मर्कुस् 12
12
अङ्गुर्की म्रङ् पीमा स्य्हेङ्बे अर्थ
(मत्ती २१:३३-४६; लुका २०:९-१९)
1येसुचे यहुदी अगुवामात अर्थ ग्यम्से चोले सुङ्ज्यी, “म्ही गीःचे म्रङ्री अङ्गुर् सुःज्यीम् कोरोरोले कउरु रीःज्यी। अङ्गुर् मेर्बरी कोल् स्य्हेङ्ज्यी। ओसेम् अङ्गुर्की म्रङ् रुङ्बरी नोबे ब्रङ् गीः स्य्हेङ्ज्यी। हुजु लीप्चे अङ्गुर्की म्रङ् पीमा स्य्हेङ्बे म्हीमात पीन्थेन्ज्यीम् थे ल्हो-ल्हो य्हुल्री य्हर्ज्यी। #यसैया ५:१,२ 2अङ्गुर् थोन्बे बेलो तब बीसेम् थेइ बो कीन्बरी थेइ योक्पो गीःत पीमा स्य्हेङ्बे म्हीमाज पीत्ज्यी। 3तर हुजु पीमा स्य्हेङ्बे म्हीमाचे योक्पोत चुङ्ज्यीम् तोज्यीम् या थेन्-थेन् दोपीत्ज्यी। 4ओसेम् म्रङ्की न्यबोचे ल्हो-ल्हो योक्पोत पीत्ज्यी। तर पीमा स्य्हेङ्बलमाचे हुजु योक्पोत क्ररी ग्यङ्ज्यी, ओसेम् थेत पेत्नलज्यी। 5म्रङ्की न्याबोचे देबेएनो ल्हो-ल्हो योक्पो गीःत पीत्ज्यी। तर हुजु योक्पोत थेङ्यीमाचे सेत्लाज्यी। होलेनो न्याबोचे ल्हो-ल्हो योक्पोमा पीत्स्यीनो टीज्यी। पीमा स्य्हेङ्बे म्हीमाचे कोइ योक्पोत सेत्लाज्यी कोइ योक्पोत तोज्यी। 6न्याबोल देरेम् पीत्परी थेचे य्हक्कोनो म्होइबे ज गीःकीनो मुबल। ओसेम् ‘थेङ्यीमाचे ङइ जतम् स्हेस स्य्हेङ्ल’ म्हेन्ज्यीम् गोदोब्न्हङ् लीक्यम् न्याबोचे थेइ जत पीत्ज्यी।
7“तर हुजु पीमा स्य्हेङ्बे म्हीमाचे र्हङ्न्हङ् चोले पङ्ज्यी, ‘क्युजुम् न्याबोइ ज य्हीन्ब। लो थेत सेत्लागे, ओसेम् थेइ हक् ङ्य्हङ्माचे यङ्स्ये मुब।’ 8होत्तज्यीम् थेङ्यीमाचे थेत चुङ्ज्यीम् सेत्लाज्यी। ओसेम् थेत अङ्गुर्की म्रङ्की फीर्च्योर् ख्लापीत्ज्यी।”
9येसुचे थेङ्यीमात ङ्योत्जेत्ज्यी, “देरे हुजु अङ्गुर्की म्रङ्की न्याबोचे त लल? ङ एङ्यीमात पङ्ब न्याबो खज्यीम् हुजु पीमा स्य्हेङ्बलमात सेत्लास्ये मुब। ओसेम् हुजु अङ्गुर्की म्रङ् ल्हो-ल्होमात पीन्स्ये मुब। 10एङ्यीमाचे धर्मइ छ्येः खेत्पल अरेउ?
