मर्कुस् 11
11
येसुत यरुसलेम्री स्वागत स्य्हेङ्बल
(मत्ती २१:१-११; लुका १९:२८-४०; युहन्ना १२:१२-१९)
1येसुतेङ् डबमा स्येःटीमम् यरुसलेम्की रेइकी जैतुन् पङ्बे गङ्तोर्की बेथफागेतेङ् बेथानीया पङ्बे ज्यीद नम्समारी दोखजेत्ज्यी। ओसेम् थेङ्चे डब ङ्हीत चोले सुङ्ज्यीम् पीत्जेत्ज्यी, 2“एङ्य्ही क्योम्सङ्की नम्सरी ङ्यीउ। ओसेम् एङ्य्ही हुजु नम्सरी वङ्ब साच्चेनो खेमेएनो खलेएनो अक्रेत्पे य्हरु बुङ्गु गीः चुङ्थेन्बल यङ्स्ये मुब। हुजुत पीत्ज्यीम् चुरी बोउ। 3खल्चे पङ्लेएनो एङ्यीमात, ‘चु ता स्य्हेङ्बल?’ पङ्ज्यी पङ्सम्, ‘प्रभुत चु तोबल मुब, ओसेम् थेङ्चे ग्योन्-ग्योन्नो चु दोःपीन्जेत्स्ये मुब’ पङो।”
4ओसेम् थेङ्य्ही य्हर्ज्यी। थेङ्य्हीचे हुजु य्हरु बुङ्गुत ग्यम् रेइकी दीम्की दोरी चुङ्थेन्बल यङ्ज्यी। थेङ्यीमाचे हुजुत पीत्टीमम् 5हुजुरी रप्टीबे म्हीमाचे थेङ्य्हीत, “हुजु य्हरु बुङ्गुत पीत्ज्यीम् एङ्य्ही ता लटीब?” बी ङ्योत्ज्यी। 6थेङ्य्हीचे येसुचे सुङ्जेत्प र्हङ्लेनो थेङ्यीमात पङ्ब बीसेम् म्हीमाचे थेङ्य्हीत बुङ्गु बोर्पुङ्ज्यी।
7थेङ्य्हीचे य्हरु बुङ्गुत येसुज बज्यीम् थेङ्य्हीइ ग्यामा बुङ्गुइ गोरी तीत्पीन्ज्यी। ओसेम् येसु हुजुइ जोरी क्रेत्जेत्ज्यी। 8य्हक्को म्हीमाचे थेङ्यीमाइ ग्यामा ग्यम्री तीत्पीन्ज्यी। ओसेम् डेत्-डेत्चे ग्यम् रेइकी दोङ्बोमाइ य्हर्ङमा थाबज्यीम् ग्यम्री तीत्पीन्ज्यी।#११:८ यहुदीमाचे ङ्हच्छ्यङ् म्हीत थेङ्यीमाकी सहररी स्वागत स्य्हेङ्बरी चोले लब मुबल 9थेङ्की लीप्-ङोन्चे ब्रबे म्हीमाचे क्रीङ्ज्यीम् पङ्ज्यी, “पर्मेस्वर्त तोप्प तखइ#११:९ पर्मेस्वर्त तोप्प तखइ ग्रीक ग्योत्की बाइबल्री म्हीमाचे होसन्न पङ्ज्यीम् क्रीङ्बल यङ्ब। होसन्न छीःम् अरमीक ग्योत् य्हीन्ब, ओसेम् होसन्न पङ्बलमी पर्मेस्वर्त तोप्प तखइ य्हीन्ब।, परमप्रभुइ छेन्री ब्योन्युबलत पर्मेस्वर्चे मोलम् न्हङ्खइ!#भजनसंग्रह ११८:२५,२६ 10ङ्य्हङ्की म्हेमे दाऊदकी खस्येकी य्हुल्त पर्मेस्वर्चे मोलम् न्हङ्खइ! ओसेम् स्वर्गइ पर्मेस्वर्त तोप्प तखइ!”
