Zwz Nduq 19
19
Loahdowh Qingj Song Goanz Bin dij Sen Maz Rownz Dix
1Haemh gaengnaeh, song goanz bin dij Sen gaengnaeh maz taeng Soaxdozmax. Laemh gaunaeh, Loahdowh yuq dih baegdu long ndaw Soaxdozmax naeh naengh, dix hiamq leztaen paenqdix zoq cenq dwnq bae raep, dix gvih bae dihndin, 2hax: "Zaeuj koij aj, gaenqsu maz rownz koij soiq din, ndowj haemh ux, nawbig fax rungh goanq bae." Gaj paenqdix yaeng: "Mboq yah, gaenqpiu yuq ndaw hangz ndowj." 3Loahdowh rongx mbaedtownq-mbaedmawq, paenqdix zux daj dix mwz rownz dix. Loahdowh hoak pyaek lai taeuq, jen binx kaeujmeg gaenq mboq aeu fahfaenx dwk naeh,#19:3 Fahfaenx zawh sowh ux aeu daj naemx zaemh dwk bae ndaw mux kaeujmeg, aeu dwk ixux zoq rux hawj daengz boaj kaeujmeg gaj laeng gaj pauz, gaj laeng gaj gawh. paenqdix zoq jin.
Soaxdozmax Mbowq Baenzzaqrawz
4Paenqdix naengz mboq mwz noanz, puj zaiz Soaxdozmax, puj jeq, puj oanq, daengzle maz homx aen rownz Loahdowh. 5Paenqdix rongx Loahdowh, daj dix hax: "Haemh naeh le goanz zaiz daeuj rownz mawz naeh yuq rawz? Zowz paenqdix og daeuj, hawj piu hoak goanz goanz daj paenqdix zaemhnoanz." 6Loahdowh daeq ndaw rownz og bae baihnog, daeuq ngaemz baegdu, yuq baegdu 7daj puj Soaxdozmax hax: "Daengzle dungzbownh, vanz su laek hoak sowh saeh oangjangj naeh! 8Su lez, gux miz song goanz lug nyingz, naengz mboq sanz daj puj zaiz zaemhyuq, hawj gux zowz paenqdix og daeuj. Su ngaiq hoak rawz hoak. Gaj song goanz gaengnaeh, paenqdix zawh daeuj rownz gux, gaenqsu laek hoj paenqdix." 9Gaj paenqdix yaeng: "Ni naeuz gvae ux! Mawz daeuj dih piu dex ndowj, mawz naengz ganz hax gaenqpiu mboq hoj maj? Gannaeh gaenqpiu haiq mawz, hawj mawz naengz yuqraix nyeuz paenqdix." Puj Soaxdozmax caqsiq nyenj maz doq Loahdowh. Gaj goanz gaj nyenj maz baihnaj daz duaiq baegdu Loahdowh vaih. 10Gaj song goanz gaengnaeh ed mungz bae laeg Loahdowh maz ndaw rownz, ngaemz baegdu. 11Yaq paenqdix daeuq dup sowh puj yuq baihnog naeh, hawj paenqdix puj jeq puj oanq, daengzle ta laiz nyiangqnyiangq, gawz goj cha mboq mex baegdu.
12Song goanz gaengnaeh daj Loahdowh hax: "Yuq ndaw aen chaenh inxnaeh mawz naengz miz puj gaengraeuh? Lugnyingz mawz az, koi mawz az, dij goanz mawz az, zowz paenqdix ni inxnaeh. 13Yez'hoahhuah haeuz ruxnyinz miz goanz dwx goanz nauz gauq dij goanz inxnaeh. Dix nemz piu daeuj hawj dij goanz aen chaenh naeh lown nauq, hawj aen chaenh naeh vaih nauq. Gaenqpiu zaekgaj hawj dij goanz inxnaeh lown." 14Yaq Loahdowh bae cha goanz daj lug nyingz dix dungzdingq naeh, haxdoq paenqdix: "Ni inxnaeh naeuz kvaiq, Yez'hoahhuah zaekgaj hawj dij goanz inxnaeh lown." Gaj paenqdix gaj goanz gaj faeklaih dix haxnyaeux.
Bin dij Sen Jeuq Loahdowh Ni Soaxdozmax
15Sowh gau fax hiamq rungh naeh, song goanz bin dij Sen choi Loahdowh: "Zowz mez mawz daj song goanz lug nyingz mawz ni inxnaeh naeuz kvaiq ux. Yaj gaenqsu cholaeng aen chaenh naeh hoak loang zaemh zoah tai." 16Gau Loahdowh naengz mboq ruxndeq hoak rawz hoak naeh, song goanz bin dij Sen naeh cholaeng Yez'hoahhuah zawchaej Loahdowh, doiqdix zoq laeg Loahdowh, mez Loahdowh, song goanz lug nyingz Loahdowh, laeg paenqdix ni ndaw chaenh naeh. 17Song goanz bin dij Sen hiamq laeg paenqdix ni yaq, miz goanz bin dij Sen ux cenq daj paenqdix hax: "Gaenqsu gowx naeuz kvaiq ux, laek lez dauh maz. Laek yuq doangh naeh ced. Lenh mwz ndaw bo zux mboq rux tai." 18Loahdowq daj dix hax: "Zaeuj gux ah, laek hawj piu hoakzaqnaeh hoak. 19Mawz lez, mawz haeuz saeh koij, jeuq aen mingh koij, koij mboq suanq zawh gaeng, gaj jixzawh mawz zaemz koij, laek nemz koij lenh mwz gvae baenz naeh! Bo gaengnaeh gvae gvaq eh. Gux naengz lenh mwz mboq taeng ndaw bo naeh, naengz lenh mboq gvaq zoq tai. 20Mawz lez, aen chaenh baiz naeh zawj taeuq ix taeuq, gowx bae ngaih nyeuz. Hawj gux gowx mwz aen chaenh naeh. Aen chaenh naeh zux zawh aen chaenh ixux naeuj. Vanz mawz hawj gux gowx mwz dih naeh, gux zoq mboq rux tai." 21Goanz bin dij Sen naeh yaeng: "Awh, gux mboq hawj dij goanz aen chaenh ix naeh lown. 22Mawz lenh gowx mwz longq naeh naeuz kvaiq ux, unj mawz naengz mwz mboq taeng dih naeh, gux gaeng goj hoak mboq baenz." Yaq longq naeh zoq rongx hoak Soaxex.#19:22 Soaxex zawh hax: "Longq ix."
