्यी। हुजुरी तर्ङ सेत्पे म्हीमा दोङ्गसे डोङ्ज्यीम् तर्ङ उप्पे ग्यङ्मा ख्रुटीब मुबल। 3दोङ्ग गीःम् सीमोनल मुबल। येसु हुजु दोङ्गरी क्रेत्जेत्ज्यीम् सीमोनत, “दोङ्ग ग्येइ यचे चेक्पजाकी क्योर् बोरो” बी सुङ्जेत्ज्यी। ओसेम् थेङ् दोङ्गरी स्य्हुज्यीम् म्हीमात लोप्जेत्ज्यी।
4म्हीमात लोप्जेत्प बीसेम् येसुचे सीमोनत सुङ्ज्यी, “दोङ्ग नुप्पे ग्लारी बोरो ओसेम् तर्ङ चुङ्बरी ग्यङ् ल्हीको।” 5चु थ्येःज्यीम् सीमोनचे येसुत पङ्ज्यी, “लोप्पोन्, ङ्यीमाचे म्हुन्गीः ग्यङ्मा ल्हीमेएनो तर्ङ गीःएनो अस्यप्। तर थेङ्चे होले सुङ्जेत्सम् ङ ग्यङ् ल्हीब।” 6थेमाचे ग्यङ्मा ल्हीब बीसेम् य्हक्को तर्ङ स्यप्ज्यीम् थेमाइ् ग्यङ्मानो डेःय्हम्ज्यी। 7ओसेम् थेङ्यीमाचे ल्हो-ल्हो दोङ्गरी मुबे र्होमात खज्यीम् गोहार् स्य्हेङ्पीनो बी ल्हादब् लज्यीम् ङ्होत्ज्यी। ओसेम् थेङ्यीमा खज्यीम् तर्ङ तेत्ज्यी। तेत्म-तेत्मम् दोङ्ग ङ्य्हीनो तर्ङचे प्लीङ्ज्यीम् दीम्ब छ्यज्यी।
8चु म्रङ्ज्यीम् सीमोन पत्रुसचे येसुइ स्य्हब्री पब्लु लज्यीम् पङ्ज्यी, “ओ प्रभु, ङ पापी म्ही य्हीन्ब, होत्तज्यीम् ङ ग्यम्से थारीङ् स्येःजेतो!” 9तलेपङ्सम् चोले य्हक्को तर्ङ स्यप्ज्यीम् सीमोनतेङ् थेइ् र्होमा थोम्ज्यी। 10सीमोनतेङ् थुन्ज्यीम् लक् स्य्हेङ्बे जब्दीयाकी जमा याकुबतेङ् युहन्नाएनो य्हक्को थोम्ज्यी। ओसेम् येसुचे सीमोनत सुङ्ज्यी, “थलोङो, देरे य्हङ्से एचे तर्ङ अचुङ्नले, म्हीमात र्हुप्स्ये मुब।” 11चु थ्येःज्यीम् थेमाचे दोङ्गत ग्येइ यरी छेङ्ज्यीम् बज्यी। ओसेम् थेमाचे जम्म स्हेःमा ख्लेथेन्ज्यीम् येसुइ लीप्चे ब्रज्यी।
येसुचे पुन् स्यप्पे म्हीत फेन्न लजेत्पल
(मत्ती ८:१-४; मर्कुस् १:४०-४५)
12येसु ज्यीद सहर गीःरी मुबल। हुजु नम्सरी पुन् स्यप्पे म्ही गीः मुबल। येसुत म्रङ्ज्यीम् हुजु पुन् स्यप्पे म्हीचे थेङ्की स्य्हब्री पब्लु लज्यीम् चोले पङ्ज्यी, “प्रभु, एइ थुः मुसम् ङत फेन्न लब खम्ब।” 13येसुचे हुजु म्हीत फ्याचे छुज्यीम् सुङ्ज्यी, “एत फेन्न लबे सेम् ङल मुब, ए फेनो।” ओसेम् येसुचे होले सुङ्ब साच्चेनो पुन् स्यप्पे म्ही फेन्ज्यी। 14ओसेम् येसुचे थेत सुङ्ज्यी, “चु तम् एचे खल्तेएनो थस्येतो। तर लम्बुज ङ्यीज्यीम् र्हङ्त ङोनो#५:१४ ज ङ्यीज्यीम् र्हङ्त ङोनो हुजु बेलोरी पुन् स्यप्पे म्ही ल्हो-ल्हो म्हीमातेङ् बक्च्य टी अम्यङ्ब मुबल। हुजु पुन् स्यप्पे म्ही फेन्बल मुब बी चे अपङ् गदे हुजु म्ही फन्ज्यी अपङ्ब मुबल।। मोसाचे कुल्ब र्हङ्ले म्हीमात ए फेन्बल ङोन्बे लागीरी ठा पीनो” बी कुल्जेत्ज्यी।
