मर्कुस् 10
10
येसुचे स्यीङ्ग थाबे बारेरी लोप्जेत्पल
(मत्ती १९:१-१२; लुका १६:१८)
1हुजु लीप्चे येसुचे हुजु ग्ला ख्लेथेन्ज्यीम् यहुदीया प्रदेस्तेङ् यर्दन ग्येन्दीइ क्योम्सङ् स्येजेत्ज्यी। देबेएनो हुजुरी य्हक्को म्हीमा र्हुप् तज्यी। ओसेम् येसुचे ङोन्ग्यम् र्हङ्लेनो थेङ्यीमात लोप्जेत्ज्यी।
2डेत्-डेत् फरीसीमा येसुइज खज्यीम् थेङ्त तम् चुङ्बरी ङ्योत्ज्यी, “र्हेम्बोचे र्हङ्की म्रीङ्त स्यीङ्ग थाब तब वुइ अत?” 3येसुचे थेङ्यीमात ङ्योत्जेत्ज्यी, “एङ्यीमात मोसाचे ता कुल्बल मुब?” 4थेङ्यीमाचे पङ्ज्यी, “र्हेम्बोचे र्हङ्की म्रीङ्त ख्लाथोसम् स्यीङ्ग थाज्यीम् ख्लाब तब बी मोसाचे ब्रीबल मुब।”#ब्यबस्था २४:१-४; मत्ती ५:३१ 5येसुचे थेङ्यीमात सुङ्ज्यी, “एङ्यीमाकी कोङ्बे सेम्चे लज्यीम् मोसाचे चोले ब्रीबल य्हीन्ब। 6तर ठुङ्बे बेलो य्हङ्सेनो म्हीत ‘पर्मेस्वर्चे अपकोलतेङ् अमकोल’ स्य्हेङ्जेत्ज्यी। #ठुङ्ब १:२७; ५:२ 7‘होत्तज्यीम् म्हीचे र्हङ्की अपतेङ् अमत ख्लेथेन्ज्यीम् र्हङ्की म्रीङ्तेङ् थुन्ज्यीम् टीब। 8ओसेम् थेङ्य्ही ल्ही गीः र्हङ्ब तस्ये मुब।’#ठुङ्ब २:२४ देरेम् थेङ्यीमा ङ्ही अय्हीन् तर ल्हीः गीः तब। 9होत्तज्यीम् पर्मेस्वर्चे ल्हीः गीः स्य्हेङ्जेत्पलत खल म्हीचेएनो अफेःखइ।”
10येसु र्हङ्की डबमातेङ् दीम्री तबे बेलोरी थेङ्यीमाचे चु तम्की बारेरी देबेएनो ङ्योत्ज्यी। 11येसुचे थेङ्यीमात सुङ्ज्यी, “खल र्हेम्बोचे र्हङ्की म्रीङ्त स्यीङ्ग थाज्यीम् ल्हो-ल्हो अमकोलत भ्या स्य्हेङ्ब थेचे ङोन्ग्यम्की म्रीङ्की बीरुद्दरी ब्यभीचार् स्य्हेङ्ब।#मत्ती ५:३२; १ कोरीन्थी ७:१०,११ 12ओसेम् होलेनो खल म्रीङ्चे र्हङ्की र्हेम्बोतेङ् स्यीङ्ग थाज्यीम् ल्हो-ल्हो अपकोलत भ्या स्य्हेङ्ब थेचेएनो ङोन्ग्यम्की र्हेम्बोइ बीरुद्दरी ब्यभीचार् स्य्हेङ्ब।”
येसुचे कोलमात मोलम् न्हङ्बल
(मत्ती १९:१३-१५; लुका १८:१५-१७)
13येसुचे फ्याचे छुज्यीम् मोलम् न्हङ्खइ बी म्हीमाचे र्हङ्की कोलमा थेङ्ज बज्यी। तर डबमाचे हुजु म्हीमात बराज्यी। 14चु म्रङ्ज्यीम् येसुत बोमो रप्ज्यी, ओसेम् थेङ्यीमात सुङ्ज्यी, “कोलमात ङइज खबुङो। थेङ्यीमात थर्होदो, तलेपङ्सम् पर्मेस्वर्की य्हुल् चु कोलमा र्हङ्बलनो य्हीन्ब। 15ङ एङ्यीमात देमेन्नो पङ्ब, खल्चे पर्मेस्वर्की य्हुल्त कोल गीःचे र्हङ्ले ग्रहन् अस्य्हेङ्ज्यी, थे हुजु न्हङ् वङ्स्ये अरे।”#मत्ती १८:३ 16हुजु लीप्चे थेङ्चे हुजु कोलमात र्हङ्की तङ्री थोज्यीम् थेङ्यीमाइ जोरी फ्या थेन्ज्यीम् मोलम् न्हङ्ज्यी।
