JOHANE 11
11
Kifwa cha Lazaro
1Nao mndumu wa Bethania uwangwagha Lazaro orekoghe mkongo. Bethania ni muzi ghwa Maria na mruna Marita.#Lk. 10.38-39 2Ni uja Maria oremshingieghe Bwana mavuda, na kumuaghia maghu ghake kwa iridia jake, nuo mruna Lazaro orekoghe mkongo.#Joh. 12.3 3Na waja waruna wa waka wikaduma momu kwa Jesu wikighamba, “Bwana, mghenyi wako kumkunde ni mkongo.”
4Nao Jesu iji wasikira agho ukaghamba, “Wukongo ughu si kwa wundu ghwa kifwa anduangi, ela ni kwa wundu ghwa kumredia Mlungu wubaa, na kwa wundu ghwa Mwana wa Mlungu kukaswa.”
5Jesu oremkundieghe Marita, na mruna wa waka, na Lazaro. 6Ela sena iji waghorelwa angu Lazaro orekoghe mkongo, ukachuria kukaia andu koni orekoghe kwa matuku awi. 7Niko ukawizera wanughi wake, “Dighende Judea sena.” 8Wanughi wake wikamzera, “Mwalimu, kafwani koni Wayahudi wedeeka wikikulola wikulase na magho, sena kookunda kughenda ahoeni?” 9Jesu ukawitumbulia, “Welee, saa ra dime si ikumi na iwi anguwada? Uo ose ughendagha na dime ndekuwagha anduangi, angu waghuwona mwengere ghwa wurumwengu ughu. 10Ela ukaghenda na kio uchakuwa, angu ndena ugho mwengere anduangi.” 11Jesu uendameria kughora agho ukaghamba, “Mghenyi odu Lazaro walala, ela niaendammbusira.” 12Wanughi wake wikamzera, “Bwana, ngera waalala, uboa to.” 13Ela Jesu odeghora malagho gha kifwa cha Lazaro, nawo wikadaghesha uaghora kulala kwa dilo. 14Niko Jesu ukawighoria worinyi, “Lazaro wafwa, 15ela naboilwa kwa wundu ghonyu angu serekoghe aho, eri inyo mpate kurumiria. Elaima dighende kwake.” 16Tomasi (uwangwagha Masa) ukawizera wanughi wammbao, “Ndedighende diwose difwanye nao.”
Jesu, uko kuruka na irangi
17Nao iji Jesu wavika, ukamkua Lazaro usinde andenyi ya kaburi matuku ana. 18Bethania erekoghe kaavui na Jerusalemu sa wukula ghwa kilometa idadu, 19na Wayahudi wengi werekoghe wacha kwa weke Marita na Maria, kuwihoresha ngolo kwa wundu ghwa kifwa cha mruna.
20Nao iji Marita wasikira angu Jesu waawuyacha, ukaghenda kummara, ela Maria oresigharikieghe nyumbenyi. 21Marita ukamzera Jesu, “Bwana, ngera kodeeka aha, kumangu mwanidu nderefwagha anduangi. 22Ela sena namanya angu hata idana Mlungu uchakuneka icho chose kuchaamlomba.” 23Jesu ukamzera, “Mwanyinyu ucharuka.” 24Marita ukamzera, “Namanya angu ucharuka ngelo ya kuruka ituku ja kutua mbai.” 25Jesu ukamzera, “Ini nuo uko kuruka na irangi. Uo unirumiriagha ini, hata ngera wafwa, uchakaia moyo; 26na uo ose uko moyo, na kunirumiria ini, na jingi ndechaafwa anduangi. Welee, kwarumiria agho?” 27Marita ukamzera, “Ee Bwana. Narumiria angu oho koko Kristo, Mwana wa Mlungu uja uchagha wurumwengunyi.”
Jesu kudikwa ni mbori
28Nyuma ya Marita kughora huwo, ukaghenda kummbanga mruna Maria kwa kiviso ukamzera, “Mwalimu oko aha wakuwanga.” 29Nao iji Maria wasikira agho, ukawuka shwa-shwa, ukaghenda kummara. 30Na Jesu orekoghe usengirie mzinyi kande, ela orekoghe ajaeni Marita orekwaneghe nao. 31Waja wandu werekwanyeghe na Maria wikimhoresha, iji weremmbonieghe ukiwuka na kufuma shwa-shwa wikamnugha, angu wereririkanyireghe uaghenda kulila aja kaburinyi.
