Luk 21
21
Cakupeleka ca jwamkongwe jwamasije
(Mak 12:41-44)
1Yesu* piŵalolite ŵaweni ŵandu ŵakusicila ali mkuponya yakupeleka yawo mwibokosi lyakuŵicilamo mbiya ku Nyumba ja AMBUJE. 2Ŵam'weni soni jwamkongwe jwamasije* ali mkuponya mwibokosimo mbiya siŵili. 3Yesu ŵatite, “Ngumsalila kuti jwamkongwe jwamasije jwakulagaju aponyisye mwibokosimu mwakwapunda ŵane wosopeŵa. 4Ŵandu ŵane wosopeŵa aponyisye mwibokosimu yayijigele kutyocela pa yejinji yakwete, nambo jwamkongweju, mu kulaga kwakwe, aponyisye mwibokosimu yakwe yosope yiŵakwete, atamose mbiya syakapakombolele kusuma yakulya.”
Yesu akuŵeceta ya konasika kwa Nyumba ja AMBUJE
(Mat 24:1-2; Mak 13:1-2)
5Ŵakulijiganya* ŵakwe ŵane ŵaliji mkuŵeceta ya Nyumba ja AMBUJE kuti ŵajisalalisye ni maganga gakusalala, soni mituka jiŵicidwe mwelemo. Yesu ŵatite, 6“Ndaŵi jikwisa jakuti yosope yimkuyiwonayi tiyicigwisidwa ni amagongo ŵenu, ngasilisigala liganga atamose limo pacanya pa lijakwe, gosope tigacigumulidwa.”
Yisawusyo ni yipwetesi
(Mat 24:3-14; Mak 13:3-13)
7Ŵandu ŵane ŵamwusisye Yesu kuti, “Cemwalimu, ana yeleyi tiyicitendekwa cakaci? Ana ticicitendekwa ni cici cakutumanyisya uwe kuti ndaŵi jikwanile jakuti yeleyi yitendekwe?”
8Yesu ŵatite kuti, “Mkalamuce kuti jwine jwalijose akamsokonesya. Ŵandu ŵajinji taciyika acikolangaga lina lyangu acitiji, ‘Une ndili Klistu!’* soni ‘Ndaŵi jiŵandicile.’ Mkasimwakuya jemanjajo. 9Mkatenda woga pitimcipikana ya ngondo ni njojo, yindu yeleyi yikwenela kutendekwa, nambo ngayikugopolela kuti mbesi ja cilambo capasi jiyice.”
10Yesu ŵasalile soni kuti, “Mitundu ja ŵandu jakulekanganalekangana tijicimenyana ngondo, cilambo ticicijimucilana ni cilambo cine, soni ucimwene tiwucimenyana ni Ucimwene ujakwe. 11Tikuciŵa kwana yisicinya, sala, ni yilwele ku malo gakulekanganalekangana. Tikuciŵa soni kwana yakogoya ni yimanyisyo yakusimonjesya kwinani. 12Nambo yindu yosopeyi mkaniyitendekwe, tacimkamula ni kumlagasya. Tacimpeleka kuti mkalamulidwe ku nganya ja magambo ku nyumba syakupopelela ni kumyika m'nyumba ja acikayidi. Timcija kuwonecela pameso pa ayimwene ni ŵakulamula ligongo lya une. 13Jeleji tijiciŵa ndaŵi ni lipesa lyenu lyakuti mundendele une umboni. 14Sambano mkadandawula kuti timciŵeceta cici pa ndaŵi jakuti mlicinjilicisye mwasyene.#Luk 12:11-12 15Une tinjimpa maloŵe ni lunda mwakuti pakwajanga amagongo ŵenuwo ngasayikombola kwikana kapena kuyisisya. 16Timcipelecedwa ni acinangolo ŵenu, acalongo acimjenu, acanasi ŵenu, nipo ŵane mwa jemanja timciwulajidwa. 17Ŵandu wosope tacimŵenga jemanja ligongo lya kunguya une. 18Nambo luwumbo lwa mu mtwe mwenu ngasilujasika atamose lumo. 19Kupitila mkupilila kwenu timcikola umi usyesyene.”
