Lukas 20
20
Leejtwg Tsocai Rau Yexus
(Mathais 21:23-27; Malakaus 11:27-33)
1Muaj ib hnub thaum Yexus tseem tabtom qhia cov neeg nyob hauv lub Tuamtsev thiab qhuabqhia txog Txoj Moo Zoo, cov thawj povthawj hlob, cov xibhwb uas qhia Kevcai, nrog rau cov txwjlaug txawm tuaj 2nug Nws hais tias, “Koj qhia rau peb seb, Koj tau cai qhovtwg los ua tej no? Leejtwg tsocai rau Koj?”
3Yexus teb lawv hais tias, “Kuv los yuav nug nej ib los thiab. Nej sim qhia rau Kuv seb, 4leejtwg tsocai rau Yauhas muab neeg ua kevcai rausdej, Vajtswv lossis neeg?”
5Lawv txawm sibtham hais tias, “Peb yuav teb licas? Yog peb hais tias ‘Vajtswv tsocai rau Yauhas ua,’ Nws yuav hais tias, ‘Ua licas nej ho tsis ntseeg Yauhas?’ 6Tiamsis yog peb ho teb tias, ‘Neeg tsocai rau Yauhas ua,’ cov neeg coob-coob uas nyob ntawm no yuav muab pobzeb ntaus peb, rauqhov sawvdaws yeej paub tias Yauhas yog ib tug xibhwb cev Vajtswv lus.” 7Yogli ntawd, lawv thiaj teb tias, “Peb tsis paub, xyov leejtwg tsocai rau nws.”
8Yexus hais rau lawv tias, “Kuv los yuav tsis qhia rau nej hais tias leejtwg tsocai rau Kuv ua tej no thiab.”
Zaj Lus Pivtxwv Hais Txog Cov Neeg Uas Tu Lub Vaj Txivhmab
(Mathais 21:33-46; Malakaus 12:1-12)
9Yexus txawm hais ib zaj lus pivtxwv rau lawv mloog: “Muaj ib tug txivneej cog ib cov txivhmab. Nws muab cov txivhmab ntawd xauj rau ib co neeg tu, ces nws txawm mus rau lwm tebchaws tau ntev loo. #Yaxaya 5:1 10Thaum txog lub caij de txivhmab, nws txawm txib ib tug tubqhe mus cuag cov neeg uas tu lub vaj thiab sau tej txivhmab uas yog nws feem los rau nws. Tiamsis cov neeg uas tu lub vaj txawm muab tus tubqhe ntawd ntaus thiab ntiab nws rov mus tes dawb tes npliag. 11Tus tswv vaj rov txib dua ib tug tubqhe mus, tiamsis cov neeg uas tu lub vaj muab nws ntaus, ua saib tsis taus nws, thiab ntiab nws rov mus tes dawb tes npliag. 12Tus tswv vaj rov txib dua tus tubqhe thib peb mus; cov neeg uas tu lub vaj kuj muab nws ntaus sab kawg thiab muab nws pov rau sab ntug vaj nraud.
13“Thaum ntawd, tus tswv vaj hais tias, ‘Kuv yuav ua licas? Kuv yuav txib kuv tus tub uas kuv hlub mus, uacas los lawv yeej yuav hwm nws xwb!’ 14Tiamsis thaum cov neeg uas tu lub vaj pom tus tub ntawd, lawv txawm sibtham hais tias, ‘Tus no ntag lau, yog tus tswv vaj tus tub. Peb ciali muab nws tua povtseg, peb thiajli tau nws tej teejtug!’ 15Yogli ntawd, lawv txawm muab nws thawb rau sab ntug vaj nraud thiab muab nws tua lawm.
“Yexus nug hais tias, ‘Nej xav tias tus tswv vaj yuav ua licas rau cov neeg uas tu lub vaj ntawd? 16Nws yeej yuav mus muab lawv cov ntawd tua povtseg thiab muab lub vaj ntawd tso rau lwmtus tu.’ ”
Thaum sawvdaws hnov Yexus hais li ntawd, lawv hais tias, “Thov kom tsis txhob muaj li ntawd ib zaug li!”