बरु म्ही
(मत्ती १९:१६-३०; लुका १८:१८-३०)
17येसु हुजु ग्लाचे स्येःब छ्येमम् म्ही गीः छ्योङ्खज्यीम् थेङ्की ङोन्री पुइ जुःज्यीम् ङ्योत्ज्यी, “ज्यबे लोप्पोन्, खेमेएनो अबेबे जीवन् यङ्बरी ङचे त स्य्हेङ्थोब?” 18येसुचे थेत सुङ्ज्यी, “ए ङत तले ज्यब पङ्ब? पर्मेस्वर् बीम खलेएनो ज्यब अरे। 19पर्मेस्वर्चे कुल्जेत्पे अर्तीमा एचे स्येःबलनो मुब- ‘म्ही थसेतो, ब्यभीचार् थस्य्हेङो, य्हो थलोउ, भ्यु पङ्ज्यीम् र्होत दोस् थपीनो, थठग्तीउ ओसेम् र्हङ्की अप-अमत स्हेस स्य्हेङो।’”#प्रस्थान २०:१२-१६; ब्यबस्था ५:१६-२० 20हुजु म्हीचे पङ्ज्यी, “लोप्पोन्, ङचे हुजुमा जम्मनो कोल य्हङ्स्येनो ङ्येन्ज्यीम् ब्रबल मुब।” 21येसुचे थेत म्होइज्यीम् स्हीजेत्ज्यी ओसेम् सुङ्ज्यी, “एचे दवम् लक् गीः स्य्हेङ्थोस्ये मुब। ङ्यीउ ओसेम् एइ मुब थम्चे स्हेमा चुङ्ज्यीम् प्रङ्नमात पीनो, एचे स्वर्गरी सम्पती यङ्स्ये मुब। हुजु लीप्चे खज्यीम् ङइ लीप्चे ब्रउ।” 22येसुचे सुङ्बे चु तम् थ्येःज्यीम् थेइ लीः म्लङ् तज्यी। ओसेम् य्हक्को छेर्ज्यीम् य्हर्ज्यी। तलेपङ्सम् थे य्हक्को बरु मुबल।
23येसुचे कोरोरोले स्हीज्यीम् डबमात सुङ्जेत्ज्यी, “बरु म्हीत पर्मेस्वर्की य्हुल्री वङ्बरी य्हक्को गारो मुब।” 24थेङ्की डबमा चु थ्येःज्यीम् तेङेन् तज्यी। तर येसुचे थेङ्यीमात देबेएनो सुङ्ज्यी, “अज्यो-अलेमा, पर्मेस्वर्की य्हुल्री वङ्बरी य्हक्को गारो मुब। 25बरु म्ही पर्मेस्वर्की य्हुल्री वङ्ब बीमम् दब्की मीःचे ऊँट वङ्ब देबल तब।” 26चु थ्येःज्यीम् डबमा य्हक्कोनो तेङेन् तज्यीम् थेङ्यीमान्हङ् गीःचे गीःत ङ्योत्ज्यी, “होलेपङ्सम् खल थर्ब खम्ब?” 27येसुचे थेङ्यीमात स्हीजेत्ज्यीम् सुङ्ज्यी, “म्हीमाचे चु लक् स्य्हेङ्ब अखम्। तर पर्मेस्वर्चे स्य्हेङ्जेत्प अखम्बल तेएनो अरे।”
28पत्रुसचे पङ्ज्यी, “प्रभु, ङ्यीमाचेमी जम्म स्हेमा ख्लेथेन्ज्यीम् थेङ्की लीप्चे ब्रबल मुब।” 29येसुचे सुङ्ज्यी, “ङ एङ्यीमात देमेन्नो पङ्ब, खल्चे ङइ लागीरी ओसेम् ज्यबे सम्तर्की लागीरी दीम्नम्, अज्यो-अले, अन-अङ, अप-अम, कोलमा ओसेम् म्रङ्मा ख्लेथेन्ज्यी, 30थेचे जम्बलीङ्री मुबे बेलोरीनो सय गुन य्हक्को दीम्मा, अज्यो-अलेमा, अन-अङमा, अप-अममा, कोलमातेङ् म्रङ्मा ओसेम् म्हीमाचे पीन्बे दुखएनो नाथोस्ये मुब। ओसेम् लीक्यम्की बेलोरीएनो खेमेएनो अबेबे जीवन यङ्स्ये मुब। 