15तर येसुइ चर्चा झेन्नो य्हक्को तबोर्ज्यी। ओसेम् य्हक्को म्हीमा थेङ्चे लोप्जेत्पे फ्रोइ ङ्येन्बतेङ् नबलमा फेन्बे लागीरी खज्यी। 16तर थेङ्मी सुन्सान् ग्लामारी स्येज्यीम् प्रार्थना स्य्हेङ्जेत्प मुबल।
येसुचे कङ् अचल्दीबे म्हीत फेन्न लबल
(मत्ती ९:१-८; मर्कुस् २:१-१२)
17तीरेत् येसु म्हीमात लोप्जेत्टीब मुबल। हुजुरी धर्म-लोप्पोन्मातेङ् फरीसीमाएनो रेइरी टीटीब मुबल। थेमा गालीलतेङ् यहुदीया प्रदेस्की जम्म नम्सतेङ् यरुसलेम सहरसेएनो खबल मुबल। येसुतेङ् नबलमात फेन्न लबे परमप्रभुकी सक्ती मुबल। 18हुजुरी म्हीमाचे कङ् अचल्दीबे म्ही गीः थेइ तीत्सतेङ्नो नाज्यीम् बज्यी। थेमाचे थेत दीम्न्हङ् येसुइ ङोन्री बोर्ब छ्यज्यी। 19तर य्हक्को म्हीमा मुज्यीम् येसुज बोर्बरी ग्यम् अयङ्। होत्तज्यीम् थेमाचे हुजु नबे म्हीत दीम्जोरी बोर्ज्यी। ओसेम् थेमाचे नबे म्ही वङ्बकीनो दीम्की छन स्याज्यीम् थेइ तीस्सरीनो येसुइ ङोन्ग्यम् फप्पीत्ज्यी। 20येसुचे हुजु म्हीमाकी चोतेबे बीस्वास् म्रङ्ज्यीम् कङ् अचल्तीबे म्हीत सुङ्ज्यी, “अले एइ पाप क्षमा तबल मुब।”
21येसुचे सुङ्बे चु तम् थ्येःज्यीम् धर्म लोप्पोन्मातेङ् फरीसीमाचे थेमाकी सेम्री चोले म्हेन्ज्यी, “पर्मेस्वर्त खीसइतीबे चु म्ही खल य्हीन्ब? पाप्मी पर्मेस्वर्चेकीनो क्षमा स्य्हेङ्जेत्प खम्ब।” 22थेमाइ सेम्की तम् गोज्यीम् येसुचे सुङ्ज्यी, “एङ्यीमाचे चोतेब तले म्हेम्ब? 23हुजु कङ् अचल्तीबे म्हीत, ‘एइ पाप क्षमा तज्यी’ पङ्बतेङ्, ‘रेःज्यीम् ब्रउ’ पङ्ब खजु चइ देबल य्हीन्ल? 24जम्बुलीङ्री म्हीइ जत पाप क्षमा स्य्हेङ्बे अधीकार् मुब बी ङ एङ्यीमात ङोन्स्ये मुब।” ओसेम् येसुचे हुजु कङ् अचल्तीबे म्हीत सुङ्ज्यी, “ङ एत पङ्ब, रेःगो ओसेम् र्हङ्की तीस्स दुत्ज्यीम् दीम्री य्हरो।” 25होले सुङ्ब साच्चेनो हुजु म्ही रेःज्यीम् र्हङ्की तीस्स दुत्ज्यीम् पर्मेस्वर्त तोप्ज्यीम् दीम्री य्हर्ज्यी। 26ओसेम् जम्मनो थोम्ज्यीम् पर्मेस्वर्त तोप्ज्यी। ओसेम् लोङ् लोङ्ज्यीम् चोले पङ्ज्यी, “तीङी ङ्य्हङ्माचे थोम्बे लक् म्रङ्ज्यी!”