‘खजु युङ्बत कर्मीमाचे लक् अत पङ्ज्यी, हुजु युङ्बनो स्हुर् युङ्ब तखज्यी।
11चु परमप्रभुचे स्य्हेङ्जेत्पल य्हीन्ब।
ओसेम् चु लक् ङ्य्हङ्माचे च्याबरी तेङेन्ल म्रङ्ब।’#भजनसंग्रह ११८:२२,२३”
12यहुदी अगुवामाचे येसुत चुङ्ब म्हइज्यी, तलेपङ्सम् थेङ्चे सुङ्बे अर्थ थेङ्यीमाकी बीरुद्दरी सुङ्बल बी था मुबल। तर थेङ्यीमा य्हक्को म्हीमातेङ् लोङ्बल तज्यीम् थेङ्त ख्लेथेन्ज्यीम् य्हर्ज्यी।
तीरो फाबे बारेरी येसुत ङ्योत्पल
(मत्ती २२:१५-२२; लुका २०:२०-२६)
13हुजु लीप्चे येसुचे न्होङ्बे तम् सुङ्सम् फसइतील बी थेङ्यीमाचे डेत्-डेत् फरीसीमातेङ् हेरोदकी डेत्-डेत् म्हीमात पीत्ज्यी। 14थेङ्यीमाचे येसुज खज्यीम् ङ्योत्ज्यी, “लोप्पोन्, ङ्यीमात था मुब, थेङ्चे देमेन्कीनो सुङ्ब, थेङ्चे खलइ तम्तएनो वास्त स्य्हेङ्अजेत्। तलेपङ्सम् खल्लएनो लीः स्हीज्यीम् लक् स्य्हेङ्अजेत्। तर पर्मेस्वर्की ग्यम् देमेन्नो ज्यनलज्यीम् लोप्जेत्प। ङ्यीमात सुङो, रोमी सरकार कैसरत तीरो फाब तब वुइ अत? 15ङ्यीमाचे थेत तीरो फाथोःब वुइ फाअतो?”
येसुचे थेङ्यीमाकी अज्यबे सेम् खेम्ज्यीम्, “एङ्यीमाचे ङत तले फसइतीब म्हइब? खइ, ङत रोमी पइस गीः बोउ, च्यागे” बी सुङ्ज्यी।
16थेङ्यीमाचे थेङ्त पइस गीः बज्यीम् पीन्ज्यी। ओसेम् थेङ्चे थेङ्यीमात, “चु पइसरी खलइ लीःतेङ् मीन् ब्रीबल मुब?” बी ङ्योत्ज्यी। थेङ्यीमाचे “कैसरल” बी पङ्ज्यी।
17हुजु लीप्चे येसुचे थेङ्यीमात, “होलेपङ्सम् कैसरलमा कैसरतनो ओसेम् पर्मेस्वर्लमा पर्मेस्वर्तनो पीनो” बी सुङज्यी। ओसेम् चु तम् थ्येःज्यीम् थेङ्यीमा तेङेन् तज्यी।
पुनरुत्थानकी बारेरी ङ्योत्पल
(मत्ती २२:२३-३३; लुका २०:२७-४०)
18स्यीज्यीम् लीक्यम् पुनरुत्थान् अत पङ्बे डेत्-डेत् सदुकीमा खज्यीम् येसुत ङ्योत्ज्यी,#प्रेरीत् २३:८ 19“लोप्पोन्, मोसाचे ङ्य्हङ्मात पीन्बे नीयम्री चोले ब्रीबल मुब। ‘खल्ल पङ्लेएनो कोल अतननो अज्यो स्यीज्यी पङ्सम् अलेचे अज्योइ लागीरी कोल तखइ बी चङ्त भ्या स्य्हेङ्थोब।’ #ब्यबस्था २५:५
20“ग्ला गीरी अज्यो-अले थेत् ङ्यीस् मुबल। अज्यो ग्रेन्चे भ्या स्य्हेङ्ज्यी तर कोल अतननो थे स्यीज्यी। 21ओसेम् म्हइलाचे चङ्त भ्या स्य्हेङ्ज्यी तर कोल अतननो थेएनो स्यीज्यी। ओसेम् सइलाचेनो चङ्त भ्या स्य्हेङ्ज्यी, थेएनो होलेनो स्यीज्यी। 22होलेनो थेत् ङ्यीस्चेनो पालोले चङ्त भ्या स्य्हेङ्ज्यी। ओसेम् कोल अतनले थेङ्यीमा स्यीज्यी। ज्युःरी हुजु अमकोलएनो स्यीज्यी। 23देरे ङ्यीमात सुङो, पुनरुत्थान्की बेलोरी हुजु अमकोल खलइ म्रीङ् तब? तलेपङ्सम् थेतेङ् थेत् ङ्यीस्चेनो भ्या स्य्हेङ्बल मुबल।”