31तर देरे ङोन्ग्यम् मुबे य्हक्को म्हीमा लीप्चे तस्ये मुब। ओसेम् देरे लीक्यम् मुबे म्हीमा ङोन्चे तस्ये मुब।” #मत्ती २०:१६; लुका १३:३०
येसुचे देबेएनो र्हङ् स्यीस्येकी बारेरी सुङ्बल
(मत्ती २०:१७-१९; लुका १८:३१-३४)
32येसुतेङ् थेङ्की डबमा यरुसलेम्री य्हर्टीबे बेलोरी येसु ङोन्-ङोन् स्येजेत्टीब मुबल। डबमा छक्क तबल मुबल। ओसेम् ल्हो-ल्हो थेङ्की लीप्चे ब्रबे म्हीमा लोङ्बल मुबल। थेङ्चे देबेएनो र्हङ्की चुङ् ङ्ही डबमात तीच्छङ् नोम्ज्यीम् थेङ्की जोरी तयम्टीबे तम्मा स्येत्ज्यी। 33थेङ्चे सुङ्ज्यी, “ङ्येनो, देरे ङ्य्हङ्मा यरुसलेम्री ङ्यीटीबल मुब। म्हीइ जत हुजुरी चुङ्ज्यीम् ङ्हच्छ्यङ् लम्बुमातेङ् धर्म लोप्पोन्माकी यारी सोप्तीस्ये मुब। थेङ्यीमाचे थेत सेत्नोथोब पङ्ज्यीम् रोमी म्हीमाकी यारी सोप्तीस्ये मुब। 34थेङ्यीमाचे थेत ङोःस्ये मुब, थो सास्ये मुब, कोर्रचे ग्यङ्स्ये मुब ओसेम् सेत्स्ये मुब। तर थे स्यीज्यीम् सोम्रेत् लीप्चे देबेएनो सोस्ये मुब।”
याकुबतेङ् युहन्नाचे फ्या स्य्हु लबल
(मत्ती २०:२०-२८)
35हुजु लीप्चे जब्दीयाकी जमा याकुबतेङ् युहन्ना येसुइज खज्यीम्, “लोप्पोन्, ङ्यी ङ्य्हीचे ता र्हीत्लेनो थेङ्चे स्य्हेङ्पीन्जेतो बी ङ्यीङ्य्हीइ सेम् मुब” बी पङ्ज्यी। 36येसुचे थेङ्य्हीत “ङचे एङ्य्हीइ लागीरी ता स्य्हेङ्थोज्यी?” बी ङ्योत्जेत्ज्यी। 37थेङ्य्हीचे पङ्ज्यी, “थेङ् र्हङ्की स्वर्गइ ठीःरी स्य्हु:बे बेलोरी ङ्यीङ्य्हीत गीःत थेङ्की केत्पट्टीचे ओसेम् गीःत थेङ्की ल्होम् पट्टीचे टीपुङ्जेतो।” 38येसुचे थेङ्यीमात सुङ्ज्यी, “एङ्यीमाचे ता र्हीत्थोब बी अस्ये। ङचे नाबे दुख एङ्यीमाचे नाब खम्ब? ङचे कीन्बे दुखइ बप्तीस्मा एङ्यीमाचे कीन्ब खम्ब?” #लुका १२:५० 39थेङ्यीमाचे “ङ्यीमाचे खम्ब” पङ्ज्यी। ओसेम् येसुचे थेङ्यीमात सुङ्ज्यी, “देमेन्नो ङ्चे नाथोबे दुख एङ्यीमाचेएनो नास्ये मुब। ओसेम् ङचे कीन्थोबे बप्तीस्मा एङ्यीमाचेएनो कीन्स्ये मुब। 40तर ङइ केत् पट्टीतेङ् ल्होम् पट्टीचे टीबुङ्बे अधीकार् ङइ यारी अरे। हुजु ग्ला पर्मेस्वर्चे खल्त पीन्ब पङ्ज्यीम् स्य्हेङ्जेत्ज्यी थेतनो न्हङ्स्ये मुब।”