32Nao iji Maria orevikieghe andu Jesu orekoghe na kummbona, ukaghwa maghunyi kwake ukimzera, “Bwana, ngera kodeeka aha, kumangu mwanidu nderefwagha anduangi.” 33Jesu uendammbona ukilila, na Wayahudi waja weremnughieghe wikilila wori, ngolo yake ikanyavurika na kuja wasi. 34Ukawikotia, “Welee, mwammbikie hao?” Wikaghamba, “Bwana, choo kuwone.” 35Jesu ukadikwa ni mbori. 36Nao Wayahudi wikaghamba, “Zighanenyi seji oremkundieghe!” 37Wazima wikaghamba, “Keni mundu uhu oremtambueghe uja kitungure meso, nderedimagha kughiria Lazaro usakefwa anguwada?”
Jesu kumrukisha Lazaro
38Nao Jesu ukasirimika nandighi sena ngolonyi kwake, ukacha kaburinyi; nayo erekoghe ya mbanga na igho jawikwa mnyangonyi kwaro. 39Jesu ukaghamba, “Injenyi igho!” Marita mruna uja mundu ufue ukaghamba, “Bwana, luma ulu uanuka; angu wakaie kaburinyi matuku ana.” 40Jesu ukamzera, “Welee, sikuzerieghe kukarumiria kuchaghuwona wubaa ghwa Mlungu anguwada?” 41Nao wikajiinja igho. Jesu ukazighana noko ighu ukaghamba, “Nakuneka chawucha Aba, angu kwanisikira, 42nani neremanyireghe angu oho kwadanisikira ngelo rose. Ela naghighora agha kwa wundu ghwa wandu wiko kimusi aha; wipate kurumiria angu ni oho korenidumieghe.” 43Umeria kughora agho, ukawanga kwa lwaka lubaa, “Lazaro! Fuma shighadi!” 44Nao uja mundu orekoghe ufue ukafuma shighadi, urighirilo nguwo ra kurika maghu na mikonu, na wushu ghwake ghufungilo na kitambaa. Jesu ukawizera, “Mfunguonyi, mumleke ughende.”
Njama rem'bwagha Jesu
(Mat. 26.1-5; Mk. 14.1-2; Lk. 22.1-2)
45Kwa huwo Wayahudi wengi awo werechieghe kwa Maria, iji wawona agho oreghibonyereghe, wikamrumiria. 46Ela wazima wikaghenda na kuwighoria Mafarisayo iro maza rerebonyeroghe ni Jesu. 47Niko Mafarisayo na wakohani wabaa wikakwanya Mwandu, nawo wikaghamba, “Dibonya wada? Mundu uhu waawuyabonya weke mwakilimbiti wengi. 48Dikamsigha huwu, kula mundu uchamrumiria, na Waroma wichacha na kuinona Hekalu na mbari edu.” 49Umu wawo uwangwagha Kayafa, uo orekoghe Mkohani M'baa mwaka ugho, ukawizera, “Inyo ndemwichi ilagho jingi putu. 50Ndemmbonagha angu yamfwana mundu umu ufo kwa wundu ghwa wandu, kuchumba mbari yose kutota anguwada?” 51Agha ndereghighorieghe kwa kumanya kwake koni anduangi, ela angu orekoghe Mkohani M'baa mwaka ghuja, orelodieghe angu Jesu uchafwa kwa wundu ghwa mbari yawo; 52hata si kwa mbari yawo iekeri anduangi, ela uwikwanye chiaimweri awo wana wa Mlungu wisaghisikie.
53Nao kufuma aho, vilongozi va Wayahudi wikabonya mpango ghom'bwagha Jesu. 54Kwa huwu Jesu ndereselieghe worinyi kwa Wayahudi anduangi, ela orefumieghe aho ukaghenda kaavui na kireti, muzi ghuwangwagha Efraimu; ukakaia aho andwamweri na wanughi wake.
55Idana Ndima ya Pasaka ya Wayahudi erekoghe kaavui, na wandu wengi werejokieghe Jerusalemu, wipate kukuelesha Ndima iyo isevikie. 56Nawo wikakaia wikimlola Jesu; hata iji wakwana chiaimweri Hekalunyi, wikakotiana weni na weni, “Mmbona wada? Yadimika ikaie useche ndimenyi loli?” 57Wakohani wabaa na Mafarisayo werekoghe wafunya momu angu mndungi ukamanya andu uko, uwighorie wipate kummbwada.
Trenutno odabrano:
JOHANE 11: TAITA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
©Bible Society of Kenya, 1997
All rights reserved.