24येसुचे थेङ्यीमात सुङ्ज्यी, “एङ्यीमा न्होर्टीबल टीम्। तलेपङ्सम् एङ्यीमाचे धर्सास्त्रतेङ् पर्मेस्वर्की सक्तीइ बारेरी गोबल अरे। 25तलेपङ्सम् स्यीब ग्यम्से सोबे बेलोरी म्हीमाचे न्ह भ्या स्य्हेङ्ब न्ह स्य्हेङ्पीन्ब। तर थेङ्यीमा स्वर्गइ स्वर्गदुत्मा र्हङ्ब तब।
26“स्यीब ग्यम्से सोबे बारेरी एङ्यीमाचे मोसाचे ब्रीबे छ्येरी अखेतो स्यीम्? पर्मेस्वर्चे मोसात मे लुम्टीबे जीङ्न्हङ्चे, ‘ङ अब्रहामकी पर्मेस्वर्, इसहाककी पर्मेस्वर् ओसेम् याकुबकी पर्मेस्वर् य्हीन्ब’#प्रस्थान ३:६ बी सुङ्ज्यी। 27थेङ् स्यीबलमाकी पर्मेस्वर् अय्हीन्, तर सोम्बोमाकी पर्मेस्वर् य्हीन्ब। एङ्यीमा य्हक्कोनो न्होर्बल टीम्।”
येसुचे कुल्जेत्पे गोदोब्न्हङ्की ङ्हच्छ्यङ् अर्ती
(मत्ती २२:३४-४०; लुका १०:२५-२८)
28धर्म-लोप्पोन् गीःचे हुजुरी तबे तम्मा ङ्येन्टीब मुबल। येसुचे सदुकी म्हीमात ज्यनले जोहाप् न्हङ्बल म्रङ्ज्यीम् थेचे येसुत ङ्योत्ज्यी, “लोप्पोन्, पर्मेस्वर्चे कुल्जेत्पे अर्तीमान्हङ्री खजु चइ गोदोब्न्हङ्री ङ्हच्छ्यङ् य्हीन्ब?”
29येसुचे सुङ्ज्यी, “गोदोब्न्हङ्री ङ्हच्छ्यङ्मी चु य्हीन्ब, ‘ओ इस्राएलीमा, ङ्येनो! परमप्रभु ङ्य्हङ्की पर्मेस्वर् गीःकीनो परमप्रभु य्हीन्ब। 30एचे परमप्रभु र्हङ्की पर्मेस्वर्त र्हङ्की जम्मा सेम् य्हङ्से, जम्मा बुः य्हङ्से, जम्मा लो य्हङ्से ओसेम् जम्मनो बङ्से म्होइगो।’#ब्यबस्था ६:४,५ 31पर्मेस्वर्चे कुल्जेत्पे ल्हो-ल्हो ङ्हच्छ्यङ् अर्ती चु य्हीन्ब, ‘एइ खीम्चेत र्हङ्त र्हङ्लेनो म्होइगो।’ पर्मेस्वर्चे कुल्जेत्पे अर्तीमान्हङ्री चु ङ्हीम् ङ्हच्छ्यङ् अर्ती य्हीन्ब।”#लेबी १९:१८
32हुजु धर्म-लोप्पोन्चे येसुत पङ्ज्यी, “लोप्पोन्, थेङ्चे ठीक्नो सुङ्ज्यी, परमप्रभु पर्मेस्वर् गीःकीनो मुब, थेङ् बीमम् ल्हो-ल्हो पर्मेस्वर् खलएनो अरे।#ब्यबस्था ४:३५ 33ओसेम् पर्मेस्वर्त र्हङ्की सेम् य्हङ्से, जम्मा लो य्हङ्से, जम्मा बङ्चे म्होइब ओसेम् र्हङ्की खीम्चेत र्हङ्त र्हङ्लेनो म्होइबमी मेरी पीन्बे ठातेङ् ल्हो-ल्हो ठामा बीमम् ङ्हच्छ्यङ् य्हीन्ब।”#होसे ६:६ 34हुजु म्हीचे होसीयार् तज्यीम् जोहाप् पीन्बल म्रङ्ज्यीम् येसुचे सुङ्ज्यी, “ए पर्मेस्वर्की य्हुल् ग्यम्से थारीङ् अरे।” हुजु लीप्चे खल्चेएनो येसुत ल्हो-ल्हो तम् ङ्योत्पे आर् अल।#लुका १०:२५-२८
ख्रीस्ट् खलइ ज?
