लुका 6
6
दुःब न्हबे दीन्की बारेरी लोप्जेत्पल
(मत्ती १२:१-८; मर्कुस् २:२३-२८)
1येसु दुःब न्हबे दीन्री व्ह म्रङ् ग्यम्से तज्यीम् स्येःटीब मुबल। थेङ्की डबमाचे व्हइ नम् टङ्ज्यीम् याचे न्हइज्यीम् चज्यी।#६:१ चोले चलेनो य्हो लबल अतब मुबल। व्यवस्था २३:२६ 2चु म्रङ्ज्यीम् फरीसीमाचे डबमात पङ्ज्यी, “मोसाचे ब्रीबे पर्मेस्वर्की नीयम्चे दुःब न्हबे दीन्री स्य्हेङ्ब अत पङ्बे लक् तले स्य्हेङ्ब?” 3येसुचे थेमात जोहाप् न्हङ्ज्यी, “दाऊदतेङ् थेइ र्होमा फो ख्रेन्बे बेलोरी थेचे ता स्य्हेङ्ज्यी? एङ्यीमाचे खेत्पल अरेउ स्यीम्? 4थेचेम् झेन् पर्मेस्वर्की ज्यीद दीम्न्हङ् वङ्ज्यीम् ल्हो-ल्होचे चब अतबे लम्बुचेकीनो चब तबे पर्मेस्वर्त पीन्बे गेङ् कीन्ज्यीम् चज्यी। ओसेम् थेइ र्होमातएनो पीन्ज्यी।”#६:४ १ सामुएल २१:१-६; लेबी २४:९ 5ओसेम् येसुचे थेमात सुङ्ज्यी, “म्हीइ ज, दुःब न्हबे दीन्की प्रभु य्हीन्ब।”
या खर्बे म्ही फेन्बल
(मत्ती १२:९-१४; मर्कुस् ३:१-६)
6ल्हो-ल्हो दुःब न्हबे दीन्री येसु यहुदीमा र्हुप् तबे दीम्री स्येज्यीम् पर्मेस्वर्की फ्रोइ लोप्जेत्ज्यी। हुजुरी केत् या खर्बे म्ही गीः मुबल। 7येसुचे दुःब न्हबे दीन्री हुजु या खर्बे म्हीत फेन्न लसम् येसुत दोस् लगइदील म्हेन्ज्यीम् धर्म लोप्पोनमातेङ् फरीसीमाचे च्याटीब मुबल। 8थेमाइ सेम्की तम् गोज्यीम् येसुचे या खर्बे म्हीत सुङ्ज्यी, “ए रेःज्यीम् म्हीमाकी गुङ्री रपो।” होले सुङ्ब साच्चेनो हुजु म्ही रेःज्यीम् जम्मइ गुङ्री रप्ज्यी। 9ओसेम् येसुचे थेमात सुङ्ज्यी, “लो पङो देरेम्, दुःब न्हबे दीन्री ङ्य्हङ्की नीयम्चे खतेबे लक् स्य्हेङो पङ्ब? ज्यबे लक् स्य्हेङ्ब वुइ अज्यबे लक् स्य्हेङ्ब? थर्नलब ज्यब वुइ स्यीनलब ज्यब?” 10ओसेम् येसुचे म्हीमा जम्मत स्हीज्यीम् या खर्बे म्हीत सुङ्ज्यी, “एइ या स्येल् लो।” हुजु म्हीचे या स्येल् लब बीसेम् थेइ या फेन्ज्यी।
11चु म्रङ्ज्यीम् फरीसीमातेङ् धर्म-लोप्पोन्मा बोमोचे न सर्ज्यीम् येसुत खले ता स्य्हेङ्ब बी गीःचे गीःत पङ्ज्यी।
येसुचे चुङ्ङ्यी प्रेरीत दम्जेत्पल
(मत्ती १०:१-४; मर्कुस् ३:१३-१९)