11येसु यरुसलेम्री दोखब बीसेम् पर्मेस्वर्की दीम्न्हङ् स्येःज्यी। ओसेम् पर्मेस्वर्की दीम्री मुबे जम्मनो स्य्हेमा स्हीजेत्ज्यी। तर गेःबल तज्यीम् चुङ् ङ्ही डबतेङ् बेथानीयारी स्येःजेत्ज्यी।
रोःरो अरोबे नेभाराइ दोङ्बोत केम्लङ् न्हङ्बल
(मत्ती २१:१८-१९)
12न्हम्स्य्होर्हङ् थेङ्यीमा बेथानीयाचे दोःज्यीम् ब्योन्खटीमम् येसु ख्रेन्जेत्ज्यी। 13येसुचे चेक्पजकी क्योर् बा उलुप्ले मुबे नेभारइ दोङ्बो गीः म्रङ्जेत्ज्यी। हुजु नेभारइ दोङ्बोरी रोःरो रोःज्यीवा बी स्हीबरी थेङ् स्येःज्यी। तर हुजु दोङ्बोरी बामाकीनो यङ्जेत्ज्यी। तलेपङ्सम् नेभारा रोःबे बेलो अतबल मुबल। 14ओसेम् येसुचे नेभारइ दोङ्बोत सुङ्ज्यी, “देरे य्हङ्स्ये ए ग्यम्से रोःबे रोःरो खल्चेएनो चस्ये अरे।” थेङ्चे चोले सुङ्जेत्पल थेङ्की डबमाचे थ्येःज्यी।
येसु पर्मेस्वर्की दीम्री स्येःबल
(मत्ती २१:१२-१७; लुका १९:४५-४८; युहन्ना २:१३-२२)
15येसुतेङ् थेङ्की डबमा यरुसलेम्री दोखजेत्प बीसेम् थेङ् पर्मेस्वर्की दीम्री स्येःजेत्ज्यी। ओसेम् हुजुरी चुङ्टीबतेङ् ग्लुटीबलमा जम्मत ल्हब्लाजेत्ज्यीम् टङ देब्टीबलमाकी टेबल ओसेम् परेवामा चुङ्बरी टीबलमाकी ग्लामा प्लङ्-प्लीङ् सोलाजेत्ज्यी। 16थेङ्चे पर्मेस्वर्की दीम्री खल्तेएनो तइ स्हेएनो चुङ्बतेङ् ग्लुब स्य्हेङ् अबुङ्। 17ओसेम् थेङ्चे म्हीमात लोप्ज्यीम् सुङ्जेत्ज्यी, “पर्मेस्वर्की फ्रोइरी चोले ब्रीबल मुब, ‘ङइ दीम् जम्म जात्की म्हीमाइ लागीरी प्रार्थना स्य्हेङ्बे दीम् तस्ये मुब।’#यसैया ५६:७ तर एङ्यीमाचे ङइ दीम्त य्होमा टीबे ग्ला स्य्हेङ्ज्यी।”#यर्मीया ७:११ 18चु तम् ङ्हच्छ्यङ् लम्बुमातेङ् धर्म लोप्पोन्माचे थ्येःज्यी। ओसेम् थेङ्यीमाचे येसुत खले सेत्प पङ्ज्यीम् ज्यप्ज्यीम् च्याब तीप्ज्यी। तर थेङ्यीमा येसुतेङ् लोङ्बल मुबल। तलेपङ्सम् जम्म म्हीमा थेङ्चे लोप्जेत्पे फ्रोइरी तेङेन् तबल मुबल। 19ङ्येस्ये तब बीसेम् येसु डबमातेङ् बक्च्य सहर् ग्यम्से डोङ्ज्यीम् स्येःजेत्ज्यी।
नेभाराइ दोङ्बो ग्यम्से लोप्पे तम्
(मत्ती २१:२०-२२)