17Yexus txawm ntsiantsoov lawv thiab nug hais tias, “Vajtswv Txojlus hais licas? #Nnkauj 118:22
“ ‘Lub pobzeb uas cov neeg ua tsev muab povtseg lawm,
lub ntawd twb dhau los ua lub thawj uas tseemceeb dua ntais lawm.’
18Txhua tus uas ntog mus tsoo lub pobzeb ntawd, yuav tawg tas mus; thiab yog lub pobzeb ntawd poob los tsoo leejtwg, tus ntawd yuav ntsoog tas huv tibsi.”
Nug Txog Kev Them Se
(Mathais 22:15-22; Malakaus 12:13-17)
19Cov xibhwb uas qhia Kevcai thiab cov thawj povthawj hlob yeej npajsiab yuav ntes Yexus tamsim ntawd, vim lawv paub tias Nws txhobtxwm piav zaj lus pivtxwv ntawd los tawmtsam lawv xwb; tiamsis lawv kuj ntshai cov pejxeem. 20Yogli ntawd, lawv thiaj pheej nrhiav seb puas muaj sijhawm zoo ntes Yexus. Lawv txawm ntiav qeeleej kom uatxuj ua li neeg ncajncees mus nug Yexus li ub li no, seb Nws puas yuav hais txhaum, kom lawv thiaj zoo ntes Nws coj mus rau tus tswvxeev uas muaj hwjchim. 21Cov neeg uas lawv ntiav mus ntawd nug Yexus hais tias, “Xibhwb, peb paub tias tej lus uas Koj hais thiab tej uas Koj qhia puavleej yog huv tibsi li. Peb paub tias Koj tsis xaiv leejtwg ntsejmuag, tiamsis Koj tsuas qhia qhov tseeb txog Vajtswv txojkev rau neeg xwb. 22Koj qhia rau peb seb, yog peb them se rau Xixas puas txhaum peb txoj kevcai los tsis txhaum?”
23Tiamsis Yexus twb paub txog lawv tej tswvyim phem ntawd lawm, Nws thiaj hais rau lawv tias, 24“Muab ib lub nyiaj los rau kuv saib seb. Lub ntsejmuag thiab lub npe uas txaug rau hauv lub nyiaj no yog leejtwg lub?”
Lawv teb tias, “Yog Xixas lub.”
25Yexus hais rau lawv tias, “Yam uas yog Xixas li ciali muab rau Xixas, thiab yam uas yog Vajtswv li ciali muab rau Vajtswv.”
26Lawv yeej ntes tsis tau ib qho txhaum dabtsi uas Yexus hais tabmeeg sawvdaws li; lawv xav tsis thoob rau tej lus uas Nws hais ntawd ces lawv txawm nyob twjywm lawm.
Nug Txog Cov Neeg Uas Tuag Sawv Rovqab Los
(Mathais 22:23-33; Malakaus 12:18-27)
27Cov Xadukais uas tsis ntseeg tias neeg yuav sawv hauv qhovtuag rovqab los, muaj qeeleej tuaj cuag Yexus thiab nug hais tias, #Teshl 23:8 28“Xibhwb, Mauxes sau txoj kevcai no qhia rau peb hais tias, ‘Yog ib tug txivneej twg tuag thaum nws tus pojniam tseem tsis tau muaj menyuam, nws tus kwv yuavtsum yuav tus niamtij thiaj muaj tubki rau tus tijlaug.’ #2Kev 25:5 29Zaumno, muaj xya leej kwvtij; tus tijlaug hlob yuav pojniam tiamsis tseem tsis tau muaj menyuam ces nws txawm tuag lawm. 30Tus kwv thib ob yuav tus niamtij, 31thiab tus kwv thib peb los kuj ua tibyam li ntawd thiab. Xya leej kwvtij puavleej yuav tus pojniam ntawd, tiamsis lawv puavleej tuag tas tsis tau muaj ib tug menyuam li. 32Thaum kawg tus pojniam ntawd txawm tuag lawm thiab. 33Yogli ntawd, thaum txog hnub uas cov neeg tuag sawv rovqab los, tus pojniam ntawd yuav yog leejtwg tus pojniam? Rauqhov lawv xya leej puavleej tau yuav nws huv tibsi lawm.”