(मत्ती २२:४१-४६; २३:१-३६; लुका २०:४१-४७)
35येसुचे पर्मेस्वर्की दीम्री लोप्जेत्टीबे बेलोरी चोले सुङ्ज्यी, “धर्म लोप्पोन्माचे मुक्ती न्हङ्बे ख्रीस्ट्त खले दाऊदकी ज पङ्ब? 36तलेपङ्सम् दाऊद र्हङ्चेनो पबीत्र आत्मा ग्यम्से चोले पङ्बल मुब-
‘परमप्रभुचे ङइ प्रभुत सुङ्ज्यी,
ङचे एइ सत्तुर्मात एइ कङ् थीङ्री अथेन्गदे
ए ङइ केत्पट्टी#१२:३६ केत्पट्टी सक्ती मुबतेङ् स्य्हेस यङ्बे ग्ला य्हीन्ब।चे टीउ।’#भजनसंग्रह ११०:१
37“दाऊदचे थे र्हङ्चेनो मुक्ती न्हङ्बे ख्रीस्ट्त ‘ङइ प्रभु’ पङ्ब पङ्सम् खले थे दाऊदकी ज तब खम्ब?” य्हक्को म्हीमाचे थेङ्की फ्रोइ तङ्-तङ्ज्यीम् ङ्येन्ज्यी।
38येसुचे लोप्जेत्पे बेलोरी चोले सुङ्ज्यी, “धर्म लोप्पोन्मा ग्यम्से चोङ् लज्यीम् टीउ। थेमा र्हीङ्ब र्हीङ्ब येन् येन्ज्यीम् कोर्ब म्हइब। ओसेम् बजाररी ब्रबे बेलोरी म्हीमाचे स्हेस स्य्हेङ्खइ म्हेन्ब। 39थेङ्यीमा यहुदीमा र्हुब् तबे दीम्री ङ्यीबतेङ् ङोन्ग्यम्की ग्लामारी टीब म्हइब ओसेम् डोन् चबे ग्लामारी ङ्यीबतेङ् स्हेस यङ्बे ग्लामारी टीब म्हइब। 40थेङ्यीमाचे र्हेम्बो स्यीबे अमकोलमाइ दीम्नम् ब्येन्ब, ओसेम् ङोन्बे लागीरी र्हीङ्बे प्रार्थना स्य्हेङ्ब। होतेबमाचे झेन् य्हक्को ङ्हच्छ्यङ् सजाय यङ्स्ये मुब।”
र्हेम्बो स्यीबे अमकोलइ भेटी
(लुका २१:१-४)
41येसु पर्मेस्वर्की दीम्की भेटी युबे तङ्लोकी रेइरी स्य्हुज्यीम् म्हीमाचे टङ युबल स्हीजेत्ज्यी। बरु म्हीमाचे य्हक्को टङ युज्यी। 42ओसेम् र्हेम्बो स्यीबे प्रङ्न अमकोल गीःएनो खज्यीम् स्हङ्मोइ पइस ङ्ही#१२:४२ पइस ङ्ही चु पइस पङ्बलमी हुजु बेलोरी गोदोब्न्हङ्री चेक् तब मुबल। युज्यी। 43येसुचे र्हङ्की डबमात र्हुब्ले ङ्होत्ज्यीम् सुङ्जेत्ज्यी, “ङ एङ्यीमात देमेन्नो पङ्ब, चु र्हेम्बो स्यीबे अमकोलचे ल्हो-ल्होमाचे बीमम् य्हक्को भेटी युबल मुब। 44तलेपङ्सम् ल्हो-ल्हो म्हीमाचे थेमातेङ् य्हक्को मुबल ग्यम्चे युज्यी। तर चु अमकोल प्रङ्न तलेएनो थेतेङ् मुब थम्चे युज्यी।”
वर्तमान में चयनित:
मर्कुस् 12: WTDG
हाइलाइट
शेयर
कॉपी
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.