Yesu akuŵeceta yakonasika kwa msinda wa Yelusalemu
(Mat 24:15-21; Mak 13:14-19)
20Patimciyiwona kuti msinda wa Yelusalemu usyungulilidwe ni amagongo m'manyilile kuti conasiko cakwe ciŵandicile. 21Pelepo ŵali ku Yudeya atilile ku matumbi, ŵele ŵali mu msinda akopocemo. Ŵele ŵali ku migunda akaja kwinjila soni mu msindamo. 22Masiku gelego tigaciŵa masiku gakuwucisya yisawusyo kuti yosope yiyalembedwe m'Malemba yigumbalicisidwe.#Hos 9:7 23Tiyiciŵa yakogoya kwa acakongwe ŵele ŵitaciŵa ali akwete pa cilu, nipo soni acakongwe ŵele ŵitaciŵa ni ŵanace ŵakonga pa gele masikugo. Yisawusyo yejinji tiyiciyika pa cilambo pano, nipo kutumbila kwa Mlungu tikuciŵa pa ŵandu ŵeleŵa. 24Ŵane ŵa jemanjaji taciwulajidwa pa ngondo jakogoya, soni ŵane tacijigalidwa mpela acikapolo ŵakukamulwa ku ngondo pa cilambo cosope capasi. Kaneko msinda wa Yelusalemu tiwucijonanjidwa ni amagongo ŵakwe mpaka kumbesi kwa ndaŵi ja ŵandu ŵa mitundu jine.*
Kuyika kwa Mwanace jwa Mundu
(Mat 24:29-31; Mak 13:24-27)
25“Tipaciŵa yindu yakusimonjesya yakutendekwa pa lyuŵa, pa mwesi ni pa ndondwa. Ŵandu ŵa mitundu josope tacidandawula soni tacimala lunda, pa ndaŵi jitacipikana kukukuma kwa nyasa ni matumbela gakwe.#Yes 13:10; Esek 32:7; Yow 2:31; Ciw 6:12-13 26Ŵandu tacikomoka ligongo lya woga pakwembecela yindu yayili mkwisa pa cilambo cosope capasi, pakuti macili gosope ga kwinani tigacitenganyika. 27Pandaŵi jelejo ŵandu tacimwona Mwanace jwa Mundu* akwisa m'mawunde mwamacili ni lumbili lwekulungwa.#Dan 7:13; Ciw 1:7 28Patiyicitanda kutendekwa yeleyi, timjime ni timnyakusye mitwe jenu ni kuŵa ŵakulimba mitima, ligongo cikulupusyo cenu ciŵandicile.”
Lijiganyo lya citela ca mkuju
(Mat 24:32-35; Mak 13:28-31)
29Kaneko Yesu ŵasalile jemanjajo citagu* ni ŵatite, “Mganicisye ya citela ca mkuju ni yitela yine yosope. 30Pimkuyiwona kuti yikutanda kusipuka, mkusamanyilila kuti cawu ciŵandicile. 31Myoyo soni, pitimciyiwona yosope yimbecete yila, tim'manyilile kuti Mlungu asigele panandi kutamilisya Ucimwene wakwe.”
32“Kusyene ngumsalicisya kuti yosopeyi tiyicitendekwa ŵandu ŵa mpago awunowu mkanamale kuwa wosope. 33Kwinani ni cilambo capasi tiyicimala, nambo maloŵe ga Mlungu ngasigamala macili kose.”
Akwakalamusya kuti alindilileje
34“Nambo mlilolecesye mwacimsyene, kuti mitima jenu jikasitopelwa ni kulya kapena kukolelwa kapena kusitopelwa ni yakusawusya ya umi awuno, kuti lyele lisikulyo likamyicilila mwacisisimucisya. 35Pakuti tilicayicilila mpela cigwenembe wosope ŵakutama pa cilambo pano. 36Mlindilileje ndaŵi syosope, mcipopelaga kuti timpakombole kulupuka pa yindu yosope yiticitendekwayi, soni kuti mkajime pameso pa Mwanace jwa Mundu.”
37Masiku gosope Yesu ŵajiganyaga m'Nyumba ja AMBUJE, nambo ndaŵi ja cilo jwalakwejo ŵakopokaga ni kuja kutama kwitumbi line lyakolanjidwa Olifi.*#Luk 19:47 38Ŵandu wosope ŵajimukaga kundaŵi mnope ni kwika kuŵaliji Yesu ku Nyumba ja AMBUJE kula kukupikanila maloŵe gakwe.
Trenutno odabrano:
Luk 21: YAWO
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Chiyawo Bible: Buku Jeswela © Bible Society of Malawi, 2014