20न्हम्स्योर्हङ् स्य्होरी हुजु ग्यम् तज्यीम् स्येःटीमम् तील म्रङ्बे नेभारइ दोङ्बो टा य्हङ्स्येनो खर्बल म्रङ्जेत्ज्यी। 21येसुचे सुङ्जेत्पे तम् पत्रुसचे व्हल् स्य्हेङ्ज्यीम् थेङ्त पङ्ज्यी, “लोप्पोन्, स्हीगो, थेङ्चे केम्लङ् न्हङ्बे नेभारइ दोङ्बो खर्ज्यीम् स्यीनेम्।” 22येसुचे थेङ्यीमात सुङ्जेत्ज्यी, “पर्मेस्वर्त बीस्वास् स्य्हेङो। 23ङ एङ्यीमात देमेन्नो पङ्ब, खल्चे पङ्लेएनो र्हङ्की सेम्री तइ सङ्कएनो अलनले र्हङ्चे पङ्बे तम् पुरा तब बी बीस्वास् लज्यीम् चु गङ्त, ‘ए चु ग्ला ग्यम्से य्हर्ज्यीम् समुन्द्ररी तइङ्यीउ’ बी पङ्ज्यी पङ्सम् होलेनो तस्ये मुब।#मत्ती १७:२०; १ कोरीन्थी १३:२ 24होत्तज्यीम् ङ एङ्यीमात पङ्ब, एङ्यीमाचे प्रार्थनारी त र्हीत्ज्यी हुजु यङ्ज्यीन्बल मुब बी बीस्वास् लउ। ओसेम् हुजु एङ्यीमाचे यङ्स्ये मुब। 25एङ्यीमा प्रार्थना स्य्हेङ्बे बेलोरी खल्चे पङ्लेनो एङ्यीमाइ बीरुद्दरी पाप स्य्हेङ्बल मुसम् थेङ्यीमात क्षम पीनो। होलेनो स्वर्गइ अपचे एङ्यीमाइ पाप क्षम न्हङ्जेत्स्ये मुब।#मत्ती ६:१४,१५ 26[तर एङ्यीमाचे ल्हो-ल्होत क्षम अपीन्ज्यी पङ्सम् स्वर्गइ अपचेएनो एङ्यीमाइ पाप क्षम न्हङ्स्ये अरे।]”
येसुइ अधीकारकी बारेरी ङ्योत्पल
(मत्ती २१:२३-२७; लुका २०:१-८)
27येसु र्हङ्की डबमातेङ् बक्च्य देबेएनो यरुसलेम्री ब्योन्खज्यी। येसु पर्मेस्वर्की दीम्री कोर्जेत्टीबे बेलोरी ङ्हच्छ्यङ् लम्बुमातेङ् धर्म लोप्पोन्मा ओसेम् यहुदी अगुवामा हुजुरी खज्यीम् 28“थेङ्चे चु लक्मा स्य्हेङ्बे अधीकार् खनचे यङ्ज्यी? चु अधीकार् थेङ्त खल्चे पीन्ज्यी?” बी थेङ्त ङ्योत्ज्यी। 29येसुचे थेङ्यीमात सुङ्ज्यी, “ङएनो एङ्यीमात तम् गीः ङ्योत्प, हुजु तम्की जोहाप् पीनो। हुजु लीप्चे खतेबे अधीकारचे ङचे चु लक् स्य्हेङ्ब बी एङ्यीमात स्येत्प। 30युहन्नाचे बप्तीस्मा पीन्बे अधीकार् पर्मेस्वर् ग्यम्से वुइ म्ही ग्यम्स्ये यङ्ज्यी?” ङत पङो। 31चु थ्येःज्यीम् थेङ्यीमा र्हङ्न्हङ् चोले तम् पङ्ज्यी, “पर्मेस्वर् ग्यम्से पङ्गे पङ्स्यीम्, ‘एङ्यीमाचे युहन्नात तले बीस्वास् अस्य्हेङ्बल?’ बी थेचे पङ्स्ये मुब। 32तर म्हीमा ग्यम्से यङ्ज्यी बीएनो पङ्अखम्।” चोले पङ्बरी थेङ्यीमा म्हीमातेङ् लोङ्ज्यी। तलेपङ्सम् म्हीमा जम्मचे युहन्नात अगम्बक्त बी बीस्वास् स्य्हेङ्ब मुबल। 33होत्तज्यीम् थेङ्यीमाचे येसुत, “ङ्यीमाचे अस्ये” बी पङ्ज्यी।
ओसेम् येसुचे थेङ्यीमात सुङ्ज्यी, “ङएनो खजु अधीकार् ग्यम्से चु लक्मा स्य्हेङ्ब, हुजु एङ्यीमात अस्येत्।”
वर्तमान में चयनित:
मर्कुस् 11: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.