Dij Sen Hawj Soaxdozmax Daj Owhmoahlaz Lown
23Gau Loahdowh mwz taeng Soaxex naeh, tang'vaenz haeuz og maz. 24Sowh gau naeh, Yez'hoahhuah aeu leuhhuangh daj faez daeq ndaw fax, dih dix yuq naeh, zoaj daeuj ndaw Soaxdozmax daj Owhmoahlaz. 25Dix hawj le aen chaenh naeh daj daengz doangh vaih nauq, hawj dij goanz le aen chaenh naeh lown nauq, hawj daengz gaenq kwnj ndaw namh maz naeh lown nauq. 26Mez Loahdowh ueq naj lez dauh, dix zoq byenqbaenz bo saeu gow ux. 27Taeng nawlaeng zaeux, Yaqboahlazhanq mwz dih vaenzranz dix yuq baihnaj Yez'hoahhuah in naeh. 28Dix lez bae aen chaenh Soaxdozmax, aen chaenh Owhmoahlaz, ndaw doangh, ux! Leztaen gaj dih gaj mizgaj yai laeuh, laeuh daj yai laeuh pyaeu jik dungzlumj. 29Zwz dij Sen ndaep dij goanz le aen chaenh ndaw doangh naeh, ndaep dij goanz le aen chaenh Loahdowh ndaej ndowj yaq naeh, dij Sen nwh ndaej Yaqboahlazhanq, zoq mboq hawj Loahdowh tai.
Luglan Loahdowh
30 Loahdowh mboq ganz yuq ndaw Soaxex ndowj, zoq daj song goanz lug nyingz dix ni Soaxex, mwz ndaw bo ndowj. Dix daj song goanz lug nyingz dix ndowj ndaw aen ngomz ux. 31Lugnyingz to dix daj lug nyingz daih ngih dix hax: "Dez raeuz haeuz jeq, dix mboq rux daeuq aeu mez, baenzzaqnaeh dix zoq mboq rux miz lug tem. Dih naeh goj mboq miz gawz daj zwzndai dungzlumj maz raep raeuz hoak mez, hawj raeuz miz lug. 32Maz, raeuz hawj dez raeuz ndut laeuj, hoakzaqnaeh zux daj dix noanz baenz, gaenqraeuz daj dez raeuz zaemhnoanz, hoanx naeh rownz raeuz zux miz luglan." 33Haemh gaengnaeh, paenqdix zoq hawj dez paenqdix ndut laeuj. Lugnyingz to zoq ndonj mwz daj dez dix zaemhnoanz. Lugnyingz to dix gau rawz noanz bae, gau rawz dwnq maz, Loahdowh, dez paenqdix, goj mboq ruxndeq.
34Vaenzlaeng, lug nyingz to dix haxdoq lug nyingz daih ngih dix: "Haemhvaz gux daj dez raeuz zaemhnoanz, haemh naeh gaenqraeuz daeuq aeu laeuj hawj dez raeuz ndut, mawz zoq ndonj mwz daj dix zaemhnoanz. Hoakzaqnaeh, raeuz daj dez raeuz zaemhnoanz, gaenqraeuz gaj goanz gaj miz luglan." 35Yaq haemh gaengnaeh paenqdix zoq daeuq hawj dez paenqdix ndut laeuj. Lugnyingz daih ngih naeh zoq daj dez dix zaemhnoanz. Lugnyingz daih ngih gaurawz noanz bae, gaurawz dwnq maz, Loahdowh dez paenqdix gaeng goj mboq ruxndeq. 36Hoakzaqnaeh, song goanz lug nyingz Loahdowh gaj goanz gaj daj Loahdowh zaemhnoanz, gaj goanz gaj bazlug. 37Lugnyingz to zowngx goanz lug zaiz ux, saeh dix nyaek minxzwh hoak Moahyaq. "Moahyaq" zawh hax: "Daeq zawj dez gux daeuj." Puj Moahyaq zawh luglan dix nauq. 38Lugnyingz daih ngih dix goj zowngx goanz lug zaiz ux, saeh dix nyaek minxzwh hoak Benq-yaqmix. "Benq-yaqmix" zoq zawh hax: "Lug zaiz bihnongx gux." Puj Yaqmaenh zawh luglan dix nauq.
वर्तमान में चयनित:
Zwz Nduq 19: ZHN
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Peace Publishing Co. All rights reserved.