12तीरेत् येसु गङ्री स्येःज्यीम् म्हुन्गीःनो पर्मेस्वर्तेङ् प्रार्थना स्य्हेङ्जेत्ज्यी। 13स्य्हो तब बीसेम् येसुचे डबमात ङ्होत्जेत्ज्यी। ओसेम् थेमा न्हङ्चे चुङ्ङ्यीत दम्जेत्ज्यीम् थेमात प्रेरीत पङ्बे मीन् न्हङ्ज्यी। 14चोले दम्जेत्पे चुङ्ङ्यी प्रेरीतमा सीमोन (थेत येसुचे पत्रुस पङ्बे मीनेएनो थेन्पीन्जेत्ज्यी), अन्द्रीयास (सीमोनकी अले), याकुब, युहन्ना, फीलीप, बारथोलोमाइ, 15मत्ती, थोमा, याकुब (अल्फायसकी ज), सीमोन (र्हङ्की य्हुल्त माया स्य्हेङ्बे म्ही#६:१५ र्हङ्की य्हुल्त माया स्य्हेङब ओसेम् र्हङ्की य्हुल्की स्वतन्त्रइ लागीरी छेप्प। थे राजनीती पाटीरी सहभागी मुबल।), 16यहुदा (याकुबकी ज), यहुदा इस्करीयोत (थेचे लीक्यम् येसुत म्हीमाचे चुङ्न लपीन्ज्यी)।
येसुचे य्हक्को म्हीमात फेन्न लजेत्पल
(मत्ती ४:२३-२५)
17येसु प्रेरीतमातेङ् गङ्से फप्जेत्मम् च्येत् ग्लारी दोःजेत्ज्यी। हुजुरी ल्हो-ल्हो डबमा मुबल। ओसेम् यहुदीया प्रदेस्तेङ् यरुसलेम सहरसे ओसेम् समुन्द्रइ यरी मुबे टुरोसतेङ् सीदोन सहरसेएनो ज्याब अखम्ब सम्मइ म्हीमा खज्यीम् हुजुरी र्हुप् तबल मुबल। 18म्हीमा येसुचे लोप्जेत्पे फ्रोइ ङ्येन्बतेङ् नबलमा फेन्बे लागीरी खबल मुबल। म्हङ् स्यप्ज्यीम् दुख यङ्बे म्हीमाएनो फेन्ज्यी। 19जम्मा म्हीमाचे येसुत छुब छ्यज्यी। तलेपङ्सम् जम्मनो नबे म्हीमा थेङ् ग्यम्से डोङ्बे सक्तीचे फेन्टीब मुबल।
मोलम् यङ्बलमातेङ् धीक्कार यङ्बलमा
(मत्ती ५:१-१२)
20हुजु लीप्चे येसुचे थेङ्की डबमात स्हीजेत्ज्यीम् चोले सुङ्ज्यी,
“ओ प्रङ्न तबलमा, एङ्यीमात पर्मेस्वर्चे मोलम् न्हङ्बल मुब!
तलेपङ्सम् पर्मेस्वर्की य्हुल् एङ्यीमाल य्हीन्ब।
21ओ ख्रेम्बलमा, एङ्यीमात पर्मेस्वर्चे मोलम् न्हङ्स्ये मुब!
तलेपङ्सम् एङ्यीमात पर्मेस्वर्चे म्रेन्न लजेत्स्ये मुब।
ओसेम् क्राबे म्हीमा, एङ्यीमात पर्मेस्वर्चे मोलम् न्हङ्स्ये मुब!
तलेपङ्सम् एङ्यीमात पर्मेस्वर्चे ङ्येत्न लजेत्स्ये मुब!
22“म्हीइ जत बीस्वास् स्य्हेङ्बल पङ्ज्यीम् म्हीमाचे एङ्यीमात अखोस्ये, ख्लास्ये, ओसेम् खीसइतीस्ये मुब। ओसेम् थेङ्यीमाचे एङ्यीमात अज्यब स्य्हेङ्बे म्हीमा पङ्लेनो पर्मेस्वर्चेमी एङ्यीमात मोलम् न्हङ्स्ये मुब। 23हुजु बेलोरी तङ्ज्यीम् स्यउ। तलेपङ्सम् एङ्यीमात स्वर्गरी ङ्हच्छ्यङ् बक्सीस् थेन्बल मुब। दङ्बोइ अगम्बक्तमातएनो एङ्यीमात सतइतीबे म्हीमाइ म्हेमेमाचे होलेनो सतइतीब मुबल।”
24“तर धीक्कार बरुमा,
तलेपङ्सम् एङ्यीमाचे सुखइ जीवन बीतइतीज्यीन्बल मुब!