34Yexus teb tias, “Cov pojniam thiab txivneej tiam no thiajli sibyuav xwb, 35tiamsis cov pojniam thiab cov txivneej uas tsimnyog sawv rovqab los tau txojsia thiab mus nyob rau tiam tomntej, cov ntawd yuav tsis sibyuav lossis muaj kev sibtxis ua txij ua nkawm lawm. 36Lawv yuav zoo ib yam li cov timtswv ceebtsheej thiab yuav tsis txawj tuag li. Lawv yog Vajtswv cov menyuam, rauqhov lawv twb sawv hauv qhovtuag rovqab los lawm. 37Mauxes yeej hais meej-meej tias cov uas tuag lawm yuav sawv rov los muaj txojsia. Nyob rau hauv zaj uas hais txog cov nplaimtaws uas cig ntawm tsob ntoo, nws hu tus Tswv hais tias, ‘Anplahas tus Vajtswv, Ixaj tus Vajtswv, thiab Yakhauj tus Vajtswv.’ #Khiav 3:6 38Vajtswv tsis yog cov neeg tuag tus Vajtswv, tiamsis yog cov neeg ciaj tus Vajtswv. Rauqhov nyob rau ntawm Nws, ces txhua tus puavleej ciajsia.”
39Cov xibhwb uas qhia Kevcai qeeleej hais tias, “Xibhwb, Koj teb tau zoo heev!” 40Rauqhov lawv tsis muaj cuabkav nug Nws ntxiv li lawm.
Nug Txog Tus Mexiyas
(Mathais 22:41-46; Malakaus 12:35-37)
41Yexus nug lawv hais tias, “Yuav ua licas hais tau hais tias tus Mexiyas yog Daviv li cajces? 42Rauqhov Daviv tau hais tseg nyob rau hauv phau Ntawv Nkauj hais tias:
“ ‘Tus Tswv hais rau kuv tus Tswv hais tias:
Los zaum ntawm Kuv sab xis #Nnkauj 110:1
43mus txog thaum Kuv muab Koj cov yeebncuab ua lub rooj tiag taw hauv Koj qab xibtaws.’
44Daviv twb hu Nws hais tias ‘Tus Tswv’; es yuav ua licas hais tau tias tus Mexiyas yog Daviv li cajces?”
Yexus Ceebtoom Txog Cov Xibhwb Uas Qhia Kevcai
(Mathais 23:1-36; Malakaus 12:38-40)
45Thaum cov neeg sawvdaws tabtom mloog Yexus qhia, Yexus hais rau Nws cov thwjtim hais tias, 46“Nej yuavtsum ceevfaj txog cov xibhwb uas qhia Kevcai. Lawv nyiam hnav tej tsho ntev ncig mus ncig los rau ub rau no, thiab nyiam kom neeg hawm lawv tom tej kiab; lawv xaiv mus nyob tej rooj uas tseemceeb hauv tej tsev sablaj, thiab thaum muaj rooj noj rooj haus lawv nyiam nyob ntawm tej chaw samxeeb xwb. 47Lawv txhav cov pojntsuam tej vajtse yuav, thiab uatxuj thov Vajtswv ntev-ntev kom sawvdaws qhuas lawv! Lawv cov no yuav raug txim hnyav tshajplaws!”
Trenutno odabrano:
Lukas 20: MWW2022
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2022 United Bible Societies. All rights reserved.