41चु थ्येःज्यीम् ल्हो-ल्हो डब च्यीत याकुबतेङ् युहन्ना म्रङ्ज्यीम् बोमो रप्ज्यी। 42येसुचे थेङ्यीमात थेङ् मुबे ग्लारी ङ्होत्ज्यीम् सुङ्ज्यी, “एङ्यीमाचे स्येःबलनो मुब, यहुदी अय्हीन्बे म्हीमाइ जोरी सासन् स्य्हेङ्बे सासक्माचे र्हङ्की सेम्चे म्हेन्ब र्हङ्लेनो म्हीमाइ जोरी सासन् स्य्हेङ्ब। ओसेम् ङ्हच्छ्यङ् पद्री मुबलमाचे म्हीमाइ जोरी अधीकार् स्य्हेङ्ब।#लुका २२:२५,२६ 43तर एङ्यीमा होतेब तब अत। एङ्यीमान्हङ्री खल्चे ङ्हच्छ्यङ् तबे सेम् लज्यी थेचे ल्हो-ल्हो जम्मइ स्य्हप्तो स्य्हेङ्थोब।#मत्ती २३:११; मर्कुस् ९:३५; लुका २२:२६ 44ओसेम् एङ्यीमान्हङ्री खल्चे जम्मन्हङ्री ङोन्ग्यम् तबे सेम् लज्यी थे जम्मइ योक्पो तथोब। 45तलेपङ्सम् म्हीइ जएनो स्य्हप्तो यङ्बे लागीरी युबल अय्हीन्, तर ल्हो-ल्होत स्य्हप्तो स्य्हेङ्बरी युबल य्हीन्ब। ओसेम् र्हङ्की जीवन पीन्ज्यीम् य्हक्को म्हीमात थर्नलबरी युबल य्हीन्ब।”
बारतीमाइ पङ्बे कन म्ही
(मत्ती २०:२९-३४; लुका १८:३५-४३)
46येसु डबमातेङ् यरीहोरी दोखजेत्ज्यी। ओसेम् हुजु सहर् ख्लेथेन्ज्यीम् स्येःबे बेलोरी य्हक्को म्हीमा थेङ्यीमाइ लीप्-लीप् ङ्यीज्यी। ओसेम् ग्यम्री तीमैकी ज बारतीमाइ पङ्बे स्योःबे कन म्ही गीः टीटीब मुबल। 47हुजु कन म्हीचे नासरत्की येसु स्येःटीब बी थ्येःब बीसेम् थेचे क्रीङ्ज्यीम् पङ्ज्यी, “ओ दाऊदकी ज येसु, ङत दय स्य्हेङ्जेतो!”
48य्हक्को म्हीमाचे थेत कुटी टीउ बी बराज्यी। तर थे झेन् केत् ङ्हच्छ्यङ् तेत्ज्यीम्, “दाऊदकी ज ङत दय स्य्हेङ्जेतो!” बी पङ्ज्यी। 49येसुचे हुजु कन म्ही क्रीङ्बल सेन्जेत्ज्यी। ओसेम् थोम्ले रप्जेत्ज्यीम्, “थेत चुरी ङ्होदो” बी सुङ्ज्यी। ओसेम् थेङ्यीमाचे हुजु कन म्हीत, “रेःगो ओसेम् ए तङो, एत थेङ्चे ङ्होत्जेत्टीबल मुब” बी पङ्ज्यी। 50ओसेम् थेचे य्हुर्बे येन् ख्लाथेन्ज्यीम् फोत् रेःज्यीम् येसुइज खज्यी। 51येसुचे थेत, “ङचे एइ लागीरी त स्य्हेङ्खइ म्हेन्ब?” बी ङ्योत्जेत्ज्यी। ओसेम् हुजु कन म्हीचे पङ्ज्यी, “लोप्पोन्, ङइ मीः म्रङ्नलजेतो।” 52येसुचे थेत, “ङ्यीउ, एइ बीस्वासचे एत फेन्नलबल मुब” बी सुङ्ज्यी। होले सुङ्ब साच्चेनो थेइ मीः म्रङ्खम्ज्यी। ओसेम् थे ग्यम्री येसुइ लीप्चे ब्रज्यी।
वर्तमान में चयनित:
मर्कुस् 10: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.