येसुचे लेबीत ङ्होत्जेत्पल
(मत्ती ९:९-१३; मर्कुस् २:१३-१७)
27हुजु लीप्चे, येसु स्येःटीबे बेलोरी येसुचे लेबी #५:२७ लेबी थेत मत्तीएनो पङ्ब मुबलपङ्बे तीरो दुत्पे म्हीत तीरो फाबे ग्लारी टीटीब म्रङ्जेत्ज्यी। येसुचे थेत सुङ्ज्यी, “ङइ लीप्चे ब्रउ।” 28ओसेम् लेबी रेःज्यीम् हुजु जम्म लक् पीत्थेन्ज्यीम् येसुइ लीप्चे ब्रज्यी।
29हुजु लीप्चे लेबीचे येसुइ लागीरी दीम्री ङ्हच्छ्यङ् डोन् स्य्हेङ्ज्यी। हुजु डोन् चबरी तीरो दुत्पे य्हक्को म्हीमातेङ् ल्होल्होएनो म्हीमा मुबल। 30फरीसीतेङ् थेमाइ धर्म लोप्पोन्माचे गन्गन् लज्यीम् येसुइ डबमात पङ्ज्यी, “एङ्यीमाचे तीरो दुत्पे म्हीमा ओसेम् ल्हो-ल्हो पापीमातेङ् चबथुङ्ब तले स्य्हेङ्ब?#५:३० खल पङ्लेनो ज्यबे म्हीचे तीरो दुप्पे म्हीमा ओसेम् ल्हो-ल्हो पापीमातेङ् चबथुङ्ब स्य्हेङ्ज्यी पङ्सम् थेएनो हुजुमा र्हङ्ब तब बी फरीसीतेङ् धर्म-लोप्पोन्माचे म्हेन्ब मुबल।” 31येसुचे थेङ्यीमात जोहाप् सुङ्ज्यी, “अनबे म्हीमात डाक्टर अतो। नबे म्हीमातकीनो तोःब। 32होलेनो ङ धर्मीमात ङ्होप्परी अय्हीन्, तर पापीमात पस्चताप स्य्हेङो पङ्बरी युबल य्हीन्ब।”
फोइतेन् टीबे बारेरी लोप्जेत्पल
(मत्ती ९:१४-१७; मर्कुस् २:१८-२२)
33गदे म्हीमाचेम् येसुत पङ्ज्यी, “युहन्नाइ डबमा य्हक्को र्हङ्ब ङ्यीम्बु टीज्यीम् प्रार्थना स्य्हेङ्ब। ओसेम् फरीसीइ डबमाचेएनो होले स्य्हेङ्ब, तर एइ डबमामी चब थुङ्बकीनो स्य्हेङ्ब।” 34येसुचे जोहाप् न्हङ्ज्यी, “भ्याइ डोन्री दुलहा बक्च्य मुबे बेलोरी जन्तीमात तेएनो चअपुङ्नले य्हर्पुङ्बो स्यीम्? देमेन्नो य्हर्अबुङ्। 35तर चोतेबे दीन्माएनो खस्ये मुब, दुलहा थेमा ग्यम्से फेःज्यीम् बोर्स्ये मुब। हुजु लीप्चे थेमा फोइतेन् टीस्ये मुब।”
36येसुचे देबेनो ल्हो-ल्हो अर्थ गीः सुङ्ज्यी, “खल्चेएनो छार् येन् डेःज्यीम् बोक्ट येन्री अख्य। होले स्य्हेङ्सम् छार् येनेएनो न्होङ्ब। ओसेम् छार् येन्खेन् बोक्ट येन्तेङ् छन्द अख।
37“खल्चेएनो छार् अङ्गुर्की नीङ्गु बोक्ट डीइ गल्दरी अयु। युलेएनो छार् अङ्गुर्की नीङ्गुचे डीइ् गल्द थीज्यीम् नीङ्गु य्हर्ब। ओसेम् डीइ् गल्देएनो न्होङ्ब। 38छार् अङ्गुर्की नीङ्गुमी छार् डीइ गल्दरीनो युथेन्थोब। 39य्हीन्बरीम् खल्चेएनो अङ्गुर्की च्यीप्पे नीङ्गु थुङ्ज्यीम् अङ्गुर्की छार् नीङ्गु थुङ्बे सेम् अथेन्। ‘तलेपङ्सम् थेचे पङ्ब, अङ्गुर्की च्यीप्पे नीङ्गुनो रोङ्ब।’”
वर्तमान में चयनित:
लुका 5: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