25धीक्कार म्रेन्बलमा,
तलेपङ्सम् एङ्यीमा ख्रेन्स्ये मुब!
धीक्कार ङ्येत्पलमा,
तलेपङ्सम् एङ्यीमाचे दुख यङ्ज्यीम् क्राथोस्ये मुब!
26“धीक्कार, म्हीमाचे तोप्पलमा, तलेपङ्सम् चोतेबे तोप्पमी एङ्यीमाइ म्हेमेमाचे भ्यु पङ्बे अगम्बक्तमातएनो तोप्प मुबल।”
सत्तुरमातएनो म्होइथोब
(मत्ती ५:३८-४८; ७:१२)
27“तर ङचे लोप्पे अर्थ ङ्येन्बलमात पङ्ब, सत्तुर्मात म्होइको। ओसेम् एङ्यीमात अखोबमातएनो ज्यब स्य्हेङो। 28एङ्यीमात केत्पलमात मोलम् पीनो। एङ्यीमात अज्यब स्य्हेङ्बमाकी लागीरी प्रार्थना स्य्हेङो। 29एङ्यीमात ग्रम्ब गीःरी पातल्चे ग्यङ्ज्यी पङ्सम् हुजु म्हीत गीःब ग्रम्बएनो तापीनो। एइ य्हुर्बे येन् ब्येन्बलत लबेदएनो प्लोक्ज्यीम् पीनो। 30एत र्हीत्पलमात पीनो ओसेम् एइ स्हेः बोर्बलमात दोःज्यीम् थर्हीतो। 31ल्हो-ल्हो म्हीमाचे एङ्यीमाकी लागीरी ता स्य्हेङ्पीन्खइ म्हेन्ज्यी, होलेनो एङ्यीमाचे ल्हो-ल्हो म्हीमातएनो स्य्हेङो।
32“एङयीमाचे र्हङ्त म्होइबलमातकीनो म्होइज्यी पङ्सम् एङ्यीमाचे ङ्हच्छ्यङ् ज्यबे लक् ता स्य्हेङ्ज्यी? तलेपङ्सम् पापीमाचेएनो र्हङ्त म्होइबमात म्होइब। 33र्हङत ज्यब स्य्हेङ्बलमातकीनो ज्यब स्य्हेङ्ज्यी पङ्सम् एङ्यीमाचे ङ्हच्छ्यङ् ज्यबे लक् ता स्य्हेङ्ज्यी? तलेपङ्सम् पापीमाचेएनो होले स्य्हेङ्ब। 34एङ्यीमाचे फाब खम्बलमातकीनो क्ष्या पीन्ज्यी पङ्सम् एङ्यीमाचे ङ्हच्छ्यङ् ज्यबे लक् ता स्य्हेङ्ज्यी? तलेपङ्सम् पापीमाचेएनो फाब खम्बे पापीमात क्ष्या पीन्ब।
35“होले अयीन् एङ्यीमाचेमी सत्तुर्मात म्होइको, थेमात ज्यब स्य्हेङो। ओसेम् क्ष्या ताबमात दोःज्यीम् र्हीत्पे आस् अथेन्नले क्ष्या पीनो। होले स्य्हेङ्ज्यी पङ्सम् एङ्यीमाचे ङ्हच्छ्यङ् बक्सीस् यङ्स्ये मुब। ओसेम् एङ्यीमा जम्मन्हङ्री ङ्हच्छ्यङ् पर्मेस्वर्की ज-जमे तस्ये मुब। तलेपङ्सम् पर्मेस्वर्चे गुन् अरेबे म्हीत ओसेम् अज्यबे लक् स्य्हेङ्बे म्हीतएनो दय स्य्हेङ्जेत्प। 36पर्मेस्वर् अप खतेबे कृपालु मुब, एङ्यीमाएनो होतेबे कृपालु तउ।”
र्होत दोस् थलइदीउ
(मत्ती ७:१-५)
37“र्होत दोस् थलइदीउ ओसेम् पर्मेस्वर्चे एत दोस् लइदीस्ये अरे। र्होत न्याय थस्येङो ओसेम् पर्मेस्वर्चे एत न्याय स्य्हेङ्स्ये अरे। र्होत क्षम पीनो ओसेम् पर्मेस्वर्चे एत क्षम पीन्स्ये मुब। 38र्होत पीनो ओसेम् पर्मेस्वर्चे एत पीन्स्ये मुब। एङ्यीमाचेमी छुत्-छुत्च्यीम् म्य्हुर् तज्यीम् य्हर्बसम्म यङ्स्ये मुब। एङ्यीमाचे र्होत खले पीन्ज्यी होलेनो पर्मेस्वर् ग्यम्से यङ्स्ये मुब।”
39येसुचे थेङ्यीमात अर्थ गीः चोले सुङ्ज्यी, “मीः अम्रङ्बे म्हीचे ल्हो-ल्हो मीः अम्रङ्बे म्हीत या चुङ्ज्यीम् ब्रेत्प खम्ब? ब्रेत्ज्यी पङ्सम् ङ्य्हीनो व्हङ्री अतइ्? 40डब र्हङ्की लोप्पोन् बीमम् ङ्हच्छ्यङ् अत, तर लोप्पोन्चे लोप्प बीसेम् थे लोप्पोन् रहङ्बनो तब।”
41“र्हङ्की अलेइ गोरी स्येत् ब्रब म्रङ्ब्लचे र्हङ्की गोरी मइ ब्रब खले अम्रङ्ब? 42र्हङ्की गोरी मइ् ब्रब अम्रङ्ब्लचे खले पङ्खम्ब ‘अले एइ गोरी मुबे स्येत् दुत्ज्यीम् ख्लाके।’ ओ न्हङ् अज्यबे म्हीमा! ङोन्ग्यम् र्हङ्की गोरी मुबे मइतगीः लब्लाको ओसेम् अलेइ गोरी मुबे स्येत् दुत्ज्यीम् ख्लाखम्ब।”
दोङ्बोतेङ् दोङ्बोइ रोःरो
(मत्ती ७:१६-२०; १२:३३-३५)
43“ज्यबे दोङ्बोचे अज्यबे रोःरो अरो। ओसेम् अज्यबे दोङ्बोचे ज्यबे रोःरो अरो। 44खतेबे दोङ्बो पङ्लेनो हुजुरी रोःबे रोःरो चेनो स्येःब। म्हङ् पुजुइ दोङ्बोरी अम्बएनो अरो, स्याउएनो अरो। 45ज्यबे सेम् मुबे म्हीचे र्हङ्की सेम्न्हङ्चे ज्यबे तम्नो पङ्ब। ओसेम् अज्यबे सेम् मुबे म्हीचे र्हङ्की सेम्न्हङ्चे अज्यबे तम्नो पङ्ब। तलेपङ्सम् थेइ सेम्न्हङ् ता मुज्यी हुजु तम्नो थेइ सुङ्चे पङ्ब।”
थो ङ्य्हीइ दीम्
(मत्ती ७:२४-२७)
46“ङचे पङ्बे तम् अङ्येन्सम् एङ्यीमा ङत तले ‘प्रभु, प्रभु’ पङ्ब? 47ङतेङ् खज्यीम् ङइ तम् ङ्येन्ज्यीम् ङ्चे पङ्ब र्हङ्ले स्य्हेङ्बे म्ही खतेब बी, ङ एङ्यीमात स्येत्प। 48थे दीम् स्य्हेङ्बे म्ही गीः र्हङ्ब य्हीन्ब, हुजु म्हीचे नुप्नले ह्वज्यीम् दीम्की जग ङ्हच्छ्यङ् युङ्बजोरी स्य्हेङ्ज्यी। नम् युज्यीम् भल युलेएनो कोङ्नले स्य्हेङ्बल तज्यीम् थेइ दीम् अफुप्। 49तर ङइ तम् ङ्येन्ज्यीमएनो ङचे पङ्ब र्हङ्ले अस्य्हेङ्बलमी जग अयुनले दीम् स्य्हेङ्बे म्ही र्हङ्ब य्हीन्ब। नम् युज्यीम् भल युज्यी। ओसेम् थेइ दीम् फुप्ज्यीम् स्हीःय्हर्ज्यी।”
वर्तमान में चयनित:
लुका 6: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
